□ انار بۇلت \ شينجياڭ گازەتىنىڭ ٴتىلشىسى ٴرايدا
ٴدوربىلجىن اۋدانى قارا ەمىل قالاشىعىنىڭ اقكومەي قىستاعى مال شارۋاشىلىعىن نەگىز ەتكەن، ەگىن شارۋاشىلىعى مەن مال شارۋاشىلىعىن ۇشتاستىرعان شاعىن تاۋلى قىستاق. وسى ارادا قىستاق پارتيا ياچەيكاسى شۋجيى، قىستاق تۇرعىندار كوميتەتىنىڭ مەڭگەرۋشىسى ٴماري قاجىكەن اۋىزعا الىنسا بولعانى، قىستاق تۇرعىندارى ”ول قىستاقتا قىرۋار ناقتى ىستەر تىندىردى، ٴبىزدىڭ جاقسى كادرىمىز!“ دەپ باس بارماقتارىن كوتەرىپ القايدى.
”ٴاربىر ٴىستى تىڭعىلىقتى تىندىرىپ، دامۋعا جول باستاۋشى بولعىم كەلەدى“، ـ دەدى ٴماري.
اۋىر مىندەتتى باتىلدىقپەن ارقالاپ، بۇقارانىڭ دامۋداعى جول باستاۋشىسى بولدى
2006 ـ جىلى ٴماري داشۋەنى بىتىرگەننەن كەيىن نەگىزگى ساتىعا تامىر تارتۋدى، نەگىزگى ساتىعا قىزمەت وتەۋدى مۇرات ەتىپ، قارا ەمىل قالاشىعىنا قايتىپ، وسى قالاشىق مالشىلىق جاتاقتى مەكتەبىنىڭ وقىتۋشىسى بولدى.
وقۋ ـ اعارتۋ قىزمەت ورنىندا ول مۇقيات قىزمەت ىستەپ، بەلسەنە العا باسىپ، كوپ وتپەي جۇڭگو كوممۋنيستىك پارتياسىنا مۇشە بولدى. ٴماري ىلگەرىندى ـ كەيىندى قىستاقتىڭ قاشىقتان مەڭگەرۋشىسى، اۋىل شارۋاشىلىعى جوراسى، پارتيا ياچەيكاسى مۇشەسى، ايەلدەر بىرلەستىگىنىڭ ٴتورايىمى قاتارلى مىندەتتەردى اتقاردى. 2019 ـ جىلدىڭ باسىندا قابىلەتى ۇزدىك، بۇقارالىق نەگىزى جاقسى ٴماري ۇيىنەن 4 كيلومەتر قاشىقتاعى اقكومەي قىستاعىنا بارىپ، قىستاق پارتيا ياچەيكاسى شۋجيى سىندى اۋىر مىندەتتى ارقالادى.
اقكومەي قىستاعىنا العاش بارعانىندا ٴماري بۇقارانىڭ دامۋ جول باستاۋشىسى بولۋعا بەل بۋادى. ول اقكومەي قىستاعىنىڭ بارلىق جەرىنە بارىپ، بۇكىل قىستاقتاعى 121 وتباسىن ارالاپ، قىستاق تۇرعىندارىنىڭ اسىققانىنا، قاجەتىنە دەن قويا قۇلاق ٴتۇرىپ، قىستاق تۇرعىندارىنىڭ العا قويعان ۇسىنىس ـ پىكىرلەرىن تۇگەلدەي ەستەلىككە الدى. كوپ وتپەي ول اۋىلداستاردىڭ ويىن ٴبىلىپ، قىزمەت جۇلگەسىن ٴداپ باسىپ يگەردى.
