حۋ ۋىنلۇڭ: ”مەنىڭ جات جەردەگى مەيىرلى وتباسىم“

【انار گۇلى قىپ - قىزىل بولىپ اشىلدى】

تيانشان تورى - شينجياڭ گازەتىنىڭ ءتىلشىسى گان شيڭحۋا

　　ىرىسقان اباقان وتباسى جەمەنەي اۋدانى قارجاۋ قالاشىعىنىڭ مۇقىرتاي دەيتىن مال شارۋاشىلىق وڭىرىندە تۇرادى، 4 جىلدان بەرى، حۋ ۋىنلۇڭ وسى وتباسىنىڭ ءبىر ”ۇلى“ قاتارىندا سانالىپ كەلەدى، سونان بەرى، ولار ءوزارا كومەكتەسىپ، ءبىر - بىرىنە قارايلاسىپ، ءبىر - بىرىنە كوڭىل ءبولىپ، قامقورلىق جاساپ كەلدى ...

　　”اتا، جاڭا جىلدارىڭىز قۇتتى بولسىن، اپام ەكەۋىڭىز دەنساۋلىقتارىڭىزعا كوڭىل بولىڭىزدەر، كەشكە قاراي تۇيەگە جەم - ءشوپ سالۋعا شىققاندا قالىڭ كيىنىپ الىڭىزدار، كۇندەلىكتى جەمىس، كوكونىس تۇتىنىپ تۇرىڭىزدار...“ 2023 - جىلى 1-ايدىڭ 1 - كۇنى حۋ ۋىنلۇڭ ىرىسقان اقساقالعا تەلەفونمەن حابارلاسىپ، احۋال سۇراسىپ، جۇمىستاردى قاداعالاي تاپسىرىپ جاتتى.

　　”جارايدى، ءبىلدىم اينالايىن، ءبىرقانشا كۇن ىلگەرىدە الىپ بەرگەن كوكونىستەرىڭدى ءالى جەپ تاۋىسپادىق، الاڭسىز بول، ءوزىڭ دە ۋاعىندا تاماقتان، قۇرت قاجەت بولسا ايتارسىڭ، ءىنىڭ جەتكىزىپ بەرەدى...“ ىرىسقان اقساقال ”2 - ۇلىنان“ كەلگەن تەلەفوندى قۋانا قابىلدادى دا قارت جۇبايىن تەلەفوندا سويلەسۋگە شاقىردى.

　　حۋ ۋىنلۇڭ جەمەنەي اۋداندىق حالىق پروكۋراتۋراسى مەكەمەسىندە قىزمەت ىستەيدى، 2018 - جىلى 8 - ايدىڭ 27 - كۇنى ىرىسقان وتباسىمەن تانىسىپ، تۋىس بولعان. ىرىسقان اقساقالدىڭ 2 ۇلى بار، ولاردىڭ وتباسى جەمەنەي اۋدان قالاشىعىنان 100 قانشا كيلومەتر الىستاعى مال شارۋاشىلىق وڭىرىندە تۇرادى، تۇيە باعىپ، شۇبات ساتۋدى نەگىزگى كىرىس كوزى ەتەدى.

　　2018 - جىلى 10 - ايدىڭ ءبىر كۇنى حۋ ۋىنلۇڭ ىرىسقان وتباسىنا امانداسا كەلەدى، ءدال وسى كەلگەن كەزىندە شۇبات الماقشى بولعان ءبىر قاريدار قارتتىڭ ۇيىندە شۇبات قۇيىپ بەرۋگە لايىق بوتەلكە جوق بولعانى ءۇشىن كەتىپ قالعانىن كورەدى.

　　كەيىن حۋ ۋىنلۇڭ شۇبات قۇيۋعا قولايلى بوتەلكە قاراستىرادى. التاي قالاسىنا ءىسساپارعا شىققان كەزىندە ءبىر اراق دۇكەنىنەن سيىمدىلىعى 1 - 5 كيلوگرام اينالاسىندا سۇيىقتىق قۇيۋعا قولايلى بوتەلكە ساتاتىنىن بايقايدى، ايتسە دە ونىڭ باعاسى قىمبات ەدى. كەيىن ءبىر دوسى ارقىلى ۇرىمجىدەن قولايلى بوتەلكە قاراستىرىپ، ءبىر توبىن ساتىپ الىپ ىرىسقان وتباسىنا جەتكىزىپ بەرەدى. ەكى جىلدان بەرى، حۋ ۋىنلۇڭ ولارعا شۇبات قۇياتىن بوتەلكە ساتىپ الىپ بەرىپ كەلەدى، سونىمەن بىرگە جول بويىنا ءبىر قۇلاقتاندىرۋ تاقتاسىن ورناتىپ، وعان قاريانىڭ جانە بالاسىنىڭ تەلەفونى قامتىلعان ينفورماتسيالاردى جازىپ قالدىرادى.

