وزگە جەردى ءوز جەرىنە بالاپ، ىنتىماقتاسا ءوزارا قارايلاسىپ، تەرەڭ سۇيىسپەنشىلىك ورناتتى

日期:2021年12月22日
来源:新疆日报
【字体:

− گۋاڭشي گۇيلين قالاسىنداعى ۇلتتاردىڭ ارالاسۋى، ىشتەسۋى، توعىسۋى تۋرالى بىرنەشە اڭگىمە

  انار بۇلت / شينجياڭ گازەتىنىڭ ءتىلشىسى ميھىرگۇل عوپۇر

  ”گۇيليننىڭ تابيعاتى بارىنەن ادەمى“، گۋاڭشي جۋاڭزۋ اۆتونوميالى رايونى گۇيلين قالاسى سۇلۋ كورىنىستەرىمەن الەمگە ايگىلى. ەجەلدەن بەرى وسىناۋ ايگىلى ساياحات قالاسى بۇكىل ەلدىڭ جەر - جەرىندەگى ادامداردى وسىندا كەلىپ ساياحاتتاۋعا، ساۋدامەن شۇعىلدانۋعا ۇزدىكسىز باۋراپ كەلەدى، سولاردىڭ اراسىندا شينجياڭنان كەلگەن ءار ۇلت بۇقاراسى دا از ەمەس.

  12 - ايدىڭ 16 - كۇنى ءتىلشى الىستاعى گۇيليندە جۇمىس ىستەيتىن، ساۋدامەن شۇعىلداناتىن شينجياڭدىق ادامدارمەن تەلەفون ارقىلى سويلەسىپ، ولاردىڭ سول جەرگە تامىر تارتىپ، وزگە جەردى ءوز جەرىنە بالاپ، جەرگىلىكتى بۇقارامەن تاتۋ - ءتاتتى سيلاسىپ، ءبىر ءۇيلى جانداي ەتەنە وتكەن مەيىرگە تولى اڭگىمەلەرىن تىڭدادى.

  ”سۇيىسپەنشىلىك پەن مەيىردىڭ ارقاسىندا مەن وسىندا تامىر تارتتىم“

  ءمۇتالىپ قۇربان ءار كۇنى تاڭەرتەڭ شاعىن اۋماقتىڭ الدىنداعى بازارعا بارىپ ءبىر كەسە گۇيلين كۇرىش كەسپەسىن ءىشىپ، ونان سوڭ ءوزى اشقان قاقتامالار دۇكەنىنە تارتادى. ”بيىل 44 جاستامىن، گۇيلينگە كەلگەنىمە 22 جىل بولىپتى، بۇل جەردەگى تۇرمىسقا الدەقاشان ۇيىرلەسىپ كەتتىم“، - دەيدى ءمۇتالىپ.

  1999 - جىلى 7 - ايدا ءمۇتالىپ قاراقاش اۋدانى ۇرچى اۋىلى اۋات قىستاعىنان گۇيلينگە كەلىپ، قاقتاما ساتاتىن اۋىلداسىنا ىلەسىپ جايما اشىپ، ءبىر ايدا 350 يۋان ەڭبەكاقى الىپتى. ءبىر جىلدان كەيىن، ءمۇتالىپ قاقتاۋ تەحنيكاسىن ابدەن يگەرىپ العان سوڭ، ءوزى جايما اشپاق بولادى.

  2001 - جىلى گۇيلين قالاسى قالا باسقارۋ تارماق اترەتى 2 - ۇلكەن اترەتىنىڭ باستىعى داي رۇيحۇيدىڭ كومەگىندە، ءمۇتالىپ قيىنشىلىعى بار وتباسىلار، مۇگەدەك ادامدار، جۇمىسسىزدار سياقتىلارعا ارنايى ورنالاستىرىلعان ”مەيىر جەتكىزۋ جايماسىن“ جالعا الادى.

