4 ـ ايدىڭ 10 ـ كۇنى تۇستەن كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ بەيجيڭدە ما يىڭجيۋمەن جانە ونىڭ ساپارلاستارىمەن كەزدەستى.
□ سۋرەتتى شينحۋا اگەنتتىگىنىڭ ٴتىلشىسى جۇي پىڭ تۇسىرگەن
4 ـ ايدىڭ 10 ـ كۇنى تۇستەن كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ بەيجيڭدە ما يىڭجيۋمەن جانە ونىڭ ساپارلاستارىمەن كەزدەستى.
□ سۋرەتتى شينحۋا اگەنتتىگىنىڭ ٴتىلشىسى شيە حۋانچى تۇسىرگەن
شينحۋا اگەنتتىگىنىڭ 4 ـ ايدىڭ 10 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ 4 ـ ايدىڭ 10 ـ كۇنى تۇستەن كەيىن بەيجيڭدە ما يىڭجيۋمەن جانە ونىڭ ساپارلاستارىمەن كەزدەستى.
شي جينپيڭ مىنالاردى ٴبىلدىردى: ەكى جاعالاۋداعى باۋىرلاستار بىردەي جۇڭحۋا ۇلتىنا ٴتان. جۇڭحۋا ۇلتى _ دۇنيە جۇزىندەگى ۇلى ۇلت، تاريحى ۇزاق، شۇعىلالى، دۇنيەدە تەڭدەسسىز جۇڭحۋا وركەنيەتىن جاراتقان، ٴاربىر جۇڭحۋا پەرزەنتى مۇنى ماقتانىش ەتەدى جانە داڭق سانايدى. جۇڭحۋا ۇلتىنىڭ 5000 جىلدان استام ۇزاق تاريحىندا تاريحتا وتكەن اتا ـ بابالارىمىزدىڭ تايۋانعا كوشىپ بارىپ، ٴوسىپ ـ وركەندەگەندىگى، ەكى جاعالاۋداعى باۋىرلاستاردىڭ شەتەل شاپقىنشىلىعىنا بىرگە قارسى تۇرىپ، تايۋاندى قايتارىپ العاندىعى جازىلعان. جۇڭحۋا ۇلتى ەجەلدەن بەرى بۇعازدىڭ ەكى جاعالاۋىنىڭ بولىنبەس تاريحىن جازىپ، ەكى جاعالاۋداعى باۋىرلاستاردىڭ تامىرلاس تاريحي شىندىعىن وشپەستەي ەتىپ كەستەلەگەن.
ەكى جاعالاۋداعى باۋىرلاستاردىڭ بارلىعى جۇڭگولىقتار، شەشىلمەيتىن تۇيىنشەك، اقىلداسۋعا كەلمەيتىن ماسەلە جوق، ەشقانداي كۇش ٴبىزدى ايىرا المايدى. بۇعازدىڭ ارالىعى ەكى جاعالاۋداعى باۋىرلاستاردىڭ ەتەنە سۇيىسپەنشىلىگىنە بوگەت بولا المايدى جانە ونى ۇزە المايدى. ٴتۇزىمنىڭ ۇقساماستىعى ەكى جاعالاۋدىڭ ٴبىر مەملەكەتكە، ٴبىر ۇلتقا ٴتان ەكەندىگى سىندى وبيەكتيۆ شىندىقتى وزگەرتە المايدى. سىرتقى كيلىگۋ وتباسىنداعىلاردىڭ باس قوسۋى، مەملەكەتتىڭ بىرلىككە كەلۋى سىندى تاريحي ۇلكەن اۋقىمدى توسا المايدى. ەكى جاعالاۋداعى باۋىرلاستار ەجەلدەن بەرى باستان ـ اياق تامىرلاس، تىلەكتەس بولىپ، ٴبىر ـ بىرىنە قارايلاسىپ كەلەدى.
