جۇڭحۋا مەملەكەتتىك باس جۇمىسشى ۇيىمى قۇرىلعاندىعىنىڭ 100 جىلدىعىن قۇتتىقتاۋ جانە مەملەكەتتىك ەڭبەك ەرلەرى مەن وزات قىزمەتكەرلەردى ماداقتاۋ ـ سيلاۋ جينالىسى سالتاناتپەن وتكىزىلدى
شي جينپيڭ ماڭىزدى ٴسوز سويلەدى، پارتيا ورتالىق كوميتەتى اتىنان بۇكىل ەلدەگى ٴار ۇلت جۇمىسشىلارىنا، شارۋالارىنا، زيالىلارىنا جانە باسقا دا ەڭبەكشى قاۋىمعا، ٴار دارەجەلى جۇمىسشى ۇيىمدارىنا جانە بارلىق جۇمىسشى ۇيىمى قىزمەتكەرلەرىنە شىنايى سالەم جولدادى! ماداقتالىپ ـ سيلانعان مەملەكەتتىك ەڭبەك ەرلەرىن جانە وزات قىزمەتكەرلەردى قىزۋ قۇتتىقتادى!
لي چياڭ باسقاردى، جاۋ لىجي، ۋاڭ حۋنيڭ، ديڭ شۋەشياڭ، لي شي قاتىناستى، ساي چي ماداقتاۋ ـ سيلاۋ قاۋلىسىن وقىدى
4 ـ ايدىڭ 28 ـ كۇنى جۇڭحۋا مەملەكەتتىك باس جۇمىسشى ۇيىمى قۇرىلعاندىعىنىڭ 100 جىلدىعىن قۇتتىقتاۋ جانە مەملەكەتتىك ەڭبەك ەرلەرى مەن وزات قىزمەتكەرلەردى ماداقتاۋ ـ سيلاۋ جينالىسى بەيجيڭ حالىق سارايىندا سالتاناتپەن وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ جينالىسقا قاتىناستى ٴارى ماڭىزدى ٴسوز سويلەدى.
سۋرەتتى شينحۋا اگەنتتىگىنىڭ ٴتىلشىسى لي شۋەرىن تۇسىرگەن
4 ـ ايدىڭ 28 ـ كۇنى جۇڭحۋا مەملەكەتتىك باس جۇمىسشى ۇيىمى قۇرىلعاندىعىنىڭ 100 جىلدىعىن قۇتتىقتاۋ جانە مەملەكەتتىك ەڭبەك ەرلەرى مەن وزات قىزمەتكەرلەردى ماداقتاۋ ـ سيلاۋ جينالىسى بەيجيڭ حالىق سارايىندا سالتاناتپەن وتكىزىلدى. سۋرەتتە: شي جينپيڭ قاتارلى پارتيا مەن مەملەكەت باسشىلارى مەملەكەتتىك ەڭبەك ەرلەرى مەن وزات قىزمەتكەرلەردىڭ ۋاكىلدەرىنە داڭق كۋالىگىن بەردى.
سۋرەتتى شينحۋا اگەنتتىگىنىڭ ٴتىلشىسى شيە حۋانچى تۇسىرگەن
جۇڭحۋا مەملەكەتتىك باس جۇمىسشى ۇيىمى قۇرىلعاندىعىنىڭ 100 جىلدىعىن قۇتتىقتاۋ جانە مەملەكەتتىك ەڭبەك ەرلەرى مەن وزات قىزمەتكەرلەردى ماداقتاۋ ـ سيلاۋ جينالىسى 4 ـ ايدىڭ 28 ـ كۇنى تۇستەن بۇرىن حالىق سارايىندا سالتاناتپەن وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ جينالىسقا قاتىناستى ٴارى ماڭىزدى ٴسوز سويلەپ، بىلاي دەپ باسا دارىپتەدى: جاڭا داۋىردەگى جاڭا جورىقتا، ٴسوز جوق، پارتيانىڭ وزەكتى مىندەتىن تىعىز ارقاۋ ەتىپ، جۇمىسشى تابى مەن قالىڭ ەڭبەكشى قاۋىمنىڭ تەلەگەي كۇشىن توپتاپ، تىڭعىلىقتى ىستەپ، قايراتتانا العا ۇمتىلىپ، كۇرەس جاساپ ۇلەس قوسىپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ ۇلى جوباسىن نىق قاداممەن رەالدىققا اينالدىرۋ كەرەك.
