شينحۋا اگەنتتىگىنىڭ 1 ـ ايدىڭ 27 ـ كۇنى بەيجيڭنەن بەرگەن حابارى. مەملەكەت ٴتوراعاسى شي جينپيڭ 1 ـ ايدىڭ 27 ـ كۇنى فرانسيا زۇڭتۇڭى ماكرونمەن ٴوزارا قۇتتىقتاۋ تەلەگرامماسىن جولداپ، ەكى ەل ديپلوماتيالىق قارىم ـ قاتىناس ورناتقاندىعىنىڭ 60 جىلدىعىن قۇتتىقتادى.
شي جينپيڭ بىلاي دەپ اتاپ كورسەتتى: 60 جىلدىڭ الدىندا جۇڭگو _ فرانسيا قىرعي قاباقتىق سوعىستىڭ سەڭىن بۇزىپ، لاگەر اسۋىنان اسىپ ٴوتىپ، باس ەلشى دارەجەلى ديپلوماتيالىق قارىم ـ قاتىناس ورناتتى. وسى تاريحي ۋاقيعا الەمدىك جۇيەنىڭ تىلدەسۋ مەن سەلبەسۋدىڭ دۇرىس باعىتىنا قاراي وزگەرۋىن ىلگەرىلەتىپ، كۇنى بۇگىنگە دەيىن ٴالى دە ماڭىزدى شابىتتاندىرۋ مانىنە يە بولىپ كەلەدى. 60 جىلدان بەرى جۇڭگو مەن فرانسيا باستان ـ اياق دەربەس، ٴوز ـ وزىنە قوجايىن بولۋ سىندى ستراتەگيالىق تاڭداۋعا تاباندى بولىپ، باستان ـ اياق ٴوزارا پايدا جەتكىزۋ، سەلبەسۋ ارقىلى بىرگە دامۋدى جۇزەگە اسىرۋعا، تەرەزەسى تەڭ اۋىس ـ كۇيىس جاساۋ ارقىلى وركەنيەتتەردىڭ ٴوزارا ۇلگى الۋىن جەبەۋگە، كوپ جاقتىلى سايكەستىرۋ ارقىلى الەمدىك سىن ـ سايىستارعا تىزە قوسا توتەپ بەرۋگە كۇش سالىپ كەلەدى. ەكى ەل قارىم ـ قاتىناسى كوپتەگەن ”ٴبىرىنشىنى“ جاراتىپ، سۇبەلى جەتىستىكتەرگە قول جەتكىزىپ، ەكى ەل حالقىنا قۇت ـ ىرىس اكەلۋمەن بىرگە دۇنيەنىڭ بەيبىتشىلىگى مەن ورنىقتىلىعىن قورعاۋدا، دۇنيەنىڭ كوپ ۇيەكتەنۋى مەن حالىقارالىق قارىم ـ قاتىناستاردىڭ دەموكراتيالانۋىن جەبەۋدە ماڭىزدى رول اتقاردى.
شي جينپيڭ بىلاي دەپ باسا دارىپتەدى: بۇگىنگى تاڭداعى دۇنيە تاعى دا شەشۋشى جول ايىرىعىندا تۇر. قالاي بەت الۋ سىندى ٴداۋىر سۇراۋى، تاريح سۇراۋى الدىندا، جۇڭگو مەن فرانسيا دەربەس، ٴوز ـ وزىنە قوجايىن بولاتىن ٴىرى ەل جانە بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى مۇشە ەلى رەتىندە ديپلوماتيالىق قارىم ـ قاتىناس ورناتقانداعى اۋەلگى ماقساتتى ۇستانىپ، جاۋاپكەرشىلىك، بورىش ارقالاپ، بەيبىتشىلىككە، حاۋىپسىزدىككە، گۇلدەنۋگە، العا باسۋعا اپاراتىن ادامزاتتىڭ دامۋ جولىن بىرگە اشۋعا ٴتيىس. مەن جۇڭگو _ فرانسيا قارىم ـ قاتىناسىنىڭ دامۋىنا ايرىقشا ٴمان بەرەمىن، ماكرون زۇڭتۇڭمەن بىرگە ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 60 جىلدىعىن وراي ەتىپ، تۋراشىلدىقتان اينىماي جاڭالىق اشىپ، بۇرىنعىعا مۇراگەرلىك ەتىپ، بولاشاققا جول اشىپ، جۇڭگو مەن فرانسيانىڭ جان ـ جاقتى ستراتەگيالىق سەرىكتەستىك قارىم ـ قاتىناسىن ونان ارى بەرىك ٴارى ومىرشەڭدىككە باي ەتىپ تۇلعالاپ، ەكى ەل مەن دۇنيە ٴجۇزى حالقىنىڭ قۇت ـ ىرىسىن ارتتىرۋعا اناعۇرلىم زور ۇلەس قوسۋدى قالايمىن.
ماكرون قۇتتىقتاۋ تەلەگرامماسىندا مىنالاردى ٴبىلدىردى: 60 جىلدىڭ الدىندا فرانسيا مەن جۇڭگونىڭ ديپلوماتيالىق قارىم ـ قاتىناس ورناتۋى كورەگەندىككە باي تاريحي شەشىم. قازىر دۇنيە ٴجۇزى بۇرىن بولىپ كورمەگەن داعدارىستارعا ٴدوپ كەلۋدە، فرانسيا مەن جۇڭگو، ەۆروپا وداعى مەن جۇڭگو تىزە قوسا العا تارتىپ، الەمدىك سىن ـ سايىستارعا توتەپ بەرۋدەگى ورتاق شەشۋ جوباسىن تابۋدى تىپتەن قاجەت ەتەدى. 2023 ـ جىل _ فرانسيا _ جۇڭگو قارىم ـ قاتىناسىنىڭ ومىرشەڭدىگى جاپپاي قالپىنا كەلگەن ٴبىر جىل، 2024 ـ جىل فرانسيا _ جۇڭگو سەلبەستىگى ونان ارى ىلگەرىلەيتىن ٴبىر جىل بولادى. مەن ٴتوراعا مىرزامەن بىرگە ەكى جاقتىڭ ەكونوميكا ـ ساۋدا، گۋمانيتارلىق ىستەر، جاستار سياقتى جاقتارداعى اۋىس ـ كۇيىسىن، سەلبەستىگىن ىلگەرىلەتىپ، الەمدىك ماسەلەلەردەگى بايلانىستى، سايكەسۋدى كۇشەيتىپ، فرانسيا مەن جۇڭگونىڭ جان ـ جاقتى ستراتەگيالىق سەرىكتەستىك قارىم ـ قاتىناسىن ۇزدىكسىز تەرەڭدەتىپ، بەلسەندى دە العاباسار ومىرشەڭدىك ارقىلى فرانسيا _ جۇڭگو قارىم ـ قاتىناسىنىڭ جاڭا 60 جىلىن باستاۋدى ٴۇمىت ەتەمىن.
