جۇڭگو كوممۋنيستىك پارتياسى ورتالىق كوميتەتى ساياسي بيۋروسى تۇراقتى كوميتەتى ءماجىلىس اشتى
جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ قىزمەتى مالىمەتىن تىڭدادى
ساقتانۋ - تىزگىندەۋ قىزمەتىن ونان ارى ساپالىلاندىرۋدىڭ 20 تارماقتى شاراسىن اقىلداسىپ، ورنالاستىردى
جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ ءماجىلىستى باسقاردى
شينحۋا اگەنتتىگىنىڭ 11 - ايدىڭ 10 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتى ساياسي بيۋروسى تۇراقتى كوميتەتى 11 - ايدىڭ 10 - كۇنى ءماجىلىس اشىپ، جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ قىزمەتى مالىمەتىن تىڭدادى، ساقتانۋ - تىزگىندەۋ قىزمەتىن ونان ارى ساپالىلاندىرۋدىڭ 20 تارماقتى شاراسىن اقىلداسىپ، ورنالاستىردى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ ءماجىلىستى باسقاردى ءارى ماڭىزدى ءسوز سويلەدى.
ءماجىلىس مىنالاردى اتاپ كورسەتتى: قازىر جاڭا تيپتى ايدارشا ۆيرۋس ءالى دە ۇزدىكسىز وزگەرىپ، بۇكىل الەمدە ىندەت ءالى دە تارالۋ كۇيىندە تۇر، ەل ىشىندە جاڭادان تۋىلعان ىندەت ۇزدىكسىز جارىققا شىعۋدا. ەلىمىز − جان سانى كوپ ءىرى ەل، ءالسىز ادامدار شوعىرىنىڭ سانى كوپ، وڭىرلەردىڭ دامۋى بىركەلكى ەمەس، ەمدەۋ بايلىعىنىڭ جالپى مولشەرى جەتكىلىكسىز، كەيبىر وڭىرلەردە ىندەت ءالى دە بەلگىلى كولەم الىپ وتىر. ۆيرۋستىڭ وزگەرۋى مەن قىس، كوكتەم ماۋسىمىنداعى كليمات فاكتورلارىنىڭ ىقپالىنان ىندەتتىڭ تارالۋ اۋماعى مەن كولەمى ونان ارى كەڭەيۋى مۇمكىن، ساقتانۋ - تىزگىندەۋ جاعدايى ءالى دە اۋىر، ءسوز جوق، ستراتەگيالىق تاباندىلىقتى ساقتاپ، ىندەتتەن ساقتانۋ - تىزگىندەۋ قىزمەتتەرىن عىلمي، دالمە - ءدال ويداعىداي ىستەۋ كەرەك.
ءماجىلىس مىنالاردى باسا دارىپتەدى: پارتيا ورتالىق كوميتەتىنىڭ شەشىمدەرى مەن ورنالاستىرۋلارىن تولىق، دالمە - ءدال، جاپپاي دايەكتىلەندىرىپ، تياناقتاندىرىپ، حالىقتى بارىنەن جوعارى قويۋعا، ءومىردى بارىنەن جوعارى قويۋعا بۇلجىماستان تاباندى بولىپ، ”سىرتتان كىرۋدەن ساقتانۋ، ىشتە قايتا بەلەڭ بەرۋدەن ساقتانۋ“ باس تاكتيكاسىن بۇلجىماستان تياناقتاندىرىپ، ”يكەمدى نولگە ءتۇسىرۋ“ باس باعىتىن بۇلجىماستان دايەكتىلەندىرىپ، ىندەتكە توسقاۋىل قويۋ، ەكونوميكانى ورنىقتىرۋ، دامۋ حاۋىپسىز بولۋ تالابىنا ساي، ىندەتتەن ساقتانۋ - تىزگىندەۋدى جانە ەكونوميكالىق، قوعامدىق دامۋدى جوعارى ونىمدىلىكپەن ءبىر تۇتاس جوسپارلاپ، حالىقتىڭ ءومىرىنىڭ حاۋىپسىزدىگى مەن دەنساۋلىعىن ەڭ جوعارى دەڭگەيدە قورعاپ، ىندەتتىڭ ەكونوميكالىق، قوعامدىق دامۋعا جەتكىزەتىن ىقپالىن ەڭ جوعارى شەكتە ازايتۋ كەرەك.
