导航切换
  1. اعىمداعى ورىن:
  2. باس بەت
  3. اعىم جاڭالىقتارى
  4. باس حابار
  5. زاڭ - ەرەجە

بۇكىل ەلدەگى ٴار ۇلت حالقىنا كوكتەم مەرەكەسى بايلانىسىمەن ىزگى تىلەك تىلەدى ٴار ۇلت حالقىنا باقىت، اماندىق تىلەدى، ۇلى وتاننىڭ گۇلدەنىپ ـ قۇدىرەتتەنۋىن تىلەدى

日期:2025年01月26日
来源:新疆日报
【字体:

شي جينپيڭ كوكتەم مەرەكەسى قارساڭىندا لياۋنيڭگە بارىپ نەگىزگى ساتىداعى كادرلار مەن بۇقاراعا امانداستى، ولاردان حال سۇرادى

بۇكىل ەلدەگى ٴار ۇلت حالقىنا كوكتەم مەرەكەسى بايلانىسىمەن ىزگى تىلەك تىلەدى ٴار ۇلت حالقىنا باقىت، اماندىق تىلەدى، ۇلى وتاننىڭ گۇلدەنىپ ـ قۇدىرەتتەنۋىن تىلەدى

ساي چي تەكسەرۋدە بىرگە بولدى


  1 ـ ايدىڭ 22 ـ كۇنىنەن 24 ـ كۇنىنە دەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ قاقاعان ايازدا لياۋنيڭگە بارىپ نەگىزگى ساتىداعى كادرلار مەن بۇقاراعا امانداستى، ولاردان حال سۇرادى. سۋرەتتە: 1 ـ ايدىڭ 22 ـ كۇنى تۇستەن كەيىن شي جينپيڭ حۋلۋداۋ قالاسى سۇيجۇڭ اۋدانى ميڭشۇي مانزۋ اۋىلى جۋجياگوۋ قىستاعىندا قىزمەت تەكسەرگەندە، قىستاق تۇرعىندارىمەن ىقىلاسپەن اڭگىمەلەسىپ، كوپشىلىكتەن شىنايى حال سۇرادى جانە ولارعا كوكتەم مەرەكەسى بايلانىسىمەن ىزگى تىلەك تىلەدى.

□ سۋرەتتى شينحۋا اگەنتتىگىنىڭ ٴتىلشىسى جاي جيانلان تۇسىرگەن


  1 ـ ايدىڭ 22 ـ كۇنىنەن 24 ـ كۇنىنە دەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ قاقاعان ايازدا لياۋنيڭگە بارىپ نەگىزگى ساتىداعى كادرلار مەن بۇقاراعا امانداستى، ولاردان حال سۇرادى. سۋرەتتە: 1 ـ ايدىڭ 23 ـ كۇنى تۇستەن بۇرىن شي جينپيڭ شىنياڭ دادۇڭ قوسىمشا ازىق ـ تۇلىك ساۋدا سارايىندا قىزمەت تەكسەرگەندە، دۇكەن قوجايىندارىمەن جانە قاريدارلارمەن ىقىلاسپەن اڭگىمەلەسىپ، كوپشىلىككە كوكتەم مەرەكەسى بايلانىسىمەن ىزگى تىلەك تىلەدى.

