ج ك پ ورتالىق كوميتەتى شەتەلدەرمەن بايلانىس جاساۋ ءبولىمىنىڭ مالىمدەمەشىسى حۋ جاۋميڭ 6 - ايدىڭ 17 - كۇنى بەيجيڭدە مىنانى جاريالادى: چاۋشيان ەڭبەك پارتياسى ورتالىق كوميتەتىنىڭ باستىعى، چاۋشيان دەموكراتيالىق حالىق رەسپۋبليكاسى مەملەكەت ىستەرى كوميتەتىنىڭ باستىعى كيم جوڭ - ۇننىڭ ۇسىنىسى بويىنشا، ج ك پ ورتالىق كوميتەتىنىڭ باس شۋجيى، جۇڭحۋا حالىق رەسپۋبليكاسىنىڭ ءتوراعاسى شي جينپيڭ 6 - ايدىڭ 20 - كۇنىنەن 21 - كۇنىنە دەيىن چاۋشيان دەموكراتيالىق حالىق رەسپۋبليكاسىندا مەملەكەتتىك ساپاردا بولادى.
«حالىق گازەتى»، 6 - ايدىڭ 17 – كۇنى، بەيجيڭ (تىلشىلەر جاۋ جياميڭ، دۋ شاڭزى، باي ياڭ). ج ك پ ورتالىق كوميتەتىنىڭ شەتەلدەرمەن بايلانىس جاساۋ ءبولىمى 6 - ايدىڭ 17 - كۇنى اقپارات قۇرالدارىنا قۇلاق قاعىس ەتۋ ءماجىلىسىن اشتى. ورتالىق كوميتەت بايلانىس ءبولىمىنىڭ باستىعى سۇڭ تاۋ، سىرتقى ىستەر مينيسترلىگىنىڭ ورىنباسار مينيسترى لو جاۋحۇي ج ك پ ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭنىڭ چاۋشياندا مەملەكەتتىك ساپاردا بولۋىنا قاتىستى جاعدايلاردى تانىستىردى.
سۇڭ تاۋ بىلاي دەدى: چاۋشيان ەڭبەك پارتياسى ورتالىق كوميتەتىنىڭ باستىعى، مەملەكەت ىستەرى كوميتەتىنىڭ باستىعى كيم جوڭ - ۇننىڭ ۇسىنىسى بويىنشا ج ك پ ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ 6 - ايدىڭ 20 - كۇنىنەن 21 - كۇنىنە دەيىن چاۋشياندا مەملەكەتتىك ساپاردا بولادى. بۇل − پارتيامىز بەن مەملەكەتىمىزدىڭ ەڭ جوعارى باسشىلارىنىڭ ارادا 14 جىل وتكەندە چاۋشيانعا تاعى دا ساپارلاي بارۋى، سونداي - اق پارتيانىڭ 18 - قۇرىلتايىنان بەرى باس شۋجي شي جينپيڭنىڭ چاۋشيانعا تۇڭعىش ساپارلاۋى. بۇل ساپار جۇڭگو مەن چاۋشياننىڭ ديپلوماتيالىق قاتىناس ورناتقانىنىڭ 70 جىلدىعى قارساڭىنا تۋرا كەلىپ وتىر، ەكى ەل قاتىناسىندا الدىڭعىعا مۇراگەر بولىپ، كەيىنگىگە جول اشۋ سىندى ماڭىزدى مانگە يە.
