5 - ايدىڭ 16 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن رەسەي زۇڭتۇڭى پۋتينمەن كەڭەس وتكىزدى. سۋرەتتە: كەڭەستەن كەيىن ەكى ەلدىڭ مەملەكەت باسشىلارى «جۇڭحۋا حالىق رەسپۋبليكاسى مەن رەسەي فەدەراتسياسىنىڭ ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعى قارساڭىندا جاڭا داۋىردەگى جالپى بەتتىك ستراتەگيالىق ىستەستىك سەرىكتەستىك قارىم - قاتىناستى تەرەڭدەتۋ جونىندەگى بىرلەسكەن مالىمدەمەسىنە» بىرگە قول قويدى ءارى ونى جاريالادى.
□ سۋرەتتى شينحۋا اگەنتتىگىنىڭ ءتىلشىسى راۋ ايمين تۇسىرگەن
5 - ايدىڭ 16 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن رەسەي زۇڭتۇڭى پۋتينمەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا پۋتينگە ارناپ سالتاناتتى قارسى الۋ سالتىن وتكىزدى.
□ سۋرەتتى شينحۋا اگەنتتىگىنىڭ ءتىلشىسى راۋ ايمين تۇسىرگەن
شينحۋا اگەنتتىگىنىڭ 5 ـ ايدىڭ 16 ـ كۇنى بەيجيڭنەن بەرگەن حابارى (تىلشىلەر ياڭ يجۇن، ۋاڭ بين). 5 ـ ايدىڭ 16 ـ كۇنى تۇستەن بۇرىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن رەسەي زۇڭتۇڭى پۋتينمەن كەڭەس وتكىزدى.
ەكى ەلدىڭ مەملەكەت باسشىلارى الدىمەن شاعىن كولەمدى كەڭەس وتكىزدى.
شي جينپيڭ پۋتيننىڭ جاڭا كەزەكتى زۇڭتۇڭدىق مىندەت وتەۋ مەرزىمىن باستاعاندىعىن شىن جۇرەكتەن قۇتتىقتادى، ونىڭ جۇڭگوعا تاعى مەملەكەتتىك ساپارمەن كەلگەندىگىن قىزۋ قارسى الدى.
شي جينپيڭ بىلاي دەپ اتاپ كورسەتتى: بيىل جۇڭگو مەن رەسەيدىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعى. 75 جىلدان بەرى جۇڭگو _ رەسەي قارىم ـ قاتىناسى بوران ـ شاشىندى باستان وتكەرىپ، ۋاقىت وتكەن سايىن بەكەمدەلىپ، حالىقارالىق الماعايىپ وزگەرىستەردىڭ سىنىنان سۇرىنبەي ٴوتىپ، ٴىرى ەلدەردىڭ، كورشى ەلدەردىڭ ٴبىر ـ بىرىنە قۇرمەت ەتۋىنىڭ، بۇكپەسىز ارالاسۋىنىڭ، تاتۋ ـ ٴتاتتى ٴوتۋىنىڭ، ٴوزارا پايدا جەتكىزىپ تەڭ يگىلىككە كەنەلۋىنىڭ ۇلگىسىن ورناتتى. جۇڭگو _ رەسەي قارىم ـ قاتىناسىنىڭ ورنىقتى دامۋى ەكى ەلدىڭ جانە ەكى ەل حالقىنىڭ ٴتۇبىرلى مۇددەسىنە ۇيلەسىپ قانا قويماي، وڭىرلەردىڭ، ٴتىپتى، دۇنيە ٴجۇزىنىڭ بەيبىتشىلىگىنە، ورنىقتىلىعىنا، گۇلدەنۋىنە دە ٴتيىمدى. جۇڭگو جاق رەسەي جاقپەن باستان ـ اياق ٴبىر ـ بىرىنە سەنەتىن جاقسى كورشى، جاقسى دوس، جاقسى سەرىك بولىپ، ەكى ەل حالقىنىڭ ۇرپاقتان ـ ۇرپاققا جالعاسقان دوستىعىن ۇزدىكسىز بەكەمدەپ، ٴوز ەلدەرىنىڭ دامۋىن، گۇلدەنۋىن بىرگە جۇزەگە اسىرىپ، دۇنيە ٴجۇزىنىڭ ادىلدىگىن، ادىلەتتىلىگىن قول ۇستاسا قورعاۋدى قالايدى.
