4 - مامىر قوزعالىسىنىڭ 100 جىلدىعىن ەسكە ءتۇسىرۋ جينالىسى بەيجيڭدە سالتاناتپەن وتكىزىلدى

4 - ايدىڭ 30 - كۇنى 4 - مامىر قوزعالىسىنىڭ 100 جىلدىعىن ەسكە ءتۇسىرۋ جينالىسى بەيجيڭدەگى حالىق سارايىندا سالتاناتپەن وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جينالىستا ماڭىزدى ءسوز سويلەدى. 　 سۋرەتتى شينحۋا اگەنتتىگىنىڭ ءتىلشىسى ديڭ لين تۇسىرگەن

لي كىچياڭ، لي جانشۋ، ۋاڭ ياڭ، جاۋ لىجي، حان جىڭ، ۋاڭ چيشان قاتىناستى، ۋاڭ حۋنيڭ باسقاردى

■ 4 - مامىر قوزعالىسىنان بەرگى 100 جىل − جۇڭگو جاستارى ۇرپاقتان - ۇرپاققا جالعاپ كۇرەس جۇرگىزگەن، جەڭىسپەن العا تارتقان 100 جىل، جۇڭگو جاستارى جاستىق ورالى ارقىلى جاستىق ورالعا ءتان جۇڭگونى، جاستىق ورالعا ءتان ۇلتتى جارىققا شىعارعان 100 جىل.

■ جاڭا داۋىردەگى جۇڭگو جاستارى 4 - مامىر رۋحىن ۇزدىكسىز ساۋلەلەندىرىپ، جۇڭحۋا ۇلتىنىڭ ۇلى گۇلدەنۋىن مىندەت ەتىپ، پارتيانىڭ ءۇمىتىن، حالىقتىڭ تىلەگىن، ۇلتتىڭ ۇلكەن سەنىمىن اقتاۋى، ۇلى ءداۋىرىمىزدىڭ مىندەتىن وتەۋى كەرەك. ءبىرىنشى، ۇلى مۇرات ورناتۋ كەرەك، ەكىنشى، ۇلى وتاندى قىزۋ ءسۇيۋ كەرەك، ءۇشىنشى، ءداۋىر جاۋاپكەرشىلىگىن باتىل ارقالاۋ كەرەك، ءتورتىنشى، ەرلىكپەن ەكپىندەي كۇرەس جۇرگىزۋ كەرەك، بەسىنشى، توسەلگەن شەبەرلىك جەتىلدىرۋ كەرەك، التىنشى، ءمورالدىق جەتىلىمدى شىڭداۋ كەرەك.

شينحۋا اگەنتتىگىنىڭ 4 - ايدىڭ 30 - كۇنى بەيجيڭنەن بەرگەن حابارى. 4 - مامىر قوزعالىسىنىڭ 100 جىلدىعىن ەسكە ءتۇسىرۋ جينالىسى 4 - ايدىڭ 30 - كۇنى تۇستەن بۇرىن بەيجيڭدەگى حالىق سارايىندا سالتاناتپەن وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جينالىستا ماڭىزدى ءسوز سويلەپ بىلاي دەپ باسا دارىپتەدى: 4 - مامىر قوزعالىسىنان بەرگى 100 جىل − جۇڭگو جاستارى ۇرپاقتان - ۇرپاققا جالعاپ كۇرەس جۇرگىزگەن، جەڭىسپەن العا تارتقان 100 جىل، جۇڭگو جاستارى جاستىق ورالى ارقىلى جاستىق ورالعا ءتان جۇڭگونى، جاستىق ورالعا ءتان ۇلتتى جارىققا شىعارعان 100 جىل. جاڭا داۋىردەگى جۇڭگونىڭ جاستار قوزعالىسىنىڭ نەگىزگى تاقىرىبى، جاڭا داۋىردەگى جۇڭگونىڭ جاستار قوزعالىسىنىڭ بەتالىسى، جاڭا داۋىردەگى جۇڭگو جاستارىنىڭ بورىشى − جۇڭگو كوممۋنيستىك پارتياسىنىڭ باسشىلىعىنا تاباندى بولىپ، حالىقپەن بىرگە ”قوس 100 جىلدىق“ كۇرەس نىساناسىن جۇزەگە اسىرۋ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ جولىندا كۇرەس جۇرگىزۋ.

لي كىچياڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان جينالىسقا قاتىناستى.

