شينحۋا اگەنتتىگىنىڭ 3 ـ ايدىڭ 29 ـ كۇنى بەيجيڭنەن بەرگەن حابارى. 3 ـ ايدىڭ 29 ـ كۇنى مەملەكەت ٴتوراعاسى شي جينپيڭ مەن قازاقستاننىڭ زۇڭتۇڭى توقايەۆ جەكە ـ جەكە 2024 ـ جىلعى جۇڭگو ”قازاقستان ساياحات جىلىنىڭ“ اشىلۋ سالتىنا قۇتتىقتاۋ حاتىن جولدادى.
شي جينپيڭ بىلاي دەپ اتاپ كورسەتتى: جۇڭگو مەن قازاقستان جاقسى كورشى، ابزال دوس، تاماشا سەرىك، ەكى ەل حالىقتارىنىڭ نەشە مىڭ جىلدىق دوستىق بارىس ـ كەلىس تاريحى بار، بايىرعى جىبەك جولىنىڭ وركەنيەت اۋىس ـ كۇيىسىنىڭ، ٴوزارا ۇلگى الۋىنىڭ كوركەم داستانىن بىرگە جازعان. 2013 ـ جىلى مەن قازاقستاندا ”جىبەك جولى ەكونوميكالىق بەلدەۋىن“ بىرگە قۇرۋ باستاماسىن تۇڭعىش رەت العا قويعان بولاتىنمىن. 10 نەشە جىلدان بەرى ەكى ەل ”بىر بەلدەۋ، ٴبىر جولدى“ بىرگە قۇرۋدى ىلگەرىلەتۋدى نەگىزگى جەلى ەتە وتىرىپ، ٴار سالاداعى سەلبەستىكتە سۇبەلى تابىستارعا قول جەتكىزدى، ەكى ەل حالقىن يگىلىككە كەنەلدىرىپ، جۇڭگو مەن قازاقستاننىڭ مىڭ جىلعا جالعاسقان جىبەك جولى سۇيىسپەنشىلىگىنە جاڭا ومىرشەڭدىك كۇش سيلادى.
شي جينپيڭ بىلاي دەپ باسا دارىپتەدى: مادەنيەت اۋىس ـ كۇيىسى جانە ساياحات سەلبەستىگى _ جۇڭگو مەن قازاقستاننىڭ حالىق تىلەگىن توعىستىرۋداعى ماڭىزدى كوپىر جانە دانەكەر. جۋىق جىلداردان بەرى ەكى ەلدىڭ گۋمانيتارلىق سەلبەستىگى قانات جايىپ كەلەدى، ٴوزارا ۆيزا كەشىرىم ەتۋ كەلىسىمى كۇشكە يە بولدى، ٴوزارا مادەنيەت ورتالىعىن قۇرۋ كەلىسىمىنە قول قويىلدى، لۋبان شەبەرحاناسى تياناقتانىپ ىرگە تەپتى، جاستار اراسىنداعى اۋىس ـ كۇيىستەن قىزىقتى اڭگىمەلەر ٴجيى تارالدى، ادامدار اراسىنداعى بارىس ـ كەلىس كۇن سايىن قويۋلادى، حالىقتىڭ دوستىق نەگىزى بارعان سايىن بەكەمدەلدى. بىلتىر مەن توقايەۆ زۇڭتۇڭمەن بىرگە 2024 ـ جىلدى جۇڭگونىڭ قازاقستان ساياحات جىلى ەتۋدى بىرگە جاريالاعان بولاتىنبىز. ەكى ەلدىڭ ساياحات جىلىن وراي ەتە وتىرىپ، ساياحات سەلبەستىگىن تەرەڭدەتىپ، ادامدار اراسىنداعى بارىس ـ كەلىستى نىعايتىپ، مىڭ جىلدىق دوستىقتى ونان ارى جالعاستىرىپ، جۇڭگو مەن قازاقستان قارىم ـ قاتىناسىنىڭ جاڭا ”التىن 30 جىلىن“ قول ۇستاسا ويداعىداي قۇرۋدى، جۇڭگو مەن قازاقستان تاعدىرلاس ورتاق تۇلعاسىن قۇرۋعا جاڭا ۇلەس قوسۋدى ٴۇمىت ەتەمىن.
توقايەۆ قۇتتىقتاۋ حاتىندا مىنالاردى ٴبىلدىردى: قازاقستان مەن جۇڭگو ٴوزارا تاتۋ كورشى، ساياسي جاقتاعى ٴوزارا سەنىمدىلىك ۇزدىكسىز تەرەڭدەپ، ٴار سالاداعى سەلبەستىك جەتىستىگى مول ناتيجەلى بولىپ، ەكى ەل قارىم ـ قاتىناسىنداعى جاڭا ”التىن 30 جىلدى“ تۇلعالاۋعا كۇش قوسۋدا. قازاقستاننىڭ تاريحى، مادەنيەتى ۇزاق، ەجەلگى ەسكەرتكىشتەر كوپ، تابيعي كورىنىسى كوركەم، حالقى ىستىق ىقىلاستى باۋىرمال، قوناعۋار، جۇڭگولىق ساياحاتشىلاردىڭ ەڭ ۇناتاتىن ساياحات نىسانالى جەرىنە اينالۋىنا ابدەن بولادى. قازاقستان جاق ٴبىر قىدىرۋ ساياحات جىلى قيمىلىن وتكىزىپ، جۇڭگولىق ساياحاتشىلاردىڭ قازاقستان جونىندەگى تۇسىنىگىن جاپپاي ارتتىرىپ، قازاقستان مەن جۇڭگونىڭ عاسىرلىق دوستىعىن اناعۇرلىم بەكەمدەپ، ەكى ەلدىڭ ماڭگىلىك جان ـ جاقتى ستراتەگيالىق سەرىكتەستىك قارىم ـ قاتىناسىنا جاڭا قوزعاۋشى كۇش ۇستەيدى.
2024 جۇڭگو ”قازاقستان ساياحات جىلى“ سول كۇنى بەيجيڭدە باستالدى، قيمىلدى جۇڭگو مادەنيەت جانە ساياحات مينيسترلىگى مەن قازاقستان ساياحات جانە دەنە تاربيە مينيسترلىگى بىرلەسىپ وتكىزدى.
