شي جينپيڭ ەركىن ساۋدا سىناق رايونى قۇرىلىسىن ىشكەرىلەي ىلگەرىلەتۋ جونىندە ماڭىزدى نۇسقاۋ بەرىپ بىلاي دەپ باسا دارىپتەدى
باتىلدىقپەن ءورىس اشا العا ىلگەرىلەپ، قيىندىقتاردان قامال الۋدا اتويشى بولىپ، اناعۇرلىم جوعارى دەڭگەيدەگى ەركىن ساۋدا سىناق رايونىن قۇلشىنا قۇرۋ كەرەك
شينحۋا اگەنتتىگىنىڭ 9 - ايدىڭ 26 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ تاياۋدا ەركىن ساۋدا سىناق رايونى قۇرىلىسىن ىشكەرىلەي ىلگەرىلەتۋ جونىندە ماڭىزدى نۇسقاۋ بەرىپ بىلاي دەپ اتاپ كورسەتتى: ەركىن ساۋدا سىناق رايونىن قۇرۋ − پارتيا ورتالىق كوميتەتىنىڭ جاڭا داۋىردە رەفورما جاساۋدى، ەسىك اشۋدى ىلگەرىلەتۋدەگى ماڭىزدى ستراتەگيالىق شاراسى. 10 جىلدان بەرى ەركىن ساۋدا سىناق رايوندارى پارتيا ورتالىق كوميتەتىنىڭ شەشىمدەرى مەن ورنالاستىرۋلارىن دايەكتىلەندىرىپ، تياناقتاندىرىپ، يدەيانى ازات ەتىپ، تۋراشىلدىقتان اينىماي جاڭالىق اشىپ، نەگىزدىك سيپاتتى، ءتول جاسامپازدىق سيپاتتى ءبىر توپ رەفورما جاساۋ، ەسىك اشۋ شارالارىن العا قويىپ، كوپتەگەن بەلگى سيپاتتى، جەتەكشى سيپاتتى تۇزىمدىك جاڭالىق اشۋ جەتىستىكتەرىن قالىپتاستىرىپ، رەفورما جاساۋ، ەسىك اشۋداعى كەشەندى سىناق تۇعىرىندىق رولىن ءونىمدى ساۋلەلەندىردى.
شي جينپيڭ بىلاي دەپ باسا دارىپتەدى: جاڭا جورىقتا 10 جىلدىق قۇرىلىستىڭ تاجىريبەلەرىن جاپپاي قورىتىندىلاۋ نەگىزىندە، ەركىن ساۋدا سىناق رايونىنىڭ دەڭگەيىن جوعارىلاتۋ ستراتەگياسىن ىشكەرىلەي اتقارىپ، باتىلدىقپەن ءورىس اشا العا ىلگەرىلەپ، قيىندىقتاردان قامال الۋدا اتويشى بولىپ، اناعۇرلىم كەڭ سالادا، اناعۇرلىم تەرەڭ دەڭگەيدە ىزدەنىس جاساپ، اناعۇرلىم جوعارى دەڭگەيدەگى ەركىن ساۋدا سىناق رايونىن قۇلشىنا قۇرۋ كەرەك. پارتيانىڭ جاپپاي باسشىلىعىنا تاباندى بولىپ، جوعارى دەڭگەيدە ەسىك اشۋدى جەتەكشى ەتۋگە، تۇزىمدە جاڭالىق اشۋدى وزەك ەتۋگە تاباندى بولىپ، دامۋ مەن حاۋىپسىزدىكتى ءبىر تۇتاس جوسپارلاپ، حالىقارالىق ەكونوميكا - ساۋدا ەرەجەسىمەن جوعارى ولشەمدە ۇشتاسىپ، تۇزىمدىك ەسىك اشۋدى ىشكەرىلەي ىلگەرىلەتىپ، رەفورمانىڭ جالپى تۇلعالىق جوباسى مەن جۇيەلى شوعىرلانۋىن كۇشەيتىپ، تۇتاس كاسىپ سالاسى تىزبەگىنىڭ جاڭالىق اشا دامۋىن ىلگەرىلەتىپ، ەركىن ساۋدا سىناق رايونىنىڭ ۇلگىلىك رولىن اناعۇرلىم ويداعىداي ساۋلەلەندىرۋىنە مۇمكىندىك جاساۋ كەرەك.
ەركىن ساۋدا سىناق رايونى قۇرىلعاندىعىنىڭ 10 جىلدىعى جونىندەگى اڭگىمە ءماجىلىسى 9 - ايدىڭ 26 - كۇنى بەيجيڭدە اشىلدى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەستىڭ ورىنباسار زۇڭليى حى ليفىڭ ماجىلىستە شي جينپيڭنىڭ ماڭىزدى نۇسقاۋىن جەتكىزدى ءارى ءسوز سويلەپ بىلاي دەدى: باس شۋجي شي جينپيڭنىڭ ماڭىزدى نۇسقاۋىنىڭ رۋحىن مۇقيات ۇيرەنىپ، تەرەڭ ءتۇسىنىپ، ەركىن ساۋدا سىناق رايونى قۇرىلىسىنىڭ تاجىريبەلەرىن جان - جاقتى قورىتىندىلاپ، ەركىن ساۋدا سىناق رايونىنىڭ دەڭگەيىن جوعارىلاتۋ ستراتەگياسىن ىشكەرىلەي اتقارىپ، كوزقاراستا ۇزدىكسىز بۇرىلىس جاساپ، قامتاماسىز ەتۋ شارالارىن كۇشەيتىپ، دامۋ مەن حاۋىپسىزدىكتى ءبىر تۇتاس جوسپارلاپ، تۇزىمدە جاڭالىق اشۋدا تىڭ ناتيجە جاراتۋعا كۇش سالىپ، ەسىك اشۋدى جەبەۋدە تىڭ ءورىس اشىپ، دامۋدى جوسپارلاۋدا تىڭ ورە جاراتىپ، اناعۇرلىم جوعارى دەڭگەيدەگى ەركىن ساۋدا سىناق رايونىن قۇلشىنا قۇرۋ كەرەك.
اڭگىمە ماجىلىسىندە ساۋدا مينيسترلىگىندەگى جاۋاپتى جولداس ەركىن ساۋدا سىناق رايونىنىڭ 10 جىلدىق قۇرىلىس جاعدايىنان مالىمەت بەردى، قازىنا مينيسترلىگىنىڭ، جۇڭگو حالىق بانكەسىنىڭ، كەدەن باس مەكەمەسىنىڭ جانە شاڭحايدىڭ، تيانجيننىڭ، فۋجياننىڭ، لياۋنيڭنىڭ، سىچۋاننىڭ، گۋاڭشيدىڭ جاۋاپتى جولداستارى لەبىز ءبىلدىردى.
ورتالىق پەن مەملەكەت ورگاندارىنىڭ قاتىستى تاراۋلارىنداعى، 21 ەركىن ساۋدا سىناق رايونى تۇرعان ولكە، اۆتونوميالى رايون، قالالارداعى جاۋاپتى جولداستار قاتارلىلار اڭگىمە ماجىلىسىنە قاتىناستى.
