3 - ايدىڭ 26 - كۇنى مەملەكەت ءتوراعاسى شي جينپيڭ پاريجدە فرانسيانىڭ زۇڭتۇڭى ماكرونمەن بىرگە جۇڭگو - فرانسيا الەمدىك جونگە سالۋ تالقى مىنبەرىنىڭ جابىلۋ سالتىنا قاتىناستى. گەرمانيانىڭ زۇڭليى مەركەل، ەۆروپا وداعى كوميتەتىنىڭ ءتوراعاسى يۋنكەر ۇسىنىسپەن قاتىناستى. سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن
شينحۋا اگەنتتىگىنىڭ 3 - ايدىڭ 26 - كۇنى پاريجدەن بەرگەن حابارى (تىلشىلەر چىن جى، لي جۇڭفا، حۋاڭيىن جيازى). مەملەكەت ءتوراعاسى شي جينپيڭ 3 - ايدىڭ 26 - كۇنى پاريجدە فرانسيا زۇڭتۇڭى ماكرونمەن بىرگە جۇڭگو - فرانسيا الەمدىك جونگە سالۋ تالقى مىنبەرىنىڭ جابىلۋ سالتىنا قاتىناستى. گەرمانيانىڭ زۇڭليى مەركەل، ەۆروپا وداعى كوميتەتىنىڭ ءتوراعاسى يۋنكەر ۇسىنىسپەن قاتىناستى.
شي جينپيڭ مەن ماكرون، مەركەل، يۋنكەر دۋ قول شاپالاق ءۇنى ىشىندە جابىلۋ سالتى وتەتىن زالعا بىرگە كىردى.
شي جينپيڭ سوزىندە مىنالاردى اتاپ كورسەتتى: جۇڭگو مەن فرانسيا الەمدىك جونگە سالۋدىڭ ماڭىزدى قاتىسۋشىلارى رەتىندە، دۇنيە ءجۇزىنىڭ بەيبىتشىلىگىن، حاۋىپسىزدىگىن، ورنىقتىلىعىن قورعاۋ، كوپ جاقتىلىق پەن ەركىن ساۋدانى قورعاۋ، بىرلەسكەن مەملەكەتتەر ۇيىمىنىڭ بەلسەندى رول اتقارۋىن قولداۋ سياقتى كەلەلى ماسەلەلەردە كەڭ كولەمدى ساياسي ورتاق تانىمعا جانە بەرىك سەلبەستىك نەگىزىنە يە. جۇڭگو مەن فرانسيا ەكى مەملەكەت ءبىر - ءبىرىن قۇرمەتتەۋگە، ءوزارا سەنىم ارتۋعا، ءوزارا تەڭ تۇرعىدا مامىلە جاساسۋعا، اشىق، سيىسىمدى بولۋعا، ءوزارا پايدا جەتكىزىپ، بىرگە يگىلىككە كەنەلۋگە تاباندى بولىپ، حالىقارالىق قارىم - قاتىناستاردىڭ نەگىزگى ولشەمىن بىرگە قورعاپ، الەمدىك جونگە سالۋدىڭ كەمەلدەنۋىن بىرگە ىلگەرىلەتىپ، دۇنيە ءجۇزىنىڭ بەيبىتشىلىگى مەن ورنىقتىلىعىن قورعاۋدىڭ، ادامزات وركەنيەتىنىڭ العا باسۋىن جەبەۋدىڭ ماڭىزدى كۇشىنە اينالدى.
شي جينپيڭ بىلاي دەپ باسا دارىپتەدى: 100 جىلدا كەزىكپەگەن ۇلكەن وزگەرىس الدىندا، قاتاڭ الەمدىك سىن - سايىستار الدىندا، ادامزات دامۋىنىڭ جول ايىرىعىندا قالاي بەت الۋ سىندى تالعام الدىندا، ءار ەل بەلسەندى تۇردە ارەكەت ەتۋشىلەردەن بولۋى، قول قۋسىرىپ قاراپ تۇراتىنداردان بولماۋى، ادامزاتتىڭ بولاشاعى مەن تاعدىرىن ءوز قولىندا ۇستاۋعا تىزە قوسا قۇلشىنۋ كەرەك.