ٴماري قىستاقتىڭ دامۋىن ىلگەرىلەتۋدە قىستاق ”ەكى كوميتەتى“ القاسى قۇرىلىسىنىڭ تەتىك ەكەندىگىن ابدەن ٴبىلدى. سونىمەن ول ٴتۇزىم قۇرىلىسى سىندى وسى ٴالسىز بۋىننان باستاپ كىرىسىپ، ”3 جيىن، ٴبىر ساباق“، پارتيا مۇشەلەرىن دەموكراتيالىق باعالاۋ، قىستاق ىستەرىن، قازىنا جۇمىسىن جاريا ۇستاۋ قاتارلى تۇزىمدەردى قاتاڭ تياناقتاندىردى؛ قىستاقتا تۇراتىن قىزمەت اترەتىندەگى مۇشەلەردى قىستاقتاعى پارتيا مۇشەلەرىمەن، قىستاق ”ەكى كوميتەتىنىڭ“ مۇشەلەرىمەن ”بىرگە ٴبىر“ كومەكتەسۋ ـ سۇيەمەلدەۋ بويىنشا جۇپ قۇراپ، وي جەلىسىن، ٴادىستى، تاجىريبەنى قولما ـ قول ۇيرەتۋگە ۇسىنىس ەتىپ، اماليات بارىسىندا پارتيا مۇشەلەرى مەن قىستاق كادرلارىنىڭ بۇقاراعا قىزمەت وتەۋ قابىلەتىن كۇشەيتىپ، زاپاس كادرلاردى جەتىلدىردى. 3 جىلدا قىستاقتا 12 ادام پارتياعا مۇشە ەتىپ قابىلدانىپ، قىستاق پارتيا ياچەيكاسىنىڭ ۇيىستىرۋ قۋاتى مەن جاۋىنگەرلىك قۋاتى بارىنشا كۇشەيدى.
حالىق تۇرمىسىن ويلاپ، بۇقارا تۇرمىسىنىڭ جان اشىرى بولدى
باعىمشىلىق كاسىبى اقكومەي قىستاعىنىڭ جەتەكشى كاسىپ سالاسى، ايتسە دە، ەجەلدەن زورايماعان، كۇشەيمەگەن ەدى. ٴماري مىندەتكە وتىرعاننان كەيىن قىستاقتاعى 6000 مۋدان استام تابيعي جايلىمدى سۇيەنىش ەتە وتىرىپ شينجياڭ اۋىل شارۋاشىلىعى داشۋەسىمەن سەلبەستىكتى كۇشەيتىپ، 1200 شارشى مەتر كەلەتىن جىلى قورانى جاڭادان سالىپ، سالماق تارتپايتىن، ٴسۇتى از، ارزان جەرگىلىكتى سيىرلاردى قاتاردان قالدىرىپ، سەمينتال، شينجياڭ قوڭىر سيىرى سياقتى 200دەن استام اسىل تۇقىمدى سيىر ەنگىزدى.
قىسقا عانا بىرنەشە جىلدا بۇكىل قىستاعى 57 باعىمشىلىق وتباسىنىڭ باققان مالى 2200دەن استامعا جەتىپ، مال شارۋاشىلىعى كىرىسى باعىمشىلىقپەن شۇعىلداناتىنداردىڭ جان باسىندىق ورتاشا كىرىسىنىڭ %70تەن استامىن يەلەدى. يگىلىگىن كورۋشى سەيسەنقازى دۇيسەن تەبىرەنە: ”ٴماري شۋجيدىڭ كومەكتەسۋىندە ۇيىمىزدەگى سيىر 40قا جەتتى“، ـ دەدى.
قارا ەمىل كورىنىس وڭىرىنە جاقىن بولۋداي باسىمدىعىنا سۇيەنىپ، ٴماري قىستاق ”ەكى كوميتەتىمەن“ ”پارتيا قۇرىلىسى + ساياحات + شارۋا وتباسى + جۇمىستاندىرۋ“ سىندى دامۋ ۇلگىسىن ورناتىپ، قىستاق تۇرعىندارىن اۋلا شارۋاشىلىعىن دامىتۋعا جەتەكتەدى. 2019 ـ جىلدان بەرى، ول اۋلا ورتاسى ٴبىرشاما تاماشا، دامۋعا نيەتتەنگەن 15 وتباسىن ەگىنشىلەر (مالشىلار) شاتتىعى ساياجايىن، حالىقتىق تۇسەلحانا كاسىپ سالاسىن دامىتۋعا شابىتتاندىردى. قازىر قىستاقتا 10 ەگىنشىلەر (مالشىلار) شاتتىعى ساياجايى، 16 حالىقتىق تۇسەلحانا بار، قىستاق تۇرعىندارى تاعى قىمىز، قۇرت، تونار نانى سياقتى ەرەكشەلىككە يە ازىق ـ تۇلىكتەردى ٴوندىرىپ، ساتىپ، 35 وتباسىنداعى 72 ادامدى ٴۇيىنىڭ جانىندا جۇمىستانۋعا باستادى.