  ”بالا كۇنىمدە اكە - شەشەم اۋرۋدان قايتىس بولدى، مەندە نە اعا - ءىنى، نە اپەكە - قارىنداس تا بولمادى، داي باستىق بۇل جاعدايىمدى بىلگەن سوڭ، ارلى - بەرلى زىر جۇگىرىپ مەنىڭ قاتىستى تاراۋلاردان جالداۋ اقىسىن ازايتۋعا، كەشىرىم ەتۋگە ءوتىنىش بەرۋىمە جاردەمدەستى؛ دۇكەندى بەزەندىرۋ كەزىندە بۇل جەردەگى كوپتەگەن اق ەدىل جاندار كەلىپ كومەكتەستى؛ الەۋمەتتىك اۋماق كادرلارى ۇيىمە كەلىپ قيىنشىلىعىمدى شەشۋگە قول ۇشىن بەردى...“، - دەدى ءمۇتالىپ تىلشىگە كەزىندە مەيىرگە بولەنگەن ىستەرىن بايانداپ.

  تۇراقتى جايماسى بولعان ءمۇتالىپ ىسكە ەرەن ىنتامەن كىرىسىپ، ساۋداسى بارعان سايىن كۇسەت بولا ءتۇستى. بۇگىنگى كۇندە ءمۇتالىپ 2 قاقتاما دۇكەنىن جۇرگىزىپ وتىر، ۇيلەنىپ، بالا سۇيگەن ول بالداي ءدامدى باقىتتى تۇرمىس كەشىرۋدە.

  2020 - جىلى 8 - ايدىڭ 31 - كۇنى كەشتە ءمۇتالىپتىڭ قاقتاما دۇكەنىنىڭ ماڭىندا ءبىر پيكا كولىگىنە تۇتقيىل ءورت كەتەدى، ورتەنگەن كولىك پەن جانارماي پۋنكتىنىڭ اراسى تەك 20 نەشە مەتر، ونىڭ ۇستىنە اينالاسىندا تۇرعىندار عيماراتى كوپ، ادامدار شوعىرى مول، جاعداي ايرىقشا قاتەرلى ەدى. ءمۇتالىپ تاباندا دۇكەن قىزمەتشىلەرىن ەرتىپ ءورت سوندىرگىشپەن ءورتتى سوندىرەدى، سونىمەن بىرگە قاۋمالاپ تۇرعان جۇرتشىلىقتى بار داۋىسىمەن تاراپ كەتۋگە قۋزاپ، ءورت ءسوندىرۋشى، قۇتقارۋشى قىزمەتكەرلەر كەلگەنشە ابىگەرگە تۇسەدى.

  2021 - جىلى 11 - ايدا ءمۇتالىپ قاتارلى 3 شينجياڭدىق ”2020 - جىلعى گۇيلين قالاسىنداعى ادىلەت جولىندا ايانباعان وزات توپ“ اتاعىن يەلەدى. ”وسى جىلداردا تالاي - تالاي سۇيىسپەنشىلىك پەن مەيىردىڭ ارقاسىندا مەن وسىندا تامىر تارتتىم، مەن ءوز ءىس - ارەكەتىممەن كوپشىلىكتىڭ جاقسىلىعىن وتەسەم دەيمىن. بۇدان كەيىن دە وسىنداي جاعدايعا جولىقسام، ەش ءارى - ءسارى بولماي كەۋدە كەرە العا شىعامىن“، - دەيدى ءمۇتالىپ شىن جۇرەكتەن.

  ”گۇيليندە مەنىڭ كوپتەگەن جان اشىر جاقىندارىم بار“

  گۇيلين قالاسى شياڭشان رايونى نانمىن ءمالىسى جۋلين الەۋمەتتىك اۋماعىندا راحىمان ءدامدى تاعامدار بازارى دەيتىن تاعامجاي بار، ونداعى شينجياڭنىڭ ءار ءتۇرلى ەرەكشە، ءدامدى تاعامدارى جەرگىلىكتى بۇقارا مەن ساياحاتشىلاردى ايرىقشا باۋرايدى. ءار كۇنى تاعامجايعا كەلىپ - كەتىپ جاتقان قوناقتارعا قاراپ وتىرىپ، تاعامجاي قوجايىنى ءومار راحىماننىڭ ەكى ەزۋى قۇلاعىنا جەتەدى.

  ”مەن جايما اشىپ، نان ساتتىم، ساۋدام بارعام سايىن كەڭەيىپ، جاقسارا ءتۇستى. وسى جىلداردا گۇيلين قالاسىنداعى ءار ۇلت بۇقاراسىنىڭ كومەگى بولماسا، مەن بۇل جەردە ەشتەڭە تىندىرا الماۋشى ەدىم“، - دەيدى ءومار.

