شي جينپيڭ ورتالىق كوميتەت پارتيا مەكتەبى شينجياڭ ۇلتتار كادرلارىن باۋلۋ كلاسى اشىلعاندىعىنىڭ 70 جىلدىعى بايلانىسىمەن ماڭىزدى نۇسقاۋ بەرىپ، بىلاي دەپ باسا دارىپتەدى
شينجياڭ كلاسىن اناعۇرلىم ساپالى، اناعۇرلىم ٴونىمدى اشۋعا قۇلشىنىپ، شينجياڭعا اناعۇرلىم كوپ ادال، كىرشىكسىز، جاۋاپكەرشىلىك ارقالايتىن جوعارى ساپالى كادرلاردى باۋلۋ، جەتىلدىرۋ كەرەك
شينحۋا اگەنتتىگىنىڭ 9 ـ ايدىڭ 21 ـ كۇنى بەيجيڭنەن بەرگەن حابارى. ورتالىق كوميتەت پارتيا مەكتەبى شينجياڭ ۇلتتار كادرلارىن باۋلۋ كلاسى اشىلعاندىعىنىڭ 70 جىلدىعى بايلانىسىمەن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ ماڭىزدى نۇسقاۋ بەرىپ، بىلاي دەپ اتاپ كورسەتتى: ورتالىق كوميتەت پارتيا مەكتەبى شينجياڭ كلاسىن اشۋ _ پارتيا ورتالىق كوميتەتى جاساعان ماڭىزدى شەشىم. 70 جىلدان بەرى شينجياڭ كلاسى باستان ـ اياق پارتيا مەن مەملەكەت ىستەرىنىڭ دامۋ اياق الىسىنا ىلەسىپ العا باسىپ، وزگەشە بارىستى باسىپ ٴوتىپ، پارتياعا ادال، شىنايى، نازاريالىق نەگىزى مىعىم، ساياساتتى يگەرۋى تىڭعىلىقتى، حالىققا باقىت جاراتۋدى مۇرات تۇتقان ٴبىر توپ تاڭداۋلى كادرلاردى باۋلىپ، شينجياڭنىڭ كادرلار قوسىنى قۇرىلىسىن كۇشەيتۋدە، شينجياڭنىڭ ەكونوميكالىق، قوعامدىق دامۋىن ىلگەرىلەتۋدە، شينجياڭنىڭ قوعام ورنىقتىلىعى مەن باياندى تىنىشتىعىن جەبەۋدە ماڭىزدى رول اتقاردى.
شي جينپيڭ بىلاي دەپ باسا دارىپتەدى: جاڭا جورىقتا شينجياڭ كلاسى اشىلعاندىعىنىڭ 70 جىلدىعىن جاڭا باستاما ەتىپ، جاڭا ٴداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، پارتيا 20 ـ قۇرىلتايىنىڭ جانە 20 ـ كەزەكتى ورتالىق كوميتەت ەكىنشى، ٴۇشىنشى جالپى ماجىلىستەرىنىڭ رۋحىن ىشكەرىلەي ۇيرەنىپ، دايەكتىلەندىرىپ، ورتالىقتىڭ شينجياڭ قىزمەتى جونىندەگى 2 ـ رەتكى، 3 ـ رەتكى اڭگىمە ماجىلىستەرىنىڭ رۋحىن جاپپاي دايەكتىلەندىرىپ، جاڭا داۋىردەگى پارتيانىڭ شينجياڭدى باسقارۋ جالپى جوباسىن تولىق، دالمە ـ ٴدال دايەكتىلەندىرىپ، ”پارتيا ٴۇشىن دارىندى تاربيەلەۋ، پارتيا ٴۇشىن كەڭەس بەرۋ“ سىندى پارتيا مەكتەبىنىڭ اۋەلگى ماقساتىن امالياتتا ايگىلەۋدەن جازباي، شينجياڭ كادرلار قوسىنىنىڭ ەرەكشەلىگى مەن قىزمەت ٴىس جۇزىندىك قاجەتىن تىعىز ارقاۋ ەتىپ، ۇدايىلانعان باۋلۋ، اسىرەسە، نەگىزگى باۋلۋ مەحانيزمىن اقاۋسىزداندىرىپ، جاڭا داۋىردەگى پارتيانىڭ جاسامپاز نازارياسىمەن تاعاندى بەكەمدەپ، نەگىزدى جەتىلدىرىپ، زەيىن ـ زەردەنى ۇيىستىرىپ، رۋحتى سومداۋعا قاجىماي تاباندى بولىپ، جۇڭحۋا ۇلتى ورتاق تۇلعا تانىمىن بەكەمدەۋدى كلاس اشۋدىڭ تۇتاس بارىسىنا ٴسىڭىرىپ، ۇلت سالاسىنداعى نەگىزدىك نازاريالىق ماسەلەلەر مەن كەلەلى رەال ماسەلەلەردى زەرتتەۋدى كۇشەيتىپ، شينجياڭ كلاسىن اناعۇرلىم ساپالى، اناعۇرلىم ٴونىمدى اشۋعا قۇلشىنىپ، شينجياڭعا اناعۇرلىم كوپ ادال، كىرشىكسىز، جاۋاپكەرشىلىك ارقالايتىن جوعارى ساپالى كادرلاردى باۋلۋ، جەتىلدىرۋ كەرەك.