”1 ـ مامىر“ حالىقارالىق ەڭبەكشىلەر مەرەكەسى قارساڭىندا، شي جينپيڭ پارتيا ورتالىق كوميتەتى اتىنان بۇكىل ەلدەگى ٴار ۇلت جۇمىسشىلارىنا، شارۋالارىنا، زيالىلارىنا جانە باسقا دا ەڭبەكشى قاۋىمعا، ٴار دارەجەلى جۇمىسشى ۇيىمدارىنا جانە بارلىق جۇمىسشى ۇيىمى قىزمەتكەرلەرىنە ىقىلاستى سالەم جولدادى! شياڭگاڭ ەرەكشە اكىمشىلىك رايونىنداعى، اۋمىن ەرەكشە اكىمشىلىك رايونىنداعى، تايۋان رايونىنداعى جۇمىسشى ۇيىمى جانە ەڭبەك سالاسىنداعى دوستارعا مەرەكەلىك سالەم جولدادى! ماداقتالىپ ـ سيلانعان مەملەكەتتىك ەڭبەك ەرلەرى مەن وزات قىزمەتكەرلەردى قىزۋ قۇتتىقتادى!
لي چياڭ جينالىستى باسقاردى، جاۋ لىجي، ۋاڭ حۋنيڭ، ديڭ شۋەشياڭ، لي شي قاتىناستى، ساي چي ماداقتاۋ ـ سيلاۋ قاۋلىسىن وقىدى.
حالىق سارايىنىڭ ۇلكەن زالى سالتاناتتى دا دۋماندى بەينەگە شومدى. ٴتوراعالار مىنبەسىنىڭ جوعارعى جاعىنا ”جۇڭحۋا مەملەكەتتىك باس جۇمىسشى ۇيىمى قۇرىلعاندىعىنىڭ 100 جىلدىعىن قۇتتىقتاۋ جانە مەملەكەتتىك ەڭبەك ەرلەرى مەن وزات قىزمەتكەرلەردى ماداقتاۋ ـ سيلاۋ جينالىسى“ دەگەن جازۋ جازىلعان جينالىس بەلگىسى ىلىنگەن، ارتقى پەردەنىڭ ٴدال ورتاسىنا جۇڭگو جۇمىسشى ۇيىمىنىڭ گەربى ىلىنگەن، ۇيىم گەربىنىڭ استىڭعى جاعىنا ”1925 - 2025“ دەگەن جازۋ جازىلعان، 10 قىزىل تۋ ەكى جاعىنا ٴبولىنىپ قويىلعان. 2 ـ قاباتتاعى تەكشەگە ”شي جينپيڭ جاڭا ٴداۋىر جۇڭگوشا سوتسياليزم يدەياسىن جەتەكشى ەتىپ، پارتيانىڭ سوزىنە بۇلجىماي قۇلاق اسىپ، پارتياعا ىلەسىپ جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋ بارىسىندا جۇمىسشى تابىنىڭ نەگىزگى قوسىندىق رولى مەن جۇمىسشى ۇيىمىنىڭ كوپىرلىك، دانەكەرلىك رولىن تولىق ساۋلەلەندىرەيىك!“ دەگەن ۇران ىلىنگەن.
تۇستەن بۇرىن ساعات 10دا جينالىس باستالدى. بارلىق ادام ورىندارىنان تۇرىپ جۇڭحۋا حالىق رەسپۋبليكاسىنىڭ مەملەكەت ٴانىن اسقاقتاتا شىرقادى.
ساي چي «جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك كەڭەستىڭ مەملەكەتتىك ەڭبەك ەرلەرى مەن وزات قىزمەتكەرلەردى ماداقتاۋ ـ سيلاۋ جونىندەگى قاۋلىسىن» وقىدى. 1670 ادامعا مەملەكەتتىك ەڭبەك ەرى اتاعى، 756 ادامعا مەملەكەتتىك وزات قىزمەتكەر اتاعى بەرىلدى.
شات مەرەيلى مۋزيكا ٴۇنى ىشىندە مەملەكەتتىك ەڭبەك ەرلەرىنىڭ جانە وزات قىزمەتكەرلەردىڭ ۋاكىلدەرى رەتىمەن ٴتوراعالار مىنبەسىنە كوتەرىلدى، شي جينپيڭ قاتارلىلار ولارعا داڭق كۋالىگىن بەردى.
