مەملەكەت ءتوراعاسى شي جينپيڭ 7 - ايدىڭ 31 - كۇنى حالىق سارايىندا كولومبيانىڭ پرەزيدەنتى دۋكەمەن كەڭەس وتكىزدى.
شي جينپيڭ بىلاي دەپ اتاپ كورسەتتى: 40 جىلدىڭ الدىندا كولومبيا ۇكىمەتى جاعدايدى باعامداپ، جۇڭگومەن ديپلوماتيالىق قاتىناس ورناتۋ شەشىمىن جاسادى، پرەزيدەنت مىرزانىڭ اكەسى سول كەزدەگى ۇكىمەتتىڭ مۇشەسى بولاتىن، بۇل شەشىمدى باتىل قولداپ، ەكى ەل قاتىناسىنىڭ باستالۋىنا كۋا بولعان. بۇل كۇندە جۇڭگو مەن كولومبيانىڭ قاتىناسىن دامىتۋ مىندەتى ەكەۋىمىزگە جۇكتەلىپ وتىر. وسى رەت جۇڭگوعا ارنايى ساپارلاي كەلگەنىڭىز ءىس جۇزىندىك ارەكەتىڭىز ارقىلى جۇڭگو مەن كولومبيانىڭ ءداستۇرلى دوستىعى مەن ءوزارا ءتيىمدى سەلبەستىگىن تەرەڭدەتۋگە بەلسەنە كۇش سالعانىڭىزدى ايگىلەدى، مەن مۇنى ايرىقشا القايمىن. جۇڭگو كولومبيامەن ديپلوماتيالىق قاتىناس ورناتقانىنىڭ 40 جىلدىعى سىندى ماڭىزدى ءتۇيىندى ارقاۋ ەتىپ، بولاشاق دامۋ جوباسىن بىرگە جوبالاپ، ەكى ەل قاتىناسىنىڭ تىڭ ساتىعا كوتەرىلۋىن ىلگەرىلەتۋدى قالايدى.
