5 ـ ايدىڭ 29 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگو _ اراب ەلدەرى سەلبەستىك تالقى مىنبەرى 10 ـ كەزەكتى مينيستر دارەجەلىلەر ٴماجىلىسىنىڭ اشىلۋ سالتىنا قاتىناسۋ ٴارى مەملەكەتتىك ساپاردا بولۋ ٴۇشىن جۇڭگوعا كەلگەن ەگيپەت زۇڭتۇڭى سيسيمەن كەڭەس وتكىزدى. سۋرەتتە: شي جينپيڭ سيسيمەن قول الىسۋدا.
□ سۋرەتتى شينحۋا اگەنتتىگىنىڭ ٴتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 5 ـ ايدىڭ 29 ـ كۇنى بەيجيڭنەن بەرگەن حابارى (تىلشىلەر جىڭ ميڭدا، ۋاڭ بين). 5 ـ ايدىڭ 29 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگو _ اراب ەلدەرى سەلبەستىك تالقى مىنبەرى 10 ـ كەزەكتى مينيستر دارەجەلىلەر ٴماجىلىسىنىڭ اشىلۋ سالتىنا قاتىناسۋ ٴارى مەملەكەتتىك ساپاردا بولۋ ٴۇشىن جۇڭگوعا كەلگەن ەگيپەت زۇڭتۇڭى سيسيمەن كەڭەس وتكىزدى.
شي جينپيڭ بىلاي دەپ اتاپ كورسەتتى: 68 جىلدىڭ الدىندا، ەگيپەت اراب جانە افريكا ەلدەرى اراسىندا ەڭ الدىمەن جاڭا جۇڭگومەن ديپلوماتيالىق قارىم ـ قاتىناس ورناتتى. حالىقارالىق جاعداي مەيلى قالاي قۇبىلسادا، ەكى ەل باستان ـ اياق ٴبىر ـ بىرىنە سەنىم ارتىپ، شىنايى سەلبەسىپ، قول ۇستاسا دامىدى. بيىل جۇڭگو مەن ەگيپەتتىڭ جالپى بەتتىك ستراتەگيالىق سەرىكتەستىك قارىم ـ قاتىناس ورناتقاندىعىنىڭ 10 جىلدىعى. 10 جىلدان بەرى، مەن سيسي زۇڭتۇڭمەن ەكى جاقتى قارىم ـ قاتىناستىڭ قارىشتاپ دامۋىنا بىرگە جەتەكشىلىك ەتتىك. جۇڭگو _ ەگيپەت قارىم ـ قاتىناسى جۇڭگونىڭ اراب ەلدەرىمەن، افريكا ەلدەرىمەن، ٴىسلام ەلدەرىمەن جانە وركەندەپ كەلە جاتقان ەلدەرمەن ىنتىماعىنىڭ، ىستەستىگىنىڭ، ٴوزارا پايدا جەتكىزىپ تەڭ يگىلىككە كەنەلۋىنىڭ جاندى كارتيناسىنا اينالدى. جاڭا جاعدايدا، اناعۇرلىم باي مازمۇندى، اناعۇرلىم ومىرشەڭدىك كۇشكە يە جۇڭگو _ ەگيپەت قارىم ـ قاتىناسىن ورناتۋ ەكى ەل حالقىنىڭ ورتاق تىلەگىنە ۇيلەسەدى. جۇڭگو جاق ەگيپەت جاقپەن ٴوزارا سەنىمدىلىكتى ۇزدىكسىز تەرەڭدەتىپ، سەلبەستىكتى ىلگەرىلەتىپ، جاڭا داۋىرگە بەت العان جۇڭگو _ ەگيپەت تاعدىرلاس ورتاق تۇلعاسىن قۇرىپ، ٴوڭىردىڭ، اۋەلى، دۇنيە ٴجۇزىنىڭ بەيبىتشىلىگىنە، ورنىقتىلىعىنا، دامۋىنا، گۇلدەنۋىنە كۇش قوسۋدى قالايدى.