  2001 - جىلى ءومار ايەلى مەن ۇلىن ەرتىپ جاڭاءشار اۋدانى حانارىق قالاشىعى ءۇشقارا قىستاعىنان گۇيلينگە كەلەدى. پويەز ۆوكزالىنىڭ ماڭىندا جايما اشىپ، قاقتاما ساتىپ، ءبىر ءۇيلى جاننىڭ كۇن كورىس قامىن جاسايدى. ءبىراق 2 جىل وتپەي، ۆوكزال ماڭىنا كەشەندى رەتتەۋ - جونگە سالۋ جۇرگىزىلەتىن بولىپ، ءومار بۇل جەردە جايما اشۋعا امالسىز قالادى.

  ونىڭ نە ىستەرىن بىلمەي باسى قاتىپ تۇرعان كەزىندە، شياڭشان رايوندىق ۇلت، ءدىن ىستەرى مەكەمەسىنىڭ، ءمالى باسقارماسى مەن الەۋمەتتىك اۋماقتىڭ قىزمەتكەرلەرى ءومارعا كەلىپ، وعان جايماسىن قاراستى اۋماقتاعى ”جىلجىمالى تيجارات بويىنشا جەتەكتەۋ تۇيىنىنە“ كوشىرۋدى ۇسىنادى. بۇل شياڭشان رايونىنىڭ گۇيلينگە جۇمىس ىستەۋگە جانە شارۋاشىلىق قۇرۋعا العاش كەلگەن ءار ۇلت بۇقاراسىنىڭ جەرگىلىكتى ورتاعا تەزىرەك ۇيىرلەسىپ كەتۋىنە كومەكتەسۋ ءۇشىن قارجى قوسىپ سالعان وتپەلى سيپاتتى تيجارات الاڭ ورنى ەدى.

  وسىلايشا ءومار وتباسى گۇيليندە تابان تىرەپ تۇرىپ قالادى. ەرلى - زايىپتى ەكەۋى ادالدىق پەن سەنىمدىلىكتى نەگىز ەتىپ، قاقتاما جايماسىن دەن قويا اشادى، ولارعا قايتا اينالىپ سوعاتىن الارماندار قاتارى بارعان سايىن كوبەيىپ، تابىستارى دا كۇن سايىن كوبەيە بەرەدى.

  2013 - جىلى ءومار جيناعان اقشاسىمەن كوشەگە قاراعان 80 شارشى مەترلىك دۇكەندى جالعا الادى. 4 جىلدان كەيىن ول 2 - قاباتتاعى دۇكەندى تاعى جالعا الىپ، دۇكەن كولەمىن 300 شارشى مەترگە كەڭەيتەدى، قاقتاما جايماسىن ءدامدى تاعامدار بازارىنا اينالدىرىپ، ايىنا 10 مىڭ يۋاننىڭ ۇستىندە تازا كىرىس كىرگىزەدى.

  بيىل 7 - ايدا ءومار گۇيليننەن ءۇي ساتىپ الادى، 3 بالاسىن ماڭىنداعى ۇكىمەت مەكتەبىندە وقىتىپ جاتىر، مامىراجاي تۇرمىس كەشىرۋدە. ”وتباسىمىزداعىلار وسىنداعى تۇرمىسقا داعدىلانىپ قالدى، جەرگىلىكتى اكسەنتتە بىرنەشە اۋىز ءسوز سويلەي الامىن“، - دەيدى ءومار كۇلىمسىرەي.

  تاماشا تۇرمىس كەشىرىپ جاتقان ءومار ءتۇرلى قوعامدىق الەۋمەتتىك قيمىلدارعا بەلسەنە قاتىناسادى، الەۋمەتتىك اۋماقتىڭ ۇيىمداستىرۋىندا ول تالاي رەت ”ءار ۇلت بۇقاراسىنىڭ ءدامدى تاعامدار اۋىس - كۇيىس باس قوسۋىن“ وتكىزىپ، ءدامدى تاعامدار بازارىن پارتيانىڭ ۇلت ساياساتىن ۇگىتتەيتىن شەپكە، ۇلتتار ىنتىماعىنىڭ تەرەزەسىنە اينالدىرادى. ىندەتتەن ساقتانۋ - تىزگىندەۋ كەزىندە ول قاتىستى تاراۋلاردىڭ ىندەتتەن ساقتانۋ ۇگىتى قىزمەتىن ويداعىداي ىستەۋىنە كومەكتەسەدى ءارى گۇيلين قالاسى مەن قاشقار قالاسىنا اقشالاي، زاتتاي جىلۋ اتايدى.