□ سۋرەتتى شينحۋا اگەنتتىگىنىڭ ٴتىلشىسى شيە حۋانچى تۇسىرگەن

  شينحۋا اگەنتتىگىنىڭ 1 ـ ايدىڭ 24 ـ كۇنى شىنياڭنان بەرگەن حابارى. جۇڭحۋا ۇلتىنىڭ ٴداستۇرلى مەرەكەسى كوكتەم مەرەكەسى قارساڭىندا جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ قاقاعان ايازدا لياۋنيڭگە بارىپ نەگىزگى ساتىداعى كادرلار مەن بۇقاراعا امانداستى، ولاردان حال سۇرادى، بۇكىل ەلدەگى ٴار ۇلت حالقىنىڭ جانە شياڭگاڭدىق باۋىرلاستاردىڭ، اۋمىندىق باۋىرلاستاردىڭ، تايۋاندىق باۋىرلاستاردىڭ، شەتەلدەگى چياۋمين باۋىرلاستاردىڭ مەرەكەسىن قۇتتىقتادى! ەل ٴىشى ـ سىرتىنداعى جۇڭحۋا پەرزەنتتەرىنىڭ دەندەرىنىڭ ساۋ، قىزمەتتەرىنىڭ تابىستى، وتباسىلارىنىڭ باقىتتى بولۋىن، جىلان جىلىنىڭ قۇتتى بولۋىن تىلەدى! ۇلى وتانىمىزدىڭ ەلى امان، جۇرتى تىنىش بولۋىن، مولشىلىققا كەنەلۋىن، گۇلدەنىپ ـ قۇدىرەتتەنۋىن تىلەدى!

  1 ـ ايدىڭ 22 ـ كۇنىنەن 24 ـ كۇنىنە دەيىن شي جينپيڭ لياۋنيڭ ولكەلىك پارتكومنىڭ شۋجيى حاۋ پىڭنىڭ جانە ولكە باستىعى لي لىچىڭنىڭ سەرىك بولۋىندا، حۋلۋداۋ، شىنياڭ، بىنشي سياقتى جەرلەرگە بارىپ، اۋىل ـ قىستاقتاردى، بازارلاردى، الەۋمەتتىك اۋماقتاردى، كاسىپورىنداردى ىشكەرىلەي ارالاپ قىزمەت تەكسەرىپ، نەگىزگى ساتىداعى كادرلار مەن بۇقاراعا پارتيا ورتالىق كوميتەتىنىڭ قامقورلىعى مەن تىلەگىن جەتكىزدى.

  1 ـ ايدىڭ 22 ـ كۇنى تۇستەن كەيىن شي جينپيڭ حۋلۋداۋ قالاسىنا جەتىپ، اۆتوكولىكپەن ٴبىر ساعاتقا تاياۋ ۋاقىت ٴجۇرىپ سۇيجۇڭ اۋدانىنىڭ ميڭشۇي مانزۋ اۋىلى جۋجياگوۋ قىستاعىنا باردى. بىلتىر 8 ـ ايدا بۇل ارا اۋىر تاسقىن اپاتىنا ۇشىراپ، قىس كىرۋدەن ىلگەرى قىستاقتاعى 41 وتباسى قايتا سالىنعان جاڭا تۇراقتارىنا كوشىپ كىرگەن بولاتىن. شي جينپيڭ قىستاقتىڭ كىرە بەرىسىندە اپاتقا ۇشىراعان اۋماقتى تەكسەرىپ كورىپ، سول كەزدەگى ۇيلەردى سۋ باسۋ جانە قىستاق تۇرعىندارىن كوشىرۋ جاعدايىن ەگجەي ـ تەگجەيلى سۇراپ ۇعىستى، ونان سوڭ قىستاقتىڭ پارتيا مۇشەلەرى مەن بۇقاراعا قىزمەت وتەۋ ورتالىعىنا كەلىپ بەينەكەسكىنمەن، كورمە تاقتامەن ۇشتاستىرىپ، اپاتتان كەيىنگى قالپىنا كەلتىرۋ، قايتا قۇرۋ اياق الىسىن ۇعىسىپ، جەرگىلىكتى ورىنداعى كادرلارعا بۇقارانىڭ ٴوندىرىس ـ تۇرمىسىن، ٴسوزسىز، جاقسى ورنالاستىرىپ، قىستان قىسىلماي وتۋىنە شىنايى كەپىلدىك ەتۋدى تاپسىردى.

