
9 ـ ايدىڭ 9 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە جۇڭگوعا رەسمي ساپارمەن كەلگەن يسپانيا باس ٴۋازىرى سانچەسپەن كەزدەستى.
□ سۋرەتتى شينحۋا اگەنتتىگىنىڭ ٴتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 9 ـ ايدىڭ 9 ـ كۇنى بەيجيڭنەن بەرگەن حابارى (ٴتىلشى سۇن ي). 9 ـ ايدىڭ 9 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە جۇڭگوعا رەسمي ساپارمەن كەلگەن يسپانيا باس ٴۋازىرى سانچەسپەن كەزدەستى.
شي جينپيڭ سانچەسكە پاتشا فيليپ ـ 6 عا سالەمىن جەتكىزىپ قويۋدى ايتتى. شي جينپيڭ بىلاي دەپ اتاپ كورسەتتى: بىلتىر جۇڭگو مەن يسپانيا ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 50 جىلدىعىن بىرگە قۇتتىقتادى. ٴبىر جىلدان استام ۋاقىتتان بەرى ەكى جاق ٴار جىكتەگىلەردىڭ ٴجيى بارىس ـ كەلىسىن، ىقپالداستىعىن ساقتاپ، جاڭا سالالارداعى سەلبەستىكتى جوعارى ساپامەن ىلگەرىلەتتى. كەلەر جىلى _ جۇڭگو مەن يسپانيانىڭ جالپى بەتتىك ستراتەگيالىق سەرىكتەستىك قارىم ـ قاتىناس ورناتقاندىعىنىڭ 20 جىلدىعى. ەكى جاق ٴوزارا قۇرمەت ەتۋ، تەڭ تۇرعىدا مامىلە جاساۋ سىندى ديپلوماتيالىق قارىم ـ قاتىناس ورناتۋ اۋەلگى ماقساتىنان جازباي، جالپى جاعدايدى كوكەيدە ساقتاپ، ۇزاق بولاشاقتى كوزدەپ، ەكى ەلدىڭ جالپى بەتتىك ستراتەگيالىق سەرىكتەستىك قارىم ـ قاتىناسىنىڭ داۋىرلىك ٴمانىن ۇزدىكسىز بايىتىپ، ستراتەگيالىق تاباندىلىققا باي ۇزاق ۋاقىت ورنىقتى بولاتىن جۇڭگو _ يسپانيا قارىم ـ قاتىناسىن تۇلعالاپ، ەكى ەل قارىم ـ قاتىناسىنىڭ اناعۇرلىم جوعارى دەڭگەيگە كوتەرىلۋىن ىلگەرىلەتۋى كەرەك.
شي جينپيڭ بىلاي دەپ باسا دارىپتەدى: رەفورما جاساۋ، ەسىك اشۋ _ جۇڭگونىڭ ۇزاق ۋاقىتتىق اماليات بارىسىندا تاپقان دۇرىس دامۋ جولى، بۇلجىماي جۇرەدى. جۇڭگو كوممۋنيستىك پارتياسى 20 ـ كەزەكتى ورتالىق كوميتەتىنىڭ ٴۇشىنشى جالپى ٴماجىلىسى رەفورمانى ونان ارى جاپپاي تەرەڭدەتۋ، جۇڭگو ۇلگىسىندەگى وسىزامانداندىرۋدى ىلگەرىلەتۋ جونىندە جۇيەلى ورنالاستىرۋ جاسادى، بۇل جۇڭگو مەن يسپانيا ەكى ەلدىڭ سەلبەستىكتى تەرەڭدەتۋىنە جانە كەڭەيتۋىنە تىڭ وراي الا كەلدى. ەكى جاق ەكونوميكا ـ ساۋدا