ءماجىلىس مىنالاردى اتاپ كورسەتتى: ۆيرۋستىڭ تەز تارالۋ ەرەكشەلىگىنە ۇيلەسىپ، ”ءتورت ەرتە بولۋ“ تالابىن شىنايى تياناقتاندىرىپ، تەز تارالعان ىندەتتى جەدەل تىزگىندەپ، شەپتىڭ كەڭەيۋىنەن، ۋاقىتتىڭ ۇزارۋىنان ساقتانۋ كەرەك. كۇشتى شوعىرلاندىرا وتىرىپ ءتۇيىندى وڭىرلەردەگى ىندەتتى جويۋ شايقاسىن ويداعىداي جۇرگىزىپ، اناعۇرلىم باتىل دا كەسىمدى شارا قولدانىپ قامال الىپ، ىندەتتىڭ تارالۋىن، ءورشۋىن تەز ارادا تەجەپ، قالىپتى ءوندىرىس، تۇرمىس ءتارتىبىن تەز ارادا قالپىنا كەلتىرۋ كەرەك، قول قۋسىرىپ قاراپ وتىرۋعا، اركىم ءوز بىلگەنىن ىستەۋگە استە بولمايدى. عىلمي، دالمە - ءدال ساقتانۋ - تىزگىندەۋگە تاباندى بولىپ، ىندەتتەن ساقتانۋ قىزمەتىنىڭ ونىمدىلىگىن جوعارىلاتىپ، ىندەت حاۋىپ - قاتەرىنە دۇرىس تالداۋ جاساپ، ساقتانۋ - تىزگىندەۋ شارالارىن ونان ارى ساپالىلاندىرىپ، رەتتەپ، اۋاشالاۋ، وتكەرمەلەپ تاسىمالداۋ، حىسۋان تەكسەرۋ، ادامداردىڭ جىلجۋى، ەمدەۋ قىزمەت وتەۋى، ۆاكسينا ەگۋ، قىزمەت وتەۋمەن قامتاماسىز ەتەتىن كاسىپورىندار جانە مەكتەپ اۋلاسى قاتارلىلاردا ىندەتتەن ساقتانۋ - تىزگىندەۋ، بوگەلىپ قالعان ادامداردى تاراتۋ سياقتى جاقتاردا اناعۇرلىم دالمە - ءدال شارالار قولدانۋ كەرەك. ۆاكسينانى، ءدارى - دارمەكتى زەرتتەپ - اشۋدى زور كۇشپەن ىلگەرىلەتىپ، ۆاكسينانىڭ، ءدارى - دارمەكتىڭ ونىمدىلىگى مەن باعىتتامالىلىعىن جوعارىلاتۋ كەرەك. ىندەتتەن ساقتانۋ ءتۇرلى شارالارىن تياناقتاندىرۋمەن بىرگە، تالداۋ جاساۋدى، تۇجىرىمداۋدى كۇشەيتۋ كەرەك، ىندەتتەن ساقتانۋدىڭ قاجەتتى شارالارىن بوساڭسىتۋعا بولمايدى، جاۋاپكەرسىزدىك ىستەۋ پوزيتسياسىنا قارسى تۇرۋمەن بىرگە، فورماشىلدىققا، تورەشىلدىككە دە قارسى تۇرۋ جانە ونى جويۋ، ”ساتى - ساتى بويىنشا اۋىرتپالىق قوسۋ“، ”ءبارىن ءبىر شىبىقپەن ايداۋ“ سياقتى ادىستەردى تۇزەتۋ كەرەك. حالىق بۇقاراسىنىڭ وندىرىسىنە، تۇرمىسىنا قىزمەت وتەۋدى، قامتاماسىز ەتۋدى بار كۇشپەن ويداعىداي ىستەپ، ىندەتتى ءبىر جاقتى ەتۋ كەزىندەگى بۇقارانىڭ نەگىزگى تۇرمىس قاجەتىن شىنايى قاناعاتتاندىرىپ، اۋرۋ كورسەتۋ، ەمدەلۋ سياقتى نەگىزگى حالىق تۇرمىسى قىزمەت وتەۋىن قامتاماسىز ەتىپ، قارتتار، ءالسىز جاندار، ناۋقاستار، مۇگەدەكتەر سياقتى ەرەكشە قاۋىمعا كوڭىل ءبولۋ، كومەكتەسۋ تەبىنىن ارتتىرىپ، حالىق بۇقاراسىنىڭ ءىس جۇزىندىك قيىنشىلىعىن ويداعىداي شەشىپ، قالىپتى ءوندىرىس، قىزمەت ءتارتىبىن بار كۇشپەن قورعاۋ كەرەك. ءتۇيىندى ادامدار شوعىرىنا ۆاكسينا ەگۋ سياقتى قىزمەتتەردى ويداعىداي ىستەپ، ىندەتتەن ساقتانۋ - تىزگىندەۋ قالتقىسىن بەكەمدەۋ كەرەك.
ءماجىلىس مىنالاردى باسا دارىپتەدى: ءار دارەجەلى پارتكومدار مەن ۇكىمەتتەر يدەيا مەن ارەكەتتى پارتيا ورتالىق كوميتەتىنىڭ شەشىمدەرىمەن، ورنالاستىرۋلارىمەن بىرلىككە كەلتىرىپ، ىندەتكە قارسى اتتانۋ كۇرەسىنىڭ كۇردەلىلىگىن، جاپالىلىعىن، قايتالامالىلىعىن جەتە تانىپ، جاۋاپكەرشىلىك ارقالاۋدى كۇشەيتىپ، كۇرەس قابىلەتىن كۇشەيتىپ، ءوز جاۋاپكەرشىلىگىن ءبىلىپ، ءوز جاۋاپكەرشىلىگىن ادا ەتىپ، نەگىزگى ساتىعا ىشكەرىلەي بويلاپ، الدىڭعى شەپكە ىشكەرىلەي بويلاپ، ىندەتتەن ساقتانۋ - تىزگىندەۋ قىزمەتتەرىن ناقتى، ەگجەي - تەگجەيلى يگەرىپ، يدەيالىق جاقتان جەتەكتەۋدى جانە پسيحيكالىق جاقتان جەتەكتەۋدى ويداعىداي ىستەپ، ىندەتتەن ساقتانۋ - تىزگىندەۋدى ۇدايىلاندىرۋدان قامال الۋ شايقاسىنىڭ جەڭىسىنە باتىل قول جەتكىزۋ كەرەك.
ءماجىلىس باسقا دا ىستەردى اقىلداستى.