  ەگىنشىلىك كالەندارى بويىنشا كىشى جاڭا جىلعا تۋرا كەلگەندىكتەن، بارلىق وتباسى كوكتەم بوساعالىعىن، تەرەزە ويۋىن جاپسىرعان بولاتىن. شي جينپيڭ ىلگەرىندى ـ كەيىندى قىستاق تۇرعىنى جۋ شيسۇننىڭ، ۋاڭ باۋ ـ ۋيدىڭ ۇيىنە بارىپ، ٴۇي قۇرىلىمىن، ساپاسىن جانە مەرەكەلىك بۇيىمداردى دايىنداۋ احۋالىن تەكسەرىپ كورىپ، ۇكىمەتتىڭ قايتا سالىنعان ۇيلەرگە بەرگەن كومەك قاراجاتىنىڭ تياناقتانعان ـ تياناقتانباعاندىعىن، قىستاق تۇرعىندارىنىڭ نەگىزگى كىرىس كوزىنىڭ نە ەكەندىگىن ۇعىستى. ۋاڭ باۋ ـ ۋي وتباسىنداعىلارمەن قورالانا وتىرعان كەزدە ۋاڭ باۋ ـ ۋي باس شۋجيگە: جاڭا ٴۇيىمىز ەڭسەلى دە جارىق، جىلى، مەرەكەلىك بۇيىمداردى تولىق دايىنداپ الدىق، بۇكىل قىستاقتاعىلار شىن جۇرەكتەرىنەن پارتياعا العىس ايتادى، باس شۋجيگە العىس ايتادى، ـ دەدى. شي جينپيڭ ونان: تاعى قانداي تالابىڭ مەن ٴۇمىتىڭ بار؟ ـ دەپ سۇراعاندا، ول: اناعۇرلىم جاقسى تۇرمىس كەشىرۋدى ٴۇمىت ەتەمىن، ـ دەدى. شي جينپيڭ قۋانىشتى تۇردە: سىزدەردىڭ ۇمىتتەرىڭىز ٴبىزدىڭ دە ٴۇمىتىمىز، پارتيا مەن ۇكىمەت ماڭگى حالىق بۇقاراسىنىڭ پارمەندى سۇيەنىشى، ـ دەپ جاۋاپ قايتاردى.

  قىستاقتان اتتاناردا قىستاق تۇرعىندارى تۇس ـ تۇستان باس شۋجيگە امانداستى، شاپالاق ٴۇنى، الاقايلاعان ٴۇن شاعىن تاۋلى قىستاقتى دۋمانعا بولەدى. شي جينپيڭ اۋىلداستارعا بىلاي دەدى: بىلتىر جىل باسىنان بەرى، سىزدەردىڭ بۇل ارانى قامتىعان ەلىمىزدىڭ ٴىشىنارا جەرلەرى جاراتىلىستىق اپاتقا ۇشىرادى. پارتيامىز حالىقتى بارىنەن جوعارى قويۋعا تاباندى بولىپ، كادرلار مەن بۇقارا ٴبىر نيەتپەن ىنتىماقتاسىپ، اپاتقا قارسى اتتانۋدىڭ، اپاتتان قۇتقارۋدىڭ كەلەلى جەڭىسىنە قول جەتكىزدى. شات مەرەيلى كوكتەم مەرەكەسى تاياپ قالدى، مەن پارتيا ورتالىق كوميتەتى اتىنان اپاتقا ۇشىراعان بارلىق بۇقارادان جانە اپاتتان كەيىنگى قالپىنا كەلتىرۋ، قايتا قۇرۋ ٴبىرىنشى شەبىندە ەرلىكپەن شايقاس جاساپ جاتقان بارلىق كادرلار مەن بۇقارادان شىنايى حال سۇرايمىن جانە كوكتەم مەرەكەسى بايلانىسىمەن ىزگى تىلەك تىلەيمىن!