ارالاس كوميتەتى، عىلىم ـ تەحنيكا بىرلەسكەن كوميتەتى سياقتى تۇعىرلاردىڭ رولىن ويداعىداي ساۋلەلەندىرىپ، جاساندى زەردە، سيفرلى ەكونوميكا، جاڭا ەنەرگيا سياقتى جوعارى تەحنيكا سالالارىندا دامۋدى بىرگە جەبەپ، ٴوزارا پايدا جەتكىزىپ تەڭ يگىلىككە كەنەلۋدى جۇزەگە اسىرۋى كەرەك. يسپانيانىڭ جۇڭگو كاسىپورىندارىنىڭ يسپانياعا بارىپ قارجى قوسىپ شارۋاشىلىقتى گۇلدەندىرۋىنە تۋراشىل، ٴادىل، حاۋىپسىز، كەمسىتپەيتىن شارۋاشىلىق ـ ساۋدا ورتاسىن ۇزدىكسىز ازىرلەۋىن ٴۇمىت ەتەمىن. ەكى جاق سيىسىمدى بولۋعا، ٴوزارا ۇلگى الۋعا تاباندى بولىپ، ٴتىل وقىتۋى، جاستار، مادەنيەت، ساياحات سياقتى گۋمانيتارلىق اۋىس ـ كۇيىستى كۇشەيتىپ، حالىقتار دوستىعىن جەبەۋى كەرەك. جۇڭگو جاق يسپانيانىڭ بىلتىر سوڭعى جارتى جىلدا ەۆروپا وداعىنىڭ كەزەكتى ٴتوراعا ەلى مىندەتىن وتەگەن كەزىندە جۇڭگو مەن ەۆروپا وداعىنىڭ اۋىس ـ كۇيىسىن، سەلبەستىگىن بەلسەنە ىلگەرىلەتكەندىگىن القايدى. كەلەر جىلى جۇڭگونىڭ ەۆروپا وداعىمەن ديپلوماتيالىق قارىم ـ قاتىناس ورناتقاندىعىنىڭ 50 جىلدىعى، جۇڭگو جاق ەۆروپا وداعىمەن بىرگە ەكى جاقتى قارىم ـ قاتىناستى دامىتۋداعى تابىستى تاجىريبەلەردى قورىتىندىلاپ، جۇڭگو _ ەۆروپا وداعى قارىم ـ قاتىناسى دامۋىنىڭ دەربەس، ٴوز ـ وزىنە قوجايىن بولۋ، ٴوزارا قولداپ تابىسقا جەتۋ، دۇنيە ٴجۇزىن باقىتقا كەنەلتۋ بەتالىسىمەن نىق قاداممەن العا باسۋىن ىلگەرىلەتۋدى قالايدى. يسپانيانىڭ وسى جولدا ۇزدىكسىز سىندارلى رول اتقارۋىن ٴۇمىت ەتەمىن.
شي جينپيڭ بىلاي دەپ اتاپ كورسەتتى: بۇگىنگى دۇنيە جۇزىندە وزگەرىس پەن بىلىقپالىق قاباتتاسۋدا، جۇڭگو مەن يسپانيا ەكەۋى دە جاۋاپكەرشىلىك سەزىمگە جانە بورىشتىلىق سەزىمگە يە ەلدەر، ەكەۋى دە كوپ جاقتىلىقتى جانە ەركىن ساۋدانى دارىپتەيدى. جۇڭگو جاق يسپانيامەن جەر شارىنىڭ وڭتۇستىگىنە بەت العان ٴۇشىنشى جاق بازار سەلبەستىگىن كەڭەيتىپ، بىرلەسكەن مەملەكەتتەر ۇيىمى، 20 ەل توبى سياقتى حالىقارالىق ۇيىمدارداعى بايلانىستى، سايكەسۋدى كۇشەيتىپ، دۇنيە ٴجۇزىنىڭ بەيبىتشىلىگىنە، ورنىقتىلىعىنا جانە ادامزاتتىڭ العا باسۋ ىستەرىنە اناعۇرلىم كوپ وڭ ەنەرگيا ۇستەۋدى قالايدى.