شي جينپيڭ بىلاي دەپ باسا دارىپتەدى: جۇڭگو مەن رەسەي قارىم ـ قاتىناسىنىڭ 75 جىلدىق دامۋ تاريحىنان شىعارىلعان ەڭ ماڭىزدى قورىتىندى _ ىرگەلەس ەكى ٴىرى ەل اراسىندا، ٴسوز جوق، بەيبىت قاتار تۇرۋ بەس پرينسيبىن باستان ـ اياق اسقاقتاتىپ، ٴوزارا قۇرمەت ەتىپ، تەڭ تۇرعىدا ٴوزارا سەنىم ارتىپ، ٴبىر ـ ٴبىرىنىڭ ٴجىتى قاداعالاپ وتىرعان ىستەرىنە جاردەمدەسىپ، ەكى جاقتىڭ دامۋى مەن گۇلدەنۋىنە ٴوزارا شىنايى دەم بەرۋ كەرەك. بۇل جۇڭگو _ رەسەي ەكى ەلدىڭ دۇرىس قارىم ـ قاتىناس جاساۋ جولى ٴارى 21 ـ عاسىرداعى ٴىرى ەلدەر قارىم ـ قاتىناسىندا قۇلشىنۋعا ٴتيىستى بەتالىس. جۇڭگو _ رەسەي قارىم ـ قاتىناسىنىڭ تەرەڭ تاريحي قورى جانە بەرىك حالىق رايى نەگىزى بار، ەكى جاق ستراتەگيالىق ىستەستىك پەن ٴوزارا پايدا جەتكىزۋ سەلبەستىگىن جيىلەتىپ، ٴوز دامۋ جولىمەن باتىل ٴجۇرىپ، حالىقارالىق ادىلدىك پەن ادىلەتتىلىكتى باتىل قورعاۋى كەرەك.
پۋتين مىنالاردى ٴبىلدىردى: مەن جاڭا كەزەكتى رەسەي زۇڭتۇڭى بولعاننان كەيىن جۇڭگوعا تاعى ساپارلاي كەلگەنىمە توتەنشە قۋانىشتىمىن. بىلتىر 3 ـ ايدا ٴتوراعا شي جينپيڭ دە تاعى سايلانعاننان كەيىن كوپ وتپەي رەسەيدە مەملەكەتتىك ساپاردا بولدى. بۇل ەكى ەلدىڭ دوستىق ٴداستۇرى، بۇل ەكى جاقتىڭ جاڭا داۋىردەگى رەسەي مەن جۇڭگونىڭ جالپى بەتتىك ستراتەگيالىق ىستەستىك سەرىكتەستىك قارىم ـ قاتىناسىن كۇشەيتۋگە ايرىقشا ٴمان بەرەتىندىگىن كورسەتەدى. بيىل جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعى، سونداي ـ اق رەسەي مەن جۇڭگونىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعى، بۇل ٴبىزدىڭ بىرگە قۇتتىقتاۋىمىزعا تاتيدى. رەسەي _ جۇڭگو قارىم ـ قاتىناسىن دامىتۋ ۋاقىتتىق شارا ەمەس، ٴۇشىنشى جاققا باعىتتالمايدى، حالىقارالىق ستراتەگيالىق ورنىقتىلىققا ٴتيىمدى. رەسەي جاق جۇڭگو جاقپەن ەكى جاقتى سەلبەستىكتى ۇزدىكسىز كەڭەيتىپ، بىرلەسكەن مەملەكەتتەر ۇيىمى، بريكس ەلدەرى، شاڭحاي سەلبەستىك ۇيىمى سياقتى جۇلگەلەردەگى بايلانىستى، ىستەستىكتى جيىلەتىپ، اناعۇرلىم ٴادىل، ۇيلەسىمدى حالىقارالىق ٴتارتىپ ورناتۋدى ىلگەرىلەتۋدى قالايدى.