  شىنياڭ دادۇڭ قوسىمشا ازىق ـ تۇلىك ساۋدا سارايىنىڭ تاريحى ۇزاق، ەرەكشەلىككە يە كوكتەم مەرەكەسىندىك تاۋارلار كوزدىڭ جاۋىن الادى. 1 ـ ايدىڭ 23 ـ كۇنى تۇستەن بۇرىن شي جينپيڭ وسى اراعا كەلىپ، بىرنەشە دۇكەندى تەكسەرىپ كورىپ، دۇكەن قوجايىندارىمەن جانە قاريدارلارمەن ٴالسىن ـ ٴالى اڭگىمەلەسىپ، مەرەكە كەزىندەگى بازاردىڭ قامداۋ جاعدايىن ەگجەي ـ تەگجەيلى ۇعىستى. كوپشىلىك باس شۋجيدى كورىپ ايرىقشا تەبىرەنىپ، جان ـ جاقتان ”باس شۋجي سالەمەتسىز بە!“ ـ دەدى. شي جينپيڭ كوپشىلىككە: ”كوجە ـ قاتىق“، ”استىق“، ”جەمىس ـ جيدەك“ حالىق تۇرمىسىنداعى ٴىرى ٴىس، قازىر زات مولشىلىق، كوكتەم مەرەكەسىندەگى باس قوسۋدا كوپشىلىكتى تىپتەن جاقسى تاماقتاندىرۋ، اقاۋسىز تاماقتاندىرۋ كەرەك، ـ دەدى.

  وسىدان سوڭ، شي جينپيڭ شوعىرلى جاڭالانعان دادۇڭ رايونى چاڭان ٴمالىسى چاڭان شاعىن اۋماعىنا بارىپ، ٴتورت ۇرپاق بىرگە تۇرىپ كەلە جاتقان لاڭ سۋلاننىڭ وتباسىنا كىرىپ امانداستى. شاعىن اۋماق جاڭالانعاننان كەيىن قونىس ورتاسىنىڭ كورنەكتى جاقسارعانىن، ٴار جاقتاعى قىزمەت وتەۋ قامتاماسىزدىعىنىڭ تىندىرىمدى ىستەلگەنىن بىلگەن شي جينپيڭ مۇنى تۇراقتاندىردى. ول بىلاي دەپ اتاپ كورسەتتى: قالانى جاڭالاۋدا جەرگىلىكتى جاعدايعا قاراي ىستەپ، الەۋمەتتىك اۋماق قۇرىلىسىمەن ۇشتاستىرۋ كەرەك، بارلىعىندا حالىققا قولايلى بولۋدى، حالىققا پايدالى بولۋدى، حالىقتى الاڭسىز ەتۋدى كوزدەۋ، اسىرەسە، قارتتار مەن بالالارعا ٴتىپتى دە جاقسى كوڭىل ٴبولۋ جانە ولاردى قورعاۋ كەرەك.

  الەۋمەتتىك اۋماقتىڭ پارتيا مۇشەلەرى مەن بۇقاراعا قىزمەت وتەۋ ورتالىعىندا كەيبىر الەۋمەتتىك اۋماق تۇرعىندارى كوكتەم بوساعالىعىن جازىپ، بالالار جۇڭگو تۇيىنشەگىن جاساپ جاتىپتى. شي جينپيڭ ولاردىڭ اراسىنا بارىپ، ولاردىڭ تۋىندىلارىن ٴالسىن ـ ٴالى القاپ، ولاردى جۇڭحۋانىڭ تاڭداۋلى ٴداستۇرلى مادەنيەتىن اناعۇرلىم جاقسى جالعاستىرۋعا، اسقاقتاتۋعا ىنتالاندىردى. شي جينپيڭ تاعى الەۋمەتتىك اۋماقتاعى زەينەتكە شىققانداردىڭ توپتىق ورىنداعان سىبىزعى كۇيىن قىزىعا تاماشالادى. ول كوپشىلىككە تەرەڭ سۇيىسپەنشىلىكپەن بىلاي دەدى: كوكتەم مەرەكەسىن جاقسى وتكىزۋ جاڭا ٴبىر جىلدا تاماشا باستاما بولاتىندىعىن كورسەتەدى، بارلىق وتباسىنىڭ باقىتتى تۇرمىس كەشىرۋى، ۇلكەن ـ كىشىنىڭ قۋانىشقا بولەنۋى ٴومىردىڭ كوركەم كارتيناسى. ٴبىز بىرگە قۇلشىنىپ، وسى كوركەم كارتينانى بارعان سايىن ايشىقتاي ٴتۇسۋىمىز كەرەك.

  شاعىن اۋماقتىڭ مادەنيەت الاڭىندا تۇرعىندار شاتتىققا تولى ياڭگى ءبيىن بيلەپ جاتتى. شي جينپيڭ كوپشىلىككە قول بۇلعاپ قۇرمەت ٴبىلدىرىپ، كوپشىلىكتىڭ مەرەكەلەرىن قۇتتىقتادى.

