شي جينپيڭ بىرلەسكەن مەملەكەتتەر ۇيىمى ساۋدا جانە دامۋ كەڭەسى قۇرىلعاندىعىنىڭ 60 جىلدىعىن قۇتتىقتاۋ قيمىلىنىڭ باستالۋ سالتىنا بەينە ەكراندا ارناۋ ٴسوز سويلەدى

　6 ـ ايدىڭ 12 ـ كۇنى مەملەكەت ٴتوراعاسى شي جينپيڭ بىرلەسكەن مەملەكەتتەر ۇيىمى ساۋدا جانە دامۋ كەڭەسى قۇرىلعاندىعىنىڭ 60 جىلدىعىن قۇتتىقتاۋ قيمىلىنىڭ باستالۋ سالتىنا بەينە ەكراندا ارناۋ ٴسوز سويلەدى.

　　سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

شينحۋا اگەنتتىگىنىڭ 6 ـ ايدىڭ 12 ـ كۇنى بەيجيڭنەن بەرگەن حابارى. 6 ـ ايدىڭ 12 ـ كۇنى مەملەكەت ٴتوراعاسى شي جينپيڭ بىرلەسكەن مەملەكەتتەر ۇيىمى ساۋدا جانە دامۋ كەڭەسى قۇرىلعاندىعىنىڭ 60 جىلدىعىن قۇتتىقتاۋ قيمىلىنىڭ باستالۋ سالتىنا بەينە ەكراندا ارناۋ ٴسوز سويلەدى.

شي جينپيڭ بىلاي دەپ اتاپ كورسەتتى: بىرلەسكەن مەملەكەتتەر ۇيىمى ساۋدا جانە دامۋ كەڭەسى قۇرىلعان 60 جىلدان بەرى، بىرگە گۇلدەنۋ سىندى نەگىزگى ماقساتتى ۇستانىپ، تۇستىك ەلدەر سەلبەستىگىن بەلسەنە جەبەپ، وڭتۇستىك پەن سولتۇستىكتىڭ تىلدەسۋىن دارىپتەپ، حالىقارالىق ەكونوميكالىق جاڭا ٴتارتىپ ورناتۋدى ىلگەرىلەتىپ، الەمدىك ساۋداعا جانە دامۋعا ماڭىزدى ۇلەس قوسىپ كەلدى. كەزەكتە دۇنيە ٴجۇزىنىڭ 100 جىلدىق وزگەرىسى جەدەل قۇبىلىپ، بەيبىتشىلىك پەن دامۋ تىڭ سايىستارعا ٴدوپ كەلدى. ٴبىز تاريحقا جانە حالىققا جاۋاپتى بولۋ پوزيتسياسىمەن دۇرىس بەتالىستى ٴدال يگەرىپ، ادامزاتتىڭ تاعدىرلاس ورتاق تۇلعاسىن قول ۇستاسا قۇرۋىمىز كەرەك.

_ بەيبىتشىلىك پەن دامۋدىڭ حالىقارالىق ورتاسىن قالىپتاستىرۋ كەرەك. ٴار ەل، اسىرەسە، ٴىرى ەلدەر ناعىز كوپ جاقتىلىقتى امالياتتا ايگىلەپ، تەپە ـ تەڭ، ٴتارتىپتى بولعان دۇنيە ٴجۇزىنىڭ كوپ ۇيەكتەنۋىن دارىپتەپ، بىرلەسكەن مەملەكەتتەر ۇيىمى ۋستاۆىنىڭ نەگىزگى ماقساتى مەن پرينسيبىنە بويسۇنىپ، بىرلەسكەن مەملەكەتتەر ۇيىمى ساۋدا جانە دامۋ كەڭەسى سياقتى كوپ جاقتى قۇرىلىمداردىڭ رولىن ونان ارى ويداعىداي ساۋلەلەندىرۋىنە قولداۋ كورسەتۋ كەرەك.

_ اشىق دامۋ سىندى ٴداۋىر اۋقىمىنا سايكەسۋ كەرەك. جالپىعا ٴتيىمدى، سيىسىمدى ەكونوميكانىڭ جاھاندانۋىن دارىپتەپ، ساۋدا مەن قارجى قوسۋدىڭ ەركىن، قولايلى بولۋىن ىلگەرىلەتىپ، دامۋ تەپە ـ تەڭدىگىنىڭ بۇزىلۋى سياقتى ماسەلەلەردى ويداعىداي شەشىپ، الەمدىك باسقارۋ جۇيەسىنىڭ ٴتىپتى دە ٴادىل، ۇيلەسىمدى بەتالىسقا قاراي دامۋىن ىلگەرىلەتۋ كەرەك.

_ جاڭالىق اشا دامۋ سىندى تاريحي ورايدى يگەرۋ كەرەك. اشىق، سيىسىمدى، كەمسىتپەيتىن سيفرلى ەكونوميكا ورتاسىن تۇلعالاپ، ادامدى نەگىز ەتۋگە، زەردەلىلەنۋدى ىزگىلىككە بەيىمدەتۋگە تاباندى بولىپ، بىرلەسكەن مەملەكەتتەر ۇيىمى جۇلگەسىندە جاساندى زەردە ەرەجەسىن جونگە سالۋدى كۇشەيتىپ، جاسىل تيپ جاڭالاۋدى بەلسەندىلىكپەن ىلگەرىلەتىپ، قالىڭ وركەندەپ كەلە جاتقان ەلدەردىڭ سيفرلانۋ، زەردەلىلەنۋ، جاسىلدانۋ اۋقىمىمەن اناعۇرلىم ويداعىداي توعىسۋىنا مۇمكىندىك جاساۋ كەرەك.

شي جينپيڭ بىلاي دەپ باسا دارىپتەدى: بيىل جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعى، جۇڭگو جوعارى ساپالى دامۋ ارقىلى جۇڭگو ۇلگىسىندەگى وسىزامانداندىرۋدى جاپپاي ىلگەرىلەتۋدە، بۇل، ٴسوز جوق، دۇنيە ٴجۇزىنىڭ دامۋىنا تىڭ دا اناعۇرلىم زور وراي اكەلەدى. جۇڭگو باستان ـ اياق ”الەمنىڭ وڭتۇستىگىنىڭ“ ٴبىر مۇشەسى، ماڭگى وركەندەپ كەلە جاتقان ەلگە جاتادى. جۇڭگو باسقا وركەندەپ كەلە جاتقان ەلدەرمەن يمپورتتى بەلسەندىلىكپەن ۇلعايتىپ، ساۋدا، قارجى قوسۋ، دامۋ سەلبەستىگىن كۇشەيتىپ، بىرلەسكەن مەملەكەتتەر ۇيىمىنىڭ 2030 ـ جىلعا دەيىنگى باياندى دامۋ كەڭەستىك ٴتارتىبىنىڭ تياناقتانۋىنا دەم بەرەدى. جۇڭگو جاق ٴار جاقپەن بىرگە ادامزاتتىڭ بولاشاعىن كوكەيىندە ساقتاپ، حالىقتىڭ قۇت ـ ىرىسىن ويلاپ، دۇنيە ٴجۇزىنىڭ بەيبىت، حاۋىپسىز، گۇلدەنىپ ـ كوركەيگەن، العا باسقان كوركەم بولاشاققا بەت الۋىن ىلگەرىلەتۋدى قالايدى.