ەرىك - جىگەر جاعىنان سۇيەمەلدەۋ كەڭ ورىسكە جول اشتى
وڭتۇستىك شينجياڭنىڭ ءبىرتالاي جەرىنەن ”كەدەيلىكتەن ارىلتۋدان قامال الۋدىڭ ۋاقىت شەگەرىپ ساناۋ“ تاقتاسىن كورە الاسىز. ”ۋاقىتتى شەگەرىپ ساناعان“ كۇندەردە، ءار كەدەي وتباسىنىڭ كەدەيلىكتەن ارىلۋىنىڭ، كەدەي قىستاقتىڭ كەدەيلىك تىزىمىنەن شىعارىلۋىنىڭ، كەدەي اۋداننىڭ كەدەيلىك قالپاعىن الۋىنىڭ ءبارى - ءبارى دە قيان - كەسكى شايقاس سانالادى، كادر - بۇقارا جاپپاي ەڭ تاماشا جاۋاپ جازۋعا قۇلشىنۋدا. بۇل جاۋاپ قاعاز جوسپارلاۋ - ورنالاستىرۋدان، جۇيەلى ينجەنەريا جۇرگىزۋدەن ايرىلا المايدى، كەدەي وتباسىلارىنىڭ ىشكى قوزعاۋشى كۇشىنەن ءتىپتى دە ايرىلا المايدى.
كەدەيلەردى سۇيەمەلدەۋدە الدىمەن ەرىك - جىگەر جاعىنان سۇيەمەلدەۋ كەرەك، كەدەي وتباسىلارىنىڭ كەدەيلىك قىسپاعىنان شىعۋىنا كومەكتەسۋدىڭ قيىندىعى دا ەرىك - جىگەر جاعىنان سۇيەمەلدەۋدە. تەك ءبىرىنشى قادامدى باسسا بولعانى، كەدەي وتباسىلارىندا كەدەيلىكتەن ارىلاتىن جىگەر جانە قايرات پايدا بولىپ، ونەر - شەبەرلىك ۇيرەنەتىن ورايعا، جۇمىستاناتىن ارناعا، كىرىسىن ارتتىراتىن كاسىپكە يە بولادى.
شاتى ماھاللا قىستاعىندا تۇرىپ تىلشىلىك ىستەۋ بارىسىندا، ءبىز ەرىك - جىگەر جاعىنان سۇيەمەلدەۋدىڭ ناتيجەسىن كوردىك. بيىل كەدەيلىكتەن ارىلۋدان ءۇمىتتى كەدەيلەردىڭ بارلىعى اتتانىسقا كەلىپ، اۋلا شارۋاشىلىعىن دامىتىپ، قۇلشىنا جۇمىستانىپ، شارۋاشىلىق قۇرىپ، كىرىستەرىن ارتتىرىپ، تۇرمىستارىن جاقسارتىپ جاتىر ەكەن، بۇلاردىڭ ىشىندە بايۋعا باستاۋشىلار دا تاماشا جەتەكشىلىك رول اتقارىپ ءجۇر. قىستاقتاعى ءتۇرلى شارۋاشىلىقتار ارشىندى دامىپ، قىستاق تۇرعىندارىنىڭ سول جەردە، جاقىن ماڭدا جۇمىستانۋىنا وراي ۇسىنعان.
بايۋعا باستاۋشىلاردىڭ ءبىرتالايى بۇرىن كەدەي بولىپتى، ولاردىڭ اڭگىمەلەرى شىنىمەن دە ەرەكشە جىگەرلى. بۇرىن ازىناۋلاق تاپقانىن تىپ - تيپىل جۇمساپ تىناتىن، ۇيىندە جيناعان ءبىر تيىنى دا جوق قىستاق تۇرعىندارى قازىر ايىنا 4000 يۋان تاباتىن جۇك اۆتوموبيلىنىڭ شوفەرىنە اينالىپتى؛ بۇرىن ەسىگىنەن سىرتقا قارعا ادىم اتتامايتىن اۋىل - قىستاق ايەلدەرى بۇگىنگى تاڭدا ورمان قورعاۋشىسى بولىپ، ايىنا تۇراقتى تابىس تاۋىپ وتىر.
باقىت كۇرەسپەن كەلەدى. كوپتەگەن قىستاق تۇرعىندارى پارتيا مەن ۇكىمەت كوپشىلىك ءۇشىن كەدەيلىكتەن ارىلۋ، بايۋ جولىن سالىپ بەردى، تالپىنعانداردىڭ بارلىعى تاماشا تۇرمىسقا جەتتى، ءبىز ءۇمىت ۇشقىنىن كوردىك، ىقىلاس - ىنتامىز كۇشەيدى، سوندىقتان دەرەۋ اتتانىسقا كەلدىك دەيدى.
ەرىك - جىگەر جاعىنان سۇيەمەلدەۋ كەڭ ورىسكە جول اشتى. قىستاق تۇرعىندارى كەدەيلىك قالپاعىن لاقتىرىپ تاستاپ، اناعۇرلىم تاماشا تۇرمىسقا جەتۋگە تالپىنۋدا، ءدال وسىنداي ىشكى قوزعاۋشى كۇش كەدەيلىكتى جويۋدىڭ، كەدەيلىكتەن ورنىقتى ارىلۋدىڭ كۇش قاينارى بولىپ تابىلادى. شاتى ماھاللا قىستاعىنىڭ كەدەيلەردى سۇيەمەلدەۋدە الدىمەن ەرىك - جىگەر جاعىنان سۇيەمەلدەۋىنىڭ جاندى امالياتىنان ءبىز وڭتۇستىك شينجياڭ اۋىل - قىستاقتارىنىڭ ۇمىتكە تولى بولاشاعىن كوردىك.
