جەرگىلىكتى ۋاقىت 11 - ايدىڭ 11 - كۇنى مەملەكەت ءتوراعاسى شي جينپيڭ مەن حانىمى پىڭ لييۋان گرەتسيا زۇڭليى ميتسوتاكيس پەن ونىڭ حانىمىنىڭ سەرىك بولۋىندا، جۇڭگو شالعاي مۇحيت تەڭىز تاسىمالى پيراەۋس پورتى نىسانىن بىرگە ەكسكۋرسيالادى. سۋرەتتە: شي جينپيڭ جەرگىلىكتى قىزمەتشىلەردىڭ ۋاكىلدەرىمەن ىقىلاستى تۇردە كەڭەسىپ، ولاردىڭ قىزمەت جانە تۇرمىس جاعدايلارىن سۇراستىردى. □ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
جەرگىلىكتى ۋاقىت 11 - ايدىڭ 11 - كۇنى، مەملەكەت ءتوراعاسى شي جينپيڭ مەن حانىمى پىڭ لييۋان گرەتسيا زۇڭليى ميتسوتاكيس پەن ونىڭ حانىمىنىڭ سەرىك بولۋىندا، جۇڭگو شالعاي مۇحيت تەڭىز تاسىمالى پيراەۋس پورتى نىسانىن بىرگە ەكسكۋرسيالادى.
شي جينپيڭ مەن حانىمى پىڭ لييۋان كەلگەن كەزدە، جۇڭگولىق جانە شەتەلدىك قىزمەتشىلەر جۇڭگو مەن گرەتسيا ەكى ەلدىڭ مەملەكەت تۋىن بۇلعاپ، قىزۋ قارسى الدى.
ەكى ەل باسشىلارى مەن ولاردىڭ حانىمدارى پورت جۇمىسى جانە دامۋ جوسپارى تۋرالى تانىستىرۋدى بىرگە تىڭدادى، ونان سوڭ عيمارات توبەسىندەگى تەكشەگە كەلىپ، جالپى پورتقا كوز سالدى. قاربالاس، ءتارتىپتى جۇمىس ءجۇرىپ جاتقان كەمەجايدا وركەندەپ كەلە جاتقان بەينە بايقالادى. ءىرى تيپتەگى جۇك كەمەسى پورتقا توقتاپ، تيەۋىش قوراپتار قاتار ءتىزىلىپ، كوپىركراندار بيىككە بوي سوزىپ تۇر، تولتىرا جۇك تيەلگەن ”جۇڭگو - ەۆروپا تەڭىز - قۇرلىق جەدەل جەلىسى“ پويەزى جولعا شىعۋعا دايىن تۇر.
شي جينپيڭ جەرگىلىكتى قىزمەتشىلەردىڭ ۋاكىلدەرىمەن ىقىلاستى تۇردە كەڭەسىپ، ولاردىڭ قىزمەت جانە تۇرمىس جاعدايلارىن سۇراستىردى. قىزمەتشىلەر ىركەس - تىركەس جۇڭگو شالعاي مۇحيت تەڭىز تاسىمالى توبى شەكتى سەرىكتەستىگىنىڭ گرەتسيانىڭ قارىز داعدارىسىنىڭ ەڭ قيىن ساتىندە ولارعا جۇمىس ورايىن بەرگەنىنە العىس ايتاتىندىقتارىن ءبىلدىردى. ولاردىڭ قازىرگى قىزمەتى ورنىقتى، تۇرمىسى كوڭىلدى. پيراەۋس پورتى ”ءبىر بەلدەۋ، ءبىر جول“دى بىرگە قۇرۋدىڭ ماڭىزدى جەتىستىگىنە اينالدى، ولار مۇنى ايرىقشا ارداق تۇتىپ ماقتانىش ەتىپ، پيراەۋس پورتىنىڭ بولاشاعىنا تولىق سەنىممەن قارايدى ەكەن.
شي جينپيڭ بىلاي دەدى: پيراەۋس پورتىنا كەلىپ ەكسكۋرسيالاعانىما ەرەكشە قۋانىشتىمىن. مىڭ ەستىگەننەن ءبىر كورگەن ارتىق. بۇگىن مەن بۇل جەردەن جۇڭگو باستاما كوتەرگەن ”ءبىر بەلدەۋ، ءبىر جول“دىڭ تەك ۇران جانە اڭىز عانا ەمەس، قايتا تابىستى اماليات جانە كەرەمەت رەالدىق ەكەنىن كوردىم. ”ءبىر بەلدەۋ، ءبىر جول“ باستاماسى بىرگە اقىلداسۋعا، بىرگە قۇرۋعا، بىرگە يگىلىكتەنۋگە تاباندى بولادى، وندا بىرەۋدىڭ ايتقانى ەسەپ بولمايدى، قايتا كوپشىلىك جاۋاپكەرشىلىكتى بىرگە ارقالاپ، جەتىستىگىنەن بىرگە يگىلىكتەنەدى. جۇڭگو سىرتقى قارىم - قاتىناس بارىسىندا دۇرىس مۇددە - بورىش كوزقاراسىن ۇستانادى. مەن سىزدەر قيىندىقتا قالعان كەزدە جۇڭگو شالعاي مۇحيت تەڭىز تاسىمالى پيراەۋس پورتى نىسانىنىڭ سىزدەرگە كومەكتەسكەنىن ءبىلىپ ايرىقشا قۋانىشقا بولەندىم. سىزدەر پيراەۋس پورتىن جاقسى قۇرىپ شىقساڭىزدار، ”ءبىر بەلدەۋ، ءبىر جول“دى بىرگە قۇرۋدىڭ ماڭىزدى قاتىسۋشىسى جانە ۇلەس قوسۋشىسى بولاسىزدار. قىزمەتتەرىڭىزدىڭ تابىستى، تۇرمىستارىڭىزدىڭ باقىتتى بولۋىن تىلەيمىن.
