شي جينپيڭ استاناداعى مىندەتتى اعاش ەگۋ قيمىلىنا قاتىناسقاندا بىلاي دەپ باسا دارىپتەدى
جالپـى حالىق اعاش ەگىپ جاسىلدى كوبەيتىپ، كورىكتى جۇڭگونى بىرگە قۇرۋ كەرەك
لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتىناستى
4 ـ ايدىڭ 3 ـ كۇنى پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار بەيجيڭ قالاسى تۇڭجوۋ رايونى لۋچىڭ قالاشىعىنا بارىپ، استاناداعى مىندەتتى اعاش ەگۋ قيمىلىنا قاتىناستى. سۋرەتتە: شي جينپيڭ كوپشىلىكپەن بىرگە اعاش ەگۋدە.
□ سۋرەتتى شينحۋا اگەنتتىگىنىڭ ٴتىلشىسى جۇي پىڭ تۇسىرگەن
شينحۋا اگەنتتىگىنىڭ 4 ـ ايدىڭ 3 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ 4 ـ ايدىڭ 3 ـ كۇنى تۇستەن بۇرىن استاناداعى مىندەتتى اعاش ەگۋ قيمىلىنا قاتىناسقاندا بىلاي دەپ باسا دارىپتەدى: چيڭميڭنىڭ الدى ـ ارتىندا، جۇڭگونىڭ بايتاق دالاسىنىڭ جەر ـ جەرىندە تىرشىلىك تىنىسى جالىنداپ، اعاش ەگۋدىڭ تاماشا مەزگىلى كەلىپ جەتتى. بۇگىن ٴبىزدىڭ بىرگە اعاش ەگۋىمىز، كوپشىلىكتى اتتانىسقا كەلىپ، اعاش ەگىپ ورمان وسىرۋگە بەلسەنە قاتىناسىپ، بارلىق ادام جاسىل ٴتۇس ەلشىسى، ەكولوگيا اتويشىسى بولۋعا تالپىنىپ، كورىكتى جۇڭگو قۇرۋدا جاسىلدى كوبەيتىپ، اجار قوسىپ، ادام مەن تابيعات جاراسىمدى قاتار ٴومىر سۇرەتىن جۇڭگو ۇلگىسىندەگى وسىزامانداندىرۋدىڭ جاڭا تاراۋىن بىرگە جازۋعا ۇندەۋ ٴۇشىن بولىپ تابىلادى.
بەيجيڭ قالا ماڭىنداعى كەڭ دالادا كوكتەمنىڭ قويۋ لەبى ەسىپ تۇر. تۇستەن بۇرىن ساعات 10نان 40 مينۋت مولشەرىندە پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار توپتىق اۆتوكولىككە وتىرىپ، بەيجيڭ قالاسى تۇڭجوۋ رايونى لۋچىڭ قالاشىعىنا بارىپ، استاناداعى بۇقارامەن بىرگە مىندەتتى اعاش ەگۋگە قاتىناستى.
اعاش ەگۋ ورنى بەيجيڭ قالاسى تۇڭجوۋ رايونى مەن حىبەي ولكەسى لاڭفاڭ قالاسى بەيسان اۋدانىنىڭ تۇيىلىسىندەگى جەردە، چاۋباي وزەنىنىڭ جاعاسىنداعى بەيجيڭ مەن حىبەيدىڭ تۇڭعىش ٴوڭىر اتتاپ بىرگە قۇرعان ورمان باقشاسىندا، سۋعا جاقىن بولۋداي تاماشا ەكولوگيالىق شارت ـ جاعدايعا يە.
باس شۋجيدىڭ كەلگەنىن كورىپ، اعاش ەگىپ جاتقان كادر، بۇقارا باس شۋجيگە ىستىق ىقىلاسپەن امانداستى. شي جينپيڭ كوپشىلىككە قول بۇلعاپ قۇرمەت ٴبىلدىرىپ، كۇرەك كوتەرىپ اعاش ەگەتىن جەرگە بارىپ، بەيجيڭ قالاسىنداعى، مەملەكەتتىك ورمان شارۋاشىلىعى جانە جايلىم مەكەمەسىندەگى جاۋاپتى جولداستارمەن، سونداي ـ اق استاناداعى كادر، بۇقارا، پيونەرلەرمەن بىرگە قاربالاس جۇمىسقا كىرىسىپ كەتتى.
