جەرگىلىكتى ۋاقىت 3 - ايدىڭ 20 - كۇنى تۇستەن كەيىن ماسكەۋگە ەندى عانا جەتكەن مەملەكەت ءتوراعاسى شي جينپيڭ ۇسىنىس بويىنشا كرەمل سارايىندا رەسەيدىڭ زۇڭتۇڭى پۋتينمەن كەزدەستى.
□ سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن
شينحۋا اگەنتتىگىنىڭ 3 - ايدىڭ 20 - كۇنى ماسكەۋدەن بەرگەن حابارى (تىلشىلەر حاۋ ۋيۋي، شى حاۋ). جەرگىلىكتى ۋاقىت 3 - ايدىڭ 20 - كۇنى تۇستەن كەيىن ماسكەۋگە ەندى عانا جەتكەن مەملەكەت ءتوراعاسى شي جينپيڭ ۇسىنىس بويىنشا كرەمل سارايىندا رەسەيدىڭ زۇڭتۇڭى پۋتينمەن كەزدەستى.
شي جينپيڭ جەتكەندە، كرەمل سارايىنىڭ قولباسشىسى كولىكتەن تۇسەتىن جەردە قارسى الدى. پۋتين زۇڭتۇڭ شي جينپيڭمەن ىقىلاستى قول الىستى ءارى بىرگە سۋرەتكە ءتۇستى. ەكى ەل باسشىلارى جۇڭگو − رەسەي قارىم - قاتىناسى جانە بىرگە كوڭىل ءبولىپ وتىرعان ماسەلەلەر جونىندە ىشكەرىلەي، بۇكپەسىز پىكىرلەستى.
شي جينپيڭ بىلاي دەپ اتاپ كورسەتتى: پۋتين زۇڭتۇڭنىڭ ۇسىنىسىمەن رەسەيدە تاعى دا مەملەكەتتىك ساپاردا بولعانىما توتەنشە قۋانىشتىمىن. 10 جىلدىڭ الدىندا مەن مەملەكەت ءتوراعاسى بولعاننان كەيىن تۇڭعىش رەت ساپارعا شىققاندا رەسەيدى تاڭداعانىم كۇنى بۇگىنگە دەيىن ءالى ەسىمدە. 10 جىلدان بەرى، مەن پۋتين زۇڭتۇڭمەن تىعىز بايلانىستى ساقتاپ كەلدىم. مەيلى، مەن جۇڭگو كوممۋنيستىك پارتياسىنىڭ 20 - قۇرىلتايىندا جۇڭگو كوممۋنيستىك پارتياسى ورتالىق كوميتەتىنىڭ باس شۋجيى مىندەتىن جالعاستى وتەگەندە بولسىن، الدە، جۋىقتا عانا جۇڭگونىڭ مەملەكەت ءتوراعالىعىنا تاعى دا سايلانعاندا بولسىن، ءسىز ەڭ الدىمەن ماعان قۇتتىقتاۋ تەلەگرامماسىن جولدادىڭىز، ايرىقشا العىس ايتامىن. رەسەي كەلەر جىلى زۇڭتۇڭ سايلاۋىن وتكىزەدى. ءسىزدىڭ پارمەندى باسشىلىعىڭىزدا رەسەيدىڭ دامۋى، گۇلدەنۋى جىلدام ىلگەرىلەۋشىلىككە قول جەتكىزدى. مەن رەسەي حالقىنىڭ ءسىزدى، ءسوزسىز، ۇزدىكسىز باتىل قولدايتىندىعىنا سەنەمىن.