  ”گۇيلين مەنىڭ ءۇيىم، وسى ارادا كوپتەگەن جان اشىر جاقىندارىم بار. العاش كەلگەن كەزىمدە بەيتانىس ەل، تانىمايىن جەر بولعانىمەن، جەرگىلىكتى ورىنداعى جايدارى جاندار تۇس - تۇستان قول ۇشىن بەرىپ، ءبىزدىڭ قيىن وتكەلدەن وتۋىمىزگە كومەكتەستى، مەن ولاردى كوڭىلىمدە ماڭگى ساقتايمىن“، - دەيدى ءومار تەبىرەنە.

  قازىرگى تاڭدا ءومار وتباسىنداعىلار جەرگىلىكتى ورىننىڭ تۇرمىسىمەن بىتە قايناسىپ كەتتى. گۋاڭشي مەن شينجياڭ ەكى جەردىڭ قاتىستى تاراۋلارىنىڭ قولداۋىندا، ءومار تاعى جۇمىستاندىرۋ بويىنشا كومەكتەسۋ - سۇيەمەلدەۋدى بەلسەنە ورىستەتىپ، شينجياڭدىق سىرتقا شىعىپ جۇمىس ىستەمەكشى بولعان 30 نەشە ادامنىڭ جۇمىستانىپ، شارۋاشىلىق قۇرۋىنا دەم بەرىپتى.

  ”ۇيعۇر ۇلتىنىڭ تامسىلىندە قان مەن ەت ءبىر - بىرىنەن ايرىلا المايدى دەپ جاقسى ايتىلعان. مەيلى قايدا بارساق تا، جۇڭحۋا ۇلتى ماڭگى ءبىر شاڭىراقتىڭ ادامدارىنداي ەتەنە. ۇلتتار ىنتىماعىنا پايدالى ىستەر بولسا عانا جالعاستى ىستەي بەرەمىن“، - دەيدى ءومار.

  ”گۇيليندەگى از ۇلت بۇقاراسىن الاڭسىز ەتەمىز، كوڭىلىن ورنىقتىرامىز“

  ابليكىم ابدۇكەرىم گۇيلين قالاسى حۋانياۋ بازارىنان ءبىر بولمەلى دۇكەندى جالعا الىپ، حوتان قاس تاسىن ساۋدالايدى. قاربالاس بولماعان كەزدەرى ول چيشيڭ رايونىنداعى از ۇلتتارعا قىزمەت وتەۋ ورتالىعىنا بارىپ، مەملەكەتتە ءبىر تۇتاس قولدانىلاتىن ءتىل - جازۋدى ۇيرەنەدى.

  ”مەن ۇرىمجىدەن كەلگەنمىن، العاش كەلگەن كەزىمدە پۋتۇڭحۋانى جاقسى سويلەي المايتىنمىن. قىزمەت وتەۋ ورتالىعىندا مەملەكەتتە ءبىر تۇتاس قولدانىلاتىن ءتىل - جازۋ كۋرسى اشىلعاندىعىنان حابارلى بولعان زامان بارىپ تىزىمدەلدىم. قازىر پۋتۇڭحۋانى جاتىق سويلەيمىن، قاريدارلارعا شينجياڭنىڭ حوتان قاس تاسىن تولىق ءتۇسىندىرىپ بەرە الامىن، ساۋدام بارعان سايىن جاقسارىپ كەلەدى“، - دەيدى ابليكىم.

  تاياۋ جىلداردان بەرى گۇيلين قالاسىنىڭ ۇلتتار ىنتىماعى، العاباسارلىعىندا وزات ورىن قۇرۋ، وزات جەكە بولۋ قىزمەتىن جالپى بەتتىك ىشكەرىلەي ورىستەتۋىنە ىلەسە، ۇلتتاردىڭ ارالاسۋى، ىشتەسۋى، توعىسۋى ۇزدىكسىز تەرەڭدەپ، ءوزارا قۇرمەت ەتۋ جانە سيىسىمدى بولۋ بارىسىندا ورتاق مەكەندى قورعادى جانە گۇلدەندىردى.