كۇرەك ۇستاپ توپىراق كۇرەدى، توپىراق قومداپ بوگەن جاسادى، شەلەك كوتەرىپ، اعاش سۋاردى... شي جينپيڭ ماي قاراعاي، سارى بوياۋ اعاش، ۇيەڭكى تال، شيە اعاشى، قىزىل جاپىراقتى اسەم شاپتول، بوز ارشا سياقتى اعاشتاردىڭ قالامشالارىن ىركەس ـ تىركەس وتىرعىزدى. شي جينپيڭ اعاش وتىرعىزا ٴجۇرىپ، بالالاردىڭ ۇيرەنۋ، تۇرمىس، ەڭبەكپەن شىنىعۋ جاعدايىن سۇرادى. ول بىلاي دەپ باسا دارىپتەدى: قالىڭ جاستار مەن ورەندەر وتانىمىزدىڭ بولاشاعى، كىشكەنتاي كەزدەن باستاپ ەڭبەككە، اعاش ەگىپ، ورمان وسىرۋگە بەلسەنە قاتىناسىپ، جاسىل تۇقىمدى جۇرەگىنە سەۋىپ، تابيعاتقا قۇرمەت ەتەتىن، تابيعاتتى قىزۋ سۇيەتىن تانىم قالىپتاستىرىپ، قۇلشىنا ۇيرەنىپ، دەنە شىنىقتىرىپ، تولىسا ەسەيىپ، احلاق، اقىل ـ وي، دەنە، ەستەتيكا، ەڭبەك جاقتارىنان جان ـ جاقتى جەتىلىپ، مەملەكەتتىڭ تىرەگىنە اينالۋعا قۇلشىنۋى كەرەك. اعاش ەككەن جۇمىس باسىندا دۋماندى ەڭبەك كورىنىسى قالىپتاستى، باسشى جولداستار كوپشىلىكپەن بىرگە توپىراق قومداپ، اعاش سۋارىپ، ورتا قىزۋ مەرەيگە بولەندى.
اعاش ەككەن كەزدە، شي جينپيڭ سول جەردەگى كادر، بۇقارامەن ىقىلاستى اڭگىمەدە بولدى. ول ورتالىققا كەلىپ قىزمەت ىستەگەننەن بەرى، ٴۇرتىس 17 جىل استاناداعى مىندەتتى اعاش ەگۋ قيمىلىنا قاتىناسقاندىعىن ايتتى. ول بىلاي دەپ اتاپ كورسەتتى: بيىل جاڭا جۇڭگونىڭ اعاش ەگۋ مەرەكەسى بەلگىلەنگەندىگىنىڭ 45 جىلدىعى. بۇكىل ەل حالقى تاباندىلىقپەن اعاش ەگىپ، ورمان ٴوسىرىپ، تاقىر تاۋدى ماساتىداي قۇلپىرتتى، ٴشول دالانى جاسىل القاپقا اينالدىردى، تابىسىنا كۇللى دۇنيە جالت قارادى. سونىمەن بىرگە ەلىمىزدە ورمان جەتكىلىكسىز، جاسىل جامىلعى از بولۋ ماسەلەسىنىڭ اۋەلگىدەي كورنەكتى ەكەندىگىن، ورماننىڭ ”اسىل قازىنا“ رولىن ساۋلەلەندىرۋدىڭ ٴالى دە دەرلىكتەي تولىق ەمەستىگىن كورە ٴبىلۋىمىز كەرەك. جاسىلدى كوبەيتۋ _ باسىمدىقتى كوبەيتۋ، اعاش ەگۋ _ بولاشاقتى جاراتۋ. اعاش ەگۋدى جالعاستىرىپ، ۇرپاقتان ـ ۇرپاققا ۇلاستىرا ىستەپ، ”جاسىل قورىمىزدى“ ۇزدىكسىز مولايتۋىمىز كەرەك.