جاستار _ مەملەكەتتىڭ ٴۇمىتى، ۇلتتىڭ بولاشاعى. ەكى جاعالاۋداعى جاستار جاقسى بولسا، ەكى جاعالاۋدىڭ بولاشاعى دا جاقسى بولادى. ەكى جاعالاۋداعى جاستار جۇڭگولىقتاردىڭ جىگەرىن، قايسارلىعىن، سەنىمىن كۇشەيتىپ، جۇڭحۋا ۇلتىنىڭ باياندى قۇت ـ ىرىسىن بىرگە جاراتىپ، جۇڭحۋا ۇلتىنىڭ تاريحي تىڭ شۇعىلالى تاراۋىن ۇزدىكسىز جازۋى كەرەك.
شي جينپيڭ بىلاي دەپ باسا دارىپتەدى: ەكى جاعالاۋداعى باۋىرلاستاردىڭ ورتاق تامىرى، ورتاق مادەنيەتى، ورتاق تاريحى بار، ونان دا ماڭىزدىسى، ٴبىزدىڭ ۇلت جونىندە ورتاق جاۋاپكەرشىلىگىمىز، بولاشاق جونىندە ورتاق تىلەگىمىز بار. ٴبىز ەكى جاعالاۋ قارىم ـ قاتىناسىنىڭ كەلەلى جاعدايىن جۇڭحۋا ۇلتىنىڭ تۇتاس تۇلعالىق مۇددەسى مەن ۇزاق بولاشاقتىق دامۋى تۇرعىسىنان يگەرۋىمىز كەرەك.
ٴبىرىنشى، جۇڭحۋا ۇلتىنىڭ ورتاق مەكەنىن تاباندىلىقپەن قورعاۋ كەرەك. جۇڭحۋا ۇلتى، جۇڭحۋا وركەنيەتى نەشە مىڭ جىلدان بەرى سان وزگەرىستى وتكەرىپ، تار جول، تايعاق كەشۋلەردى باستان كەشىرگەنىمەن، ۇزىلمەي وركەندەپ، ۇزدىكسىز جالعاسىپ كەلەدى، مۇنداعى شەشۋشى ٴتۇيىن جۇڭحۋا ۇلتىندا باستان ـ اياق مەملەكەت تەرريتورياسىنىڭ بولشەكتەنۋىنە بولمايدى، مەملەكەتتىڭ بىلىعۋىنا بولمايدى، ۇلتتىڭ ىدىراۋىنا بولمايدى، وركەنيەتتىڭ ۇزىلۋىنە بولمايدى دەيتىن ورتاق سەنىمنىڭ بولعاندىعىندا. قۇدىرەتتى، بىرلىككە كەلگەن مەملەكەت باستان ـ اياق تايۋاندىق باۋىرلاستاردى قامتىعان بارلىق جۇڭحۋا پەرزەنتتەرىنىڭ تاعدىرىمەن بايلانىستى بولىپ كەلەدى. ەكى جاعالاۋداعى باۋىرلاستار ”تايۋاندى دەربەستەندىرۋدى“ كوزدەيتىن بولشەكتەۋ ارەكەتتەرىنە جانە سىرتقى كۇشتەردىڭ كيلىگۋىنە باتىل قارسى تۇرىپ، جۇڭحۋا ۇلتىنىڭ ورتاق مەكەنىن باتىل قورعاپ، بەيبىت بىرلىككە كەلۋ سىندى كوركەم بولاشاققا بىرگە تالپىنىپ، جۇڭحۋا ۇلتىنىڭ تاعدىرىن جۇڭگولىقتار ٴوز قولىندا مىقتاپ ۇستاۋى كەرەك.