  1 ـ ايدىڭ 23 ـ كۇنى تۇستەن كەيىن، شي جينپيڭ بىنشيگە بارىپ، انگاڭ توبىنا قاراستى بىنگاڭ تاقتايشا ماتەريالداردى سۋىقتاي پىشىندەۋ باس زاۆودىنىڭ 3 ـ سۋىقتاي پىشىندەۋ زاۆودىندا قىزمەت تەكسەردى. ول كاسىپورىننىڭ شوعىرلى مەڭگەرۋ ورتالىعىندا شوعىرلى مەڭگەرۋ زەردەلى جۇيەسىنىڭ اينالىم جۇمىسىن تەكسەرىپ كوردى، سەحتا سۋىقتاي پىشىندەۋ جۇمىس ٴتارتىبىن، تەحنولوگيادا جاڭالىق اشۋدى، ٴونىم يقۋاتىن ۇعىستى ٴارى ەڭبەك ەرلەرىنە، جاس تەحنولوگيا تىرەكتىلەرىنە، ٴبىرىنشى شەپتەگى جۇمىسشى ـ قىزمەتكەرلەر ۋاكىلدەرىنە ىقىلاسپەن امانداستى. شي جينپيڭ بىلاي دەپ اتاپ كورسەتتى: جاساۋ كاسىبىندە جوعارى دەڭگەيلىلەندىرۋ، زەردەلىلەندىرۋ، جاسىلداندىرۋ بەتالىسىنا تاباندى بولىپ، ونىمدەردىڭ عىلىم ـ تەحنولوگيالىق قامتىمىن جانە ۇستەمە قۇنىن ۇزدىكسىز جوعارىلاتىپ، انگاڭ سياقتى مەملەكەت مەنشىگىندەگى ٴىرى كاسىپورىندار جۇڭگو ۇلگىسىندەگى وسىزامانداندىرۋعا كوبىرەك ۇلەس قوسۋى كەرەك.

  1 ـ ايدىڭ 24 ـ كۇنى تۇستەن بۇرىن شي جينپيڭ لياۋنيڭ ولكەلىك پارتكوم مەن ولكەلىك ۇكىمەتتىڭ قىزمەت مالىمەتىن تىڭداپ، لياۋنيڭنىڭ ٴتۇرلى قىزمەتتەردە قول جەتكىزگەن ناتيجەلەرىن تۇراقتاندىرىپ، لياۋنيڭنىڭ جاڭا داۋىردەگى شىعىس تەرىستىكتىڭ جاپپاي گۇلدەنۋىن ىلگەرىلەتۋدە تىڭ سەرپىلىسكە قول جەتكىزۋ جاعىندا باتىلدىقپەن الدا ٴجۇرىپ، جۇڭگو ۇلگىسىندەگى وسىزامانداندىرۋدىڭ لياۋنيڭ تاراۋىن قۇلشىنا جازۋىن ٴۇمىت ەتتى.

  شي جينپيڭ بىلاي دەپ اتاپ كورسەتتى: لياۋنيڭنىڭ ونەركاسىپ جۇيەسى ٴبىرشاما كەمەلدى، ٴداستۇرلى كاسىپ سالالارىنىڭ تيبىن جاڭالاپ، دارەجەسىن ٴوسىرۋدى جانە ستراتەگيالىق جاڭادان گۇلدەنگەن كاسىپ سالالارىن جەتىلدىرۋدى، زورايتۋدى ٴبىر تۇتاس جوسپارلاپ، وسىزاماندانعان كاسىپ سالاسى جۇيەسىن جەدەل قۇرۋ كەرەك. ٴداستۇرلى كاسىپ سالالارىندا كاسىپ سالاسى نەگىزىن قايتا سومداۋدى جانە كەلەلى تەحنولوگيا ـ جابدىقتار جاعىندا قامال الۋدى كۇشەيتىپ، وزەكتى باسەكەلىك قۋاتتى ۇزدىكسىز جوعارىلاتۋ كەرەك. ستراتەگيالىق جاڭادان گۇلدەنگەن كاسىپ سالالارىن جەتىلدىرۋدىڭ، زورايتۋدىڭ ٴتۇيىنى عىلىم ـ تەحنولوگيادا جاڭالىق اشۋ مەن كاسىپ سالاسىندا جاڭالىق اشۋدىڭ تەرەڭ توعىسۋىن كۇشەيتىپ، جاڭاشا وندىرگىش كۇشتەردى جەرگىلىكتى جاعدايعا قاراي دامىتۋدا. دامۋ مىندەتى اۋىر بولعان سايىن ەكولوگيالىق ورتانى قورعاۋعا سولعۇرلىم باسا نازار اۋدارىپ، ەكونوميكالىق، قوعامدىق دامۋدىڭ جاپپاي جاسىل تيپ جاڭالاۋىن ىلگەرىلەتۋ كەرەك.

