4 ـ ايدىڭ 16 ـ كۇنى تۇستەن بۇرىن مالايزيانىڭ ەڭ جوعارى مەملەكەت باسشىسى يبىراھيم مالايزيانىڭ مەملەكەت پاتشا ورداسىندا جۇڭگونىڭ مەملەكەت ٴتوراعاسى شي جينپيڭمەن كەزدەستى.
سۋرەتتى شينحۋا اگەنتتىگىنىڭ ٴتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 4 ـ ايدىڭ 16 ـ كۇنى كۋالا ـ لۋمپۋردان بەرگەن حابارى (تىلشىلەر ياڭ يجۇن، سۇن حاۋ). 4 ـ ايدىڭ 16 ـ كۇنى تۇستەن بۇرىن مالايزيانىڭ ەڭ جوعارى مەملەكەت باسشىسى يبىراھيم مالايزيانىڭ مەملەكەت پاتشا ورداسىندا جۇڭگونىڭ مەملەكەت ٴتوراعاسى شي جينپيڭمەن كەزدەستى.
4 ـ ايداعى كۋالا ـ لۋمپۋردا كۇن ساۋلەسىن ەمىرەنە توگىپ، بار الاپ جاسىل جەلەك جامىلدى.
يبىراھيم مەملەكەت پاتشا ورداسى الاڭىندا شي جينپيڭگە ارناپ سالتاناتتى قارسى الۋ سالتىن وتكىزدى.
شي جينپيڭ وتىرعان اۆتوكولىك جەتكەندە، يبىراھيم مەن مالايزيا زۇڭليى انۋار اۆتوكولىكتەن تۇسەتىن جەردە قىزۋ قارسى الدى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىقتى، اسكەري وركەستر جۇڭگو مەن مالايزيا ەكى ەلدىڭ مەملەكەت ٴانىن ورىندادى، 21 رەت قۇرمەت ساليۋتى اتىلدى. شي جينپيڭ قۇرمەت قاراۋىلىن كوزدەن كەشىردى. ەكى ەلدىڭ مەملەكەت باسشىلارى مەملەكەت پاتشا ورداسىنىڭ ۇلكەن زالىنا كىرىپ، ەكى جاقتان سەرىك بولىپ كەلگەندەرمەن قول الىسىپ قۇرمەت ٴبىلدىردى.
قارسى الۋ سالتىنان كەيىن شي جينپيڭ يبىراھيممەن كەزدەستى.
شي جينپيڭ بىلاي دەپ اتاپ كورسەتتى: جۇڭگو مەن مالايزيا — جاقسى كورشى، جاقسى دوس، جاقسى سەرىك، ۇنەمى بارىس ـ كەلىس جاساسىپ، ٴبىر وتباسىنىڭ ادامدارىنداي تاتۋ بولىپ كەلەدى. ەكى ەل قارىم ـ قاتىناسى قۇلاشىن كەڭ جايعان جارتى عاسىردى باستان وتكەرىپ، اناعۇرلىم كوركەم بولاشاقتى قارسى الۋدا. مەن ەڭ جوعارى مەملەكەت باسشىسى يبىراھيممەن بىرگە قۇلشىنىپ، جۇڭگو مەن مالايزيا قارىم ـ قاتىناسىنىڭ ۇزاق مەزگىل ورنىقتى دامۋىنا جەتەكشىلىك ەتىپ، جوعارى دەڭگەيدەگى ستراتەگيالىق سيپاتقا يە جۇڭگو — مالايزيا تاعدىرلاس ورتاق تۇلعاسىن بىرگە تۇلعالاپ، تاتۋ كورشى، دوس بولۋدىڭ، ىنتىماقتاسا سەلبەسۋدىڭ جاڭا تاراۋىن جازىپ، جۇڭگو — مالايزيا قارىم ـ قاتىناسىنىڭ جاڭا ”التىن 50 جىلىن“ باستاۋدى قالايمىن.
شي جينپيڭ بىلاي دەپ باسا دارىپتەدى: جۇڭگو مەن مالايزيا ەكى جاق ساياسي جاقتاعى ٴوزارا سەنىمدىلىكتى ۇزدىكسىز تەرەڭدەتىپ، ٴبىر ـ ٴبىرىنىڭ وزەكتى مۇددەسىنە جانە ٴجىتى قاداعالاپ وتىرعان كەلەلى ىستەرىنە ساياتىن ماسەلەلەردە ٴبىرىن ـ ٴبىرى قولداۋى كەرەك. دامۋ ستراتەگياسىن ٴتۇيىلىستىرۋدى تەرەڭدەتىپ، باسىمدىقتار ارقىلى ٴوزارا تولىقتاپ، ٴوزارا پايدا جەتكىزىپ تەڭ يگىلىككە كەنەلىپ، وسىزامانداندىرۋ جولىمەن قول ۇستاسا ويداعىداي ٴجۇرۋى كەرەك. ”ەكى ەل، ەكى باقشا“، شىعىس تەڭىز جاعالاۋى تەمىر جولى سياقتى كەلەلى نىسانداردى ويداعىداي قۇرىپ، جاساندى زەردە، سيفرلى ەكونوميكا، جاسىل ەكونوميكا سياقتى بولاشاقتىق كاسىپ سالاسى سەلبەستىگىن جەدەل جەتىلدىرۋ كەرەك. جۇڭگو جاق مالايزيانىڭ اناعۇرلىم كوپ ساپالى اۋىل شارۋاشىلىعى ونىمدەرىنىڭ جۇڭگو بازارىنا كىرۋىن قارسى الادى، جۇڭگو كاسىپورىندارىن مالايزياعا بارىپ قارجى قوسىپ، شارۋاشىلىقتى گۇلدەندىرۋگە ىنتالاندىرادى. مالايزيا جاقپەن ”رۋجيا ـ ٴىسلام وركەنيەتتەرى تىلدەسۋىن“ ىلگەرىلەتىپ، ٴتىپتى دە كوپ مادەنيەت، ساياحات، وقۋ ـ اعارتۋ سەلبەستىگىن ورىستەتىپ، ەكى ەل حالقىنىڭ تىلەكتەرىنىڭ توعىسۋىن كۇشەيتۋدى قالايدى. جۇڭگو جاق مالايزيانىڭ شىعىس وڭتۇستىك ازيا ەلدەرى وداعىنىڭ كەزەكتى ٴتوراعا ەلى قىزمەتىن اتقارۋىن قولدايدى، مالايزيا جاقپەن بىرگە الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن تياناقتاندىرىپ، جەر شارىنىڭ وڭتۇستىگىنىڭ بىرلەسىپ ٴوزىن الۋەتتەندىرۋىن، بىرگە دامۋىن ىلگەرىلەتىپ، وڭىرگە جانە دۇنيە جۇزىنە ٴتىپتى دە كوپ ايقىندىلىق جانە وڭ ەنەرگيا ازىرلەۋدى قالايدى.
