4 ـ ايدىڭ 9 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن ميكرونەزيا فەدەراتسياسىنىڭ زۇڭتۇڭى سيمينامەن كەڭەس وتكىزدى. كەڭەستەن ىلگەرى شي جينپيڭ مەن حانىمى پىڭ لييۋان سيمينا مەن حانىمى انسەليدى قارسى الۋ سالتىن وتكىزدى.
□ سۋرەتتى شينحۋا اگەنتتىگىنىڭ ٴتىلشىسى لي شۋەرىن تۇسىرگەن
شينحۋا اگەنتتىگىنىڭ 4 ـ ايدىڭ 9 ـ كۇنى بەيجيڭنەن بەرگەن حابارى (ٴتىلشى ياڭ يجۇن). 4 ـ ايدىڭ 9 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن ميكرونەزيا فەدەراتسياسىنىڭ زۇڭتۇڭى سيمينامەن كەڭەس وتكىزدى.
شي جينپيڭ بىلاي دەپ اتاپ كورسەتتى: بيىل جۇڭگو مەن ميكرونەزيا ديپلوماتيالىق قارىم ـ قاتىناس ورناتقاندىعىنىڭ 35 جىلدىعى. ەكى ەل باستان ـ اياق ٴوزارا قۇرمەت ەتىپ، ٴوزارا تەڭ تۇرعىدا مامىلەدە بولىپ، دوستىق سەلبەستىك جاساپ، ٴوزارا پايدا جەتكىزىپ، تەڭ يگىلىككە كەنەلىپ، ەكى ەل حالقىنىڭ قۇت ـ ىرىسىن ارتتىردى. جۇڭگو جاق ميكرونەزيا جاقتىڭ مەملەكەتتىڭ يەلىك ۇقىعى مەن تاۋەلسىزدىگىن قورعاۋىن، ٴوز ەلىنىڭ مەملەكەت جاعدايىنا ۇيلەسەتىن دامۋ جولىمەن ٴجۇرۋىن، ەكونوميكانى گۇلدەندىرۋىن جانە حالىق تۇرمىسىن جاقسارتۋىن قولدايدى. جۇڭگو جاق ميكرونەزيا جاقپەن بىرگە ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 35 جىلدىعىن جاڭا باستاما ەتىپ، ٴار دارەجەلى اۋىس ـ كۇيىستى، تىلدەسۋدى ساقتاپ، ٴار سالاداعى ٴوزارا تيىمدىلىك جەتكىزۋ سەلبەستىگىن كۇشەيتىپ، جۇڭگو _ ميكرونەزيا قارىم ـ قاتىناسىنىڭ تىڭ ساتىعا كوتەرىلۋىن ىلگەرىلەتۋدى قالايدى. ەكى جاق ەكى ەلدىڭ جان ـ جاقتى ستراتەگيالىق سەرىكتەستىك قارىم ـ قاتىناسىنىڭ ساياسي ورنىن باتىل ساقتاپ، ٴوزارا پايدا جەتكىزىپ، تەڭ يگىلىككە كەنەلۋ، بىرگە دامۋ سىندى سەلبەستىك جالپى ارناسىنا تاباندى بولىپ، ”ٴبىر بەلدەۋ، ٴبىر جولدى“ بىرگە قۇرۋ سەلبەستىگىن جەدەل ىلگەرىلەتىپ، نەگىزدىك قۇرىلعى نىساندارى سەلبەستىگىن كۇشەيتىپ، مادەنيەت، دەنساۋلىق ساقتاۋ، وقۋ ـ اعارتۋ، جەرگىلىكتى ورىندار سياقتى جاقتارداعى گۋمانيتارلىق اۋىس ـ كۇيىستى نىعايتۋى كەرەك. ميكرونەزيا فەدەراتسياسىنداعى ٴتىپتى دە كوپ جاستىڭ جۇڭگوعا كەلىپ ٴبىلىم اسىرۋىن قارسى الامىز. جۇڭگونىڭ جەرگىلىكتى ورىندارىنداعى ”ەمدەۋدى ارالعا جەتكىزۋ“، ”تەاتردى تەڭىزگە جەتكىزۋ“ سياقتى نىساندار ميكرونەزيا فەدەراتسياسىنداعى بۇقارانىڭ قىزۋ قارسى الۋىنا يە بولدى، ەكى جاقتىڭ وسى تەكتەس نىسانداردى اناعۇرلىم كەڭ كولەمدە ورىستەتۋىنە بولادى. جۇڭگو جاق تۇستىك ەلدەر سەلبەستىگى اياسىندا ميكرونەزيا جاقتىڭ كليمات وزگەرىسىنە توتەپ بەرۋىنە كومەكتەسۋدى، قابىلەت قۇرىلىسى تاربيەسىن ورىستەتۋدى قالايدى. بىرلەسكەن مەملەكەتتەر ۇيىمى، تىنىق مۇحيتتاعى ارال ەلدەرى تالقى مىنبەرى سياقتى كوپ جاقتى جۇلگەدەگى سايكەسۋدى، سەلبەسۋدى كۇشەيتىپ، كوپ جاقتىلىقتى بىرگە امالياتتا ايگىلەپ، ادىلدىكتى، تۋراشىلدىقتى قورعاۋدى قالايدى.
