تۇيە باعىمشىلىعى ەرەكشە كاسىپ سالاسىنىڭ جولىن اشتى (ورتالىق راديو ستانسياسى تورى تاراتقان، سۋرەتتى جۇلدىز تۇسىرگەن)
ورتالىق راديو ستانسياسى تورىنىڭ 11 - ايدىڭ 18 - كۇنى بۋىرىلتوعايدان بەرگەن حابارى (ءتىلشى لو چىڭ، ەرىكتى ءتىلشى جۇلدىز). كاسىپ سالاسى − حالىقتى اۋقاتتاندىرۋدىڭ نەگىزى، اۋقاتتانۋدىڭ قاينار كوزى، اۋىل - قىستاقتى گۇلدەندىرۋدىڭ تىرەگى ەسەپتەلەدى. سوڭعى جىلدارى شينجياڭ بۋىرىلتوعاي اۋدانى وسىزامانعى ەگىن، مال شارۋاشىلىعىن كۇش سالا دامىتىپ، مەملەكەتتىك وسىزامانعى اۋىل شارۋاشىلىعى كاسىپ سالاسى باقشاسى، مەملەكەتتىك اۋىل شارۋاشىلىعىن وسىزاماندىرۋدان ۇلگى كورسەتۋ رايونى، مەملەكەتتىك اۋىل - قىستاق كاسىپ سالالارىن توعىستىرا دامىتۋدان ۇلگى كورسەتۋ باقشاسىن قۇرۋعا سۇيەنىپ، شينجياڭ ۋاڭيۋان توبىنىڭ جەتەكشىلىگىندە، تۇيە باعىمشىلىعى جاعىنا كۇش سالىپ، مالشىلاردىڭ باعىمشىلىق كوزقاراسىنا بۇرىلىس جاساپ، ءبىر - ءبىر توپ تۇيە باعىمشىلىق وتباسىن باۋلىپ شىعارىپ، ەرەكشە كاسىپ سالاسىنىڭ جولىن اشىپ، اۋقاتتانۋعا ”قارقىن ۇستەدى“.
الدىمەن بايىعاندار سوڭىنان بايىعاندارعا دەم بەرۋ، ”تۇيە باعۋ“ ارقىلى بىرگە بايۋ
تاڭ ەندى قىلاڭ بەرگەندە بۋىرىلتوعاي اۋدانى قاراماعاي قالاشىعى دەڭ قىستاعىنىڭ قىستاق تۇرعىنى مانات نۇردانبەك سەرىكتەرىمەن بىرگە تۇيەلەردى ورىسكە ايدادى، ول تۇيەلەردى ايداپ كەلە جاتىپ، باۋىرلاستارىمەن قىستىق جەم -ءشوپ دايىنداۋ جايىن اقىلداستى.
مانات نۇردانبەك بۋىرىلتوعاي اۋدانى قاراماعاي قالاشىعى قۇلاگەر جىلقى باعىمشىلىعى، سيىر - قوي بورداقىلاۋ شارۋالار كاسىپتىك سەلبەستىك كووپەراتيۆىنىڭ قۇرۋشىسى، تۇيەنىڭ باعىمىنا قانىق بولعان سوڭ جەرگىلىكتى ورىندا اتاعى بار تۇيە باعىمشىلىعى ءىرى وتباسىنا اينالدى. 2022 - جىلى اۋىل شارۋاشىلىق، اۋىل - قىستاق مينيسترلىگى جاعىنان ”مەملەكەتتىك ون ۇزدىك شارۋا“ بولىپ باعالاندى.