شي جينپيڭ بىلاي دەپ باسا دارىپتەدى: جۇڭگو − رەسەي قارىم - قاتىناسىنىڭ دامىپ بۇگىنگە جەتۋىنىڭ تەرەڭ تاريحي لوگيكاسى بار. ەڭ ءىرى كورشى ەلدەر جانە جان - جاقتى ستراتەگيالىق ىستەستىك سەرىكتەستەر رەتىندە، جۇڭگو − رەسەي قارىم - قاتىناسى وزدەرىنىڭ ديپلوماتيالىق جالپى جاعدايىندا جانە سىرتقا باعىتتالعان ساياساتىندا الدىمەن ويلاستىرىلاتىن ورىندا تۇرادى. جۇڭگو ەجەلدەن دەربەس، وزىنە - ءوزى قوجايىن بولۋ سىندى ديپلوماتيالىق ساياساتتى اتقارىپ كەلەدى. جۇڭگو − رەسەي قارىم - قاتىناسىن ويداعىداي بەكەمدەۋ، ويداعىداي دامىتۋ − جوڭگو جاقتىڭ ءوزىنىڭ ءتۇبىرلى مۇددەسى مەن دۇنيە ءجۇزىنىڭ دامۋ ۇلكەن اۋقىمىنا نەگىزدەلىپ جاساعان ستراتەگيالىق تالعامى. جۇڭگو جاقتىڭ رەسەي جاقپەن ستراتەگيالىق ىستەستىكتى كۇشەيتۋ سىندى ۇلكەن بەتالىسى بۇلجىمايدى. جۇڭگو مەن رەسەي ەكەۋى دە مەملەكەتتىڭ دامۋىن، گۇلدەنۋىن جۇزەگە اسىرۋعا كۇش سالادى، ەكەۋى دە دۇنيە ءجۇزىنىڭ كوپ ۇيەكتەنۋىن قولدايدى، ەكەۋى دە حالىقارالىق قارىم - قاتىناستىڭ دەموكراتيالانۋىن ىلگەرىلەتەدى. ەكى جاق ءارقايسى سالاداعى ناقتى سەلبەستىكتى ونان ارى تەرەڭدەتىپ، بىرلەسكەن مەملەكەتتەر ۇيىمى سياقتى كوپ جاقتى تۇعىردا سەلبەسۋدى، سايكەسۋدى كۇشەيتىپ، ءوز مەملەكەتتەرىنىڭ دامۋىنا، گۇلدەنۋىنە دەم بەرىپ، دۇنيە ءجۇزىنىڭ بەيبىتشىلىگىنىڭ، ورنىقتىلىعىنىڭ مىزعىماس تىرەگى بولۋى كەرەك.
پۋتين شي جينپيڭنىڭ رەسەيدە مەملەكەتتىك ساپاردا بولعاندىعىن قىزۋ قارسى الىپ، شي جينپيڭنىڭ ۇزدىكسىز جۇڭگونىڭ مەملەكەت ءتوراعاسى بولعاندىعىن تاعى ءبىر مارتە قىزۋ قۇتتىقتادى. پۋتين مىنالاردى ءبىلدىردى: وتكەن 10 جىلدان بەرى، جۇڭگو ءارقايسى جاقتاعى دامۋدا تۇگەلدەي جۇرتتى جالت قاراتقان ۇلى تابىستارعا قول جەتكىزدى، بۇل ءتوراعا شي جينپيڭنىڭ دانىشپان باسشىلىعىنىڭ ارقاسى، سونداي - اق جۇڭگونىڭ مەملەكەت ءتۇزىمى مەن باسقارۋ جۇيەسىنىڭ ابزالدىلىعىن دالەلدەدى. مەن ءتوراعا شي جينپيڭنىڭ پارمەندى باسشىلىعىندا، جۇڭگونىڭ، ءسوزسىز، ۇزدىكسىز دامىپ، گۇلدەنىپ، بەلگىلەنگەن ۇلى نىسانالاردى ءساتتى جۇزەگە اسىرا الاتىندىعىنا سەنەمىن. ەكى جاقتىڭ بىرگە قۇلشىنۋىندا، تاياۋ جىلداردان بەرى رەسەي − جۇڭگو قارىم - قاتىناسى ءارقايسى سالادا تۇگەلدەي مول جەتىستىككە قول جەتكىزدى. رەسەي جاق جۇڭگو جاقپەن ەكى جاقتى ناقتى سەلبەستىكتى ۇزدىكسىز تەرەڭدەتىپ، حالىقارالىق ىستەردەگى تىلدەسۋدى، سەلبەسۋدى كۇشەيتىپ، دۇنيە ءجۇزىنىڭ كوپ ۇيەكتەنۋى مەن حالىقارالىق قارىم - قاتىناستىڭ دەموكراتيالانۋ اياق الىسىن ىلگەرىلەتۋدى قالايدى.