شي جينپيڭ بىلاي دەپ اتاپ كورسەتتى: جۇڭگونىڭ تىنىق مۇحيتتاعى ارال ەلدەرىمەن ۇزاق بارىس ـ كەلىس جاساۋ تاريحى، تەرەڭ حالىقتار دوستىعى، ورتاق دامۋ قاجەتى بار. جۇڭگونىڭ ارال ەلدەرىمەن قارىم ـ قاتىناستى دامىتۋى تۇستىك ەلدەر سەلبەستىگى اياسىنداعى ٴوزارا كومەكتەسۋ بولىپ تابىلادى، بۇل ٴۇشىنشى جاققا باعىتتالماعان ٴارى ٴۇشىنشى جاقتىڭ كەدەرگىسىنە ۇشىراماۋى كەرەك. جۇڭگو جاق ٴار ەلدىڭ تىنىق مۇحيتتاعى ارال ەلدەرىمەن قارىم ـ قاتىناستى دامىتقاندا، ارال ەلدەرىنىڭ دەربەستىگىنە تاباندى بولۋدى، دامۋدى ماڭداي الدى ورىنعا قويۋعا تاباندى بولۋدى، اشىق، سيىسىمدى بولۋعا تاباندى بولۋدى دارىپتەيدى. ارال ەلدەرى وزدەرىنىڭ مەملەكەت جاعدايىنا ۇيلەسەتىن دامۋ جولىن تاڭداۋعا ۇقىقتى، بارلىق دامۋ سەرىگىمەن دوستىق سەلبەستىك ورىستەتۋگە ۇقىقتى. جۇڭگو جاق ارال ەلدەرىنىڭ دامۋىنا شاماسىنىڭ كەلىسىنشە ۇزدىكسىز قولداۋ كورسەتىپ، ٴۇش جاق نەمەسە كوپ جاق سەلبەستىگىن ورىستەتۋدى قالايدى.
سيمينا مىنالاردى ٴبىلدىردى: ميكرونەزيا فەدەراتسياسى مەن جۇڭگو ديپلوماتيالىق قارىم ـ قاتىناس ورناتقاننان بەرى ەكى ەل ٴوزارا قۇرمەت ەتۋ، تەڭ تۇرعىدا مامىلە جاساۋ، ٴبىر ـ ٴبىرىنىڭ ىشكى ىسىنە ارالاسپاۋ سياقتى نەگىزگى پرينسيپتەرگە باستان ـ اياق تاباندى بولدى، ەكى جاقتىڭ قارىم ـ قاتىناسى قارىشتاپ دامىدى. ميكرونەزيا فەدەراتسياسى ٴبىر جۇڭگو پرينسيبىن تاباندىلىقپەن اتقارادى، دۇنيە جۇزىندە تەك ٴبىر عانا جۇڭگو بار، جۇڭحۋا حالىق رەسپۋبليكاسى ۇكىمەتى بۇكىل جۇڭگوعا ۋاكىلدىك ەتەتىن بىردەن ـ ٴبىر زاڭدى ۇكىمەت، تايۋان جۇڭگو تەرريتورياسىنىڭ ايرىلماس ٴبىر بولەگى دەپ قارايدى، جۇڭگو جاقتىڭ تايۋانعا، شياڭگاڭعا، شينجياڭعا، شيزاڭعا ساياتىن وزەكتى مۇددە ماسەلەلەرىندەگى تۇرعىسىن باتىل قولدايدى. ٴتوراعا شي جينپيڭ العا قويعان الەمدىك دامۋ باستاماسى، الەمدىك حاۋىپسىزدىك باستاماسى، الەمدىك وركەنيەت باستاماسى وركەندەپ كەلە جاتقان ەلدەردىڭ بىرگە دامۋىن جۇزەگە