جۇڭگو 2 ـ اۋىر تۇرپاتتى ماشينا توبى دىياڭ ۋانحاڭ مودۋان شەكتى جاۋاپكەرشىلىك سەرىكتەستىگىنىڭ ٴبان ـ گرۋپپا باستىعى يە لينۋي مەملەكەتتىك ەڭبەك ەرلەرى مەن وزات قىزمەتكەرلەر اتىنان ۇندەۋ حاتىن وقىدى.
بۇكىل زالدى كەرنەگەن قىزۋ شاپالاق ٴۇنى ىشىندە شي جينپيڭ ماڭىزدى ٴسوز سويلەدى. ول بىلاي دەپ اتاپ كورسەتتى: جۇڭحۋا مەملەكەتتىك باس جۇمىسشى ۇيىمى قۇرىلعان 100 جىلدان بەرى، جۇڭگو كوممۋنيستىك پارتياسىنىڭ باسشىلىعىندا، ٴار دارەجەلى جۇمىسشى ۇيىمدارى پارتيانىڭ ٴارقايسى تاريحي داۋىردەگى وزەكتى مىندەتتەرىن تىعىز ارقاۋ ەتىپ، ەلىمىز جۇمىسشى تابىن پارتيانىڭ قادامىنا ٴجىتى ىلەسۋگە، ٴداۋىردىڭ الدىڭعى لەگىندە جۇرۋگە ىنتىماقتاستىرىپ جانە جۇمىلدىرىپ، توڭكەرىس، قۇرىلىس، رەفورما ۇلى ىستەرىن ىلگەرىلەتۋ بارىسىندا وشپەس ەڭبەك ٴسىڭىرىپ، ەلىمىز جۇمىسشىلار قوزعالىسىنىڭ ايبىندى تاراۋىن جازدى.
شي جينپيڭ بىلاي دەپ باسا دارىپتەدى: پارتيا 18 ـ قۇرىلتايىنان بەرى، پارتيا ورتالىق كوميتەتى جۇمىسشى تابى مەن جۇمىسشى ۇيىمى قىزمەتى جونىندە ٴبىر قىدىرۋ ماڭىزدى بايىمداۋ جاساپ، ٴبىر قىدىرۋ ماڭىزدى قىزمەتتەردى ورنالاستىرىپ، ىلگەرىلەتىپ، ٴبىر قىدىرۋ بەتالىستىق، ٴتۇبىرلى، ستراتەگيالىق ماسەلەگە تەرەڭ جاۋاپ بەرىپ، پارتيانىڭ جۇمىسشىلار قوزعالىسى نازارياسىن ونان ارى بايىتىپ جانە دامىتىپ، پارتيانىڭ جۇمىسشىلار قوزعالىسى ىستەرىنىڭ تاريحي تابىستارعا قول جەتكىزۋىن، جان ـ جاقتى العا باسۋىن ىلگەرىلەتتى. ٴار دارەجەلى جۇمىسشى ۇيىمدارى قالىڭ جۇمىسشى ـ قىزمەتكەر قاۋىمىن جاڭا داۋىردەگى جۇڭگوشا سوتسياليزم ۇلى امالياتىندا بار ونەرىن ايگىلەۋگە ىنتىماقتاستىرىپ جانە جۇمىلدىرىپ، ۋاعىندا جاپپاي دوڭگەلەك داۋلەتتى قوعام قۇرىپ شىعۋعا، جۇڭگو ۇلگىسىندەگى وسىزامانداندىرۋدى ىلگەرىلەتۋگە ماڭىزدى ۇلەس قوستى.