كەلە - كەلە تۇيەلەر (ورتالىق راديو ستانسياسى تورى تاراتقان، سۋرەتتى جۇلدىز تۇسىرگەن)
ال ەندى 10 جىل بۇرىن مانات نۇردانبەك ارحيۆ تۇرعىزىلىپ، كارتچكالاندىرىلعان وتباسى ەدى. بۇرىلىس 2012 - جىلى تۋىلدى، وسى جىلى شينجياڭ ۋاڭيۋان بيولوگيالىق تەحنيكا توبى (تومەندە قىسقارتىلىپ ۋاڭيۋان توبى دەلىندى) تومەن تەمپەراتۋرادا قۇرعاتىپ تالقان دايىنداۋدىڭ مەملەكەتتىك پاتەنتىن زەرتتەپ اشىپ، تۇيە ءسۇتىنىڭ اكتيۆ قورەكتىك قۇرامىن ەڭ زور دارەجەدە ساقتاپ، تۇيە ءسۇتىنىڭ بازارداعى ءوتىمىن كۇرت ارتتىردى، بۇل مانات نۇردانبەك ءۇشىن جاعىمدى جاڭالىق بولعان ەدى.
تۇيەنىڭ ءوسىپ - جەتىلۋ جاعدايىن بايقاۋدا (ورتالىق راديو ستانسياسى تورى تاراتقان، سۋرەتتى جۇلدىز تۇسىرگەن)
2012 - جىلى مانات نۇردانبەك شينجياڭ ۋاڭيۋان توبىنىڭ ”ءۇش ءنول كەدەيلەردى سۇيەمەلدەۋ ۇلگىسىنىڭ“ كومەگىندە تۇيە باعا باستادى. ون جىلدان بەرى ول ءار قادامىن نىقتاپ باسىپ، جىلىنا ءبىر بەلەسكە كوتەرىلىپ وتىردى، قازىر ونىڭ 592 تۇيەسى، 1700 قويى، 318 سيىرى، 300 جىلقىسى جانە 50 مۋ جەردى يەلەپ جاتقان باعىمشىلىق الاڭى بار، قورا - قوپسىسىنىڭ كولەمى 2000 شارشى مەتردەن اسادى.
قالتاسى قامپايعان مانات نۇردانبەك ءوزىنىڭ ەگىنشى، مالشى باۋىرلاستارىن جادىنان شىعارعان ەمەس، ول بۋىرىلتوعاي اۋدانى قارامايلى قالاشىعىندا قۇلاگەر جىلقى باعىمشىلىعى، سيىر - قوي بورداقىلاۋ شارۋالار كاسىپتىك سەلبەستىك كووپەراتيۆىن قۇرىپ، ٴوزى تىكەلەي 35 وتباسىنداعى شارۋانى تۇيە باعىمشىلىعى ارقىلى كىرىستى ارتتىرىپ، اۋقاتتانۋدى جۇزەگە اسىرۋعا قاراي باستادى.
”بۇگىنگى باقىتتى تۇرمىسقا پارتيانىڭ ابزال ساياساتتارىنىڭ ارقاسىندا قول جەتكىزدىم، مەن ءتىپتى دە كوپ ادامنىڭ باعىمشىلىقتى دامىتۋىنا كومەكتەسىپ، كوپشىلىكتى بىرگە كىرىستى ارتتىرۋعا، اۋقاتتانۋعا باستايتىن بولامىن“. مانات نۇردانبەكتىڭ ايتۋىنا قاراعاندا، بولاشاقتا مال - تۇلىكتەرىن جىنتىكتەي مانەرلەۋ نىسانىن ورىستەتىپ، باعىمشىلىق، سويىس، مانەرلەۋدى ءبىر تۇلعالاندىرعان كاسىپ سالاسى تىزبەگىن قالىپتاستىرىپ، قىستاق تۇرعىندارىن ءتىپتى دە كوپ اقشا تابۋعا باستاپ، مەكەنىنىڭ اۋىل - قىستاقتى گۇلدەندىرۋ ىستەرىنە ءوزىنىڭ ۇلەسىن قوسادى ەكەن.