اسىرۋعا كومەكتەسۋدە، دۇنيە ٴجۇزىنىڭ بەيبىتشىلىگىن، ورنىقتىلىعىن، گۇلدەنۋىن جەبەۋدە ماڭىزدى مانگە يە. جۇڭگو جاقتىڭ ۇزاق ۋاقىتتان بەرى ميكرونەزيا فەدەراتسياسى سياقتى تىنىق مۇحيتتاعى ارال ەلدەرىنىڭ ەكونوميكالىق، قوعامدىق دامۋىنا قىمباتتى كومەك كورسەتكەندىگىنە العىس ايتامىز، ”ٴبىر بەلدەۋ، ٴبىر جول“ اياسىندا اۋىل شارۋاشىلىعى، بالىق شارۋاشىلىعى، ەكونوميكا ـ ساۋدا، قارجى قوسۋ، ساياحات، سيفرلى ەكونوميكا سياقتى سالالارداعى سەلبەستىكتى تەرەڭدەتىپ، كليمات وزگەرىسىنە بىرگە توتەپ بەرۋدى قالايمىز. جۇڭگونىڭ تىنىق مۇحيتتاعى ارال ەلدەرى وڭىرىندەگى سەلبەستىگى ٴوڭىردىڭ بەيبىتشىلىگى مەن دامۋىنا ٴتيىمدى، ميكرونەزيا جاق ارال ەلدەرىنىڭ جۇڭگومەن سەلبەستىگىن ۇزدىكسىز بەلسەنە جەبەيدى.
كەڭەستەن كەيىن ەكى ەلدىڭ مەملەكەت باسشىلارى ”ٴبىر بەلدەۋ، ٴبىر جولدى“ بىرگە قۇرۋ، جاسىل دامۋ، اۋىل شارۋاشىلىعى، ەمدەۋ ـ دەنساۋلىق ساقتاۋ، نەگىزدىك قۇرىلعى، دامۋ سەلبەستىگى سياقتى سالالارداعى كوپ ٴتۇرلى ەكى جاقتى سەلبەستىك حۇجاتتارىنا قول قويىلۋىنا بىرگە كۋا بولدى.
ەكى جاق «جۇڭحۋا حالىق رەسپۋبليكاسى مەن ميكرونەزيا فەدەراتسياسىنىڭ بىرلەسكەن مالىمدەمەسىن» جاريالايدى.
كەڭەستەن ىلگەرى شي جينپيڭ مەن حانىمى پىڭ لييۋان حالىق سارايىنىڭ شىعىس قاقپاسىنىڭ سىرتىنداعى الاڭدا سيمينا مەن حانىمى انسەليدى قارسى الۋ سالتىن وتكىزدى.
سيمينا كەلگەندە قۇرمەت قاراۋىلى قاتار تۇزەپ قۇرمەت ٴبىلدىردى. ەكى ەلدىڭ مەملەكەت باسشىلارى سالتانات مىنبەسىنە شىقتى، اسكەري وركەستر جۇڭگو مەن ميكرونەزيا ەكى ەلدىڭ مەملەكەت ٴانىن ورىندادى، تيان ـ انمىن الاڭىندا 21 رەت ساليۋت اتىلدى. سيمينا شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ٴارى قاتارعا ٴبولىنىپ پاراتتان ٴوتۋىن كوردى.
سول كۇنى كەشتە شي جينپيڭ مەن پىڭ لييۋان حالىق سارايىنىڭ جينسى زالىندا سيمينانى جانە ونىڭ حانىمىن قارسى الۋ قوناعاسىن وتكىزدى.
ۋاڭ ي جوعارىداعى قيمىلدارعا قاتىناستى.
