4 ـ ايدىڭ 1 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا يندونەزيانىڭ سايلانعان زۇڭتۇڭى پرابوۋومەن كەڭەس وتكىزدى.
□ سۋرەتتى شينحۋا اگەنتتىگىنىڭ ٴتىلشىسى ياۋ دا ـ ۋي تۇسىرگەن
شينحۋا اگەنتتىگىنىڭ 4 ـ ايدىڭ 1 ـ كۇنى بەيجيڭنەن بەرگەن حابارى (ٴتىلشى ليۋ حۋا). 4 ـ ايدىڭ 1 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا يندونەزيانىڭ سايلانعان زۇڭتۇڭى پرابوۋومەن كەڭەس وتكىزدى.
شي جينپيڭ پرابوۋونىڭ يندونەزيانىڭ زۇڭتۇڭى بولىپ سايلانعاندىعىن قۇتتىقتادى ٴارى جوكو زۇڭتۇڭعا ٴوزىنىڭ ىستىق ىقىلاستى سالەمىن جانە ىزگى تىلەگىن جەتكىزىپ قويۋىن ٴۇمىت ەتتى. شي جينپيڭ بىلاي دەپ اتاپ كورسەتتى: وتكەن 10 جىلدا، مەن جوكو زۇڭتۇڭمەن بىرگە ەكى ەل قارىم ـ قاتىناسىنىڭ جاپپاي، جىلدام دامۋىنا جەتەكشىلىك ەتىپ، سۇبەلى تابىستارعا قول جەتكىزدىك، جاكارتا ـ باندۇڭ جوعارى قارقىندى تەمىر جولى ەكى ەلدىڭ جوعارى ساپالى سەلبەستىگىنىڭ التىن ماڭدايشالىعىنا اينالىپ، جۇڭگو _ يندونەزيا قارىم ـ قاتىناسى تاعدىرلاس ورتاق تۇلعانى بىرگە قۇرۋدىڭ جاڭا كەزەڭىنە ٴوتتى. جۇڭگو جاق جۇڭگو _ يندونەزيا قارىم ـ قاتىناسىنا ستراتەگيالىق دەڭگەيدەن جانە ۇزاق بولاشاقتىق تۇرعىدان قارايدى، يندونەزيامەن بىرگە جان ـ جاقتى ستراتەگيالىق سەلبەستىكتى تەرەڭدەتىپ، وڭىرلىك جانە الەمدىك ىقپالعا يە جۇڭگو _ يندونەزيا تاعدىرلاس ورتاق تۇلعاسىن قۇرىپ، ەكى ەل حالقىنا اناعۇرلىم كوپ قۇت ـ ىرىس اكەلۋدى، ٴوڭىر مەن دۇنيە ٴجۇزىنىڭ بەيبىتشىلىگىنە، ورنىقتىلىعىنا، گۇلدەنىپ ـ كوركەيۋىنە بەلسەندى ۇلەس قوسۋدى قالايدى.