  ”ءبىز گۇيلينگە كەلگەن بارلىق دوستاردىڭ تۇراقتاپ قالۋىن، جاقسى تۇرمىس كەشىرۋىن، ويداعىداي دامۋىن ءۇمىت ەتەمىز“، - دەيدى گۇيلين قالالىق پارتكوم بىرلىكساپ ءبولىمىنىڭ ورىنباسار باستىعى، ۇلت، ءدىن ىستەرى كوميتەتىنىڭ مەڭگەرۋشىسى ياڭ حايفىن.

  2019 - جىلى گۇيليندە ساۋدامەن شۇعىلدانعان، جۇمىستانعان، وقىپ جاتقان، تۇرمىس كەشىرگەن از ۇلت بۇقاراسىنا اناعۇرلىم ويداعىداي قىزمەت وتەۋ ءۇشىن، چيشيڭ رايونى 350 نەشە مىڭ يۋان قارجى قوسىپ، ساياسات جونىندەگى تاربيە، ءتىل ۇيرەنۋ، شەبەرلىككە باۋلۋ، كەڭەس سۇراۋ بويىنشا قىزمەت وتەۋ، قايشىلىقتاردى جاراستىرۋ سياقتى كوپ يقۋاتتى ءبىر تۇلعالاندىرعان چيشيڭ رايوندىق از ۇلتتارعا قىزمەت وتەۋ ورتالىعىن قۇرادى. بۇل ورتالىق قابىلداۋ زالى، پارتيا مۇشەلەرىنىڭ بۇقاراعا قىزمەت وتەۋ ورتالىعى، جاراستىرۋ كەڭسەسى، زاڭمەن باسقارۋ تاربيەسى بازاسى جانە انار ءدانى ساباقحاناسى، كەڭسە سياقتىلاردى ورنالاستىرىپ، از ۇلت بۇقاراسىنا ەمدەۋ قامسىزداندىرۋى، قوعامدىق قامسىزداندىرۋ، پەرزەنتتەرىنىڭ وقۋى، جۇمىستانۋعا باۋلۋ سياقتى كاسىپتەر بويىنشا كەڭەس بەرەدى جانە راسمياتتار بىتىرەدى ءارى زاڭدىق كومەك الۋ، پارتيا ىستەرى ساياساتىنان كەڭەس الۋ سياقتى كاسىپتەرمەن قامدايدى.

  چيشيڭ رايونى چىنشان باستاۋىش مەكتەبىنىڭ ادەبيەت وقىتۋشىسى تاڭ جينيۇيدىڭ قىزمەت وتەۋ ورتالىعىندا از ۇلت بۇقاراسىنا مەملەكەتتە ءبىر تۇتاس قولدانىلاتىن ءتىل - جازۋدى ۇيرەتكەنىنە 2 جىل بولىپتى. ”كۋرسانتتار قاراپايىم، ىنتالى، ءار اپتادا ءبىر ساعاتتىق كۋرس بار، وتە مۇقيات ۇيرەنەدى. 3 اي اينالاسىندا ۇيرەنۋ ارقىلى كۋرسانتتاردىڭ دەنى پۋتۇڭحۋامەن پىكىر اۋىستىرا الاتىن بولدى“، - دەيدى تاڭ جينيۇي.

  ”از ۇلت بۇقاراسىنىڭ ورتالىقتاعى انار ءدانى ساباقحاناسىندا كۋرسقا قاتىناسۋ ارقىلى تىلدەسۋ قابىلەتى جوعارىلادى، ساۋداسى دا تۇگەلدەي وڭالا ءتۇستى“، - دەيدى گۇيلين قالاسى چيشيڭ رايونى از ۇلتتارعا قىزمەت وتەۋ ورتالىعىنىڭ جاۋاپتىسى ما شىۋىن.

  ما شىۋىن بىلاي دەيدى: ”ءار ۇلت بۇقاراسى جەرگىلىكتى ورىننىڭ تۇرمىسىنا بەلسەنە توعىسىپ، الەۋمەتتىك يگىلىك ىستەرىنە، ۇلتتار ىنتىماعى قيمىلىنا قىزۋ ىنتامەن ات سالىسىپ، گۇيلين قالاسىنىڭ ەكونوميكالىق، قوعامدىق دامۋىنا ءوز كۇشتەرىن ارنادى. ءبىز الداعى جەردە ءتۇرلى قىزمەتتەردى ۇزدىكسىز جاقسى ىستەپ، گۇيليندەگى از ۇلت بۇقاراسىن الاڭسىز ەتەمىز، كوڭىلىن ورنىقتىرامىز“.