شياۋمۋ، شياۋرى جانە ولاردىڭ تان اكەسى

日期:2022年05月08日
来源:新疆日报
【字体:

انار بۇلت \ شينجياڭ گازەتىنىڭ ءتىلشىسى ياڭ شۋحان، ەرىكتى ءتىلشى تىڭگىس

  ”تان اكە، ءسىڭلىم انا كۇنگى تورتتى جەگىسى كەلىپ ءجۇر، مەنىڭ دە جەگىم كەلەدى...“ 5 - ايدىڭ 7 - كۇنى تەلەفوننان ەركەلەگەن بالعىن ءۇندى ەستىگەندە، شينجياڭ ورمان ءورتىن ءسوندىرۋ، ورتتەن ساقتانۋ باس اترەتى ىلە ورمان ءورتىن ءسوندىرۋ، ورتتەن ساقتانۋ تارماق اترەتى توعىزتاراۋ اۋداندىق ورمان ءورتىن ءسوندىرۋ، ورتتەن ساقتانۋ ۇلكەن اترەتىنىڭ 4 - دارەجەلى ءورت ءسوندىرۋ، ورتتەن ساقتانۋ جاۋىنگەرى تان دىگۋاڭنىڭ جۇرەگى ەرىپ سالا بەردى، ”جارايدى، جارايدى، ەرتەڭ اپارىپ بەرەيىن، تاعى نە جەگىلەرىڭ كەلەدى“؟

     تەلەفون شالىپ تۇرعان بۇل بالا توعىزتاراۋ اۋداندىق بالالار ۇيىندەگى شياۋمۋ بولاتىن، ءسىڭلىسى شياۋرى ەكەۋى ءار ۇلتتان قۇرالعان باسقا 48 بالامەن بىرگە وسىندا تۇرمىس كەشىرۋدە.

  ۇشەۋى بىلتىر بالالار مەرەكەسىندە العاش كەزدەسكەن - دى.

  بىلتىر 6 - ايدىڭ 1 - كۇنى 23 جاستاعى تان دىگۋاڭ مەن جاۋىنگەر سەرىكتەرى سالەم - ساۋقىتتارىن الىپ وسىنداعى بالالارعا امانداسا كەلگەن بولاتىن. العاش كەزدەسكەندە بالالار جاتىرقاعانىمەن، شۇيىركەلەسىپ كوپ وتپەي ءورت ءسوندىرۋشى، ورتتەن ساقتانۋشىلار مەن بالالار لەزدە جاقىنداسىپ، بىرگە ءان ايتىپ، ءبي بيلەپ، جۇمباق شەشىپ، كوڭىلدى وينادى، تەرەزەدە جاسىرىنىپ سىعالاپ تۇرعان ەكى كىشكەنتاي ءجۇز تان دىگۋاڭنىڭ نازارىن اۋداردى.

  ”ەكەۋى اۋلادا اسىر سالىپ ويناپ جۇرگەن بالالاردان مۇلدەم باسقاشا ەكەن. باسقا بالالار ۇساق - تۇيەككە تالاسىپ، ءان ايتىپ، ءبي بيلەپ، ’مەنى قۇشاقتاپ بيىككە كوتەرىڭىزشى‘ دەپ جۇرگەندە، وسى ەكى كىشكەنتاي قىز تارتىنىپ تۇردى“، - دەدى تان دىگۋاڭ.

  ”بالاقايلار كەلىڭدەر، سەندەرگە اعايلارىڭ نە اكەلگەنىن قاراڭدارشى“! تان دىگۋاڭ كىشكتەنتاي قىز بالالاردىڭ الدىنا بارىپ قولىن سوزدى، الايدا بالالار قولدارىن ارتىنا تىعىپ، باستارىن كوتەرىپ قاراۋدان يمەندى.

  بالالار ءۇيىنىڭ باستىعى ءپاريدام باتۇر تان دىگۋاڭعا بويى بيىگىرەگىنىڭ اتى شياۋمۋ، الاساراعىنىڭ اتى شياۋرى ەكەنىن، بىرەۋى 10 جاستا، بىرەۋى 7 جاستا ەكەنىن ايتتى. اسىلىندە ەكەۋى 76 جاستاعى اجەلەرىمەن بىرگە تۇرعان ەكەن، جۇرەك اۋرۋى بار اجەلەرى ولاردى باعىپ - قاعۋعا مۇلدەم شاماسى كەلمەي، ولاردى توعىزتاراۋ اۋداندىق بالالار ۇيىنە الىپ كەلىپتى. بەيتانىس ورتاعا العاش كەلگەن اپەكەلى - ءسىڭلىلى ەكەۋى باسقالارمەن اڭگىمەلەسپەيدى، بالالار ءۇيىنىڭ توپتىق قيمىلدارىنا دا قاتىناسپايدى ەكەن.