شي جينپيڭ بىلاي دەپ اتاپ كورسەتتى: 100 جىلدان بەرگى اماليات مىنانى تولىق دالەلدەدى: ەلىمىز جۇمىسشى تابى ايتسا ايتقانداي جۇڭگو كوممۋنيستىك پارتياسىنىڭ ەڭ بەرىك، ەڭ سەنىمدى تاپتىق نەگىزى، ايتسا ايتقانداي سوتسياليستىك مەملەكەتىمىزدىڭ باسشىلىق تابى، ايتسا ايتقانداي وزىق وندىرگىش كۇش پەن وندىرىستىك قاتىناستىڭ ۋاكىلى، ايتسا ايتقانداي جۇڭگوشا سوتسياليزمگە تاباندى بولۋدىڭ جانە ونى دامىتۋدىڭ نەگىزگى كۇشى. ەلىمىزدىڭ جۇمىسشى ۇيىمى ايتسا ايتقانداي پارتيانىڭ جۇمىسشى ـ قىزمەتكەرلەر قاۋىمىمەن بايلانىس جاسايتىن كوپىرى جانە دانەكەرى، ايتسا ايتقانداي سوتسياليستىك مەملەكەت بيلىگىنىڭ ماڭىزدى قوعامدىق تىرەگى، ايتسا ايتقانداي جۇمىسشى ـ قىزمەتكەرلەر مۇددەسىنىڭ ۋاكىلى جانە قورعاۋشىسى. مەيلى ٴداۋىر شارت ـ جاعدايى مەن قوعامدىق توپتار قالاي دامىپ وزگەرسە دە، ەلىمىز جۇمىسشى تابىنىڭ ورنى مەن رولىنان اۋىتقۋعا بولمايدى، بۇكىل ىنتا ـ پەيىلمەن جۇمىسشى تابىنا سۇيەنۋ ٴتۇبىرلى باعىتىنان اۋىتقۋعا بولمايدى، ەلىمىز جۇمىسشى ۇيىمىنىڭ سيپاتى مەن فۋنكتسياسىنان اۋىتقۋعا بولمايدى.
شي جينپيڭ بىلاي دەپ باسا دارىپتەدى: 100 جىلدان بەرى، پارتيانىڭ جۇمىسشىلار قوزعالىسى ىستەرىنىڭ نازاريالىق جاسامپازدىعى مەن امالياتتىق دامۋىنىڭ ەڭ ماڭىزدى جەتىستىگى جۇڭگوشا سوتسياليستىك جۇمىسشى ۇيىمىنىڭ دامۋ جولىن قالىپتاستىرعاندىعى بولدى. بۇل جول پارتيانىڭ جۇمىسشىلار قوزعالىسى ىستەرى مەن جۇمىسشى ۇيىمى قىزمەتىنە جاپپاي باسشىلىعىنا تاباندى بولدى، بۇكىل ىنتا ـ پەيىلمەن جۇمىسشى تابىنا سۇيەنۋ ٴتۇبىرلى باعىتىنا تاباندى بولدى، پارتيانىڭ وزەكتى مىندەتىنە بويسۇنۋعا جانە وعان قىزمەت ەتۋگە تاباندى بولدى، جۇمىسشى ۇيىمىنىڭ ساياسيلىعىنا، العاباسارلىعىنا، بۇقارالىعىنا تاباندى بولدى، جۇمىسشى ـ قىزمەتكەرلەر قاۋىمىنا قىزمەت وتەۋدى جان تامىر ەتۋگە تاباندى بولدى، زاڭ بويىنشا، ەرەجە بويىنشا قىزمەت ورىستەتۋگە تاباندى بولدى، بۇل پارتيانىڭ جۇمىسشىلار قوزعالىسى ىستەرى مەن جۇمىسشى ۇيىمى قىزمەتىنە باسشىلىق ەتۋدەگى باعالى تاجىريبەلەرىنىڭ تەرەڭ قورىتىندىسى، وعان، ٴسوز جوق، ۇزاق ۋاقىت تاباندى بولۋ كەرەك.