شي جينپيڭ بىلاي دەپ باسا دارىپتەدى: جۇڭگو _ يندونەزيا قارىم ـ قاتىناسىنىڭ قۇندى تابىستارعا قول جەتكىزۋىنىڭ تەتىگى _ ستراتەگيالىق دەربەستىككە تاباندى بولۋ، ٴوزارا سەنىمدىلىككە، ٴوزارا كومەكتەسۋگە تاباندى بولۋ، سەلبەسىپ تەڭ يگىلىككە كەنەلۋگە تاباندى بولۋ، ادىلدىككە، ادىلەتتىلىككە تاباندى بولۋ. جۇڭگو مەن يندونەزيا ەكەۋى دە وركەندەپ كەلە جاتقان ٴىرى ەلدەر جانە بازارى جاڭادان گۇلدەنگەن ەلدەر ۋاكىلى. وتكەندە ەكى ەل ۇلت تاۋەلسىزدىگىنە قول جەتكىزۋ جانە مەملەكەت قۇرىلىسى ىستەرى بارىسىندا باستان ـ اياق ٴوزارا قولداۋ كورسەتىپ كەلدى، الداعى جەردە دە شىن پەيىلىمەن ىنتىماقتاسىپ، ٴوزارا پايدا جەتكىزىپ، تەڭ يگىلىككە كەنەلۋدىڭ ۇلگىسى، بىرگە دامۋدىڭ ونەگەسى، تۇستىك ەلدەر سەلبەستىگىنىڭ اۆانگاردى بولۋعا ٴتيىس. ەكى جاق ٴوزىنىڭ مەملەكەت جاعدايىنا ۇيلەسەتىن دامۋ جولىمەن مىزعىماي ٴجۇرۋى، ٴبىر ـ ٴبىرىنىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋىنا تاباندىلىقپەن قولداۋ كورسەتۋى، ٴبىر ـ ٴبىرىنىڭ وزەكتى مۇددەسىنە ساياتىن جانە ٴجىتى قاداعالاپ وتىرعان كەلەلى ماسەلەلەردە ٴوزارا ٴتۇسىنۋى، قولداۋ كورسەتۋى كەرەك. جۇڭگو جاق يندونەزيامەن قويۋ بارىس ـ كەلىستى ساقتاپ، ەل باسقارۋ تاجىريبەلەرى جونىندە اۋىس ـ كۇيىس جاساسىپ، دامۋ ستراتەگيالارىن ٴتۇيىلىستىرۋدى كۇشەيتىپ، ”ەكى ەل، قوس باقشا“ جانە ”وڭىرلىك ۋنيۆەرسال ەكونوميكا ٴدالىزى“ نىسانىن ىشكەرىلەي ىلگەرىلەتىپ، تەڭىز ٴۇستى سەلبەستىگىن ۇزدىكسىز تەرەڭدەتۋدى قالايدى. جۇڭگو جاق كەدەيلىكتى ازايتۋ، كەدەيلىكتەن ارىلتۋ سالاسىندا يندونەزيامەن سەلبەستىكتى كۇشەيتىپ، قولداۋ كورسەتۋدى قالايدى.
شي جينپيڭ بىلاي دەپ اتاپ كورسەتتى: كەزەكتە دۇنيە ٴجۇزىنىڭ 100 جىلدىق وزگەرىس جاعدايى جەدەل قۇبىلۋدا. ەكى جاق بەيبىت قاتار تۇرۋ بەس پرينسيبىن بەلسەنە امالياتتا ايگىلەپ، ىنتىماق، دوستىق، سەلبەستىك سىندى باندۇڭ رۋحىن بار كۇشپەن اسقاقتاتىپ، تەرەزەسى تەڭ، ٴتارتىپتى بولعان دۇنيە ٴجۇزىنىڭ كوپ ۇيەكتەنۋىن جانە جالپىعا بىردەي، قامتىمدى بولعان ەكونوميكانىڭ جاھاندانۋىن ىلگەرىلەتىپ، كوپ جاقتى ىستەستىكتى كۇشەيتىپ، وركەندەپ كەلە جاتقان ەلدەردىڭ ورتاق مۇددەسىن قورعاۋعا ٴتيىس. جۇڭگو جاق يندونەزيا جاقپەن بىرگە شىعىس وڭتۇستىك ازيا ەلدەرى وداعىنىڭ ىنتىماعىن جانە وزەكتى ورنىن قورعاپ، اشىق، سيىسىمدى وڭىرلىك جۇلگەسىن قورعاپ، اناعۇرلىم تىعىز جۇڭگو _ شىعىس وڭتۇستىك ازيا ەلدەرى وداعى تاعدىرلاس ورتاق تۇلعاسىن قۇرۋدى قالايدى.