ەكى جاعالاۋداعى باۋىرلاستار مەكەندەرىنىڭ بەيبىت، تىنىش بولۋىن، وتباسىنداعىلاردىڭ تاتۋ ـ ٴتاتتى ٴوتۋىن اڭسايدى، بۇل ٴۇشىن، ٴسوز جوق، ەكى جاعالاۋ قارىم ـ قاتىناسىنىڭ بەيبىت دامۋىن ىلگەرىلەتۋ كەرەك، مۇنىڭ تەتىگى _ ٴبىر جۇڭگو پرينسيبىن ايگىلەيتىن ”92 ـ جىلعى ورتاق تانىمعا“ تاباندى بولۋ، ونىڭ وزەگى _ ەكى جاعالاۋدىڭ ٴبىر مەملەكەتكە، ٴبىر ۇلتقا ٴتان ەكەندىگى سىندى نەگىزگى فاكت جونىندە ورتاق تانىمعا كەلۋ. تەك مەملەكەتتى بولشەكتەمەسە، ەكى جاعالاۋداعىلاردىڭ بارلىعى جۇڭگولىق ەكەندىگىن، ٴبىر ٴۇيلى جان ەكەندىگىن مويىنداسا بولعانى، ەكى جاعالاۋداعى باۋىرلاستاردىڭ بىرگە وتىرىپ، وتباسى ٴىسى جونىندە الدىمەن كەزدەسىپ، اۋىس ـ كۇيىس جاساپ، ٴتۇسىنىسۋدى كۇشەيتۋىنە، ٴوزارا سەنىمدىلىكتى ارتتىرۋىنا، قايشىلىقتى شەشۋىنە، ورتاق تانىمعا كەلۋىنە ابدەن بولادى.
ەكىنشى، جۇڭحۋا ۇلتىنىڭ باياندى قۇت ـ ىرىسىن تاباندىلىقپەن بىرگە جاراتۋ كەرەك. ەكى جاعالاۋداعى باۋىرلاستاردىڭ قۇت ـ ىرىسىن كوزدەۋ ٴبىزدىڭ ەكى جاعالاۋ قارىم ـ قاتىناسىن دامىتۋداعى شىعار ٴتۇيىنىمىز جانە تابان تىرەر تياناعىمىز. جۇڭحۋا ۇلتىنىڭ باياندى قۇت ـ ىرىسىن بىرگە جاراتۋ سىندى بۇل نىسانا وتە ۇلى ٴارى وتە قاراپايىم، سايىپ كەلگەندە، ەكى جاعالاۋداعى باۋىرلاستاردىڭ تاماشا تۇرمىس جونىندەگى تالپىنىسىن جۇزەگە اسىرىپ، تايۋاندىق باۋىرلاستاردى قامتىعان بارلىق جۇڭگولىقتاردى ٴتىپتى دە جاقسى تۇرمىسقا جەتكىزىپ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن بىرگە جۇزەگە اسىرۋ بولىپ تابىلادى. ٴبىزدىڭ ۇلى قۇرلىقتاعى ٴبىر ميلليارد 400 ميلليوننان استام باۋىرلاستى جاقسى تۇرمىس كەشىرۋگە باستاۋعا قۋاتىمىز قاپتال جەتەدى، سونداي ـ اق تايۋاندىق باۋىرلاستارمەن بىرگە كوركەم بولاشاقتى بىرگە جاراتۋعا دا قۋاتىمىز قاپتال جەتەدى.
ٴبىز باستان ـ اياق تايۋاندىق باۋىرلاستاردىڭ قۇت ـ ىرىسىن ەستەن شىعارمادىق، ەڭ الدىمەن تايۋاندىق باۋىرلاستارمەن جۇڭگو ۇلگىسىندەگى وسىزامانداندىرۋدىڭ دامۋ ورايىنان بىرگە يگىلىكتەنىپ، وتانىمىز ۇلى قۇرلىعىنىڭ دامۋ، العا باسۋ جەتىستىكتەرىنەن بىرگە يگىلىكتەنىپ، تايۋاندىق باۋىرلاستار ٴۇشىن بەلسەنە ناقتى ىستەر ىستەپ، يگى ىستەر ىستەپ، قيىن ىستەردى شەشىپ، تايۋاندىق باۋىرلاستاردىڭ يگىلىگىنىڭ اناعۇرلىم ارتۋىنا، قۇت ـ ىرىسىنىڭ اناعۇرلىم ناقتىلانۋىنا، بولاشاعىنىڭ اناعۇرلىم جاقسارۋىنا مۇمكىندىك جاسايمىز.
