بوستان قىستاعى كىرىستى ارتتىرىپ، بايۋعا باستايتىن ”باعالى اسقاباققا“ يە بولدى

日期:2022年07月29日
来源:新疆日报
【字体:

ەرىكتى تىلشىلەر فىڭ لەي، ٴدىلنۇر تۇرسىنجان

  7 ـ ايدىڭ 6 ـ كۇنى تىلشىلەر شايار اۋدانى جاڭا ٴمالى قالاشىعى بوستان قىستاعىنا كەلدى، بەيبەي اسقاباقتارىنىڭ ٴوسۋ جاعدايى تاماشا ەكەن، جاپ ـ جاسىل اسقاباق جاپىراقتارىنىڭ اراسىندا قالىڭ ”بالپاناقتاي“ اسقاباقتار جاتقانىن، قىستاق تۇرعىندارى تەرۋمەن، قالتالاۋمەن، تاسىمالداۋمەن قاربالاستاپ جاتقانىن كوردى.

  7 ـ ايدىڭ 6 ـ كۇنى شايار اۋدانى جاڭاٴمالى قالاشىعى بوستان قىستاعىنىڭ تۇرعىنى بەيبەي اسقاباعىن جيناۋدا. سۋرەتتى فىڭ لەي تۇسىرگەن

  ”بىلتىر مەن 20 مۋ جەرگە بەيبەي اسقاباعىن سىناق رەتىندە ەگىپ كورىپ، 100 مىڭ يۋان كىرىس كىرگىزدىم، بيىل تاعى 50 مۋ جەرگە كوبەيتىپ ەكتىم، اۋىل شارۋاشىلىق تەحنيكتەرى جەتەكشىلىك جاساعان سوڭ، كىرىس، ٴسوز جوق، اناعۇرلىم جاقسى بولادى“، ـ دەدى ەگىنشى سامەت روزى قۋانىشتى تۇردە.

  تاياۋ جىلداردان بەرى، بوستان قىستاعىنىڭ جان باسىنا تۋرا كەلەتىن ەگىستىك جەرى از، ەگىستىك جەرى بىتىراندى، اۋىل شارۋاشىلىق قۇرىلىمى جالاڭ بولۋى سياقتى ماسەلەلەرگە مەڭزەس، شايار اۋداندىق تۇرعىن ٴۇي جانە قالا، اۋىل قۇرىلىسى مەكەمەسىنىڭ وسى قىستاقتا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتى قىستاق ”ەكى كوميتەتىمەن“ بىرلەسىپ، ەگىمشىلىك ورتاسىن ساراپتاۋ، بازار بولاشاعىنا تولىق تەكسەرۋ – زەرتتەۋ جۇرگىزۋ نەگىزىندە، بەيىمدەلگىشتىگى كۇشتى، دەرت - دەربەزگە قارسىلىق قۋاتى جاقسى، بازاردىڭ سۇرانىس مولشەرى زور بەيبەي اسقاباعىن ەنگىزۋدى ۇيعارىپ، قىستاق تۇرعىندارىنىڭ كىرىسىن ارتتىرىپ، اۋقاتتانۋىنا دەم بەردى.

  ”بەيبەي اسقاباعىنىڭ نە ەكەنىن ەستىپ كورمەپپىن عوي! “، ”ٴبىز اسقاباق ەگىپ كورمەدىك، بۇل نارسەدەن اقشا تابۋعا بولا ما؟ ... بەيبەي اسقاباعى سىندى وسى جاڭا دۇنيەنى كوپ ساندى قىستاق تۇرعىندارى تۇسىنبەي، حاۋىپ ـ قاتەردەن الاڭداعاندىقتان، بايقاپ كورۋ ويىندا بولدى.

  قىستاق تۇرعىندارىن ۋايىمنان ارىلتۋ ٴۇشىن، 2021 ـ جىلدىڭ باسىندا قىزمەت اترەتى مەن قىستاق ”ەكى كوميتەتى“ 37 قىستاق تۇرعىنىن 60 مۋ جەرگە بەيبەي اسقاباعىن سىناق رەتىندە ەگۋگە جۇمىلدىرىپ، ساتىلىم سوماسىن 300 مىڭ يۋاننان اسىردى.

  ”قىزمەت اترەتىنىڭ شابىتتاندىرىپ، جەتەكتەۋىندە، مەن 5 مۋ جەرگە بەيبەي اسقاباعىن ەكتىم، بەيبەي اسقاباعى ەندى پىسقاندا، تۇگەلدەي ساتىپ الۋ تاپسىرىسى ءتۇستى“، ـ دەدى قىستاق تۇرعىنى مامەت اسەن قۋانىشتى تۇردە.

  بەيبەي اسقاباعىن سىناق رەتىندە ەگۋدىڭ ٴساتتى بولۋى قىستاق تۇرعىندارىنىڭ كوڭىلىن ورنىقتىردى. قىزمەت اترەتى مەن قىستاق ”ەكى كوميتەتى“ تەمىردى قىزۋىندا سوعىپ، قىستاق تۇرعىندارى ۋاكىلدەر جيىنىن اشىپ اقىلداسىپ، قىستاق پارتيا ياچەيكاسى باستاماشى بولىپ سەلبەستىك كووپەراتيۆىن قۇرىپ، ”پارتيا ياچەيكاسى + سەلبەستىك كووپەراتيۆى + شارۋالار وتباسى“ تيجارات ۇلگىسى ارقىلى ٴبىر تۇتاس تۇقىم ساتىپ الۋ، ٴبىر تۇتاس ەگۋ، ٴبىر تۇتاس تەحنيكامەن قامداۋ، ٴبىر تۇتاس ساتۋ سىندى ”ٴتورت ٴبىر تۇتاس“ دامۋ ۇلگىسىن اتقارىپ، قىستاق كوللەكتيۆى مەن قىستاق تۇرعىندارىنىڭ تەڭ يگىلىككە كەنەلۋىنە جەتەكشىلىك ەتتى.