شي جينپيڭ بىلاي دەپ اتاپ كورسەتتى: پارتيانىڭ وزەكتى مىندەتى — ەلىمىز جۇمىسشىلار قوزعالىسىنىڭ داۋىرلىك تاقىرىبى. جاڭا داۋىردەگى جاڭا جورىقتا، ٴسوز جوق، ەلىمىزدىڭ جۇمىسشى تابى مەن قالىڭ ەڭبەكشى قاۋىمىن جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋگە اناعۇرلىم زور تىڭ ۇلەس قوسۋعا ونان ارى جۇمىلدىرۋ جانە ىنتالاندىرۋ كەرەك. نازاردى جوعارى ساپالى دامۋدى ىلگەرىلەتۋگە شوعىرلاندىرىپ، قالىڭ جۇمىسشى ـ قىزمەتكەردى جانە ەڭبەكشى قاۋىمدى ەسە قوسىپ ەڭبەك سىڭىرۋگە، جاڭالىق اشۋعا، جاسامپازدىق جاراتۋعا جۇمىلدىرۋ، ىنتالاندىرۋ كەرەك. جاڭا كەزەكتى عىلىم ـ تەحنولوگيا توڭكەرىسى مەن كاسىپ سالاسى وزگەرىسىنە سايكەسىپ، ەڭبەكشىلەردىڭ ساپاسىن جاپپاي جوعارىلاتۋ كەرەك. سوتسياليستىك وزەكتى قۇن كوزقاراسىن ىشكەرىلەي امالياتتا ايگىلەپ، ەڭبەك ەرى رۋحىن، ەڭبەك رۋحىن، ۇستا رۋحىن زور كۇشپەن اسقاقتاتۋ كەرەك. بىرگە بايۋدى ىلگەرىلەتۋدى كوزدە ۇستاپ، قالىڭ جۇمىسشى ـ قىزمەتكەر مەن ەڭبەكشى قاۋىمنىڭ قۇت ـ ىرىسىن ورنىقتى ارتتىرۋ كەرەك.
شي جينپيڭ بىلاي دەپ باسا دارىپتەدى: ەڭبەك ەرلەرى مەن وزات قىزمەتكەرلەر — حالىقتىڭ ونەگەسى، مەملەكەتتىڭ تىرەگى، بۇكىل قوعام ولاردىڭ ىزگى ىستەرىنەن ۇيرەنىپ، ولاردىڭ رۋحىن اسقاقتاتۋى كەرەك. ەڭبەك ەرلەرى مەن وزات قىزمەتكەرلەر داڭقتى قاستەرلەپ، ٴوز قاسيەتىن ساقتاپ، ۇزدىكسىز قۇلشىنىپ، تاعى دا تىڭ ۇلەس قوسۋى كەرەك.
شي جينپيڭ بىلاي دەپ اتاپ كورسەتتى: جاڭا تاريحي باستامادا ٴار دارەجەلى جۇمىسشى ۇيىمدارى پارتيا ورتالىق كوميتەتىنىڭ شەشىمدەرىن، ورنالاستىرۋلارىن جاپپاي دايەكتىلەندىرىپ، تياناقتاندىرىپ، جۇمىسشى ۇيىمى قىزمەتىنىڭ جوعارى ساپالى دامۋىن ىلگەرىلەتۋى كەرەك. دۇرىس ساياسي بەتالىسقا تاباندى بولىپ، قالىڭ جۇمىسشى ـ قىزمەتكەر مەن ەڭبەكشى بۇقارانى پارتيانىڭ توڭىرەگىنە تىعىز ىنتىماقتاستىرۋى كەرەك. جۇمىسشى ـ قىزمەتكەرلەردى وزەك ەتكەن قىزمەت باعدارىنا تاباندى بولىپ، جۇمىسشى ـ قىزمەتكەرلەر قاۋىمىنا شىنايى قىزمەت وتەپ، جۇمىسشى ـ قىزمەتكەرلەردىڭ جان ـ جاقتى دامۋىن جەبەۋى كەرەك. جۇمىسشى ۇيىمى رەفورماسى مەن قۇرىلىسىن تەرەڭدەتىپ، جەتەكشىلىك قۋاتىن، ۇيىمداستىرۋ قۋاتىن، قىزمەت وتەۋ قۋاتىن ۇزدىكسىز كۇشەيتۋى كەرەك.
شي جينپيڭ بىلاي دەپ باسا دارىپتەدى: جۇمىسشىلار قوزعالىسى ىستەرى — پارتيا ىستەرىنىڭ ماڭىزدى قۇرامداس بولىگى. ٴار دارەجەلى پارتكومدار جۇمىسشى ۇيىمىنا باسشىلىقتى كۇشەيتىپ جانە جاقسارتىپ، جۇمىسشى ۇيىمى قىزمەتىندەگى كەلەلى ماسەلەلەردى دەر كەزىندە اقىلداسىپ شەشىپ، جۇمىسشى ۇيىمىنىڭ مىندەت وتەۋىنە تاماشا شارت ـ جاعداي جاراتۋى كەرەك.