  شي جينپيڭ بىلاي دەپ باسا دارىپتەدى: شىعىس تەرىستىكتى جاپپاي گۇلدەندىرۋدە، سايىپ كەلگەندە، رەفورما جاساۋعا، ەسىك اشۋعا سۇيەنۋ كەرەك. رەفورمانى يگەرۋدە نازاردى ماسەلەگە اناعۇرلىم شوعىرلاندىرىپ، ٴتۇيىندى كورنەكتىلەندىرىپ، قيىن تۇيىندەردى شەشىپ، زاڭمەن باسقارىلاتىن ۇكىمەت قۇرۋ، شارۋاشىلىق ـ ساۋدا ورتاسىن ساپالىلاندىرۋ، ”ەكىدەن تيتتەي دە اۋىتقىماۋعا“ تاباندى بولۋ جانە ونى تياناقتاندىرۋ، جۇڭگوشا وسى زامانعى كاسىپورىن ٴتۇزىمىن كەمەلدەندىرۋ سياقتى جاقتاردا كوپ كۇش سالۋ كەرەك. قازىر مەملەكەتىمىزدىڭ اشىلعان ەسىگى بارعان سايىن ايقارا اشىلۋدا، ٴار دارەجەلى كادرلار ەسىك اشۋ شارت ـ جاعدايىندا ماسەلەنى ويلاۋ، شەشىم جاساۋ، قىزمەتتى يگەرۋ قابىلەتىن جوعارىلاتۋى كەرەك.

  شي جينپيڭ بىلاي دەپ اتاپ كورسەتتى: لياۋنيڭنىڭ اۋىل شارۋاشىلىق بايلىعى مول، دامۋ نەگىزى ٴبىرشاما جاقسى، قالا مەن اۋىلدىڭ توعىسا دامۋىنا تاباندى بولىپ، اۋدان ورتالىقتارىن ماڭىزدى دانەكەر ەتكەن جاڭاشا قالا ـ قالاشىقتاندىرۋ قۇرىلىسىن ىلگەرىلەتىپ، اۋدان، اۋىل، قىستاقتاردىڭ الەۋمەتتىك بايلىق ورنالاسۋى مەن كاسىپ سالاسى تىزبەگى ورنالاسىمىن ساپالىلاندىرىپ، اۋىل ـ قىستاقتى جاپپاي گۇلدەندىرۋدى تىڭعىلىقتى ىلگەرىلەتۋ كەرەك. ”1000 قىستاق ۇلگى كورسەتۋ، 10 مىڭ قىستاقتى رەتتەۋ ـ وڭاۋ ينجەنەرياسى“ تاجىريبەسىن ۇيرەنىپ، قولدانىپ، ٴىس جۇزىندىكپەن بايلانىستىرىپ، ەگجەي ـ تەگجەيلى، ناقتى يگەرىپ، ۇزدىكسىز قاجىماي كۇش سالۋعا تاباندى بولۋ كەرەك. جاۋاپكەرشىلىكتى ايقىنداپ، تۇبىنە، شەگىنە دەيىن جەتكىزىپ، ىسكە، ادامعا كوز جەتكىزە وتىرىپ نەگىزگى ساتىنى باسقارۋدى ويداعىداي يگەرۋ كەرەك.