ءبىرىنشى، ءادىل، ۇيلەسىمدى بولۋعا تاباندى بولىپ، جونگە سالۋدىڭ قىزىل سيفرى ماسەلەسىن شەشۋ كەرەك. بىرگە اقىلداسۋ، بىرگە قۇرۋ، بىرگە يگىلىكتەنۋ سىندى الەمدىك جونگە سالۋ كوزقاراسىنا تاباندى بولىپ، الەمدىك ىستەردى ءار ەل حالقى بىرگە اقىلداسىپ بىتىرۋگە تاباندى بولىپ، الەمدىك جونگە سالۋ ەرەجەسىنىڭ دەموكراتيالانۋىن بەلسەنە ىلگەرىلەتۋ كەرەك. بىرلەسكەن مەملەكەتتەر ۇيىمى سىندى كوپ جاقتىلىق تۋىن بيىك ۇستاۋدى جالعاستىرىپ، الەمدىك جانە وڭىرلىك كوپ جاقتى مەحانيزمىنىڭ ورەلى رولىن تولىق ساۋلەلەندىرىپ، ادامزاتتىڭ تاعدىرلاس ورتاق تۇلعاسىن قۇرۋدى بىرگە ىلگەرىلەتۋ كەرەك.
ەكىنشى، ءوزارا اقىلداسۋعا، ءبىر - ءبىرىن تۇسىنۋگە تاباندى بولىپ، سەنىمدىلىكتىڭ قىزىل سيفرى ماسەلەسىن شەشۋ كەرەك. ءبىر - ءبىرىن قۇرمەتتەۋدى، ءوزارا سەنىمدىلىكتى الدىڭعى ورىنعا قويىپ، تىلدەسۋدەن، اقىلداسۋدان پايدالانىپ، ورتاقتىققا ۇمتىلىپ، ايىرماشىلىقتى ساقتاۋعا، ورتاقتىقتاردى شوعىرلاندىرىپ، ايىرماشىلىقتاردى جويۋعا تاباندى بولىپ، ستراتەگيالىق ءوزارا سەنىمدىلىكتى كۇشەيتىپ، ءبىر - بىرىنەن كۇماندانۋدى ازايتۋ كەرەك. دۇرىس ادىلەت - مۇددە كوزقاراسىنا تاباندى بولىپ، ادىلەتتى الدىمەن ويلاستىرىپ، ادىلەت پەن مۇددەنى قاتار قاراستىرۋ كەرەك. تۇرلىشە وركەنيەتتەردىڭ بارىس - كەلىسىن، تىلدەسۋىن كۇشەيتىپ، ءوزارا ءتۇسىنۋدى جانە ءبىرىن - ءبىرى مويىنداۋدى تەرەڭدەتۋ كەرەك.
ءۇشىنشى، قيىنشىلىقتاردى تىزە قوسا وتىرىپ جەڭۋگە تاباندى بولىپ، بەيبىتشىلىكتىڭ قىزىل سيفرى ماسەلەسىن شەشۋ كەرەك. ورتاق، كەشەندى، سەلبەسەتىن، باياندى جاڭا حاۋىپسىزدىك كوزقاراسىن ۇستانىپ، قىرعي قاباق سوعىسى جانە سەلبەسپەي بەلدەسەتىن كونە ويدى تاستاپ، ورمان ەرەجەسىنەن باس تارتىپ، تالاس - تارتىستى بەيبىت تاسىلمەن شەشۋگە تاباندى بولىپ، پالەنى كورشىسى جاققا بەتتەتۋگە، باسقانى زيانداپ، وزىنە پايدا جەتكىزۋگە قارسى تۇرۋ كەرەك. ءار ەل بىرگە بەيبىت دامۋ جولىمەن ءجۇرۋ كەرەك.