حالىق سارايىنىڭ ۇلكەن زالى ايبىندى، دۋماندى بەينەگە ەندى. ءتوراعالار مىنبەسىنىڭ جوعارى جاعىنا ”4 - مامىر قوزعالىسىنىڭ 100 جىلدىعىن ەسكە ءتۇسىرۋ جينالىسى“ دەگەن جينالىس بەلگىسى ىلىنگەن، ارتقى پەردەنىڭ ءدال ورتاسى ”2019 − 1919“ دەگەن قىزىل ءتۇستى جازۋ، ەكى جاعىنا 10 قىزىل تۋ ءبولىپ قويىلعان. ۇلكەن زالدىڭ 2 - قاباتىنداعى تەكشەنىڭ الدىنا ”شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە تىعىز ىنتىماقتاسىپ، ۇلى 4 - مامىر رۋحىن ساۋلەلەندىرىپ، جاڭا داۋىردەگى جۇڭگو جاستار قوزعالىسىنىڭ دۇرىس بەتالىسىنا تاباندى بولىپ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋدىڭ ايبىندى جاستىق تاراۋىن قۇلشىنا جازايىق“ دەگەن ۇران جازىلعان.

جينالىس باستالاردان بۇرىن، بۇكىل زالدا ”مەن جانە مەنىڭ وتانىم“، ”كوممۋنيستىك پارتيا بولماسا، جاڭا جۇڭگو بولماس ەدى“، ”داڭقتى جۇڭگو كوممۋنيستىك جاستار وداعى“، ”وتاندى جىرلاۋ“ سياقتى اندەر شىرقالىپ، جينالىس زالىندا جاستىقتىڭ ىستىق جالىنى لاۋلادى.

شي جينپيڭ قاتارلى باسشىلار جينالىس الاڭىنا كىرگەندە، بۇكىل زالداعىلار ورىندارىنان تۇرىپ، قىزۋ شاپالاق سوقتى.

تۇستەن بۇرىن ساعات 10نان 30 مينۋت وتكەندە جينالىس باستالدى. بۇكىل زالداعىلار ورىندارىنان تۇرىپ، مەملەكەت ءانىن ورىندادى.

قىزۋ قول شاپالاق ءۇنى ىشىندە شي جينپيڭ ماڭىزدى ءسوز سويلەدى (ءسوزدىڭ تولىعىن 2 -، 3 - بەتتەن وقىڭىزدار). ول مىنالاردى ءبىلدىردى: بيىل − 4 - مامىر قوزعالىسىنىڭ 100 جىلدىعى ءارى جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعى. ەرەكشە ماڭىزعا يە وسى تاريحي ساتتە، ءبىز وسى ارادا سالتاناتپەن جينالىس وتكىزىپ، 4 - مامىر قوزعالىسى ارداگەرلەرىنىڭ وسكەلەڭ وتانشىلدىق سۇيىسپەنشىلىگى مەن توڭكەرىستىك رۋحىن ساعىنىشپەن ەسكە الىپ، پارتيا مەن حالىقتىڭ ۇلتتىڭ گۇلدەنۋىن جۇزەگە اسىرۋ جولىن قاراستىرۋداعى قۇندى تاجىريبەلەرىن قورىتىندىلاپ وتىرمىز، بۇل 4 - مامىر رۋحىن ساۋلەلەندىرىپ، بۇكىل پارتيانى، بۇكىل ەلدەگى ءار ۇلت حالقىن، اسىرەسە، جاڭا داۋىردەگى جۇڭگو جاستارىن جاپپاي دوڭگەلەك داۋلەتتى قوعام ورناتۋ، سوتسياليستىك وسىزاماندانعان مەملەكەتتى جەدەل قۇرۋ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ جولىندا كۇرەس جۇرگىزۋگە جىگەرلەندىرۋدە اسا كەلەلى ماڭىزعا يە.

شي جينپيڭ بىلاي دەپ باسا دارىپتەدى: 4 - مامىر قوزعالىسى ۇلتتىڭ باسىنا قاتەر تونگەن ساتتە بۇرق ەتتى، ول − العاباسار جاس زيالىلار اتويشى بولعان، قالىڭ حالىق بۇقاراسى قاتىناسقان يمپەرياليزمگە، فەوداليزمگە ءۇزىلدى - كەسىلدى قارسى تۇرعان ۇلى وتانشىلدىق توڭكەرىستىك قوزعالىس، جۇڭگو حالقىنىڭ ۇلتتى جويىلۋ حاۋپىنەن قۇتقارۋ، ۇلتتىڭ ار - نامىسىن قورعاۋ، ۇلتتىڭ كۇش - قۋاتىن ۇيىستىرۋ ءۇشىن كوتەرگەن ۇلى قوعامدىق توڭكەرىستىك قوزعالىسى، جاڭا يدەيانى، جاڭا مادەنيەتتى، جاڭا ءبىلىمدى تاراتقان ۇلى يدەيالىق اعارتۋ قوزعالىسى جانە جاڭا مادەنيەت قوزعالىسى، ول جويقىن كۇشپەن جۇڭگو حالقى مەن جۇڭحۋا ۇلتىنىڭ ۇلتتىڭ گۇلدەنۋىن جۇزەگە اسىرۋ مۇراتى مەن سەنىمىنە قۋات بەردى.