  شي جينپيڭ بىلاي دەپ باسا دارىپتەدى: مادەنيەتتە وزىنە سەنۋدى، ٴوزىن الۋەتتەندىرۋدى ىلگەرىلەتىپ، سوتسياليستىك رۋحاني وركەنيەت قۇرىلىسىن كۇشەيتۋدە ٴار دارەجەلى ورىنداردىڭ بارلىعى ماڭىزدى جاۋاپكەرشىلىك ارقالايدى. مادەنيەت ٴتول جاسامپازدىق قۋاتىن قۇلشىنا جوعارىلاتىپ، اناعۇرلىم كوپ سارا تۋىندى شىعارىپ، مادەنيەت جاعىندا حالىققا تيىمدىلىك جاساۋ ينجەنەرياسىن ىشكەرىلەي اتقارىپ، مادەنيەت قىزمەتكەرلەرى ارقىلى جۇرت تىلەگىن اناعۇرلىم ويداعىداي توعىستىرىپ، حالىققا مەيىر جەتكىزىپ، سەنىمدى كۇشەيتىپ، قالىڭ كادرلار مەن بۇقارانىڭ رەفورما جاساۋ، جاڭالىق اشۋ، گۇلدەنىپ دامۋ ىنتاسى مەن جىگەرىن تولىق قاۋلاتۋ كەرەك.

  شي جينپيڭ بىلاي دەپ اتاپ كورسەتتى: ٴسوز جوق، پارتيانىڭ باسشىلىعىنا تيتتەي دە اۋىتقىماي تاباندى بولىپ، بۇلجىماي پارتيانى جاپپاي قاتاڭ باسقارۋ كەرەك. پارتيا ۇيىمدارىنىڭ ساياسي يقۋاتى مەن ۇيىمدىق يقۋاتىن كۇشەيتىپ، ستيلى پاك، سالتى دۇرىس ساياسي ەكولوگيا قالىپتاستىرىپ جانە ونى ساقتاپ، پارتيا مۇشەلەرى مەن كادرلاردى ادال، كىرشىكسىز بولۋعا، جاۋاپكەرشىلىك ارقالاۋعا تاربيەلەۋ، جەتەكتەۋ كەرەك، وسىلاردى ٴارقانداي ۋاقىتتا، ٴسوزسىز، مىقتى يگەرۋ كەرەك. ورتالىقتىڭ سەگىز ٴتۇرلى بەلگىلەمەسىنىڭ رۋحىن جانە ونى اتقارۋدىڭ ەگجەي ـ تەگجەيلى ەرەجەسىن ىشكەرىلەي دايەكتىلەندىرىپ، ٴار دارەجەلى كادرلاردىڭ شىن مانىندە شىندىققا جۇگىنىپ ناقتى ٴىس ىستەۋىن، پاك، تارتىپشەڭ بولۋىن ىلگەرىلەتۋ كەرەك.

  شي جينپيڭ سوڭىندا بىلاي دەپ باسا دارىپتەدى: كوكتەم مەرەكەسى تاياپ قالدى، ٴار دارەجەلى پارتكومدار مەن ۇكىمەتتەر قيىنشىلىعى بار بۇقاراعا كوڭىل ٴبولۋ، كوكتەم مەرەكەسى تاسىمالىن ورنالاستىرۋ، بازار قامداۋىن قامتاماسىز ەتۋ، مادەنيەت تۇرمىسىن بايىتۋ سياقتى قىزمەتتەردى تىڭعىلىقتى تۇردە ويداعىداي ىستەپ، ٴوندىرىس حاۋىپسىزدىگىن كۇشەيتىپ، حالىق بۇقاراسىنىڭ كوڭىلدى، تىنىش، بەرەكەلى مەرەكە وتكىزۋىنە شىنايى كەپىلدىك ەتۋى كەرەك.

  جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ساي چي قىزمەت تەكسەرۋدە بىرگە بولدى.

  حى ليفىڭ جانە ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار قىزمەت تەكسەرۋدە بىرگە بولدى.