ءتورتىنشى، ءوزارا پايدا جەتكىزىپ، بىرگە يگىلىككە كەنەلۋگە تاباندى بولىپ، دامۋدىڭ قىزىل سيفرى ماسەلەسىن شەشۋ كەرەك. جاڭالىق اشۋدى جەتەكشى ەتۋگە، سايكەسىپ، بىرلەسە قيمىلداۋعا، ءادىل، سيىسىمدى بولۋعا تاباندى بولىپ، ومىرشەڭدىككە باي ارتۋ ۇلگىسىن، اشىق، تەڭ يگىلىكتەنەتىن سەلبەستىك ۇلگىسىن، تەڭگەرىمدى، جالپىعا ءتيىمدى دامۋ ۇلگىسىن قالىپتاستىرىپ، دۇنيە جۇزىندەگى ءار ەل حالقىنىڭ ەكونوميكانىڭ جاھاندانىپ دامۋ جەتىستىگىنەن تەڭ يگىلىكتەنۋىنە مۇمكىندىك جاساۋ كەرەك. جۇڭگو دۇنيە جۇزىلىك ساۋدا ۇيىمىنا قاجەتتى رەفورمالار جاساۋدى قولدايدى، كوپ جاقتى ساۋدا ءتۇزىلىسىن قورعايدى، فرانسيانى قامتىعان دۇنيە جۇزىندەگى ءار ەلدىڭ ”ءبىر بەلدەۋ، ءبىر جول“دى بىرگە قۇرۋىنا بەلسەنە ارالاسۋىن قارسى الادى. ءبىز جۇڭگو - ەۆروپا قارجى قوسۋ كەلىسىمى كەلىسسوزىن بىرگە ىلگەرىلەتۋىمىز كەرەك.
شي جينپيڭ مىنانى اتاپ كورسەتتى: جۇڭگو - فرانسيا دوستىعى ۇزاققا سوزىلعان. جاڭا جاعدايدا، ەكى جاق الىسقا نازار تاستاپ، بولاشاققا جول اشىپ، سەلبەسۋدى كۇشەيتۋ كەرەك. ءداستۇرلى سالالارداعى سەلبەستىكتى تەرەڭدەتىپ، جاڭادان گۇلدەنگەن سالالارداعى سەلبەستىكتى جەدەل ىلگەرىلەتىپ، كليمات وزگەرىسى جاعىنداعى سەلبەستىكتى كۇشەيتىپ، «پاريج كەلىسىمىن» جاپپاي تياناقتاندىرىپ، بيىلعى بىرلەسكەن مەملەكەتتەر ۇيىمىنىڭ كليمات وزگەرىسى جونىندەگى باسشىلار باس قوسۋىنىڭ بەلسەندى جەتىستىكتەرگە قول جەتكىزۋىن ىلگەرىلەتىپ، ەكى ەل حالقىنا جانە ءار ەل حالقىنا قۇت - ىرىس اكەلۋ كەرەك. جۇڭگو - فرانسيا ەكى جاقتىڭ جانە قاتىستى جاقتاردىڭ تىلدەسۋ ارناسىنىڭ ىركىلىسسىزدىگىن ساقتاپ، اۋىس - ءتۇيىس ارقىلى سەلبەستىكتى جەبەپ، سەلبەستىك ارقىلى تەڭ يگىلىكتەنۋدى جەبەپ، اناعۇرلىم كوركەم جەر شارى مەكەنىن قۇرۋعا قول ۇستاسا اقىل - پاراسات جانە كۇش - قۋات قوسۋىن ءۇمىت ەتەدى.