ٴۇشىنشى، جۇڭحۋا ۇلتى ورتاق تۇلعا تانىمىن تاباندىلىقپەن بەرىك ورناتۋ كەرەك. جۇڭحۋا ۇلتى ۇزاق تاريح بارىسىندا اسىل ارال تايۋاندى قامتىعان وتانىمىزدىڭ جەر ـ سۋىن بىرگە گۇلدەندىردى، جۇڭگو تاريحىن بىرگە جازدى، جۇڭحۋا مادەنيەتىن بىرگە جاراتتى، ۇلت رۋحىن بىرگە جەتىلدىردى. ەكى جاعالاۋداعى باۋىرلاستار ەجەلدەن ٴبىر ٴۇيلى جاندار، ۇنەمى بارىس ـ كەلىس جاساپ تۇرۋعا، بارعان سايىن ىشتەسىپ، ەتەنە بولا تۇسۋگە ٴتيىس. ٴبىز اناعۇرلىم پارمەندى شارالار قولدانىپ، ەكى جاعالاۋدىڭ ارالاسۋىن، ىشتەسۋىن، توعىسۋىن بەلسەنە ىلگەرىلەتىپ، ەكى جاعالاۋداعى باۋىرلاستاردىڭ ارالاسۋ بارىسىندا سىرلاسۋىنا، ىشتەسۋ بارىسىندا سەنىمدىلىكتى ارتتىرۋىنا مۇمكىندىك جاساپ، كوڭىل توعىسۋىن جەبەيمىز. ٴبىز قالىڭ تايۋاندىق باۋىرلاستاردى ۇلى قۇرلىققا كوبىرەك كەلىپ ارالاپ كورۋگە قىزۋ ىنتامەن ۇسىنىس ەتەمىز، ۇلى قۇرلىقتاعى بۇقارانىڭ وتانىمىزدىڭ اسىل ارالىنا كوبىرەك بارىپ ارالاۋىن دا قۋانا كورگىمىز كەلەدى.
جۇڭحۋا مادەنيەتى _ جۇڭحۋا ۇلتىنىڭ رۋحاني جان تامىرى، ەكى جاعالاۋداعى باۋىرلاستاردىڭ ورتاق رۋحاني مەكەنى. ەكى جاعالاۋداعى باۋىرلاستار جۇڭحۋا مادەنيەتى سەنىمىن بەكەمدەپ، سانالى تۇردە جۇڭحۋا مادەنيەتىنىڭ قورعاۋشىسى، جالعاستىرۋشىسى، اسقاقتاتۋشىسى بولىپ، جۇڭحۋا ۇلتى جونىندەگى تاۋەلدىلىك سەزىمىن، شىنايى مويىنداۋ سەزىمىن، داڭق سەزىمىن كۇشەيتىپ، جۇڭحۋا ۇلتى ورتاق تۇلعا تانىمىن بەرىك ورناتۋى كەرەك.