يبىراھيم مىنالاردى ٴبىلدىردى: ٴتوراعا شي جينپيڭنىڭ مالايزياعا مەملەكەتتىك ساپاردا بولۋى — ەكى ەل قارىم ـ قاتىناسىنداعى ٴبىر ٴىرى ٴىس، بۇل مالايزيا — جۇڭگو قارىم ـ قاتىناسىنىڭ جوعارى دەڭگەيىن تولىق ايگىلەيدى. بىلتىر 9 ـ ايدا جۇڭگودا ٴساتتى ساپاردا بولعانىم قازىرگە دەيىن انىق ەسىمدە. ٴتوراعا شي جينپيڭنىڭ وسى رەتكى مالايزياداعى ساپارىنىڭ ەكى ەل قارىم ـ قاتىناسىن جان ـ جاقتى جوعارىلاتىپ، ٴارقايسى سالاداعى سەلبەستىكتىڭ قارىشتاپ دامۋىن ىلگەرىلەتە تۇسەتىندىگىنە سەنەمىن. جۇڭگو ادام سۇيىنەتىن دامۋ جەتىستىكتەرىنە قول جەتكىزدى، بۇل — ٴتوراعا شي جينپيڭنىڭ كورەگەندىگىنىڭ جانە جۇڭگو حالقىنىڭ قاجىرلى ەڭبەگىنىڭ ارقاسى. مالايزيا جۇڭگومەن قارىم ـ قاتىناسقا ايرىقشا ٴمان بەرەدى، حالىقارالىق جاعدايدا مەيلى قانداي وزگەرىستەر بولسا دا، قول ۇستاسا بىرگە ىلگەرىلەپ، سەلبەسىپ تەڭ يگىلىككە كەنەلىپ، جوعارى دەڭگەيدەگى ستراتەگيالىق سيپاتقا يە تاعدىرلاس ورتاق تۇلعا قۇرىلىسىن ىلگەرىلەتەدى. مالايزيا جاق ٴوڭىر ەكونوميكاسىنىڭ ٴبىر تۇلعالانۋىنا ٴمان بەرەدى، ”ٴبىر بەلدەۋ، ٴبىر جول“ باستاماسىن باتىل قولدايدى، جۇڭگو جاقپەن ساۋدا، قارجى قوسۋ سەلبەستىگىن كۇشەيتىپ، كاسىپ سالاسى تىزبەگىن، قامداۋ تىزبەگىن بىرگە ورنىقتىرىپ، ۇلاستىرۋ، تۇتاستىرۋ دەڭگەيىن جوعارىلاتىپ، وقۋ ـ اعارتۋ، گۋمانيتارلىق ىستەر اۋىس ـ كۇيىسىن كۇشەيتۋدى قالايدى. مالايزيا جاق جۇڭگونىڭ تاياۋدا اشقان ورتالىقتىڭ توڭىرەكتىك قىزمەت ٴماجىلىسىن جوعارى باعالايدى، جۇڭگونىڭ الەمدىك جانە وڭىرلىك سىن ـ سايىسقا توتەپ بەرۋدە ساۋلەلەندىرگەن ماڭىزدى رولىنا باسا ٴمان بەرەدى. شىعىس وڭتۇستىك ازيا ەلدەرى وداعىنىڭ كەزەكتى ٴتوراعا ەلى جانە شىعىس وڭتۇستىك ازيا ەلدەرى وداعى — جۇڭگو قارىم ـ قاتىناسىن سايكەستىرۋشى ەل رەتىندە مالايزيا جاق شىعىس وڭتۇستىك ازيا ەلدەرى وداعى — جۇڭگو قارىم ـ قاتىناسىنىڭ اناعۇرلىم زور دامۋدى جۇزەگە اسىرۋىن ىلگەرىلەتۋگە، بەيبىت، گۇلدەنىپ ـ كوركەيگەن بولاشاقتى بىرگە تۇلعالاۋعا كۇش سالادى.
كەزدەسۋدەن كەيىن شي جينپيڭ يبىراھيم وتكىزگەن قارسى الۋ قوناعاسىنا قاتىناستى.
ساي چي، ۋاڭ ي، ۋاڭ شياۋحۇڭ قاتارلىلار جوعارىداعى قيمىلدارعا قاتىناستى.
