شي جينپيڭ گۇيجوۋ بيجيە قالاسىنىڭ چيانشي قالاسى ساياحات كەمەسىنىڭ اۋدارىلۋ شىرعالاڭىنا مەڭزەس ماڭىزدى نۇسقاۋ بەرىپ، بىلاي دەپ باسا دارىپتەدى
سۋعا كەتكەندەردى بار امالمەن ىزدەپ قۇتقارىپ، جارالانعانداردى بار كۇشپەن قۇتقارۋ ـ ەمدەۋ، اۋىر، ەرەكشە اۋىر حاۋىپسىزدىك شىرعالاڭدارىنىڭ كوپ تۋىلۋ جاعدايىن باتىل تەجەۋ كەرەك
لي چياڭ بەكىتۋ جازدى
5 ـ ايدىڭ 4 ـ كۇنى ساعات 16دان 40 مينۋت وتكەندە گۇيجوۋ بيجيە قالاسىنىڭ چيانشي قالاسى شينرىن اۋىلى حۋا ـ ۋ قىستاعىنداعى بايليحۋالاڭ كورىنىس وڭىرىندە ساياحات كەمەسى اۋدارىلۋ شىرعالاڭى تۋىلدى. قازىرگە دەيىن شىرعالاڭدا 3 ادام ٴولدى، 60 ادام شيپاحاناعا قۇتقارۋ ـ ەمدەۋگە جەتكىزىلدى، بۇدان سىرت، 14 ادام ىزدەپ قۇتقارىلۋ ۇستىندە.
شىرعالاڭ تۋىلعاننان كەيىن، جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ ايرىقشا ٴمان بەردى ٴارى ماڭىزدى نۇسقاۋ بەرىپ، بىلاي دەپ اتاپ كورسەتتى: گۇيجوۋ بيجيە قالاسى چيانشي قالاسىنىڭ ٴبىر كورىنىس وڭىرىندە ساياحات كەمەسى اۋدارىلۋ شىرعالاڭى تۋىلدى، سۋعا كەتكەندەردى بار امالمەن ىزدەپ قۇتقارىپ، جارالانعانداردى بار كۇشپەن قۇتقارىپ ـ ەمدەپ، قازا بولعانداردىڭ سوڭعى جۇمىستارىن جانە ولاردىڭ وتباسىنداعىلاردى جۇباتۋ سياقتى قىزمەتتەردى ۇيلەسىمدى ويداعىداي ىستەۋ كەرەك.
شي جينپيڭ بىلاي دەپ باسا دارىپتەدى: جاقىندا ٴىشىنارا جەرلەردە حاۋىپسىزدىك شىرعالاڭى ارت ـ ارتىنان تۋىلىپ، توپتىق ٴولىم ـ ٴجىتىم، جارالانۋ بولدى، جەر ـ جەر، قاتىستى تاراۋلار تەرەڭ ساباق الىپ، سالعىرتسۋ يدەياسىن باتىل جەڭىپ، ٴار جاقتىڭ جاۋاپكەرشىلىگىن ونان ارى قاتايتىپ، نازاردى ساياحات كورىنىس ٴوڭىرى، كولەمدى الەۋمەتتىك ورتا، تۇرعىندار شاعىن رايونى، قايتار قاتىناس سياقتىلارعا شوعىرلاندىرىپ، حاۋىپسىزدىك شارالارىن كۇشەيتىپ، قىزمەتتى تياناقتاندىرۋدى مىقتى يگەرىپ، اۋىر، ەرەكشە اۋىر حاۋىپسىزدىك شىرعالاڭدارىنىڭ كوپ تۋىلۋ جاعدايىن باتىل تەجەۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ بەكىتۋ جازىپ، بىلاي دەپ اتاپ كورسەتتى: ٴىز ـ دەرەكسىز كەتكەندەردى بار كۇشپەن ىزدەپ قۇتقارىپ، جارالانعانداردى قۇتقارىپ ـ ەمدەپ، ولاردىڭ وتباسىنداعىلاردى جۇباتۋ، سوڭعى جۇمىستاردى ٴبىر جاقتى ەتۋ جانە شىرعالاڭدى تەكسەرىپ ٴبىر جاقتى ەتۋ سياقتى قىزمەتتەردى شىنايى ويداعىداي ىستەۋ كەرەك. ”1 ـ مامىر“ دەمالىسى اياقتاۋ الدىندا تۇر، جەر ـ جەردى، قاتىستى جاقتاردى ٴوندىرىس حاۋىپسىزدىگى جاۋاپكەرشىلىگىن تياناقتاندىرۋدى جانە حاۋىپسىزدىك باسقارۋ شارالارىن تياناقتاندىرۋدى مىىقتى يگەرىپ، ٴتۇيىندى الاڭ ـ ورىنداردى، ٴتۇيىندى وڭىرلەردى كورنەكتىلەندىرىپ، حاۋىپ ـ قاتەرلەردى، كومەسكى كىناراتتاردى جاپپاي ٴبىر ـ بىردەن تەكسەرىپ جويىپ، ٴتۇرلى اۋىر، ەرەكشە اۋىر شىرعالاڭداردىڭ تۋىلۋىنان باتىل ساقتانۋعا جانە ونى تەجەۋگە ونان ارى قۋزاۋ، جەتەكشىلىك ەتۋ كەرەك.
شي جينپيڭنىڭ ماڭىزدى نۇسقاۋى مەن لي چياڭنىڭ تالابىنا ساي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەستىڭ ورىنباسار زۇڭليى جاڭ گوچيڭ قاتىستى تاراۋلاردىڭ جاۋاپتى جولداستارىن باستاپ ناق مايدانعا بارىپ، قۇتقارۋ ـ كومەكتەسۋ، ٴبىر جاقتى ەتۋ قىزمەتىنە جەتەكشىلىك ەتتى. گۇيجوۋ ولكەلىك پارتكومنىڭ، ولكەلىك ۇكىمەتتىڭ نەگىزگى جاۋاپتى جولداستارى ناق مايدانعا بارىپ شۇعىل جاعدايعا توتەپ بەرۋ، ٴبىر جاقتى ەتۋ قىزمەتىنە قولباسشىلىق ەتتى، گۇيجوۋ ولكەسى، بيجيە قالاسى ناق مايداندا ىزدەپ قۇتقارۋ، جارالانعانداردى قۇتقارۋ ـ ەمدەۋ سياقتى قىزمەتتەردى بار كۇشپەن ويداعىداي ىستەدى. كەزەكتە قاتىستى قىزمەتتەر جۇرگىزىلۋدە.
