11 ـ ايدىڭ 26 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ دياۋيۇيتاي مەملەكەتتىك قوناق ۇيىندە سينگاپۋردىڭ مەملەكەت ىستەرى اقىلشىسى لي شيانلۇڭمەن كەزدەستى.
□ سۋرەتتى شينحۋا اگەنتتىگىنىڭ ٴتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 11 ـ ايدىڭ 26 ـ كۇنى بەيجيڭنەن بەرگەن حابارى (تىلشىلەر ساۋ جيايۋە، فىڭ شينران). 11 ـ ايدىڭ 26 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ دياۋيۇيتاي مەملەكەتتىك قوناق ۇيىندە سينگاپۋردىڭ مەملەكەت ىستەرى اقىلشىسى لي شيانلۇڭمەن كەزدەستى.
شي جينپيڭ لي شيانلۇڭنىڭ سينگاپۋر زۇڭليى مىندەتىن وتەگەن كەزدە سينگاپۋردى باستاپ كورنەكتى تابىسقا قول جەتكىزگەندىگىن ٴارى جۇڭگو _ سينگاپۋر سەلبەستىگىنە ۇزاق ۋاقىت كوڭىل بولگەندىگىن جانە قولداۋ كورسەتكەندىگىن بەلسەندى باعالادى. شي جينپيڭ بىلاي دەپ اتاپ كورسەتتى: بىلتىر ٴبىز جۇڭگو مەن سينگاپۋردىڭ جان ـ جاقتى، جوعارى ساپالى كورەگەندىككە يە سەرىكتەستىك قارىم ـ قاتىناسىن بىرگە تۇراقتاندىرىپ، ەكى ەل قارىم ـ قاتىناسىنىڭ دامۋىنا ستراتەگيالىق باعىت ايقىندادىق. كەلەر جىلى جۇڭگو مەن سينگاپۋردىڭ ديپلوماتيالىق قارىم ـ قاتىناس ورناتقاندىعىنىڭ 35 جىلدىعى، ەكى جاق جوعارى جىكتەگىلەردىڭ بارىس ـ كەلىسىن جيىلەتىپ، دامۋ ستراتەگيالارىن ٴتۇيىلىستىرۋدى اناعۇرلىم كۇشەيتىپ، ٴار سالاداعى سەلبەستىكتى تەرەڭدەتىپ، ەكى ەل حالقىنا ٴتىپتى دە مول قۇت ـ ىرىس اكەلىپ، ٴوڭىردىڭ بەيبىتشىلىگى، گۇلدەنىپ ـ كوركەيۋى ٴۇشىن اناعۇرلىم زور ۇلەس قوسۋى كەرەك.
شي جينپيڭ بىلاي دەپ اتاپ كورسەتتى: بيىل سۋجوۋ ونەركاسىپ باقشا رايونى اشىلىپ قۇرىلعاندىعىنىڭ 30 جىلدىعى. 30 جىلدا، سۋجوۋ ونەركاسىپ باقشا رايونى ”كولشىك، ويپاڭ جەردەن“ ”جاڭالىق اشۋ قالاسىنا“ اينالىپ، ەكى ەل سەلبەستىگىنىڭ جاندى ۇلگىسىن ورناتتى، سونداي ـ اق سينگاپۋردىڭ جۇڭگونىڭ رەفورما جاساۋىنا، ەسىك اشۋىنا ىشكەرىلەي ات سالىسقاندىعىنىڭ كۋاسى بولدى. جۇڭگو ٴوزىنىڭ مەملەكەت جاعدايىنا ۇيلەسەتىن جۇڭگوشا سوتسياليزم جولىمەن باتىل ٴجۇرىپ، رەفورمانى ونان ارى جاپپاي تەرەڭدەتۋدىڭ، جۇڭگو ۇلگىسىندەگى وسىزامانداندىرۋدى ىلگەرىلەتۋدىڭ جاڭا جورىعىن باستادى. جۇڭگو باستان ـ اياق زەيىن ـ زەردەسىن شوعىرلاندىرىپ ٴوز ٴىسىن جاقسى ىستەۋگە تاباندى بولادى، ەكونوميكانىڭ ۇزاق ۋاقىت جاقسى بولۋىن ساقتاپ، جوعارى ساپالى دامۋدى جۇزەگە اسىرۋعا سەنىمى بار. سينگاپۋر جاقتىڭ ۇزدىكسىز جۇڭگومەن سەلبەستىك جاساسۋدا باستاماشى بولىپ، جۇڭگو _ سينگاپۋر ەكى جاقتى سەلبەستىك مەحانيزم ٴماجىلىسى تۇعىرىنان ويداعىداي پايدالانىپ، كەلەلى سەلبەستىك نىساندارىن جوعارى دەڭگەيدە ويداعىداي جۇرگىزىپ، سيفرلانۋ، جاسىلدانۋ دامۋ ورايىن يگەرىپ، جاڭا داۋىردەگى جۇڭگو _ سينگاپۋر سەلبەستىگىنىڭ جاڭا تاراۋىن ۇزدىكسىز جازۋىن قارسى الادى.
