شي جينپيڭ، لي كىچياڭ، لي جانشۋ، ۋاڭ
ياڭ، ۋاڭ حۋنيڭ، حان جىڭ، ۋاڭ چيشان ساۋىق كەشتى كوردى
رەفورما جاساۋدىڭ، ەسىك
اشۋدىڭ 40 جىلدىعىن قۇتتىقتاۋعا ارنالعان «ءبىزدىڭ 40 جىل» اتتى ادەبيەت -
كوركەمونەر ساۋىق كەشى 12 - ايدىڭ 14 - كۇنى بەيجيڭدەگى حالىق سارايىندا ءوتتى. شي
جينپيڭ، لي كىچياڭ، لي جانشۋ، ۋاڭ ياڭ، ۋاڭ حۋنيڭ، حان جىڭ، ۋاڭ چيشان قاتارلى
پارتيا مەن مەملەكەتتىڭ باسشىلارى 3000نان استام كورەرمەنمەن بىرگە ساۋىق كەشتى
كوردى. سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
شينحۋا
اگەنتتىگىنىڭ 12 - ايدىڭ 14 - كۇنى بەيجيڭنەن بەرگەن حابارى (تىلشىلەر ۋ جيڭ، لي
حۇي). ۇلى وزگەرىس ايبىندى داستان جازدى؛ ماڭگى ەستەن شىعارماي، گۇلدەنۋ جورىعىنا
ەكپىندەي ۇمتىلايىق! رەفورما جاساۋدىڭ، ەسىك اشۋدىڭ 40 جىلدىعىن قۇتتىقتاۋعا
ارنالعان «ءبىزدىڭ 40 جىل» اتتى ادەبيەت - كوركەمونەر ساۋىق كەش 12 - ايدىڭ 14 -
كۇنى كەشتە بەيجيڭدە ءوتتى. شي جينپيڭ، لي كىچياڭ، لي جانشۋ، ۋاڭ ياڭ، ۋاڭ حۋنيڭ،
حان جىڭ، ۋاڭ چيشان قاتارلى پارتيا مەن مەملەكەتتىڭ باسشىلارى 3000نان استام
كورەرمەنمەن بىرگە ساۋىق كەشتى كورىپ، رەفورما جاساپ، ەسىك اشقان 40 جىلداعى كۇللى
دۇنيەنى جالت قاراتقان تاريحي تابىستاردى بىرگە ەسكە الدى.
حالىق
سارايىنىڭ 10 مىڭ ادامدىق زالىندا شامدار جايناپ، 2 - قاباتتاعى مىنبە
ماڭدايشالىعىنا «شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ
توڭىرەگىنە تىعىز ىنتىماقتاسىپ، جۇڭگوشا سوتسياليزم ۇلى تۋىن بيىك ۇستاپ، دىڭ
شياۋپيڭ نازارياسىن، <ۇشكە ۋاكىلدىك ەتۋ> ماڭىزدى يدەياسىن، عىلمي دامۋ
كوزقاراسىن، شي جينپيڭنىڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ،
جاڭا داۋىردەگى رەفورما جاساۋدى، ەسىك اشۋدى ۇزدىكسىز العا ىلگەرىلەتەيىك!» دەگەن
كەرمە تۋ ىلىنگەن. ساحنانىڭ ورتاسىنداعى «1978»، «1979»... دەپ كەلگەن 40 جىلدى
بەينەلەيتىن ساندار شۇعىلا شاشقان كۇرەس ءىزىن كوز الدىعا جايىپ سالدى. ساحنانىڭ
ەكى جاعىندا 18 قۇرمەت قاراۋىلىنىڭ قورعاۋىنداعى التىن ءتۇستى ءبيداي تولقىنىمەن
كومكەرىلگەن ءداۋىر ەسكەرتكىشى، بەس جۇلدىزدى نارت قىزىل تۋ كەڭىستىككە شۇعىلا
شاشىپ تۇر.
19 ساعات 55 مينۋتتا شات مەرەيلى مۋزيكا ۇنىمەن شي جينپيڭ قاتارلى
باسشى جولداستار زالعا كىرىپ، رەفورما جاساۋعا، ەسىك اشۋعا ەلەۋلى ۇلەس قوسىپ،
ماراپاتتالعانداردىڭ ۋاكىلدەرىمەن ىقىلاستى تۇردە قول الىسىپ، ولارعا وسكەلەڭ
قۇرمەت ءبىلدىردى، بۇكىل زالدان شاتىرلاعان شاپالاق ءۇنى كوتەرىلدى.
