لي كىچياڭ جولداستىڭ سۇيەگى بەيجيڭدە ورتەلدى
شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار باباۋشان توڭكەرىستىك قۇرباندار قابىرستانىنا بارىپ سۇيەكپەن قوشتاستى. حۋ جينتاۋ گۇل شەڭبەر ۇسىنىپ ازا ءبىلدىردى
لي كىچياڭ جولداستى شۇعىل قۇتقارۋ كەزىندە جانە قايتىس بولعاننان كەيىن، شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ، حۋ جينتاۋ قاتارلى جولداستار شيپاحاناعا بارىپ كوڭىلىن سۇرادى نەمەسە ءتۇرلى فورمالارمەن لي كىچياڭ جولداستىڭ قايتىس بولعاندىعىنا قايعىلى ازا ءبىلدىردى ءارى ونىڭ تۋىس - تۋعاندارىنان شىنايى حال سۇرادى
11 - ايدىڭ 2 - كۇنى لي كىچياڭ جولداستىڭ سۇيەگى بەيجيڭ باباۋشان توڭكەرىستىك قۇرباندار قابىرستانىندا ورتەلدى. شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار باباۋشانعا بارىپ سۇيەكپەن قوشتاستى، حۋ جينتاۋ گۇل شەڭبەر ۇسىنىپ ازا ءبىلدىردى. سۋرەتتە: شي جينپيڭ لي كىچياڭنىڭ تۋىس - تۋعاندارىمەن قول الىسىپ، شىنايى حال سۇراۋدا.
□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
شينحۋا اگەنتتىگىنىڭ 11 - ايدىڭ 2 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسىنىڭ تاڭداۋلى مۇشەسى، ۇزاق سىنداردان وتكەن ادال كوممۋنيزم جاۋىنگەرى، ۇزدىك پرولەتاريات توڭكەرىسشىسى، ساياساتشى، پارتيا مەن مەملەكەتتىڭ كورنەكتى باسشىسى، جۇڭگو كوممۋنيستىك پارتياسى 17 -، 18 -، 19 - كەزەكتى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ بۇرىنعى زۇڭليى لي كىچياڭ جولداستىڭ سۇيەگى 11 - ايدىڭ 2 - كۇنى بەيجيڭدەگى باباۋشان توڭكەرىستىك قۇرباندار قابىرستانىندا ورتەلدى.
لي كىچياڭ جولداس جۇرەك اۋرۋى تۇتقيىل قوزعالىپ، بار كۇشپەن شۇعىل قۇتقارۋ ءونىم بەرمەي، 2023 - جىلى 10 - ايدىڭ 27 - كۇنى ساعات 0دەن 10 مينۋت وتكەندە شاڭحايدا 68 جاسىندا قايتىس بولدى.
لي كىچياڭ جولداستى شۇعىل قۇتقارۋ كەزىندە جانە قايتىس بولعاننان كەيىن، شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ، حۋ جينتاۋ قاتارلى جولداستار شيپاحاناعا بارىپ كوڭىلىن سۇرادى نەمەسە ءتۇرلى فورمالارمەن لي كىچياڭ جولداستىڭ قايتىس بولعاندىعىنا قايعىلى ازا ءبىلدىردى ءارى ونىڭ تۋىس - تۋعاندارىنان شىنايى حال سۇرادى.
11 - ايدىڭ 2 - كۇنى تۇستەن بۇرىن باباۋشان توڭكەرىستىك قۇرباندار قابىرستانىنىڭ زالى قارالى بەينەگە ەنىپ، زالدا قايعىلى مۋزيكا باياۋ ەستىلىپ تۇردى. زالدىڭ تورىنە «لي كىچياڭ جولداسقا قايعىلى ازا بىلدىرەمىز» دەگەن اق ءتۇستى جازۋ جازىلعان قارا كەرمە تۋ ىلىنگەن، كەرمە تۋدىڭ استىنا لي كىچياڭ جولداستىڭ سۋرەتى قويىلعان. لي كىچياڭ جولداستىڭ سۇيەگى گۇل شوقتارىمەن جانە ارشالارمەن قورشالىپ، ۇستىنە جۇڭگو كوممۋنيستىك پارتياسىنىڭ نارت قىزىل تۋى جابىلعان.
تۇستەن بۇرىن ساعات 9 مولشەرىندە شي جينپيڭ مەن حانىمى پىڭ لييۋان، سونداي - اق لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار ازالى مۋزيكا ءۇنى ىشىندە لي كىچياڭ جولداستىڭ سۇيەگىنىڭ الدىنا باياۋ قادام باسىپ بارىپ، اسا قايعىلى بەينەدە ءۇنسىز تۇرەگەپ تۇرىپ ازا ءبىلدىرىپ، لي كىچياڭ جولداستىڭ سۇيەگىنە 3 رەتتەن تاعزىم ەتتى ءارى لي كىچياڭ جولداستىڭ تۋىس - تۋعاندارىمەن ءبىر - بىرلەپ قول الىسىپ، حال سۇرادى. حۋ جينتاۋ گۇل شەڭبەر ۇسىنىپ، لي كىچياڭ جولداستىڭ قايتىس بولعاندىعىنا ازا ءبىلدىردى.
پارتيا مەن مەملەكەتتىڭ قاتىستى باسشى جولداستارى سۇيەكپەن قوشتاسۋعا باردى نەمەسە ءتۇرلى تاسىلدەرمەن ازا ءبىلدىردى. ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار، لي كىچياڭ جولداستىڭ كوزى تىرىسىندەگى دوستارى مەن اۋىلداستارىنىڭ ۋاكىلدەرى دە سۇيەكپەن قوشتاستى.