ەكى ەلدىڭ مەملەكەت باسشىلارى وسىدان كەيىن كەڭ كولەمدى كەڭەستى باسقاردى.
ەكى ەلدىڭ مەملەكەت باسشىلارى ەكى ەل ۇكىمەتتەرى اراسىنداعى سەلبەستىك كوميتەتتەرىنىڭ ەكى جاق ٴتوراعالارىنىڭ قارجى قوسۋ، ەنەرگيا، ەكونوميكا ـ ساۋدا، شىعىس سولتۇستىك ـ قيىر شىعىس، گۋمانيتارلىق ىستەر، حالىقارا سياقتى سالالارداعى سەلبەستىك جاعدايىنان بەرگەن مالىمەتىن تىڭداپ، قول جەتكىزگەن ىلگەرىلەۋشىلىكتەرگە رازى بولىپ، بولاشاقتاعى سەلبەستىك ۇسىنىستارىن تۇراقتاندىردى.
شي جينپيڭ بىلاي دەپ اتاپ كورسەتتى: بيىل جۇڭگو _ رەسەي قارىم ـ قاتىناسىنىڭ دامۋ تاريحىندا بەلەستىك مانگە يە ماڭىزدى جىل. جۇڭگو مەن رەسەي ديپلوماتيالىق قارىم ـ قاتىناس ورناتقان 75 جىلدان بەرى ەكى ەل قول ۇستاسا وتىرىپ ٴىرى ەلدەردىڭ، كورشى ەلدەردىڭ ٴوزارا قۇرمەت ەتۋ، تاتۋ ـ ٴتاتتى ٴوتۋ، سەلبەسىپ تەڭ يگىلىككە كەنەلۋ سىندى شىت جاڭا جولىن تاپتى. ەكى جاقتىڭ بىرگە قۇلشىنۋىندا جۇڭگو _ رەسەي قارىم ـ قاتىناسى باستان ـ اياق ورنىقتىلىقپەن العا قاراي دامىپ، ەكى ەلدىڭ جالپى بەتتىك ستراتەگيالىق ىستەستىگى ۇزدىكسىز كۇشەيىپ، ەكونوميكا ـ ساۋدا، قارجى قوسۋ، ەنەرگيا، گۋمانيتارلىق ىستەر، جەرگىلىكتى ورىندار سياقتى سالالارداعى سەلبەستىگى ۇزدىكسىز ىلگەرىلەپ، الەمدىك ستراتەگيالىق ورنىقتىلىقتى قورعاۋعا جانە حالىقارالىق قارىم ـ قاتىناستىڭ دەموكراتيالانۋىن جەبەۋگە بەلسەندى ۇلەس قوستى. بيىل جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعى. جۇڭگو جاق جوعارى ساپالى دامۋ ارقىلى جۇڭگو ۇلگىسىندەگى وسىزامانداندىرۋدى جاپپاي ىلگەرىلەتىپ، جاڭاشا وندىرگىش كۇشتەردى جەدەل دامىتۋدا ٴارى الەمدىك ەكونوميكانىڭ ارتۋىنا جاڭا قوزعالىس قۋاتىن ۇستەۋدە. جۇڭگو _ رەسەي ەكى ەل دە بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى جانە بازارى جاڭادان گۇلدەنگەن نەگىزگى ەلدەر، ەكى جاق ستراتەگيالىق ىستەستىكتى كۇشەيتىپ، ٴوزارا پايدا جەتكىزۋ سەلبەستىگىن كەڭەيتىپ، دۇنيە ٴجۇزىنىڭ كوپ ۇيەكتەنۋى مەن ەكونوميكانىڭ جاھاندانۋى تاريحي اۋقىمىنا ۇيلەسۋ _ ەكى ەلدىڭ ورتاق ستراتەگيالىق تالعامى. ەكى جاق ديپلوماتيالىق قارىم ـ قاتىناس ورناتقاندىعىنىڭ 75 جىلدىعىن جاڭا باستاما ەتىپ، دامۋ ستراتەگياسىن ٴتۇيىلىستىرۋدى اناعۇرلىم كۇشەيتىپ، ەكى جاقتى سەلبەستىكتىڭ مازمۇنىن ۇزدىكسىز بايىتىپ، ەكى ەلگە جانە ەكى ەل حالقىنا اناعۇرلىم ويداعىداي باقىت جاراتىپ، دۇنيە ٴجۇزىنىڭ گۇلدەنۋى مەن ورنىقتىلىعىنا اناعۇرلىم كوپ وڭ ەنەرگيا ۇستەۋى كەرەك. ەكى جاق ەكى ەلدىڭ سەلبەستىك قۇرىلىمىن اناعۇرلىم ساپالىلاندىرىپ، ەكونوميكا ـ ساۋدا سياقتى ٴداستۇرلى سالالارداعى سەلبەستىكتىڭ تاماشا جاعدايىن بەكەمدەۋى كەرەك. گۋمانيتارلىق اۋىس ـ كۇيىستىڭ اناعۇرلىم كوپ جارقىن تۇيىندەرىن قالىپتاستىرىپ، ”جۇڭگو _ رەسەي مادەنيەت جىلىن“ بىرگە ويداعىداي وتكىزىپ، جەرگىلىكتى ورىنداردىڭ سەلبەستىگىن جيىلەتىپ، حالىق تىلەگى دانەكەرىن ۇزدىكسىز جاقىنداتۋ كەرەك. بىرلەسكەن مەملەكەتتەر ۇيىمى، بريكس ەلدەرى، شاڭحاي سەلبەستىك ۇيىمى سياقتى حالىقارالىق كوپ جاقتى تۇعىرلارداعى، سونداي ـ اق وڭىرلىك ىستەردەگى بايلانىستى جانە سەلبەستىكتى كۇشەيتىپ، حالىقارالىق جاۋاپكەرشىلىكتى ايگىلەپ، ٴادىل، ۇيلەسىمدى الەمدىك باسقارۋ جۇيەسىن ورناتۋدى ىلگەرىلەتۋ كەرەك.
پۋتين مىنالاردى ٴبىلدىردى: رەسەي _ جۇڭگو ەكى ەلدىڭ ۇكىمەتتەر ارا سەلبەستىك مەحانيزمىنىڭ اينالىمى جاقسى، ەكى ەلدىڭ ەكونوميكا ـ ساۋدا، اۋىل شارۋاشىلىعى، ونەركاسىپ، ەنەرگيا، ۇلاستىرۋ، تۇتاستىرۋ سياقتى سالالارداعى سەلبەستىگى ورنىقتى دامىدى. رەسەي _ جۇڭگو قارىم ـ قاتىناسىنىڭ ورناۋى مەن دامۋى تاتۋ كورشىلىك، دوستىق، ٴوزارا قۇرمەت ەتۋ، ٴوز ەلدەرىنىڭ دامۋىنا دەم بەرۋ سياقتى پرينسيپتەردى نەگىز ەتىپ، ٴتۇرلى سىننان سۇرىنبەي ٴوتتى. بۇگىن ەكى جاق جەلىلەس سەلبەستىك حۇجاتتارىنا قول قويدى، بۇل ەكى جاقتىڭ ٴوزارا پايدا جەتكىزۋ سەلبەستىگىن ۇزدىكسىز تەرەڭدەتۋ، كەڭەيتۋ بەكىمىن ايگىلەدى. رەسەي جاق جۇڭگو جاقپەن «2030 ـ جىلدان ىلگەرگى رەسەي _ جۇڭگو ەكونوميكالىق سەلبەستىك جوباسىن» ويداعىداي تياناقتاندىرىپ، بيىلعى جانە كەلەر جىلعى ”رەسەي _ جۇڭگو مادەنيەت جىلى“ قيمىلىن ويداعىداي وتكىزىپ، ەۆروپا _ ازيا ەكونوميكالىق وداعىنىڭ ”ٴبىر بەلدەۋ، ٴبىر جولدى“ بىرگە قۇرۋ باستاماسىمەن ٴتۇيىلىسۋىن كۇشەيتۋدى قالايدى. كەلەر جىلى دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن قارسى الامىز، رەسەي _ جۇڭگو ەكى جاق قۇتتىقتاۋ قيمىلدارىن وتكىزەدى. رەسەي جاق جۇڭگو جاقتىڭ كەلەلى حالىقارالىق، وڭىرلىك ىستەردە وبيەكتيۆ، ٴادىل تۇرعىدا تۇرعاندىعىن القايدى، جۇڭگو جاقپەن ستراتەگيالىق ىستەستىكتى ۇزدىكسىز جيىلەتىپ، ٴوزارا قولداۋدى بەكەمدەپ، دۇنيە ٴجۇزىنىڭ كوپ ۇيەكتەنۋى جانە حالىقارالىق قارىم ـ قاتىناستىڭ دەموكراتيالانۋى ٴۇردىسىن جەبەپ، رەسەي مەن جۇڭگونىڭ جالپى بەتتىك ستراتەگيالىق ىستەستىك سەرىكتەستىك قارىم ـ قاتىناسىنىڭ اناعۇرلىم قوماقتى جەتىستىكتەرگە قول جەتكىزۋىن ىلگەرىلەتۋدى قالايدى.
كەڭەستەن كەيىن ەكى ەلدىڭ مەملەكەت باسشىلارى «جۇڭحۋا حالىق رەسپۋبليكاسى مەن رەسەي فەدەراتسياسىنىڭ ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعى قارساڭىندا، جاڭا داۋىردەگى جالپى بەتتىك ستراتەگيالىق ىستەستىك سەرىكتەستىك قارىم ـ قاتىناستى تەرەڭدەتۋ جونىندەگى بىرلەسكەن مالىمدەمەسىنە» بىرگە قول قويدى ٴارى ونى جاريالادى، سونداي ـ اق ەكونوميكا ـ ساۋدا، تابيعاتتى قورعاۋ، تەكسەرۋ، كارانتيندەۋ، مەديا سياقتى سالالارداعى كوپ ٴتۇرلى ەكى جاقتى سەلبەستىك حۇجاتتارىنا قول قويىلۋىنا بىرگە كۋا بولدى.
ەكى ەلدىڭ مەملەكەت باسشىلارى تاعى بىرگە تىلشىلەرمەن كەزدەستى.
كەڭەستەن بۇرىن شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا پۋتينگە ارناپ سالتاناتتى قارسى الۋ سالتىن وتكىزدى.
پۋتين جەتكەن ساتتە قۇرمەت قاراۋىلى قاتار تۇزەپ قۇرمەت ٴبىلدىردى. ەكى ەلدىڭ مەملەكەت باسشىلارى سالتانات مىنبەسىنە شىقتى، اسكەري وركەستر جۇڭگو مەن رەسەي ەكى ەلدىڭ مەملەكەت ٴانىن ورىندادى، تيان ـ انمىن الاڭىندا 21 رەت ساليۋت اتىلدى. پۋتين شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ٴارى قاتارعا ٴبولىنىپ پاراتتان ٴوتۋ سالتاناتىن تاماشالادى. جۇڭگو _ رەسەي ەكى ەلدىڭ جاس وسپىرىمدەرى قولدارىنا گۇل شوعىن جانە جۇڭگو _ رەسەي ەكى ەلدىڭ مەملەكەت تۋىن ۇستاپ، ەكى ەلدىڭ مەملەكەت باسشىلارىنا الاقايلاپ قۇرمەت ٴبىلدىردى.
سول كۇنى تۇستە شي جينپيڭ حالىق سارايىنىڭ جينسى زالىندا پۋتينگە ارناپ قارسى الۋ قوناعاسىن وتكىزدى.
ساي چي، ديڭ شۋەشياڭ، ۋاڭ ي، حى ليفىڭ، جاڭ گوچيڭ، شىن يچين قاتارلىلار جوعارىداعى قيمىلعا قاتىناستى.