«بايىرعى بايتاق دالا كوكتەم سامالىمەن وياندى، كوركەم وزەننىڭ سەڭى
سوگىلىپ، تىڭ تىرشىلىك قاينادى. جۇيتكيىك قانە، 5000 جىل تولقىنعا مىنگەن بىزدەر،
ۇلتتىڭ گۇلدەنۋى ءۇشىن جاڭا جورىققا سايلانىپ...» التىن ءتۇستى پارتيا بەلگىسى
ساحنا ورتاسىندا نۇرىن توگىپ، «ءبىزدىڭ جولىمىز» اتتى حورمەن ساۋىق كەشتىڭ
شىمىلدىعى اشىلدى.
ساۋىق كەش
كىرىسپە، الدىڭعى جانە سوڭعى ءبولىم، سوڭعى ءسوز بولىپ ءبولىندى. الدىڭعى ءبولىم
«شىعىستىڭ ايبىندى تولقىنى» مۋزيكالى قىسقا تەاتر فورماسىمەن رەفورما جاساپ، ەسىك
اشقاننان بەرگى جۇڭگوداعى وراسان زور وزگەرىستەردى قايتا كوز الدىعا اكەلدى.
«كەزدەسەيىك جاس دوستار»، «شۇعىلاعا شومعان ءومىرىمىز»، «التىن ۇرشىق پەن كۇمىس
ۇرشىق»، «جاقسىلار امان بولسىن» سياقتى اندەر رەفورمانىڭ كوكتەم سامالى وپكەن
بايابان دالاداعى جۇرتتىڭ ىنتا - جىگەرىن قايتا ەسكە ءتۇسىردى. «ايتقىم كەلمەيدى»،
«ايالداما»، «سىرتقى دۇنيە»، «كوكتەم حيكاياسى» سياقتى كورىنىسپەن بىرلەستىرىلگەن
اندەر مەن بيلەر قالىڭ قۇرىلىسشىلاردىڭ ەكونوميكالىق ەرەكشە رايوننىڭ قۇتتى
توپىراعىندا قاجىرلى ەڭبەك ەتىپ ۇلەس قوسقاندىعىن جىرلادى. «ءۇمىت دالاسىندا»، «مەن
سەنى سۇيەمىن، سولتۇستىكتىڭ قارى»، «شينتيانيوۋ اۋەنى»... سياقتى كلاسسيك اندەر
اۋىل - قىستاق رەفورماسىنىڭ جالىندى كارتيناسىن جايىپ سالدى؛ «جۇڭگو دەپ سوققان
جۇرەگىم»، «جاڭا داۋىرگە وتكەندە»، «بەيجيڭ ءسىزدى قارسى الادى»، «وزەن -
تاۋلارىم»... تاماشا، تارتىمدى ويىندار حالىقتى بايىتۋداعى، مەملەكەتتى
قۇدىرەتتەندىرۋدەگى شۇعىلالى ىزدەردى قايتا ەلەستەتتى. «ۇلى ويانۋ» اتتى كورىنىسپەن
بىرلەستىرىلىپ وقىلعان ولەڭ ساۋىق كەشتىڭ الدىڭعى ءبولىمىن شىرقاۋ شىڭعا كوتەرىپ،
بۇكىل ەلدەگى ءار ۇلت حالقىنىڭ رەفورما جاساپ، ەسىك اشۋعا دەگەن «تەرەڭ تەبىرەنىسى
مەن ماڭگىلىك قۇرمەتىن» بەينەلەدى.
سوڭعى
ءبولىم «ەكپىندەي العا تارتقان جاڭا ءداۋىر» 6 مۋزيكالىق تاراۋ ارقىلى شي جينپيڭنىڭ
جاڭا ءداۋىر جۇڭگوشا سوتسياليزم يدەياسىنىڭ جەتەكشىلىگىندە، جۇڭگوشا سوتسياليزمنىڭ
جاڭا داۋىرگە ءوتىپ، ەڭسە كوتەرۋدەن، بايۋدان قۇدىرەتتەنۋگە دەيىنگى ۇلى شارىقتاۋدى
قارسى العاندىعىن جان - جاقتى كورسەتتى. «جاڭا ءورىس» «ءبىز وزىمىزگە سەنەمىز، العا
باسامىز» دەيتىن ايبىندى ىنتانى بىلدىرسە، «ءداۋىر جىرى» «باقىت كۇرەسپەن كەلەدى،
ەڭبەك ەڭ ارداقتى» دەيتىن اسقاق رۋحتى شىعانداتتى، «كەدەيلىكتەن ارىلۋ جارناماسى»
«جۇڭحۋا پەرزەنتتەرىنىڭ مىڭ جىلدىق ارمانىن جۇزەگە اسىرۋىن» شىرقاسا، «ارميانى
قۇدىرەتتەندىرۋ جاۋىنگەر جىرى» «وتان ءۇشىن مايداندا شەشۋشى جەڭىسكە جەتۋ» تۋرالى
قايتپاس سەرت بەردى... «ءبىر بەلدەۋ، ءبىر جول شالقىماسى» جانە «الەممەن قاۋىشۋ»
سىندى 2 مۋزيكالىق تاراۋدا «جاڭا جىبەك جولىنىڭ بايتاق دالادا كوسىلگەن» كورىنىسى
جاندى ەلىتىپ، «ءبىز تاعدىرلاس ورتاق تۇلعامىز» دەيتىن جۇرەك ءۇنىن بولاشاققا
جەتكىزدى. گو لانيىڭ قاتارلى 10 نەشە ساقا كوركەمونەرشى بار ىقىلاسىمەن ورىنداعان
كلاسسيك ءان «مەن سەنى سۇيەمىن، جۇڭگو» وتان مەن حالىققا دەگەن تەرەڭ ماحابباتتى
بەينەلەدى. ساۋىق كەش شىمىلدىعى «تولقىن جارا تاعى اتتاندىق» انىمەن جابىلىپ، جۇڭگو
حالقىنىڭ تولقىن جارىپ قايتا جەلكەن جايعان، رەفورما جاساپ، ەسىك اشۋعا قايتا
اتتانعان نۇرلى بولاشاعىن بەينەلەدى.