سانچەس پاتشا فيليپ ـ 6 نىڭ ٴتوراعا شي جينپيڭگە جولداعان ىقىلاستى سالەمىن جەتكىزىپ مىنانى ٴبىلدىردى: اراعا ٴبىر جىل سالىپ جۇڭگوعا تاعى دا ساپارلاي كەلگەنىمە ايرىقشا قۋانىشتىمىن، بۇل يسپانيا _ جۇڭگو قارىم ـ قاتىناسىنىڭ قويۋ ەكەندىگىن ايگىلەيدى. يسپانيا مەن جۇڭگونىڭ دوستىعى ارىدان باستاۋ العان، ەكى ەل ٴوزارا قۇرمەت ەتۋ نەگىزىندە سەرىكتەستىك قارىم ـ قاتىناستى ۇزدىكسىز دامىتتى، تەرەڭدەتتى. وسى رەتكى ساپارىمدا ەكى جاق جاسىل دامۋ سياقتى سالالارداعى كوپ ٴتۇرلى سەلبەستىك كەلىسىمىنە قول قويىپ، ەكى جاق سەلبەستىگىنىڭ وراسان زور كومەسكى كۇشى مەن نۇرلى بولاشاعىن ايگىلەدى. ەكى جاقتىڭ گۋمانيتارلىق اۋىس ـ كۇيىستى كۇشەيتىپ، ەكونوميكا ـ ساۋدا، جاڭا ەنەرگيالى اۆتوكولىك سياقتى سالالارداعى سەلبەستىكتى تەرەڭدەتۋىن ٴۇمىت ەتەمىن، يسپانيا جاق جۇڭگو كاسىپورىندارىنا تاماشا ورتا ازىرلەۋدى قالايدى. يسپانيا مەن جۇڭگو ەكى جاق تا دۇنيە ٴجۇزىنىڭ بەيبىتشىلىگىن قورعاۋعا، كوپ جاقتىلىقتى قورعاۋعا كۇش سالادى. بۇگىنگى تاڭداعى دۇنيە ٴجۇزى اۋمالى ـ توكپەلىلىك، قاقتىعىس، كەدەيلىك، كليمات وزگەرىسى سياقتى قات ـ قابات سىن ـ سايىستارعا ٴدوپ كەلىپ وتىر، بۇل حالىقارالىق قوعامنىڭ سەلبەستىكتى كۇشەيتىپ، بىرگە توتەپ بەرۋىن قاجەت ەتەدى. جۇڭگو دۇنيە ٴجۇزىنىڭ بەيبىتشىلىگى مەن دامۋىن قورعايتىن شەشۋشى كۇش، كەلەلى حالىقارالىق، وڭىرلىك ماسەلەلەردى شەشۋدە ماڭىزدى سىندارلى رولىن ساۋلەلەندىرۋدە. يسپانيا جاق جۇڭگومەن قارىم ـ قاتىناسقا ستراتەگيالىق تۇرعىدان قارايدى، ٴبىر جۇڭگو ساياساتىن تاباندىلىقپەن اتقارادى، جۇڭگونىڭ سەنىمدى سەرىگى بولۋدى قالايدى، يسپانيا مەن جۇڭگونىڭ جالپى بەتتىك ستراتەگيالىق سەرىكتەستىك قارىم ـ قاتىناسىن ونان ارى تەرەڭدەتىپ، ەكى ەل حالقىنىڭ قۇت ـ ىرىسىنا جانە دۇنيە ٴجۇزىنىڭ بەيبىتشىلىگى مەن گۇلدەنۋىنە اناعۇرلىم زور ۇلەس قوسۋدى ٴۇمىت ەتەدى. يسپانيا جاق ەركىن ساۋدا جانە بازاردى اشىق ۇستاۋ پرينسيبىن قولدايدى، ساۋدا سوعىسىن جۇرگىزۋدى قۇپتامايدى، ەۆروپا وداعى مەن جۇڭگو قارىم ـ قاتىناسىنىڭ اقاۋسىز دامۋىن جەبەۋدە ۇزدىكسىز بەلسەندى رول اتقارۋدى قالايدى.
ەكى جاق تاعى ۋكراينا داعدارىسى مەن پالەستينا _ يزرايل قاقتىعىسى سياقتى ماسەلەلەر جونىندە پىكىر اۋىستىردى.
ۋاڭ ي كەزدەسۋگە قاتىناستى.