شي جينپيڭ بىلاي دەپ باسا دارىپتەدى: وتانىمىزدى جاسىلداندىرۋدا جاسىلدى كەڭەيتۋدى، جاسىلدى گۇلدەندىرۋدى، جاسىلدى قورعاۋدى قاتار اتقارۋ كەرەك. جاسىلدى كەڭەيتكەندە، كەڭ كولەمدە مەملەكەت جەرىن جاسىلداندىرۋدى عىلمي ىلگەرىلەتىپ، جەر جاعدايىنا ۇيلەسەتىن اعاش ەگىپ، ٴدال ۋاعىندا ۇيلەسىمدى امال قولدانىپ، ەگىلگەن اعاشتاردى تۇگەلدەي قاتارعا قوسىپ، ٴبىر الاپتا ورمان ٴوسىرۋ ارقىلى، سول الاپتى كوركەيتۋ كەرەك. جاسىلدى گۇلدەندىرگەندە، ساپا مەن ونىمدىلىككە باسا ٴمان بەرىپ، جاسىل تاۋ، تۇنىق سۋدى باعالى بايلىققا اينالدىرۋدىڭ ارناسىن كەڭەيتىپ، ورماننىڭ ”سۋ قويماسى، اقشا قامباسى، استىق قامباسى، كومىر قىشقىل گاز قامباسى“ بولۋىن اناعۇرلىم ويداعىداي سايكەستى ىلگەرىلەتىپ، ەكولوگيالىق ونىمدىلىكتىڭ، ەكونوميكالىق ونىمدىلىكتىڭ، قوعامدىق ونىمدىلىكتىڭ بىرلىگىن جۇزەگە اسىرۋ كەرەك. جاسىلدى قورعاعاندا، ورمان، جايلىم بايلىعىن قورعاۋدى كۇشەيتىپ، ورتتەن ساقتانۋ، ٴورت ٴسوندىرۋ قىزمەتىن ويداعىداي ىستەپ، ەلەۋلى كومەسكى كىناراتتاردى ٴبىر ـ بىردەن تەكسەرۋدى، وڭاۋدى ىشكەرىلەي ورىستەتىپ، وڭاي ـ وسپاق كەلمەگەن جاسىلداندىرۋ جەتىستىگىن ويداعىداي قورعاۋ كەرەك. ٴۇش تەرىستىك ٴوڭىرى مەملەكەت جەرىن جاسىلداندىرۋدىڭ نەگىزگى شايقاس مايدانى، اناعۇرلىم كوپ كۇشتى ”ٴۇش تەرىستىك“ ينجەنەريا قۇرىلىسىنا شوعىرلاندىرىپ، سولتۇستىك ٴوڭىردىڭ جاسىل قورعانىن بەكەمدەۋ كەرەك.
شي جينپيڭ بىلاي دەپ اتاپ كورسەتتى: وتاندى جاسىلداندىرۋدا بارلىق ادام جاۋاپكەرشىلىگىن ادا ەتۋى كەرەك. بۇقارانىڭ ات سالىسۋ ارناسىن ىركىلىسسىزدەندىرىپ، جاۋاپكەرشىلىكتى ادا ەتۋ فورماسىندا جاڭالىق اشىپ، ورمان باستىعى ٴتۇزىمىنىڭ رولىن ويداعىداي ساۋلەلەندىرىپ، ٴار جاقتىڭ كۇشتەرىن اتتانىسقا كەلتىرىپ، جالپى حالىقتىق مىندەتتى اعاش ەگۋدىڭ ۇزدىكسىز تەرەڭدەۋىن، ناقتىلانۋىن ىلگەرىلەتۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ بەيجيڭدەگى مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك كەڭەستىڭ مۇشەلەرى قاتارلىلار اعاش ەگۋ قيمىلىنا قاتىناستى.