شي جينپيڭ بىلاي دەپ باسا دارىپتەدى: جۇڭگو قازىر مەملەكەتتى قۇدىرەتتەندىرۋ قۇرىلىسى، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋدە، جۇڭگو مەن ەگيپەتتىڭ ٴار سالاداعى اۋىس ـ كۇيىسى، سەلبەستىگى تاريحي ورايعا ٴدوپ كەلىپ وتىر. ەكى جاق ۇزدىكسىز ٴبىرىن ـ ٴبىرى تاباندىلىقپەن قولداپ، بىرگە دامۋدى قول ۇستاسا جەبەۋى كەرەك. جۇڭگو جاق ەگيپەت جاقپەن نەگىزدىك قۇرىلعى، ونەركاسىپ، ەلەكتر قۋاتى، اۋىل شارۋاشىلىعى سياقتى ٴداستۇرلى سالالارداعى سەلبەستىكتىڭ كومەسكى كۇشىن ىشكەرىلەي اشىپ، ەمدەۋ ـ دەنساۋلىق ساقتاۋ، ينفورماتسيا ـ حابارلاسۋ، تۋىندايتىن ەنەرگيا سياقتى جاڭادان گۇلدەنگەن سالالارداعى سەلبەستىكتى اشىپ، ەكونوميكا ـ ساۋدا، قارجى قوسۋ سەلبەستىگىن تەرەڭدەتىپ، اناعۇرلىم كوپ جۇڭگو كاسىپورىندارىن ەگيپەتكە بارىپ قارجى قوسىپ، شارۋاشىلىعىن گۇلدەندىرۋگە شابىتتاندىرۋدى قالايدى. بيىلعى ”جۇڭگو _ ەگيپەت سەرىكتەستىك جىلىن“ ويداعىداي وتكىزىپ، ەكى ەل ادامدارىنىڭ بارىس ـ كەلىسى مەن گۋمانيتارلىق اۋىس ـ كۇيىستى، سەلبەستىكتى كەڭەيتىپ، ەگيپەتتەگى ”لۋبان شەبەرحاناسىن“ جۇڭگو _ افريكا كاسىپتىك وقۋ ـ اعارتۋ سەلبەستىگىنىڭ ۇلگىسى ەتىپ قۇرىپ شىعۋ كەرەك.
شي جينپيڭ بىلاي دەپ باسا دارىپتەدى: جۇڭگو جاق ەگيپەتتىڭ حالىقارالىق جانە وڭىرلىك ىستەردە اناعۇرلىم زور رول ساۋلەلەندىرۋىن قولدايدى، ەگيپەت جاقپەن بىرلەسكەن مەملەكەتتەر ۇيىمى، شاڭحاي سەلبەستىك ۇيىمى، بريكس ەلدەرى سەلبەستىك مەحانيزمى سياقتى كوپ جاقتى تۇعىرلارداعى سايكەسۋدى، سەلبەسۋدى اناعۇرلىم جيىلەتىپ، تەپە ـ تەڭ، ٴتارتىپتى دۇنيە ٴجۇزىنىڭ كوپ ۇيەكتەنۋى مەن جالپىعا ٴتيىمدى، سيىسىمدى ەكونوميكانىڭ جاھاندانۋىن دارىپتەپ، حالىقارالىق ادىلدىكتى، ادىلەتتىلىكتى جانە وركەندەپ كەلە جاتقان ەلدەردىڭ ورتاق مۇددەسىن بىرگە قورعاۋدى قالايدى. بيىل _ جۇڭگو _ اراب ەلدەرى سەلبەستىك تالقى مىنبەرى قۇرىلعاندىعىنىڭ 20 جىلدىعى. جۇڭگو جاق ەگيپەتپەن جانە باسقا دا ٴارقايسى جاقپەن بايلانىستى، سەلبەستىكتى جيىلەتىپ، جۇڭگو _ اراب ەلدەرى سەلبەستىك تالقى مىنبەرىن ويداعىداي قۇرىپ، جۇڭگو _ اراب ەلدەرى قارىم ـ قاتىناسىنىڭ دامۋىنا ۇزدىكسىز تىڭ قوزعاۋشى كۇش قوسىپ، جۇڭگو _ اراب ەلدەرى تاعدىرلاس ورتاق تۇلعاسى قۇرىلىسىن ىلگەرىلەتۋدى قالايدى. جۇڭگو جاق ەگيپەت سياقتى جۇڭگو _ افريكا سەلبەستىك تالقى مىنبەرىنىڭ افريكا جاق مۇشەلەرىمەن بىرگە جۇڭگو _ افريكا دوستىق سەلبەستىك رۋحىن ساۋلەلەندىرىپ، جوعارى دەڭگەيدەگى جۇڭگو _ افريكا تاعدىرلاس ورتاق تۇلعاسىن قول ۇستاسا قۇرۋدى دا قالايدى.