  2022 ـ جىلى اسقاباق ەگۋدىڭ شىنىندا پايداسى بار ەكەنىن كورىپ، 80 نەشە قىستاق تۇرعىنى ىرىقتى تۇردە قىزمەت اترەتىن ىزدەپ، بەيبەي اسقاباعىن ەگۋدىڭ قاتارىنا قوسىلدى، ەگىلگەن جەر اۋدانى دا 60 مۋدان 800 مۋعا كەڭەيدى.

  ەگىمشىلىك كولەمىن كەڭەيتۋدە، تەحنيكالىق ورە دە، ٴسوز جوق، جوعارى بولۋى كەرەك. بەيبەي اسقاباعىنىڭ ٴونىم مولشەرىنىڭ، ساپاسىنىڭ بىردەي جوعارىلاۋىنا كەپىلدىك ەتۋ ٴۇشىن، قىزمەت اترەتى اۋدان، اۋىلدارداعى اۋىل شارۋاشىلىق تەحنيكتەرىن ”اتىز باسى ساباقحاناسىن“ اشۋعا ۇسىنىس ەتىپ، اتىز باسىندا 30 نەشە رەت ەگىمشىلىك تەحنيكاسى كۋرسىن اشىپ، ناق مايداندا كورسەتۋ، بەتپە ـ بەت پىكىرلەسۋ ٴتاسىلى ارقىلى ديقاندارعا ەگىمشىلىك، دەرت ـ دەربەزدەن، زياندى جاندىكتەردەن ساقتانۋ - تىزگىندەۋ، تىڭايتقىش بەرۋ سياقتى قولدانىلمالى تەحنيكالاردى ۇيرەتىپ، بەيبەي اسقاباعىنىڭ ساپاسىن جوعارىلاتىپ، ونىمدىلىگىن ارتتىرۋعا نەگىز قالادى.

  ”اۋىل شارۋاشىلىق تەحنيكتەرىنىڭ ۇيرەتۋ ٴادىسى بويىنشا باپتالعاننان كەيىن، اتىزداعى بەيبەي اسقاباقتارىنىڭ ٴبىتىمى زورايدى، سونداي – اق تۇگەل دوپ – دومالاق بولىپ ٴوستى. ونىڭ ۇستىنە قىزمەت اترەتى مەن كووپەراتيۆ بولعاندىقتان، ساتۋدان تيتتەي دە الاڭدامادىق“، - دەدى قىستاق تۇرعىنى ارزىگۇل يميت بيىل ەككەن بەيبەي اسقاباعى جايلى ءسوز بولعاندا جۇزىنەن قۋانىش لەبى ەسىپ.

  قايتكەندە تەز، ويداعىداي باعادا ساتۋعا بولادى؟ قىزمەت اترەتى، قىستاق ”ەكى كوميتەتى“ جانە سەلبەستىك كووپەراتيۆىنىڭ ءارقايسىسى ٴوز مىندەتتەرىنە جاۋاپتى بولدى. قىزمەت اترەتى اسقاباقتى الىپ، سىرتقا شىعىپ كورمەگە قاتىناسىپ، قىستاقتاعى بەيبەي اسقاباعىنىڭ اتاعىن اسپانداتىپ، شاندۇڭ ساۋداگەرلەرىنىڭ ۇزاق ۋاقىت ساتىپ الۋ كەلىسىمىنە قول جەتكىزدى. قىستاق ”ەكى كوميتەتى“ ساۋدا سارايلارىنا، ەرەن بازارلارعا كىرىپ، بازارلارعا شاپقىلاپ، جەرگىلىكتى ورىندا ساتۋ ارناسىن اشتى. سەلبەستىك كووپەراتيۆى ٴبىر تۇتاس جيناپ الىپ ىرىكتەۋ، سۇرىپقا ٴبولىپ باعا بەلگىلەۋ ارقىلى بازاردىڭ تۇرلىشە قاجەتىن قاناعاتتاندىردى.

  بيىل 7 ـ ايدا بوستان قىستاعىنداعى بەيبەي اسقاباعىنان مول ٴونىم الىنىپ، مۋ باسىندىق ورتاشا ٴونىم مولشەرى 2.2 تونناعا جەتىپ، بازاردىڭ ورتاشا باعاسى بويىنشا، كىرىستىڭ از بولعاندا 3 ميلليون يۋاننان اساتىنى قامتاماسىز ەتىلدى.

  ”كەلەسى قادامدا ٴبىز بەيبەي اسقاباعىن ەگۋدەن ۇلگى كورسەتۋ بازاسىن كۇش سالا قۇرىپ، توڭىرەكتەگى قىستاقتاردى بەيبەي اسقاباعىن ەگۋگە جەتەكتەيمىز. سونىمەن بىرگە، اسقاباق ساۋعا قورابىن اشىپ، ٴونىمنىڭ قوسىمشا قۇنىن جوعارىلاتىپ، بەيبەي اسقاباعىن قىستاق تۇرعىندارىن اۋقاتتاندىرىپ، بايۋعا باستايتىن ’باعالى اسقاباققا‘ اينالدىرۋدى جوسپارلاپ وتىرمىز“، ـ دەدى بوستان قىستاعىندا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ باستىعى، 1 - شۋجي ۋي چيباڭ تولىق سەنىممەن.