　　مۇقىرتايدىڭ قىستا بورانى قاتتى بولادى، ءاركۇنى تۇيەلەرگە جەم - ءشوپ بەرۋ ەرەكشە جاپالى جۇمىس، مۇنى كورىپ بىلگەن حۋ ۋىنلۇڭ ىرىسقان اقساقالعا ماڭدايعا تاعىلاتىن، كەن جۇمىسشىلارى قولداناتىن پروجەكتەر ساتىپ الىپ بەردى، بۇل ىرىسقان اقساقالدىڭ كەشتە تۇيەلەرىنە جەم - ءشوپ سالۋىنا قولايلىلىق تۋدىردى.

　　ىرىسقان قاريامەن تانىسقالى كوپ جىل بولعاندىقتان ول كىسى حۋ ۋىنلۇڭنىڭ ءوزىن ىزدەپ كەلگەنىن كورگەندە ەرەكشە قۋانىپ 2 - ۇلىم كەلدى دەپ ءماز بولىپ قالاتىن، جاس - شامالارى بويىنشا حۋ ۋىنلۇڭ بۇل ءۇيدىڭ 2 - بالاسىنىڭ قاتارىندا ەدى. ىرىسقان وتباسىمەن تۋىس بولعالى، حۋ ۋىنلۇڭ جۇمىستان قولى بوساعاندا اقساقالدىڭ وتباسىنا ۇنەمى امانداسىپ بارىپ تۇردى.

　　ىرىسقان اقساقالدىڭ كەنجەسىنىڭ اتى جۇماقان، ول اعاسى جونىندە بىلاي دەپ اعىنان اقتارىلدى: ”حۋ اعام وتە كەرەمەت، ول بىزگە شۇبات قۇياتىن بوتەلكە اكەلىپ بەرىپ، قۇلاقتاندىرۋ تاقتاسىن ورناتىپ بەرگەلى وتباسىمىزدىڭ شۇباتىنىڭ ساۋداسى جاقسى بولدى“. ادەتتە تۇرمىستىق ماسەلە جونىندە دە جۇماقان حۋ ۋىنلۇڭمەن اقىلداسىپ، وي ورتاقتاستىرىپ تۇرادى.

　　2022 - جىلى 4 - ايدا، حۋ ۋىنلۇڭنىڭ ايەلى فىڭ چۇن ءبىر جاسار قىزىن ەرتىپ كورلا قالاسىنان جەمەنەي اۋدانىنا تۋىسشىلاي كەلگەن، مۇنى ەستىگەن ىرىسقان اقساقال سان قايتارا تەلەفون جالعاپ، حۋ ۋىنلۇڭنىڭ بالا - شاعاسىن ۇيىنە شاقىردى.

　　2022 - جىلى 5 - ايدىڭ 1 - كۇنى حۋ ۋىنلۇڭ بالا - شاعاسىن ەرتىپ امانداسا كەلدى، ىرىسقان قاريا ەرتەمەن تۇرىپ قوناق كۇتۋگە دايىندالدى، جۇبايى وزات ريزابەك قازان اسىپ، كەنجە ۇلىن قالاشىقتان كوكونىس، جەمىس اكەلۋگە جۇمسادى. حۋ ۋىنلۇڭ بالا - شاعاسىن ەرتىپ ىرىسقان وتباسىنا كەلگەندە، قويانجون داستارقان دايىن بولىپ ۇلگەرگەن ەدى.

　　داستارقانعا وتىرعاندا ىرىسقان مەن جۇبايى حۋ ۋىنلۇڭنىڭ قىزىن كەزەكتەپ كوتەرىپ، تاماقتاندىرىپ ابىگەرگە ءتۇستى، تاماقتان كەيىن بالانى ەرتىپ تۇيەگە ءمىندى. تۋىستاردىڭ باس قوسىپ مارە - سارە بولعان ءساتى تەز وتە شىقتى، حۋ ۋىنلۇڭ كەتەرىندە وزات تاتەي ءبىر دوربا قۇرتىن قولىنا ۇستاتتى، وتباسىنداعىلار تۋىستارىن ەداۋىر جەرگە دەيىن شىعارىپ قويدى.

　　حۋ ۋىنلۇڭ جەمەنەي اۋدانىندا سالت ءجۇرىپ ىستەيدى. ”تاعى ءبىر مەيىرلى وتباسىمنىڭ بولعانىنا ءوزىمدى تالەيلى سەزىنەمىن، تۋىستارىمنىڭ جاعدايىنىڭ جاقسارۋىنا قولىمنان كەلگەنىنشە كومەكتەسەمىن“. حۋ ۋىنلۇڭ ىرىسقان اقساقالدىڭ جاقسى بالاسى بولۋعا قۇلشىنامىن دەپ وتىر.