سيسي مىنالاردى ٴبىلدىردى: مەملەكەتتىك ساپاردا بولۋعا ٴارى جۇڭگو _ اراب ەلدەرى سەلبەستىك تالقى مىنبەرى 10 ـ كەزەكتى مينيستر دارەجەلىلەر ٴماجىلىسىنىڭ اشىلۋ سالتىنا قاتىناسۋعا جۇڭگوعا كەلگەنىمە توتەنشە قۋانىشتىمىن. قازىر دۇنيە ٴجۇزى تەرەڭ دە كۇردەلى وزگەرىس ىشىندە تۇر، ورتا شىعىس ٴوڭىرى داعدارىستىڭ قۇيىنا باتتى. ەگيپەت جاق جۇڭگو جاقپەن جالپى بەتتىك ستراتەگيالىق سەرىكتەستىك قارىم ـ قاتىناستى ونان ارى تەرەڭدەتىپ، ٴوڭىردىڭ بەيبىتشىلىگىن، ورنىقتىلىعىن قۇلشىنا جەبەۋدى ٴۇمىت ەتەدى. ەگيپەت جاق ٴبىر جۇڭگو پرينسيبىنە بۇلجىماي تاباندى بولادى، جۇڭگو جاقتىڭ تايۋانعا ساياتىن، شياڭگاڭعا ساياتىن، شيزاڭعا ساياتىن، ادامدىق ۇقىق سياقتى وزەكتى مۇددە ماسەلەلەرىندەگى تۇرعىسىن باتىل قولدايدى، جۇڭگونىڭ مەملەكەتتىڭ بۇكىلدەي بىرلىككە كەلۋىن جۇزەگە اسىرۋىن باتىل قولدايدى. ەگيپەت جاق اناعۇرلىم كوپ جۇڭگو كاسىپورىندارىنىڭ ەگيپەتكە بارىپ قارجى قوسىپ، سەلبەستىك جاساپ، ەگيپەتتىڭ جاساۋ كاسىبىنىڭ دامۋى مەن ونەركاسىپتەنۋ اياق الىسىنا دەم بەرۋىن قارسى الادى. بيىلعى ”ەگيپەت _ جۇڭگو سەرىكتەستىك جىلىن“ وراي ەتىپ، گۋمانيتارلىق اۋىس ـ كۇيىستى جيىلەتىپ، ەكى ەلدىڭ ينفورماتسيا ـ حابارلاسۋ، جاساندى زەردە، جاڭا ەنەرگيا، استىق حاۋىپسىزدىگى، فينانس سياقتى جاقتارداعى سەلبەستىگىن كۇشەيتۋدى ٴۇمىت ەتەمىن. ەگيپەت جاق ٴتوراعا شي جينپيڭ العا قويعان جەلىلەس الەمدىك دارىپتەمەلەردى القايدى، جۇڭگو جاقپەن كوپ جاقتى ىستەستىكتى جيىلەتىپ، ادامزاتتىڭ بەيبىتشىلىگىنە، العا باسۋىنا بەلسەندى ۇلەس قوسۋدى قالايدى.