شي جينپيڭ بىلاي دەپ اتاپ كورسەتتى: پيراەۋس پورتى نىسانى − جۇڭگو مەن گرەتسيا ەكى جاقتىڭ ءوز ارتىقشىلىقتارىمەن ءبىرىن - ءبىرى تولىقتاۋدىڭ، قۋاتتىلاردىڭ قول ۇستاسۋىنىڭ، ءوزارا پايدا جەتكىزىپ، بىرگە يگىلىكتەنۋدىڭ تابىستى مىسالى. ەكى جاقتىڭ ونان ارى قۇلشىنىپ، پورتتىڭ كەيىنگى قۇرىلىسىن، دامۋىن جاقسى جۇرگىزىپ، وڭىرلىك زات جەتكىزۋ - جىبەرۋ ورتالىعى بولۋ نىساناسىن ورىنداپ، جۇڭگو - ەۆروپا قۇرلىق - تەڭىز جەدەل جەلىسىن قالىپتاستىرۋىن ءۇمىت ەتەمىن. مەن پيراەۋس پورتىنىڭ بولاشاعىنىڭ شەكسىز بولاتىندىعىنا، سەلبەستىك جەتىستىگىنىڭ ەكى ەل جانە ءوڭىر حالقىنا ۇزدىكسىز تيىمدىلىك جاسايتىندىعىنا سەنەمىن. جۇڭگو - گرەتسيا سەلبەستىگىنىڭ ۇزدىكسىز تىڭ، تاماشا ناتيجەگە جەتۋىن تىلەيمىن.
ميتسوتاكيس مىنالاردى ءبىلدىردى: گرەتسيا قارىز داعدارىسىنىڭ قىسپاعىندا قالعاندا، جۇڭگو گرەتسيا حالقىنا كومەك بەردى. اماليات پيراەۋس پورتى نىسانىنىڭ ءوزارا ءتيىمدى، ءوزارا پايدالى ەكەنىن، گرەتسيا ەكونوميكاسىنىڭ قالپىنا كەلۋى مەن قوعامىنىڭ دامۋىن پارمەندى تۇردە جەبەگەنىن، گرەتسيا مەملەكەتى مەن حالقىنىڭ مۇددەسىنە ۇيلەسەتىندىگىن، گرەتسيا حالقىنىڭ قولداۋىنا يە بولعاندىعىن دالەلدەپ وتىر. گرەتسيا جاق تا بۇدان ”دوس“ دەگەن ءسوزدىڭ ناعىز ءمانىن تەرەڭ سەزىندى. گرەتسيا جاق جۇڭگو جاقپەن قول ۇستاسا قۇلشىنىپ، پيراەۋس پورتى نىسانىن ۇلعايتىپ، كۇشەيتىپ قۇرىپ، ونى ”ءبىر بەلدەۋ، ءبىر جول“دى بىرگە قۇرۋدىڭ تيپتىك ونەگەسىنە اينالدىرۋدى قالايدى.
ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.
پيراەۋس پورتى − گرەتسياداعى ەڭ ۇلكەن پورت، افينادان وڭتۇستىك باتىسقا قاراي 10 كيلومەتر جەرگە ورنالاسقان. 2016 - جىلى جۇڭگو شالعاي مۇحيت تەڭىز تاسىمالى توبى پيراەۋس پورتى پورت جۇمىسى مەكەمەسىنىڭ جەكەشەلەندىرۋ نىسانىنىڭ مەردىگەرلىگىن ءساتتى تۇردە الىپ، رەسمي تۇردە پورت جۇمىسى مەكەمەسىنىڭ جارناسىن مەڭگەرەتىن جارناگەرى بولدى جانە جۇمىس جۇرگىزۋدى، باسقارۋدى وتكىزىپ الدى، نىسان قازىر جەرگىلىكتى 10 مىڭنان استام ادامدى تىكەلەي نەمەسە جانامالاي جۇمىسپەن قامتىدى. اتالعان پورت قازىر جەر ورتا تەڭىزىندەگى ەڭ ۇلكەن پورتقا جانە دۇنيە جۇزىندەگى دامۋى ەڭ تەز تيەۋىش قوراپتى پورتتاردىڭ بىرىنە اينالدى.