الدىمەن ءسۇت تاسىپ، ونان سوڭ باعىمشىلىقپەن شۇعىلدانۋ، تاجىريبە جيناعان سوڭ اۋقاتتانۋ
”اعاي، تۇيەلەردى ساۋىپ بولدىڭىز با؟ تۇيەنىڭ ءسۇتىن جيناعالى كەلدىم، بۇگىن قانشالىق بار؟“ 11 - ايدىڭ 14 - كۇنى تاڭەرتەڭ ساعات 6دا، بۋىرىلتوعاي اۋدانى جەتارال قالاشىعى قارابيە قىستاعىنىڭ ءسۇت تاسۋشىسى ارعىن الىپ تۇيە باققان وتباسىلارىن ارالاپ، جاڭا ساۋىلعان تۇيە ءسۇتىن ءسۇت قويماسىنا جيىپ، كولىكتىڭ باسىن ۋاڭيۋان توبىنا تۋرالاعان ەدى.
تۇيەلەرگە قىستىق جەم - ءشوپ جيناۋدا (ورتالىق راديو ستانسياسى تورى تاراتقان، سۋرەتتى جۇلدىز تۇسىرگەن)
ارعىن الىپ تۇيەنىڭ ءسۇتىن تاسۋمەن اينالىسقانىنا ءۇش جىل بولدى، ول تىلشىگە تۇيەنىڭ ءسۇتىن جيناپ، تاسۋ دەگەنگە ءسال قاراماۋدى ايتتى، ءار كۇنى وسى جۇمىسپەن اينالىسۋدىڭ وزىنەن ول 6000 يۋانعا جۋىق كىرىس كىرگىزەدى ەكەن.
جاقسىدان ونەگە الىپ، ءبىرىنىڭ ارتىقشىلىعىن ءبىرى قابىلداپ، كەمشىلىگىن تولىقتاۋ. ۇيرەنۋگە قۇلىقتى ارعىن الىپ تۇيەنىڭ ءسۇتىن تاسىپ، جيناۋ بارىسىندا قىرۋار تۇيە باعىپ اۋقاتتانعان قىستاق تۇرعىندارىمەن تانىسىپ، ءبىر تالاي باعىمشىلىق ونەرىن يگەردى، بىلتىردان باستاپ اكەسىمەن اقىلداسا كەلىپ، تۇيە باعۋعا كىرىستى. ”باستابىندا تۇيەنىڭ ءسۇت بەرۋ مولشەرى تومەن بولدى، سەبەبى تەحنيكامىز جەتەرسىز، قۇرىلعىمىز كەمەلدى ەمەس، باپتاۋىمىز كەلىسپەي قالعان ەدى، كەيىن اۋداندىق ۇكىمەت جانە ۋاڭيۋان توبىنىڭ كومەگىندە باعىمشىلىق تەحنيكامىز بىرتە - بىرتە ارناعا تۇسە باستادى“. ارعىن الىپتىڭ ايتۋىنا قاراعاندا قولىندا 300 تۇيە بار ەكەن، ءبارىنىڭ كۇيى جامان ەمەس كورىنەدى.
اۆتوماتتى ءسۇت ساۋۋ (ورتالىق راديو ستانسياسى تورى تاراتقان، سۋرەتتى جۇلدىز تۇسىرگەن)
قازىر ارعىن الىپ ءسۇت تاسۋشىدان قىستاقتاعى باعىمشىلىق ءىرى وتباسىنا، اۋقاتتانۋ شەبەرىنە اينالدى. ارعىن الىپ ماقتانىشپەن بىلاي دەدى: ”جىلدىق تازا كىرىسىم ءبىر ميلليون يۋاننان اسادى، مەن تاعى دا ءتىپتى دە كوپ مالشىلاردى تۇيە باعۋعا باستاپ، سەلبەستىك كووپەراتيۆىن قۇرىپ، كوپشىلىكپەن بىرگە اۋقاتتانامىن“.
تۇيە باعىپ قايتالاي جۇمىستانىپ، ”تۇيەنىڭ ارقاسىندا“ دوڭگەلەك داۋلەتكە قاراي ويىسۋ
التاي ايماعى جەمەنەي اۋدان قالاشىعىنىڭ شىعىس تەرىستىگىندەگى قۇبا تۇزگە سالىنعان 20 قاتارلاس باعىمشىلىق قوراسى كوزگە بىردەن تۇسەدى. 2019 - جىلى جەمەنەي اۋداندىق حالىق ۇكىمەتى ۋاڭيۋان توبىمەن بىرلەسىپ قۇرعان ۋانتو باقشاسى نىسانى وسىندا ىرگە تەپكەن ەدى.