ساۋىق كەش
مۋزيكا، ءبي، تەاتر، ولەڭ وقۋ، كورىنىسپەن بىرلەستىرىپ ورىنداۋ، كوپ مەديا سياقتى
ساحنالىق تاسىلدەردەن جان - جاقتى پايدالانىپ، ايبىنى اسقاق وتانىمىزدىڭ 40 جىلدان
بەرگى عالامات وزگەرىستەرىن جاندى تۇردە قايتا كورسەتىپ، 40 جىلدان بەرى جۇڭگو
كوممۋنيستىك پارتياسىنىڭ جۇڭحۋا ۇلتىن باستاپ، گۇلدەنۋ ارمانىنا قاراي ۇزدىكسىز
كۇرەس جۇرگىزگەن ايبىندى ساپارىن وبرازدى تۇردە كورسەتىپ، ميلليارد حالىقتىڭ شي
جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا
رەفورمانى، ەسىك اشۋدى تۇبەگەيلى جۇرگىزەتىن بەكىمى مەن سەنىمىن تولىق بەينەلەدى.
بەيجيڭدەگى
ج ك پ ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ
شۋجيلەرى، مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىقتارى،
مەملەكەتتىك كەڭەس مۇشەلەرى، ەڭ جوعارى حالىق سوتى مەكەمەسىنىڭ باستىعى، ەڭ جوعارى
حالىق پروكۋراتۋراسىنىڭ باس پروكۋرورى، مەملەكەتتىك ساياسي كەڭەستىڭ ورىنباسار
ءتوراعالارى، سونداي - اق ورتالىق اسكەري ىستەر كوميتەتىنىڭ مۇشەلەرى ساۋىق كەشتى
كوردى.
ورتالىقتاعى پارتيا، ۇكىمەت، ارميا،
بۇقارالىق ۇيىمداردىڭ ءار تاراۋلارىنداعى جانە بەيجيڭ قالاسىنداعى نەگىزگى جاۋاپتى
جولداستار، ءارقايسى دەموكراتيالىق پارتيا - توپتاردىڭ ورتالىق كوميتەتتەرىنىڭ،
مەملەكەتتىك ساۋدا - ونەركاسىپشىلەر بىرلەستىگىنىڭ جاۋاپتىلارى جانە پارتيادا،
توپتا جوق قايراتكەرلەردىڭ ۋاكىلدەرى، ساقا پارتيا مۇشەلەرىنىڭ، ساقا كادرلاردىڭ
ۋاكىلدەرى، رەفورما جاساۋعا، ەسىك اشۋعا ەلەۋلى ۇلەس قوسىپ ماراپاتتالعانداردىڭ
جانە ولاردىڭ تۋىستارىنىڭ ۋاكىلدەرى، شياڭگاڭدىق، اۋمىندىق باۋىرلاستاردىڭ،
تايۋاندىق باۋىرلاستاردىڭ، شەتەلدەگى چياۋمين باۋىرلاستاردىڭ جانە وتانعا ورالعان
چياۋميندەردىڭ، چياۋميندەر تۋىستارىنىڭ ۋاكىلدەرى، استاناداعى ءار سالا
جۇرتشىلىعىنىڭ ۋاكىلدەرى، ازاتتىق ارميا مەن قارۋلى ساقشى بولىمدەرىندەگى كوماندير
- جاۋىنگەرلەردىڭ ۋاكىلدەرى، ءار ەلدىڭ جۇڭگودا تۇراتىن ەلشىلەرىنىڭ، حالىقارالىق
ۇيىمداردىڭ جۇڭگودا تۇراتىن ۋاكىلدەرىنىڭ جانە جۇڭگودا قىزمەت ىستەيتىن شەتەلدىك
مامانداردىڭ ۋاكىلدەرى دە ساۋىق كەشتى كورۋگە قاتىناستى.