  مۇنى ەستىگەن تان دىگۋاڭنىڭ ولارعا جانى اشىپ، ءسوز جوق، وسى ەكى بالاعا قارايلاسىپ، سەرىك بولىپ، ولارعا مەيىرىم سەزىندىرىپ، كوڭىلدى ەسەيۋىنە مۇمكىندىك جاسايىن دەگەن ويعا كەلدى.

  وسىدان كەيىن اپتا سوڭى، مەرەكەلىك دەمالىس كۇندەرى تان دىگۋاڭ مەن ساپتاستارى ۇساق - تۇيەك جەمەكتىكتەرىن، ۇيرەنۋ جانە تۇرمىس بۇيىمدارىن الىپ بالالار ۇيىنە كەلىپ اپەكەلى - ءسىڭلىلى ەكەۋىمەن امانداسىپ، اڭگىمەلەسىپ، كىتاپ وقىپ، اڭگىمە ايتىپ بەرىپ، ولاردى باسقا بالالارمەن ويىن ويناۋعا ەرتىپ باراتىن، كەيدە بالالاردى سىرتقا ويناۋعا الىپ شىعاتىن بولدى.

  بىرتىندەپ شياۋمۋ مەن شياۋرىنىڭ جۇزدەرىنە كوڭىلدىلىك ورناپ، اشىق - جارقىن، ۇمىتشەڭ بولىپ، وزدەرىنە دەگەن سەنىمى بارعان سايىن نىعايىپ، كىشكەنتاي دوستارىمەن جاقىن ارالاساتىن بولىپ الدى. قاي كەزدەن باستالعانى بەلگىسىز، بالالار ونى ”تان اعاي“ دەپ شاقىرۋىن ”تان اكە“ دەۋگە وزگەرتتى، تان دىگۋاڭ ىشتەي بۇعان قاتتى قۋاندى.

  5 - ايدىڭ 4 - كۇنى تان دىگۋاڭ مەن ساپتاستارى بالالار ۇيىنە بالالارعا امانداسا بارارلارىندا قانداي تورت الۋ، قانداي ساۋعا الۋ دەگەندەرگە ءبىرتالاي باس قاتىرىستى.

  ”اۆتوكولىكتەن تۇسە سالا ەكەۋىنىڭ قاقپادا مەنى كۇتىپ تۇرعانىن، مەنى كورىسىمەن قۋانا سەكىرگەندەرىن كورىپ ءوزىمدى ەرەكشە باقىتتى سەزىندىم“! مۇنان كەيىن ۋاقىت شىعا قالسا بولعانى ولارعا بارىپ امانداسىپ، سەرىك بولىپ، ولاردى جاقسى ۇيرەنىپ، كوڭىلدى ەسەيىپ، داشۋەگە شىعىپ، كوز اياسىن كەڭەيتۋگە شابىتتاندىرامىن، - دەدى تان دىگۋاڭ.

  انە - مىنە دەگەنشە توعىزتاراۋ اۋداندىق ورمان ءورتىن ءسوندىرۋ، ورتتەن ساقتانۋ ۇلكەن اترەتى مەن بالالار ءۇيىنىڭ دوستىعى ورناعاندىعىنا ءبىر جىل بولدى، 50 بالا ءورت ءسوندىرۋشى، ورتتەن ساقتانۋشى اعايلارى مەن بالالار ۇيىندەگى اعاي - اپايلارىنىڭ دەن قويا قامقورلىق ەتۋىندە تاعى ءبىر جاس ەسەيدى.

  ءپاريدام تىلشىگە اپەكەلى - ءسىڭلىلى ەكەۋىنىڭ تان اكەلەرىنە تەلەفون شالىپ، وزدەرىنىڭ كوڭىل سىرلارىن ايتىپ، تان اكەلەرىنىڭ اڭگىمەسىن تىڭداپ، سونان كەيىن بارىپ الاڭسىز ۇيىقتايتىندىعىن ايتتى، ”بۇل ەكەۋىنىڭ ەڭ كوڭىلدى ءساتى ەدى“، - دەدى ءپاريدام.