”ءشول قايىعى“ اتالعان تۇيەنى ”بايۋعا باستايتىن قايىق“ سىندى كاسىپ سالاسىنا اينالدىرۋ ءۇشىن، 2019 - جىلى 6 - ايدا ۋاڭيۋان توبى جەمەنەي اۋدانىمەن سەلبەسىپ، بىرگە قارجى قوسىپ يەلەگەن جەر اۋماعى 40 مىڭ مۋ شاماسىندا كەلەتىن جەمەنەي اۋدانى ۋانتو باقشاسىن قۇردى. بۇل نىسان بايلىقتى مۇلىككە، قارجىنى جارنا ۇلەسىنە، ەگىنشى، مالشىلاردى جۇمىسشىعا اينالدىرىپ، جايلىمدى مايعا الۋ، تۇيە باعىپ جالدانىپ جۇمىستانۋ، تابىس ءبولۋ سياقتى تاسىلدەرمەن جەمەنەي اۋدانىنىڭ 3265 وتباسىنداعى 8900 مالشىنى كىرىستەرىن ورنىقتى ارتتىرۋعا باستادى.
مەيرامبەك ايتەكە مەن جۇبايى ۋانتو باقشاسىنىڭ قىزمەتكەرى، ولار سەرىكتەستىكتەن 27 تۇيە ءبولىپ الدى، سەرىكتەستىك تاعى ەرلى - زايىپتى ەكەۋىنىڭ ٴاربىرىنە اي سايىن 3000 يۋان ەڭبەكاقى بەردى، بۇدان تىس تۇيە ءسۇتىنىڭ ءار كيلوگرامىن 40 يۋاننان سەرىكتەستىككە ساتىپ بەرەدى، ەرلى - زايىپتى ەكەۋى قوس ۇلەس كىرىسكە يە بولدى.
كەلە - كەلە تۇيەلەر (ورتالىق راديو ستانسياسى تورى تاراتقان، سۋرەتتى جۇلدىز تۇسىرگەن)
مەيرامبەك ايتەكە بىلاي دەيدى: ”بۇرىن كوشپەندى تۇرمىس كەشىرگەمىز، ءار جولى ءورىس جاڭالاعاندا ەرلى - زايىپتى ەكەۋىمىز كۇنىنە 2 - 3 ساعات عانا كوز شىرىمىن الاتىنبىز، ءبىر جىل كۇيبەڭدەگەندە دە ماندىتىپ اقشا تابا المايتىنبىز. قازىر بۇل ارادا تۇيە باعۋدان سىرت شاعىن دۇكەن اشىپ الدىق، قىزىم وقۋ تاۋىسقان سوڭ دا باقشا رايونىنا كەلىپ جۇمىس ىستەدى، قازىر وتباسىمىزدىڭ ايلىق كىرىسى 10 مىڭ يۋاننان اسادى، تۇرمىسىمىز بارعان سايىن جاقسارۋدا“.
سوڭعى جىلدارى بۋىرىلتوعاي اۋدانى ۋاڭيۋان توبى ارقىلى وسى اۋداننىڭ، التاي ايماعىنىڭ، ءتىپتى شينجياڭنىڭ، سولتۇستىك شينجياڭ ءوڭىرىنىڭ تۇيە باعىمشىلىعىنا باستاماشىلىق ەتىپ، التاي ايماعى، تارباعاتاي ايماعى، سانجى وبلىسى سياقتى ايماق، وبلىستارداعى 5600دەن استام وتباسىنداعى نەشە ون مىڭ مالشىنى اۋقاتتانۋ جولىنا ءتۇسىردى. التاي ايماعىنداعى باستاپقى 20 مىڭنان استام تۇيەنىڭ سانىن كۇرت ءوسىرىپ 120 مىڭ تۇيەگە جەتكىزىپ، ”ءشول قايىعىن“ اتى زاتىنا ساي ”بايۋعا باستايتىن قايىققا“ اينالدىردى.