ەكى جاق پالەستينا _ يزرايل قاقتىعىسى جونىندە دە پىكىر اۋىستىردى. شي جينپيڭ بىلاي دەپ اتاپ كورسەتتى: وسى رەتكى پالەستينا _ يزرايل قاقتىعىسى پالەستينادا قىرۋار بەيكۇنا بۇقارانىڭ ٴولىم ـ ٴجىتىمىن تۋدىردى، گازادا ادامگەرشىلىك جاعدايى توتەنشە اۋىر، جۇڭگو جاق بۇعان قاتتى اشىنادى. كەزەكتەگى شۇعىل مىندەت _ دەرەۋ قاقتىعىستى دوعارىپ، سوعىستى توقتاتىپ، قاقتىعىستىڭ سىرتقا كەڭەيىپ، ٴوڭىردىڭ بەيبىتشىلىگىنە، ورنىقتىلىعىنا ىقپال جاساۋىنان ساقتانۋ، ٴتىپتى دە اۋىر ادامگەرشىلىك داعدارىسىنان ساقتانۋ. ”ەكى ەل جوباسى“ _ پالەستينا ماسەلەسىن شەشۋدىڭ ٴتۇبىرلى شىعار جولى. جۇڭگو جاق پالەستينانىڭ بىرلەسكەن مەملەكەتتەر ۇيىمىنا رەسمي مۇشە ەل بولۋىن باتىل قولدايدى. جۇڭگو جاق ەگيپەت جاقتىڭ جاعدايدىڭ باسەڭدەۋىن ىلگەرىلەتۋدە جانە ادامگەرشىلىك كومەك كورسەتۋدە اتقارعان ماڭىزدى رولىن القايدى، ەگيپەت جاقپەن بىرگە گازاداعى بۇقاراعا شاماسىنىڭ كەلىسىنشە ۇزدىكسىز كومەكتەسىپ، پالەستينا ماسەلەسىن ەرتەرەك جاپپاي، ٴادىل، باياندى شەشۋدى ىلگەرىلەتۋدى قالايدى.
سيسي مىنالاردى ٴبىلدىردى: ەگيپەت جاق جۇڭگو جاقتىڭ پالەستينا ماسەلەسىندە باستان ـ اياق ادىلدىكتى جاقتاپ، ادىلەت مايدانىندا تاباندى بولعاندىعىن ايرىقشا القايدى، جۇڭگو جاقپەن تىعىز بايلانىستى ساقتاپ، گازا ٴوڭىرىنىڭ شۇعىل جاعدايىنىڭ تەز ارادا باسەڭدەۋىن ىلگەرىلەتۋدى قالايدى.
كەڭەستەن كەيىن، ەكى ەلدىڭ مەملەكەت باسشىلارى ”ٴبىر بەلدەۋ، ٴبىر جولدى“ بىرگە قۇرۋدى ىلگەرىلەتۋ سەلبەستىك جوباسى، عىلىم ـ تەحنيكادا جاڭالىق اشۋ، قارجى قوسۋ جانە ەكونوميكالىق سەلبەستىك، كارەنتيندەۋ سياقتى سالالارداعى كوپ ٴتۇرلى ەكى جاقتى سەلبەستىك حۇجاتتارىنا قول قويىلۋىنا بىرگە كۋا بولدى.
ەكى جاق «جۇڭحۋا حالىق رەسپۋبليكاسى مەن اراب ەگيپەت رەسپۋبليكاسىنىڭ جالپى بەتتىك ستراتەگيالىق سەرىكتەستىك قارىم ـ قاتىناستى تەرەڭدەتۋ جونىندەگى بىرلەسكەن مالىمدەمەسىن» جاريالادى.
كەڭەستەن بۇرىن، شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا سيسيدى قارسى الۋ سالتىن وتكىزدى.
سيسي كەلگەندە قۇرمەت قاراۋىلى قاتار تۇزەپ قۇرمەت ٴبىلدىردى. ەكى ەلدىڭ مەملەكەت باسشىلارى سالتانات مىنبەسىنە شىقتى، اسكەري وركەستر جۇڭگو مەن ەگيپەت ەكى ەلدىڭ مەملەكەت ٴانىن ورىندادى، تيان ـ انمىن الاڭىندا 21 رەت ساليۋت اتىلدى. سيسي شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ٴارى قاتارعا ٴبولىنىپ پاراتتان ٴوتۋىن كوردى.
سول كۇنى كەشتە شي جينپيڭ حالىق سارايىنىڭ جينسى زالىندا سيسيدى قارسى الۋ قوناعاسىن وتكىزدى.
ۋاڭ ي جوعارىداعى قيمىلدارعا قاتىناستى.
