4 ـ ايدىڭ 12 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن سۋرينامنىڭ زۇڭتۇڭى سانتوكيمەن كەڭەس وتكىزدى. سۋرەتتە: كەڭەستىڭ الدىندا شي جينپيڭ مەن حانىمى پىڭ لييۋان سانتوكيمەن جانە حانىمى مەيليسامەن بىرگە سۋرەتكە ٴتۇستى.
□ سۋرەتتى شينحۋا اگەنتتىگىنىڭ ٴتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 4 ـ ايدىڭ 12 ـ كۇنى بەيجيڭنەن بەرگەن حابارى (ٴتىلشى ليۋ حۋا). 4 ـ ايدىڭ 12 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن سۋرينامنىڭ زۇڭتۇڭى سانتوكيمەن كەڭەس وتكىزدى.
شي جينپيڭ بىلاي دەپ اتاپ كورسەتتى: جۇڭگو مەن سۋرينامنىڭ دوستىعى ارىدان باستالىپ، ۋاقىت وتكەن سايىن بەكەمدەلە ٴتۇستى. سۋرينام جاڭا جۇڭگومەن ٴبىرىنشى توپتا ديپلوماتيالىق قارىم ـ قاتىناس ورناتقان، جۇڭگومەن ستراتەگيالىق سەرىكتەستىك قارىم ـ قاتىناس ورناتقان جانە جۇڭگومەن ”بىر بەلدەۋ، ٴبىر جولدى“ بىرگە قۇرۋ سەلبەستىك جوباسىنا قول قويعان كارايب ەلدەرىنىڭ ٴبىرى. ەكى ەل باستان ـ اياق ٴوزارا قۇرمەت ەتىپ، تەڭ تۇرعىدا مامىلە جاساپ، تۇستىك ەلدەر سەلبەستىگىنىڭ تيپتىك ۇلگىسىنە اينالدى. جۇڭگو جاق سۋرينام جاقپەن بىرگە قۇلشىنىپ، ساياسي ٴوزارا سەنىمدىلىكتى اناعۇرلىم بەكەمدەپ، ەكونوميكا ـ ساۋدا سەلبەستىگىن كۇشەيتىپ، گۋمانيتارلىق اۋىس ـ كۇيىس اياسىن كەڭەيتىپ، حالىقارالىق سەلبەستىكتى جيىلەتىپ، جۇڭگو مەن سۋرينامنىڭ اناعۇرلىم بەرىك ستراتەگيالىق سەلبەستىك سەرىكتەستىك قارىم ـ قاتىناسىن قۇرۋدى ىلگەرىلەتىپ، ەكى ەل حالقىن ٴتىپتى دە جاقسى باقىتقا كەنەلتۋدى قالايدى.
شي جينپيڭ بىلاي دەپ باسا دارىپتەدى: جۇڭگو جاق سۋرينام جاقتىڭ جۇڭگو جونىندەگى دوستىق پەيىلدەن باستان ـ اياق جازباي، جۇڭگونىڭ وزەكتى مۇددەسىنە ساياتىن جانە ٴجىتى قاداعالاپ وتىرعان كەلەلى ماسەلەلەردە جۇڭگو جاقتى تاباندىلىقپەن قولداعاندىعىن بارىنشا القايدى. جۇڭگو جاق، سونداي ـ اق سۋرينام جاقتىڭ مەملەكەتتىڭ يەلىك ۇقىعىن، تاۋەلسىزدىگىن قورعاۋىن دا، ٴوز ەلىنىڭ مەملەكەت جاعدايىنا ۇيلەسەتىن دامۋ جولىن ٴوزى تاڭداۋىن دا باتىل قولدايدى. جۇڭگو جاق سۋرينام جاقپەن ۇزدىكسىز ٴوزارا ٴتۇسىنىسىپ، ٴبىرىن ـ ٴبىرى قولداپ، جوعارى جىكتەگىلەردىڭ بارىس ـ كەلىسىن ساقتاپ، تاراۋلار، زاڭ شىعارۋ قۇرىلىمدارى، ساياسي پارتيالار اراسىنداعى دوستىق بارىس ـ كەلىستى نىعايتىپ، ەل باسقارۋ تاجىريبەلەرىن اۋىستىرۋدى كۇشەيتۋدى قالايدى. جۇڭگو جاق سۋرينامنىڭ ٴتىپتى كوپ ساپالى