شينحۋا اگەنتتىگىنىڭ 2 ـ ايدىڭ 17 ـ كۇنى بەيجيڭنەن بەرگەن حابارى. مەملەكەت ٴتوراعاسى شي جينپيڭ 2 ـ ايدىڭ 17 ـ كۇنى تەلەگرامما جولداپ، 37 ـ كەزەكتى افريكا وداعى باسشىلار ٴماجىلىسىنىڭ اشىلعاندىعىن قۇتتىقتادى.
شي جينپيڭ بىلاي دەپ اتاپ كورسەتتى: كەزەكتە دۇنيە ٴجۇزى 100 جىلدا بولماعان زور وزگەرىس جاعدايىنا تۋرا كەلدى، جۇڭگو مەن افريكانى ۋاكىل ەتكەن ”الەمدىك وڭتۇستىك“ قارىشتاپ دامىپ، دۇنيە تاريحىنىڭ العا باسۋىنا تەرەڭ ىقپال جاسادى. افريكا وداعى افريكا مەملەكەتتەرىن بىرلەسىپ وزدەرىن الۋەتتەندىرۋگە ىنتىماقتاستىرىپ، ٴبىر تۇلعالاندىرۋ مەن ەركىن ساۋدا رايونى قۇرىلىسىن زور كۇشپەن ىلگەرىلەتتى. افريكا وداعىنىڭ 20 ەل توبىنىڭ قۇرامىنا ٴساتتى تۇردە ەنۋى افريكانىڭ الەمدىك باسقارۋداعى ۋاكىلدىك سيپاتى مەن ٴسوز سويلەۋ ۇقىعىن ونان ارى جوعارىلاتتى. جۇڭگو جاق مۇنى شىن جۇرەكتەن قۇتتىقتايدى.
شي جينپيڭ بىلاي دەپ باسا دارىپتەدى: وتكەن ٴبىر جىلدا جۇڭگو مەن افريكا قارىم ـ قاتىناسى ۇزدىكسىز ىشكەرىلەي دامىپ، جۇڭگو ـ افريكا باسشىلار كەڭەسى ٴساتتى اشىلدى، ەكى جاق وزدەرىنىڭ وسىزاماندانۋ جولى جونىندە ىزدەنىس جاساۋىنا ٴوزارا قولداۋ كورسەتىپ، دامۋ جوباسىن جۇزەگە اسىرۋعا بىرگە تاماشا ورتا جاراتۋدى ۇيعاردى. 2024 ـ جىلى جۇڭگو ـ افريكا سەلبەستىك تالقى مىنبەرىنىڭ جاڭا كەزەكتى ٴماجىلىسى اشىلادى، مەن افريكا ەلدەرى باسشىلارىمەن بىرگە ەكى جاقتىڭ حالقىنا باقىت جاراتۋدى كوزدە ۇستاپ، جۇڭگو ـ افريكا سەلبەستىگىنىڭ جاڭا جوباسىن دەن قويا جوبالاپ، جوعارى دەڭگەيدەگى جۇڭگو ـ افريكا تاعدىرلاس ورتاق تۇلعاسىن بىرگە قۇرۋدى ىلگەرىلەتۋدى قالايمىن.