شي جينپيڭ مىنالاردى تالاپ ەتتى: ورتالىقتاعى قاتىستى تاراۋلار جەتەكشىلىك ىستەپ سەلبەسەتىن، شينجياڭ قولداۋ كورسەتىپ سايكەسەتىن، ورتالىق كوميتەت پارتيا مەكتەبى نەگىزگى تۇلعالىق رولىن ساۋلەلەندىرەتىن قىزمەت ارناسىن اناعۇرلىم كەمەلدەندىرىپ، ٴار جاقتاعى ساياساتتاردى تياناقتاندىرىپ، شينجياڭ كلاسىن ويداعىداي اشۋعا تاماشا شارت ـ جاعداي جاراتىپ، پارمەندى كەپىلدىك ازىرلەۋ كەرەك.
ورتالىق كوميتەت پارتيا مەكتەبى شينجياڭ ۇلتتار كادرلارىن باۋلۋ كلاسى اشىلعاندىعىنىڭ 70 جىلدىعى جونىندەگى اڭگىمە ٴماجىلىسى 9 ـ ايدىڭ 21 ـ كۇنى بەيجيڭدە اشىلدى. ورتالىق كوميتەت پارتيا مەكتەبىنىڭ (مەملەكەتتىك اكىمشىلىك شۋەيۋانى) باستىعى (شۋەيۋان باستىعى) چىن شي ماجىلىستە شي جينپيڭنىڭ ماڭىزدى نۇسقاۋىن جەتكىزدى ٴارى ٴسوز سويلەپ، مىنالاردى ٴبىلدىردى: باس شۋجي شي جينپيڭنىڭ ماڭىزدى نۇسقاۋىنىڭ رۋحىن جانە پارتيا مەكتەبى قىزمەتى جونىندەگى ماڭىزدى بايىمداۋلارىن ىشكەرىلەي ۇيرەنىپ، دايەكتىلەندىرىپ، جاڭا ٴداۋىردىڭ جاڭا جورىعىندا پارتيانىڭ وزەكتى مىندەتىن جۇزەگە اسىرۋدى كوزدەپ، شينجياڭ ۇلتتار كادرلارىن باۋلۋ كلاسى قىزمەتىن ٴبىر تۇتاس جوسپارلاپ، جوبالاپ، پارتيا 20 ـ كەزەكتى ورتالىق كوميتەتى ٴۇشىنشى جالپى ٴماجىلىسى رۋحىنىڭ شينجياڭدا ناقتىلانۋىن، تياناقتانۋىن ىلگەرىلەتۋ كەرەك. شينجياڭ كادرلارىنىڭ ەرەكشەلىگى مەن قىزمەت قاجەتىن تىعىز ارقاۋ ەتىپ، تاربيەلەۋدىڭ، باۋلۋدىڭ جۇيەلىلىگىن، باعىتتامالىلىعىن كۇشەيتىپ، نەگىزدىك باۋلۋدى تىڭعىلىقتى ورىستەتىپ، پارتيانىڭ جاسامپاز نازارياسىمەن قارۋلانۋدى كۇش سالا تەرەڭدەتىپ، جۇڭحۋا ۇلتى ورتاق تۇلعا تانىمىن بەكەمدەۋ تاربيەسىن كۇشەيتۋ قاجەت. رەفورما جاساۋعا، جاڭالىق اشۋعا تاباندى بولىپ، ٴار جاقتىڭ كۇشىن توپتاپ، شينجياڭعا اناعۇرلىم كوپ ادال، كىرشىكسىز، جاۋاپكەرشىلىك ارقالايتىن جوعارى ساپالى كادرلاردى باۋلۋ، جەتىلدىرۋ كەرەك.
ورتالىق كوميتەت ۇيىمداستىرۋ بولىمىندەگى، ورتالىق كوميتەت پارتيا مەكتەبىندەگى (مەملەكەتتىك اكىمشىلىك شۋەيۋانى)، شينجياڭ ۇيعۇر اۆتونوميالى رايوندىق پارتكومداعى جاۋاپتى جولداستار، ورتالىق كوميتەت پارتيا مەكتەبى شينجياڭ ۇلتتار كادرلارىن باۋلۋ كلاسىن ۇيىمداستىرۋشىلار ۋاكىلدەرى، كۋرسانتتار ۋاكىلدەرى پىكىر اۋىستىرىپ، ٴسوز سويلەدى.