ەرەكشە ونىمدەرىنىڭ جۇڭگو بازارىنا كىرۋىن قارسى الادى، سۋرينام جاقپەن ”بىر بەلدەۋ، ٴبىر جولدى“ بىرگە قۇرۋ سەلبەستىگىن تەرەڭدەتىپ، دامۋ ستراتەگيالارىن ۇشتاستىرۋدى كۇشەيتىپ، ساۋدا، قارجى قوسۋ، اۋىل شارۋاشىلىعى، ەنەرگيا، كەن كاسىبى، نەگىزدىك قۇرىلعى قۇرىلىسى، سيفرلى ەكونوميكا سياقتى سالالارداعى سەلبەستىكتى كەڭەيتىپ، ەكى ەل حالقىنا اناعۇرلىم مول ناقتى قۇت ـ ىرىس اكەلۋدى قالايدى. سۋرينام كارايب وڭىرىندەگى حۋاچياۋ، حۋارىن ەڭ كوپ مەملەكەتتەردىڭ ٴبىرى، سونداي ـ اق باتىس جارتى شارداعى جۇڭگونىڭ كوكتەم مەرەكەسىن زاڭدا بەلگىلەنگەن دەمالىس كۇنى ەتكەن العاشقى مەملەكەت. ەكى جاق ۇزدىكسىز گۋمانيتارلىق اۋىس ـ كۇيىسكە دەم بەرىپ، ادامداردىڭ بارىس ـ كەلىس جاساۋىنا قولايلىلىق تۋدىرىپ، كۇڭزى شۋەيۋانىن بىرگە ويداعىداي قۇرۋى كەرەك. جەرگىلىكتى ورىندار سەلبەستىگىن كۇشەيتىپ، ەكى ەلدىڭ اۋىس ـ كۇيىس، سەلبەستىگىنىڭ مازمۇنىن ۇزدىكسىز بايىتۋ كەرەك. جۇڭگو جاق سۋرينام سياقتى وركەندەپ كەلە جاتقان ەلدەرمەن بىرگە، كوپ جاقتى سايكەستىكتى جانە ىنتىماقتاسا سەلبەسۋدى كۇشەيتىپ، ورتاق مۇددەنى قورعاپ، ورتاق دامۋدى جۇزەگە اسىرىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى. جۇڭگو جاق كارايب ەلدەرىمەن قارىم ـ قاتىناستى دامىتۋعا ٴمان بەرىپ، كارايب ەلدەرىنىڭ كوركەيىپ ـ گۇلدەنۋگە، دامۋعا تالپىنۋىنا، حالىق بۇقاراسىنىڭ قۇت ـ ىرىسىن ارتتىرۋىنا قولداۋ كورسەتەدى، وڭىردەگى مەملەكەتتەردىڭ ەكونوميكالىق، قوعامدىق دامۋىنا شاماسىنىڭ كەلىسىنشە ۇزدىكسىز كومەكتەسۋدى قالايدى.
سانتوكي مىنالاردى ٴبىلدىردى: سۋرينام مەن جۇڭگونىڭ دوستىق بارىس ـ كەلىسىنىڭ تاريحى ۇزاق. سۋرينامداعى حۋارىن قاۋىمى سۋرينامنىڭ مەملەكەت قۇرىلىسىنا ماڭىزدى ۇلەس قوستى. سۋرينام مەن جۇڭگو ديپلوماتيالىق قارىم ـ قاتىناس ورناتقان 48 جىلدان بەرى سۋرينام جاق ٴبىر جۇڭگو پرينسيبىنە باستان ـ اياق تاباندى بولدى، جۇڭگونىڭ مەملەكەت تۇتاستىعىن جۇزەگە اسىرۋىنا ۇزدىكسىز بۇلجىماي قولداۋ كورسەتەدى. جۇڭگو سۋرينامنىڭ جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋىنا جانە ەكونوميكالىق، قوعامدىق دامۋىنا قۇندى قولداۋ كورسەتتى، ەكى ەلدىڭ اۋىل شارۋاشىلىعى، دەنساۋلىق ساقتاۋ، نەگىزدىك قۇرىلعى سياقتى سالالارداعى سەلبەستىگىندە سۇبەلى جەتىستىككە قول جەتتى، وسىنىڭ بارلىعى ەكى ەلدىڭ جوعارى دەڭگەيدەگى ساياسي ٴوزارا سەنىمدىلىگى مەن تەرەڭ باۋىرلاستىق