شي جينپيڭ بىلاي دەپ اتاپ كورسەتتى: بۇگىنگى دۇنيە ٴجۇزى 100 جىلدا بولماعان زور وزگەرىس جاعدايىن باستان كەشىرۋدە. حاۋىپ ـ قاتەر جانە سىن ـ سايىستار الدىندا، ٴارقانداي مەملەكەت قارا باسىنىڭ عانا قامىن كۇيتتەپ قالا المايدى، ىنتىماقتاسۋعا، سەلبەسۋگە، اشىق، سيىسىمدى بولۋعا تاباندى بولۋ عانا دۇنيەدەگى دۇرىس جول. جۇڭگو جاق سينگاپۋر جاقپەن بىرگە ناعىز كوپ جاقتىلىقتى امالياتتا ايگىلەپ، ەكونوميكانىڭ جاھاندانۋ اعىمىنا ۇيلەسىپ، حالىقارانىڭ ادىلدىگىن، ادىلەتتىلىگىن قورعاپ، توپتاردىڭ تىرەسۋىن، بولشەكتەنۋىن، قارسىلاسۋىن تەجەپ، ازيا تاعدىرلاس ورتاق تۇلعاسىن قۇرۋدى قالايدى.
لي شيانلۇڭ مىنالاردى ٴبىلدىردى: بىلتىر 3 ـ ايدا مەن جۇڭگودا ٴساتتى ساپاردا بولىپ، ٴتوراعا شي جينپيڭمەن بىرگە سينگاپۋر _ جۇڭگو قارىم ـ قاتىناسىنىڭ ورنىن جان ـ جاقتى، جوعارى ساپالى كورەگەندىككە يە سەرىكتەستىك قارىم ـ قاتىناس دەڭگەيىنە كوتەرۋدى جاريالادىق. ەكى ەل قارىم ـ قاتىناسى اناعۇرلىم كۇشەيىپ، ەكى جاقتى سەلبەستىك مەحانيزم ٴماجىلىسى ٴساتتى اشىلىپ، كوپتەگەن ناقتى ىستەر جەتىستىگى تۋىندادى. سۋجوۋ ونەركاسىپ باقشا رايونى اشىلعان، قۇرىلعان 30 جىلدان بەرى، دامىپ وسىزاماندانعان قالا ـ قالاشىققا اينالىپ، سينگاپۋر مەن جۇڭگونىڭ جوعارى ساپالى سەلبەستىك جاساۋىنىڭ تابىستى امالياتىنا جانە التىن ٴارىپتى ماڭدايشالىعىنا اينالدى، سونىمەن قاتار دۇنيە جۇزىنە جۇڭگونىڭ ۇزدىكسىز رەفورما جاساۋ، ەسىك اشۋ بەينەسىن ايگىلەدى. جۇڭگو تابىستى وسىزاماندانا دامۋ جولىن تاپتى، سينگاپۋر جاق جۇڭگونىڭ بولاشاعىنا تولىق سەنىمدى، جۇڭگونىڭ دامۋدى، گۇلدەنىپ ـ كوركەيۋدى ساقتاپ، دۇنيە ٴجۇزىنىڭ بەيبىتشىلىگى مەن دامۋىنا اناعۇرلىم زور ۇلەس قوساتىندىعىنا سەنەدى. سينگاپۋر جاق جۇڭگومەن سەلبەستىكتى تەرەڭدەتۋگە ۇزدىكسىز كۇش سالىپ، جۇڭگو ۇلگىسىندەگى وسىزامانداندىرۋ بارىسىنا بەلسەندى ات سالىسادى. كەزەكتەگى كۇردەلى حالىقارالىق جاعدايدا، ٴار ەل ۇزاق بولاشاقتىق كوز ايا ۇستانىپ، كوپ جاقتىلىققا تاباندى بولىپ، ىنتىماقتاسا سەلبەسۋگە كۇش سالىپ، حاۋىپ ـ قاتەر، سىن ـ سايىستارعا بىرگە توتەپ بەرىپ، حالىققا اناعۇرلىم ويداعىداي باقىت جاراتۋعا ٴتيىس.
ەكى جاق تاعى جۇڭگو _ امەريكا قارىم ـ قاتىناسى، وڭىرلىك جاعداي سياقتى ورتاق كوڭىل ٴبولىپ وتىرعان كەلەلى ماسەلەلەر جونىندە پىكىر اۋىستىردى.
ۋاڭ ي كەزدەسۋگە قاتىناستى.