پرابوۋو جوكو زۇڭتۇڭنىڭ ٴتوراعا شي جينپيڭگە ايتقان ىقىلاستى سالەمىن جەتكىزىپ، مىنالاردى ٴبىلدىردى: زۇڭتۇڭ بولىپ سايلانعاننان كەيىن، تۇڭعىش رەت جۇڭگودا ساپاردا بولعانىما ايرىقشا قۋانىشتىمىن، جۇڭگو ماڭىزدى ىقپالعا يە ٴىرى ەل، يندونەزيامەن باستان ـ اياق ٴوزارا قۇرمەت ەتىپ، تەڭ تۇرعىدا ٴوزارا مامىلە جاساسىپ كەلەدى. مەن ٴتوراعا شي جينپيڭنىڭ جۇڭگو حالقىنا باسشىلىق ەتىپ ۇلى تابىستارعا قول جەتكىزگەندىگىنە ايرىقشا سۇيىنەمىن، جۇڭگو كوممۋنيستىك پارتياسىنىڭ تاجىريبەلەرىن ۇيرەنىپ، ۇلگى الىپ، ەل باسقارۋ تاجىريبەلەرى جونىندەگى اۋىس ـ كۇيىستى تەرەڭدەتۋدى قالايمىن. جۇڭگو يندونەزيانىڭ كۇشتى سەلبەستىك سەرىگى. سوڭعى جىلدارى جۇڭگو كاسىپورىندارى يندونەزيانىڭ ەكونوميكالىق قۇرىلىسىنا بەلسەنە، ىشكەرىلەي ات سالىسىپ، يندونەزيانىڭ مەملەكەت دامۋىنا دەم بەردى. مەن اناعۇرلىم بەرىك يندونەزيا _ جۇڭگو قارىم ـ قاتىناسىن دامىتۋدى بۇكىلدەي قولدايمىن، جوكو زۇڭتۇڭنىڭ جۇڭگوعا باعىتتاعان دوستىق ساياساتىن جالعاستىرىپ، دەربەس، وزىنە ـ ٴوزى قوجايىن بولۋعا تاباندى بولىپ، يندونەزيا ۇكىمەتىنىڭ بۇرىننان بەرى ۇستانىپ كەلگەن ٴبىر جۇڭگو ساياساتىنا باتىل بويسۇنىپ، جۇڭگو جاقپەن بىرگە ٴبىر ـ ٴبىرىنىڭ وزەكتى مۇددەسىن تاباندىلىقپەن قولداپ، ەكى ەل قارىم ـ قاتىناسىنىڭ اناعۇرلىم جان ـ جاقتى جانە جوعارى ساپالى دامۋىن ىلگەرىلەتىپ، ەكى ەلدىڭ تاعدىرلاس ورتاق تۇلعاسىن قۇرۋ ماڭىزدى ورتاق تانىمىن ويداعىداي تياناقتاندىرۋدى قالايمىن. يندونەزيا جاڭا ۇكىمەتى ەكى ەلدىڭ دامۋ ستراتەگيالارىن ٴتۇيىلىستىرۋدى بەلسەنە ىلگەرىلەتىپ، ەكونوميكا ـ ساۋدا، كەدەيلىكتەن ارىلتۋ سياقتى سالالارداعى سەلبەستىكتە اناعۇرلىم كوپ جەتىستىكتەرگە قول جەتكىزۋدى ىلگەرىلەتىپ، ەكى ەل حالقىن ونان ارى باقىتقا كەنەلتۋدى قالايدى. جۇڭگو حالىقارالىق ىستەردە، اسىرەسە، پالەستينا ماسەلەسىندە باستان ـ اياق ادىلدىكتى، ادىلەتتىلىكتى جاقتاپ كەلەدى، مەن مۇنى ايرىقشا القايمىن. يندونەزيا جۇڭگو جاقپەن بىرگە حالىقارالىق جانە وڭىرلىك ىستەردە سايكەسۋدى، سەلبەسۋدى كۇشەيتىپ، تۇستىك ەلدەر سەلبەستىگىنە اناعۇرلىم زور ۇلەس قوسۋدى قالايدى.
ۋاڭ ي كەڭەسكە قاتىناستى.