دوستىق سۇيىسپەنشىلىگىن ايگىلەپ، سۋرينامنىڭ ەكونوميكاسىنىڭ دامۋىنا جانە حالىق تۇرمىسىنىڭ جاقسارۋىنا بارىنشا دەم بەرىپ، تۇستىك ەلدەر سەلبەستىگىنىڭ تيپتىك ۇلگىسىن ورناتتى. ٴتوراعا شي جينپيڭ ”ٴبىر بەلدەۋ، ٴبىر جولدى“ بىرگە قۇرۋ جانە الەمدىك دامۋ باستاماسى سياقتى ماڭىزدى الەمدىك باستامالاردى ورتاعا قويىپ، تەرەزەسى تەڭ، ٴتارتىپتى بولعان دۇنيە ٴجۇزىنىڭ كوپ ۇيەكتەنۋىن جانە جالپىعا بىردەي، سيىسىمدى بولعان ەكونوميكانىڭ جاھاندانۋىن دارىپتەدى، مۇنىڭ كوپ جاقتىلىقتى قورعاۋ، دۇنيە ٴجۇزىنىڭ بەيبىتشىلىگى مەن باياندى دامۋىن جەبەۋدەگى ماڭىزى زور، سۋرينام جاق مۇنى قولدايدى، جۇڭگو جاقپەن ىستەستىكتى كۇشەيتىپ، ادامزاتتىڭ تاعدىرلاس ورتاق تۇلعاسىن قۇرۋدى بىرگە ىلگەرىلەتۋدى قالايدى. وسى رەتكى ساپاردى وراي ەتىپ، ەكى ەلدىڭ ۇكىمەت، پارتيا اۋىس ـ كۇيىسىن اناعۇرلىم كۇشەيتىپ، ەكونوميكا ـ ساۋدا، قارجى قوسۋ، جاسىل دامۋ، كليمات وزگەرىسىنە توتەپ بەرۋ سياقتى سالالارداعى سەلبەستىكتى كەڭەيتىپ، سۋرينام مەن جۇڭگونىڭ ستراتەگيالىق سەلبەستىك سەرىكتەستىك قارىم ـ قاتىناسىن اناعۇرلىم تەرەڭدەتۋدى ٴۇمىت ەتەمىن. سۋرينام جاق كارايب ەلدەرىنىڭ جۇڭگومەن قارىم ـ قاتىناستى دامىتۋىن ىلگەرىلەتۋ جاعىندا بەلسەندى قۇلشىنىس جاساۋدى قالايدى.
كەڭەستەن كەيىن ەكى ەلدىڭ مەملەكەت باسشىلارى ەكونوميكا ـ ساۋدا، قارجى قوسۋ، جاسىل دامۋ، سيفرلى ەكونوميكا، وقۋ ـ اعارتۋ سياقتى سالالارداعى كوپ ٴتۇرلى ەكى جاقتى سەلبەستىك حۇجاتتارعا قول قويىلۋىنا بىرگە كۋا بولدى.
ەكى جاق «جۇڭحۋا حالىق رەسپۋبليكاسى مەن سۋرينام رەسپۋبليكاسىنىڭ بىرلەسكەن اقپاراتتىق مازمۇنداماسىن» جاريالادى.
كەڭەستىڭ الدىندا شي جينپيڭ مەن حانىمى پىڭ لييۋان حالىق سارايىنىڭ شىعىس قاقپاسىنىڭ سىرتىنداعى الاڭدا سانتوكي مەن حانىمى مەيليسانى قارسى الۋ سالتىن وتكىزدى.
سانتوكي كەلگەن ساتتە قۇرمەت قاراۋىلى قاتار تۇزەپ قۇرمەت ٴبىلدىردى. ەكى ەلدىڭ مەملەكەت باسشىلارى سالتانات مىنبەسىنە شىقتى، اسكەري وركەستر جۇڭگو مەن سۋرينام ەكى ەلدىڭ مەملەكەت ٴانىن ورىندادى، تيان ـ انمىن الاڭىندا 21 رەت ساليۋت اتىلدى. سانتوكي شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ٴارى قاتارعا ٴبولىنىپ پاراتتان ٴوتۋىن كوردى.
سول كۇنى كەشتە شي جينپيڭ مەن پىڭ لييۋان حالىق سارايىنىڭ جينسى زالىندا سانتوكي مەن ونىڭ حانىمىن قارسى الۋ قوناعاسىن وتكىزدى.
ۋاڭ ي جوعارىداعى قيمىلدارعا قاتىناستى.