لي چياڭ جينالىستى باسقارعاندا بىلاي دەپ اتاپ كورسەتتى: باس شۋجي شي جينپيڭ ماڭىزدى سوزىندە 100 جىلدان بەرى پارتيا باسشىلىق ەتكەن جۇڭگو جۇمىسشىلار قوزعالىسىنىڭ شۇعىلالى بارىسى مەن ۇلى تابىستارىنا جوعارى باعا بەرىپ، جۇڭگو جۇمىسشى تابى مەن جۇڭگو جۇمىسشى ۇيىمىنىڭ پارتيا مەن مەملەكەت ىستەرىنىڭ دامۋ جالپى جاعدايىنداعى ورنى مەن رولىن تولىق تۇراقتاندىرىپ، جۇمىسشىلار قوزعالىسى ىستەرى مەن جۇمىسشى ۇيىمى قىزمەتىنىڭ باعالى تاجىريبەلەرىن تەرەڭ قورىتىندىلاپ، ەلىمىزدىڭ جۇمىسشى تابى مەن قالىڭ ەڭبەكشى قاۋىمنىڭ جاڭا جورىقتا ەكپىندەي ىلگەرىلەپ، جاڭا داۋىرگە ۇلەس قوسۋىنا شىنايى ٴۇمىت ارتىپ، جاڭا داۋىردەگى جاڭا جورىقتا جۇمىسشى ۇيىمى قىزمەتىن ويداعىداي ىستەۋ جونىندە ايقىن تالاپتار قويدى. سوزدە پارتيا ورتالىق كوميتەتىنىڭ جۇمىسشى تابى مەن قالىڭ ەڭبەكشى قاۋىم جونىندەگى شىنايى قامقورلىعى، جۇمىسشىلار قوزعالىسى ىستەرى مەن جۇمىسشى ۇيىمى قىزمەتىنە ايرىقشا ٴمان بەرۋى قامتىلعان، اسا كۇشتى ساياسي سيپاتقا، يدەيالىق سيپاتقا، ستراتەگيالىق سيپاتقا، جەتەكشىلىك سيپاتقا يە، ونى مۇقيات ۇيرەنىپ، ٴتۇسىنىپ، ىشكەرىلەي دايەكتىلەندىرۋ، تياناقتاندىرۋ كەرەك. ٴبىز شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋدىڭ جاڭا جورىعىندا تاعى دا تىڭ ۇلەس قوسىپ، تاعى دا شۇعىلالى ناتيجە جاراتۋىمىز كەرەك.
جۇڭحۋا مەملەكەتتىك باس جۇمىسشى ۇيىمىنىڭ ٴتوراعاسى ۋاڭ دۇڭميڭ جينالىستا ٴسوز سويلەدى.
جينالىس ايبىندى «ينتەرناتسيونال ٴانى» ٴۇنى ىشىندە اياقتادى.
جۇڭگو كوممۋنيستىك پارتياسى ورتالىق كوميتەتى شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتىندەگى، مەملەكەتتىك كەڭەستەگى، مەملەكەتتىك ساياسي كەڭەستەگى، ورتالىق اسكەري ىستەر كوميتەتىندەگى قاتىستى باسشى جولداستار، كەزىندە مەملەكەتتىك باس جۇمىسشى ۇيىمىندا باسشىلىق مىندەت وتەگەن ساقا جولداستار جينالىسقا قاتىناستى.
ورتالىقتاعى پارتيا، ۇكىمەت، ارميا ورىندارىنىڭ، بۇقارالىق ۇيىمداردىڭ قاتىستى تاراۋلارىنداعى جانە بەيجيڭ قالاسىنداعى جاۋاپتى جولداستار، ٴارقايسى دەموكراتيالىق پارتيا ـ توپتاردىڭ ورتالىق كوميتەتتەرىنىڭ، مەملەكەتتىك ساۋدا ـ ونەركاسىپشىلەر بىرلەستىگىنىڭ جاۋاپتىلارى جانە پارتيادا، توپتا جوق قايراتكەرلەردىڭ ۋاكىلدەرى، ولكە دارەجەلى باس جۇمىسشى ۇيىمدارىنىڭ ۋاكىلدەرى، 2025 ـ جىلعى مەملەكەتتىك ەڭبەك ەرلەرى مەن وزات قىزمەتكەرلەر، بۇرىنعى كەزەكتى مەملەكەتتىك ەڭبەك ەرلەرى مەن وزات قىزمەتكەرلەردىڭ ۋاكىلدەرى قاتارلىلاردان 3000نان استام ادام جينالىسقا قاتىناستى.