سونىمەن بىرگە ٴماري ٴدوربىلجىن اۋداندىق ادام كۇشى بايلىعى جانە قوعامدىق قامتاماسىزداندىرۋ مەكەمەسىمەن، ٴدوربىلجىن اۋداندىق تەحنيك جۇمىسشى مەكتەبىمەن بەلسەنە سەلبەستىك جاساپ، قىستاق دارەجەلى ”جۇمىستاندىرۋ ەرەن بازارىن“ قۇرىپ، بۇكىل اۋداننىڭ جۇمىستاندىرۋعا قىزمەت وتەۋ بايلىعىن توپتاپ، اسپازدىق، قۇرىلىس، ەلەكترمەن دانەكەرلەۋ قاتارلى قاتىستى شەبەرلىككە باۋلۋ جۇمىستارىن ورىستەتىپ، قىستاق تۇرعىندارىنىڭ جۇمىستانۋىنا تەگىن دانەكەر بولدى.
ٴماريدىڭ باستاماشىلدىعىندا قىستاق تۇرعىندارىنىڭ كىرىسى جىل سايىن ارتىپ كەلەدى، بيىل قىستاق تۇرعىندارىنىڭ جان باسىندىق ورتاشا كىرىسى 16 مىڭ يۋاننان اسىپ، قىستاق كوللەكتيۆىنىڭ ەكونوميكالىق كىرىسى 220 مىڭ يۋانعا جەتەتىندىگى مەجەلەنىپ وتىر.
ۋايىمنان ارىلتىپ، قيىنشىلىعىن شەشىپ، بۇقارا القايتىن ”قيىنشىلىقتى شەشۋشىگە“ اينالدى
2020 ـ جىلى 6 ـ ايدا قىستاق تۇرعىنى جاقيا نيعىمەتجان كاريا مي ارتەرياسى وسپەسى جارىلۋ جانە سوڭعى مەزگىلگە ٴوتۋ سەبەبىنەن قارامايلى قالالىق حالىق شيپاحاناسىنا شۇعىل اپارىپ وپەراتسيا جاساتۋعا تۋرا كەلىپ، 100 نەشە مىڭ يۋان قاراجات شۇعىل قاجەت بولعاندا، ۇيىندەگىلەر نەبارى 60 مىڭ يۋان عانا جيناي الادى. ٴماري بۇل جاعدايدان حاباردار بولعاننان كەيىن تۇندەلەتە شيپاحاناعا بارىپ، شيپاحانا باسشىلارىنا كاريانىڭ جاعدايىن تۇسىندىرگەن سوڭ شيپاحانانىڭ كومەگىنە يە بولىپ، كاريا ومىرىنە تونگەن حاۋىپتەن قۇتىلادى.
2021 ـ جىلى 8 ـ ايدىڭ ٴبىر كۇنى تۇستە، ٴماري جالعىز باستى كاريا ٴباتيما عيناياتتىڭ مۇرنىنان قان اعىپ توقتاماي تۇرعاندىعى جونىندەگى كومەك سۇراعان تەلەفوندى قابىلدايدى، سونىمەن ٴماري داكىسىن الىپ كاريانىڭ ۇيىنە بارىپ، جاي ٴبىر جاقتى ەتكەننەن كەيىن دوسىنا حابارلاسىپ، كاريانى ٴدوربىلجىن اۋداندىق حالىق شيپاحاناسىنا جەتكىزەدى ٴارى 1000 يۋان ەمدەۋ اقىسىن تولەي تۇرادى. كاريا ساۋىعىپ قىستاققا قايتقاننان كەيىن كەزىككەننىڭ بارىنە ”ٴماري شۋجي جاقسى!“ دەپ القادى.
مۇنداي ىستەر تولىپ جاتىر: ٴماري مەيىر جەتكىزۋشىلەرمەن بايلانىس جاساپ قارا ەمىل قالاشىعى مالشىلىق جاتاقتى مەكتەبىنە قۇنى 8000 يۋان كەلەتىن سومكە جانە سپورت كيىمىن تارتۋ ەتتى؛ بىرەۋلەردىڭ جۇمىستانۋى قيىنعا سوققاندا ٴماري ادام كۇشى بايلىعى جانە قوعامدىق قامتاماسىزداندىرۋ تاراۋىنا سۇيەنىپ جۇمىس تاۋىپ ىستەۋىنە كومەكتەستى؛ ٴار جولعى مەرەكە ـ مەيرامداردا ول كۇرىش، ۇن جانە سۋ ماي الىپ قيىنشىلىعى بار وتباسىلاردان حال سۇرايدى... قانشا شارشاپ ـ شالدىقسا دا ونىڭ ٴار كۇنى جۇزىنەن كۇلكى ٴۇيىرىلىپ، قىستاق تۇرعىندارىنىڭ ىستەرى ٴۇشىن جار قۇلاعى جاستىققا تيمەي جۇرەدى.