ەكى جاق ۋكراينا ماسەلەسى جونىندە ىشكەرىلەي پىكىر اۋىستىردى. شي جينپيڭ بىلاي دەپ باسا دارىپتەدى: ۋكراينا ماسەلەسىندە بەيبىتشىلىك، بايىپتىلىق جونىندەگى ۇندەر ۇزدىكسىز جينالىپ، كوپ ساندى ەلدەر شۇعىل جاعدايدى باسەيتۋدى قولداپ، بەيبىتشىلىككە ءناسيحاتتاپ، كەلىسسوز وتكىزۋگە جەبەۋدى قۋاتتاپ، وت ۇستىنە ماي قۇيۋعا قارسى تۇرۋدا. تاريحتان قاراساق، قاقتىعىس ەڭ سوڭىندا تۇگەلدەي تىلدەسۋ جانە كەلىسسوز وتكىزۋ ارقىلى شەشۋدى قاجەت ەتەدى. تاياۋدا جۇڭگو جاق ارناۋلى تۇردە تۇرعى حۇجاتىن جاريالاپ، ۋكراينا داعدارىسىن ساياسي جولمەن شەشۋگە ۇندەپ، قىرعي قاباق سوعىس ويىنا قارسى تۇردى، سىڭار جاقتى جازالاۋعا قارسى تۇردى. ءبىز قيىنشىلىق قانشالىق كوپ بولعان سايىن، بەيبىتشىلىككە سولعۇرلىم مۇمكىندىك قالدىرۋ؛ قايشىلىق قانشالىقتى شيەلەنىسكەن سايىن، تىلدەسۋ قۇلشىنىسىنان سولعۇرلىم كەشپەۋ كەرەك دەپ قارايمىز. جۇڭگو جاق ۋكراينا ماسەلەسىن ساياسي جولمەن شەشۋدى ىلگەرىلەتۋدە سىندارلى رولىن ۇزدىكسىز ساۋلەلەندىرۋدى قالايدى.
پۋتين مىنالاردى ءبىلدىردى: رەسەي جاق جۇڭگو جاقتىڭ كەلەلى حالىقارالىق ماسەلەلەردە ەجەلدەن ءادىل، وبيەكتيۆ، تەپە - تەڭ تۇرعىدان جازباعاندىعىن، ادىلدىكتى، ادىلەتتىلىكتى جاقتاعاندىعىن القايدى. رەسەي جاق جۇڭگو جاقتىڭ ۋكراينا ماسەلەسىن ساياسي جولمەن شەشۋ جونىندەگى تۇرعى حۇجاتىن مۇقيات زەرتتەپ، بەيبىتشىلىك كەلىسسوزىنە اشىق پوزيتسيا ۇستاندى، جۇڭگو جاقتىڭ مۇندا سىندارلى رول اتقارۋىن قارسى الادى.
ەكى ەلدىڭ مەملەكەت باسشىلارى ەرتەڭ تاعى دا كەڭەس وتكىزىپ، بولاشاق ءبىر مەزگىلدەگى جۇڭگو − رەسەي جان - جاقتى ستراتەگيالىق ىستەستىك سەرىكتەستىك قارىم - قاتىناسىنىڭ تىڭ جوباسىن جوسپارلاۋدى كۇتەتىندىكتەرىن ءبىلدىردى.
