مەملەكەت ءتوراعاسى شي جينپيڭ مەن حانىمى پىڭ لييۋان 5 – ايدىڭ 15 – كۇنى بەيجيڭدەگى مەملەكەتتىك دەنەتاربيە الاڭىندا ازيا وركەنيەتتەر تىلدەسۋ جينالىسىنا قاتىناسقان شەتەل باسشىلارىمەن جانە ولاردىڭ حانىمدارىمەن بىرگە ازيا مادەنيەت مەرەكەسى قيمىلىنا قاتىناستى.ۋاڭ حۋنيڭ قيمىلعا قاتىناستى.
مامىراجاي مامىردىڭ قوڭىر جەلى ەسكەن بەيجيڭ قالاسىندا مەرەكەنىڭ مەرەيى تاسقىندادى. قۇس ۇياسى مەملەكەتتىك دەنەتاربيە الاڭىندا جالت - جۇلت ەتكەن ءتۇرلى - ءتۇستى شىراقتار كوزدىڭ جاۋىن الادى.
ساعات 19 دان 59 مينۋت وتكەندە «تاعدىرلاس ورتاق تۇلعا» اتتى ايبىندى مۋزىكانىڭ دەمەۋىندە شي جينپيڭ مەن پىڭ لييۋان كامبودجانىڭ پاتشاسى سيحاموني، گرەتسيانىڭ پرەزيدەنتى پاۆلوپۋلوس، سينگاپۋردىڭ پرەزيدەنتى حاليما، شريلانكانىڭ پرەزيدەنتى سيريسەنا، ارمەنيانىڭ پرەمەر مينيسترى پاشنيان قاتارلى شەتەل باسشىلارىمەن جانە ولاردىڭ جۇبايلارىمەن بىرگە ءتوراعالار مىنبەسىنە شىقتى.
ۋانرو قۇس جولىنىڭ شىراقتارى كەڭىستىكتە كەرى ەسەپتەۋ سيفرلارىن كورسەتىپ، كورەرمەندەر: 10، 9، 8، 7، 6، 5، 4، 3، 2، 1 ! دەپ كەرى قاراي سان سانادى. سونىمەن «جالىندى جاستىق شاق، ازيا ارمانىن بىرگە جۇزەگە اسىرايىق» نەگىزگى تاقىرىبىنداعى مادەنيەت سالتاناتى رەسمي باستالدى.
دۋ قول شاپالاق ءۇنى ىشىندە شي جينپيڭ ارناۋ ءسوز سويلەپ، جۇڭگو ۇكىمەتى مەن جۇڭگو حالقى اتىنان ءار ەلدەن كەلگەن سيلى قوناقتار مەن كوركەمونەرشىلەردى قىزۋ قارسى الدى. شي جينپيڭ مىنالاردى اتاپ كورسەتتى: ازياداعى ەلدەردىڭ بارىندە ەرتە زامانعى شۇعىلالى مادەنيەت بار، ولار ءوز الدىنا ءبىر - ءبىر تۇلعا، وزىندىك وزگەشەلىككە يە، سونىمەن بىرگە، ولار جاراسىمدى قاتار ءومىر ءسۇرىپ، ءبىر ـ بىرىنە شۇعىلا شاشادى. ازيا وركەنيەتىنىڭ الۋان تۇرلىلىگى ازيا مادەنيەتىنە اناعۇرلىم باي مازمۇندى، باياندى ومىرشەڭدىك كۇش سيلادى. بۇگىن كەشتە كوركەمونەر ۇلتتىق شەڭبەردەن القىپ ءوتىپ، كوڭىل كوكجيەگىن كەڭەيتىپ، يدەيالاردى توعىستىرىپ، شۇعىلالى ازيانى، ومىرشەڭدىك كۇشى تاسقىنداعان ازيانى، بەيبىت، العا باسقان ازيانى بۇكىل دۇنيە جۇزىنە ايگىلەيدى.
شي جينپيڭ: ازيا مادەنيەت قيمىلى رەسمي باستالدى! − دەپ جاريالادى.