ٴتورتىنشى، جۇڭحۋا ۇلتىنىڭ ۇلى گۇلدەنۋىن تاباندىلىقپەن جۇزەگە اسىرۋ كەرەك. 100 جىلدىق كۇرەس ارقىلى ٴبىز جۇڭگو ۇلگىسىندەگى وسىزامانداندىرۋ جولىمەن ٴساتتى جۇردىك، ۇلتتى گۇلدەندىرۋدىڭ نۇرلى بولاشاعىن قارسى الدىق، سۇن جۇڭشان مىرزانىڭ سول جىلدارى جاساعان جوباسىن جۇزەگە اسىرىپ قانا قويماي، تاعى سۇن جۇڭشان مىرزانىڭ ويلاعانىنان الدەقايدا اسىپ تۇسكەن كوپتەگەن تابىستاردى جاراتتىق. ۇلتتى گۇلدەندىرۋدىڭ تاريح دوڭعالاعى تىنباي العا ىلگەرىلەۋدە، بۇعان ەكى جاعالاۋداعى باۋىرلاستاردىڭ كۇرەسى مەن ماڭداي تەرى سىڭگەن، بۇل ەكى جاعالاۋداعى باۋىرلاستاردىڭ ٴبىر نيەتپەن بىرگە جاراتۋىن، ۇزدىكسىز كۇرەس جۇرگىزۋىن قاجەت ەتەدى، سونداي ـ اق بۇل سوڭىندا ەكى جاعالاۋداعى باۋىرلاستاردىڭ كۇش جالعاپ كۇرەس جۇرگىزۋى بارىسىندا جۇزەگە اسادى. ەكى جاعالاۋداعى جاستار، ٴسوز جوق، ٴىرى ىستەر ىستەي الادى، سونداي ـ اق كەسەك تابىستارعا قول جەتكىزە الادى. ٴبىز تايۋان جاستارىنىڭ وتان ۇلى قۇرلىعىنا كەلىپ ارمانعا قۇلاش سەرمەۋىن، ارمان سومداۋىن، ارماندى جۇزەگە اسىرۋىن قارسى الامىز، ەكى جاعالاۋداعى جاستاردىڭ ەسەيىپ ـ ەرجەتۋىنە، دارىندى بولۋىنا، تابىسقا جەتۋىنە ۇزدىكسىز اناعۇرلىم جاقسى شارت ـ جاعداي، اناعۇرلىم كوپ وراي جاراتامىز. ەكى جاعالاۋداعى جاستاردىڭ ٴوزارا ۇيرەنىپ، ٴوزارا ۇلگى الىپ، ٴبىر ـ بىرىنە ارقا سۇيەپ، ٴبىر نيەت ـ ٴبىر تىلەكتە بولا وتىرىپ، تاريحتىڭ ۇتىلامالى تاياقشاسىن ويداعىداي جەتكىزىپ، ۇلتتىڭ گۇلدەنۋىن جۇزەگە اسىرۋعا جاستىق كوكتەمىن ارناۋىن ٴۇمىت ەتەمىز.
شي جينپيڭ بىلاي دەدى: 4 ـ ايدىڭ 3 ـ كۇنى حۋاليان اۋدانىنىڭ تەڭىز ايدىنىندا 7.3 بال جەر سىلكىنىسى تۋىلىپ، ٴولىم ـ ٴجىتىم بولىپ، مال ـ مۇلىك شىعىنعا ۇشىرادى، مەن قازا بولعان باۋىرلاستارعا ازا بىلدىرەمىن، اپات تۋىلعان وڭىردەگى بۇقارادان حال سۇرايمىن.
ما يىڭجيۋ مىنالاردى ٴبىلدىردى: ”92 ـ جىلعى ورتاق تانىمعا“ تاباندى بولۋ، ”تايۋاندى دەربەستەندىرۋگە“ قارسى تۇرۋ _ ەكى جاعالاۋ قارىم ـ قاتىناسىنىڭ بەيبىت دامۋىنىڭ ورتاق ساياسي نەگىزى. ەكى جاعالاۋ حالقى بىردەي جۇڭحۋا ۇلتىنا ٴتان، ەكەۋى دە يانحۋاڭ ۇرپاقتارى، اۋىس ـ كۇيىستى، سەلبەستىكتى تەرەڭدەتىپ، جۇڭحۋا مادەنيەتىن بىرگە جالعاستىرىپ، ەكى جاعالاۋداعى باۋىرلاستاردىڭ قۇت ـ ىرىسىن مولايتىپ، قول ۇستاسا العا باسىپ، جۇڭحۋانى گۇلدەندىرۋگە كۇش سالۋ كەرەك.
ماجىلىسكە قاتىناسقان تايۋان جاستارىنىڭ ۋاكىلدەرى ٴسوز سويلەدى.
ۋاڭ حۋنيڭ، ساي چي قاتارلىلار كەزدەسۋگە قاتىناستى.