ماكرون سوزىندە بىلاي دەدى: ەۆروپا مەن جۇڭگونىڭ تىلدەسۋدى، كەڭەسۋدى ساقتاۋى كوپ جاقتىلىقتى قورعاۋدا ورنىن وگەيسىتۋگە بولمايتىن رول اتقارۋدا. ەۆروپا مەن جۇڭگونىڭ يراننىڭ يادرو ماسەلەسى، كليمات وزگەرىسى، افريكا قۇرلىعىنىڭ حاۋىپسىزدىگى جانە دامۋى سياقتى سالالارداعى تۇرعىسى قارايلاس، ءبارى دە پارمەندى، ءادىل كوپ جاقتى جۇيە قۇرىپ، دۇنيە ءجۇزىنىڭ بەيبىتشىلىگىنە جانە حاۋىپسىزدىگىنە ۇلەس قوسۋدى دارىپتەيدى. جۇڭگونىڭ قارىشتاي دامۋى، سان ميلليون ادامدى كەدەيلىكتەن ءساتتى ارىلتۋى ادامعا تەرەڭ اسەر بەرەدى. فرانسيا جۇڭگونىڭ حالىقارالىق ىستەردەگى ماڭىزدى، بەلسەندى رولىنا باسا ءمان بەرەدى. ەۆروپا - جۇڭگو دۇنيە جۇزىندەگى ماڭىزدى كۇشتەر، ستراتەگيالىق ءوزارا سەنىمدىلىكتى كۇشەيتىپ، تىلدەسۋ تاسىلىمەن سەلبەستىكتى جەبەۋ كەرەك. جۇڭگو جاق العا قويعان ”ءبىر بەلدەۋ، ءبىر جول“ باستاماسى كەلەلى ماڭىزعا يە، دۇنيە ءجۇزىنىڭ بەيبىتشىلىگىندە، ورنىقتىلىعىندا، دامۋىندا ماڭىزدى رول اتقارا الادى. ەۆروپا جاق جاڭالىق اشۋ تاسىلىمەن ەۆروپا وداعىنىڭ دامۋ ستراتەگياسى مەن ”ءبىر بەلدەۋ، ءبىر جول“ باستاماسىن ءتۇيىلىستىرىپ، ەۆروپا - ازيانىڭ ءوزارا بايلانىسۋىن، ءوزارا ۇلاسۋىن بىرگە جەبەۋىنە بولادى.
مەركەل بىلاي دەدى: ەۆروپا ەلدەرىنىڭ جۇڭگومەن اراداعى تاماشا قارىم - قاتىناسى ەۆروپا وداعىنىڭ جۇڭگومەن كوپ جاقتى سەلبەستىك جاساسۋىنا تاماشا نەگىز ازىرلەدى. ەۆروپا جاق ەۆروپا - جۇڭگو قارجى قوسۋ كەلىسىمى كەلىسسوزىن جەدەل ىلگەرىلەتىپ، ”ءبىر بەلدەۋ، ءبىر جول“ سىندى ماڭىزدى سەلبەستىك باستاماسىنا قاتىسۋدى بەلسەنە كەڭەسۋ، ەۆروپا - جۇڭگو سەلبەسۋ ارقىلى كوپ جاقتىلىقتى قورعاۋ، دۇنيە جۇزىلىك ساۋدا ۇيىمى سياقتى كوپ جاقتى قۇرىلىمدار رەفورماسىن بىرگە اقىلداسۋ كەرەك. گەرمانيا كەلەر جىلى ەۆروپا - جۇڭگو باسشىلارىنىڭ كەڭەسىن وتكىزۋدى ۇسىنىس ەتەدى.
يۋنكەر بىلاي دەدى: ەۆروپا - جۇڭگو ماڭىزدى ستراتەگيالىق سەلبەستىك سەرىك. ەكى جاقتىڭ تەپە - تەڭ نەگىزدە تىلدەسۋدى ساقتاۋى ەرەكشە ماڭىزدى، ەۆروپا - جۇڭگو قارجى قوسۋ كەلىسىمى كەلىسسوزىن بەلسەنە ىلگەرىلەتۋ ءارى دۇنيە جۇزىلىك ساۋدا ۇيىمىنىڭ رەفورماسى سياقتى كەلەلى حالىقارالىق ماسەلەلەردە سايكەستىكتى ساقتاۋ كەرەك. مەن الدا وتكىزىلەتىن ەۆروپا - جۇڭگو باسشىلارى كەڭەسىنىڭ بەلسەندى تابىستارعا قول جەتكىزۋىن ءۇمىت ەتەمىن.
ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.