شي جينپيڭ بىلاي دەپ اتاپ كورسەتتى: 4 - مامىر قوزعالىسى يمپەرياليزمگە، فەوداليزمگە ءۇزىلدى - كەسىلدى قارسى تۇرعان توڭكەرىستىك سيپاتىمەن، وتاندى قۇتقارۋ، وتاندى قۇدىرەتتەندىرۋ اقيقاتىنا تالپىنعان العاباسارلىق سيپاتىمەن، ءار ۇلت، ءار سالاداعى بۇقارا بەلسەندىلىكپەن ات سالىسقان كەڭ اۋقىمدىلىق سيپاتىمەن جۇڭگو قوعامىنىڭ العا باسۋىن ىلگەرىلەتىپ، ماركسيزمنىڭ جۇڭگودا تارالۋىن جەبەپ، ماركسيزمنىڭ جۇڭگونىڭ جۇمىسشىلار قوزعالىسىمەن ۇشتاسۋىن جەبەپ، جۇڭگو كوممۋنيستىك پارتياسىنىڭ قۇرىلۋىنا يدەيا، كادر جاعىنان دايىندىق جاسادى، جاڭا توڭكەرىستىك كۇشتەردىڭ، توڭكەرىستىك مادەنيەتتىڭ، توڭكەرىستىك كۇرەستىڭ تاريح ساحناسىنا شىعۋىنا شارت - جاعداي ازىرلەدى، ول − جۇڭگونىڭ كونە دەموكراتيالىق توڭكەرىسىنىڭ جاڭا دەموكراتيالىق توڭكەرىسكە قاراي وتۋىندەگى بۇرىلىس ءتۇيىنى رەتىندە تاياۋ زاماننان بەرى جۇڭحۋا ۇلتىنىڭ ۇلت تاۋەلسىزدىگى مەن دامۋىنا، العا باسۋىنا ۇمتىلۋىنىڭ تاريحي بارىسىندا بەلەستىك مانگە يە.

شي جينپيڭ بىلاي دەپ باسا دارىپتەدى: 4 - مامىر قوزعالىسى بۇكىل ۇلتتىڭ كۇشىمەن وتانشىلدىق ۇلى تۋىن بيىك كوتەردى. 4 - مامىر قوزعالىسى وتاندى ءسۇيۋدى، العا باسۋدى، دەموكراتيانى، عىلىمدى باستى مازمۇن ەتكەن ۇلى 4 - مامىر رۋحىن جەتىلدىردى، ونىڭ وزەگى − وتانشىلدىق رۋح. وتانشىلدىق − ءبىزدىڭ ۇلت رۋحىمىزدىڭ وزەگى، جۇڭحۋا ۇلتىنىڭ ىنتىماقتاسا كۇرەس جۇرگىزۋىنىڭ، ءوزىن تالماي الۋەتتەندىرۋىنىڭ رۋحاني دانەكەرى. تاريح مىنانى تەرەڭنەن كورسەتتى: وتانشىلدىق ەجەلدەن جۇڭحۋا ۇلتىنىڭ قانىندا اعىپ جاتىر، وشپەيدى، بۇزىلمايدى، جويىلمايدى، جۇڭگو حالقى مەن جۇڭحۋا ۇلتىنىڭ ۇلت تاۋەلسىزدىگى مەن ۇلتتىڭ ار - نامىسىن قورعاۋداعى قۇدىرەتتى رۋحاني قوزعاۋشى كۇش، وتانشىلدىق ۇلى تۋىن بيىك ۇستاعاندا عانا، جۇڭگو حالقى مەن جۇڭحۋا ۇلتى جۇڭگونى وزگەرتۋ، دۇنيەنى وزگەرتۋ كۇرەسىندە تاۋ قوپارىپ، تەڭىز قوتاراتىن تاريحي ۇلى كۇشتى تاسقىنداتا الادى!

شي جينپيڭ بىلاي دەپ اتاپ كورسەتتى: 4 - مامىر قوزعالىسى بۇكىل ۇلتتىڭ ارەكەتى ارقىلى اقيقاتقا ۇمتىلۋداعى، العا باسۋعا تالپىنۋداعى ۇلى ويانۋىنا جىگەر بەردى. 4 - مامىر قوزعالىسىنىڭ سىن - سىناعى ارقىلى ماركسيزم تۋى استىنا جينالعان جۇڭگونىڭ العاباسارلارىنىڭ سانى بارعان سايىن كوبەيدى، 1921 - جىلى جۇڭگو كوممۋنيستىك پارتياسىنىڭ رەسمي قۇرىلعاندىعى جاريالانىپ، جۇڭگو تاريحىندا شىت جاڭا پاراق اشىلدى. تاريح مىنانى تەرەڭنەن كورسەتتى: ماركسيزم بولعاندىقتان، جۇڭگو كوممۋنيستىك پارتياسىنىڭ باسشىلىعى بولعاندىقتان، جۇڭگو حالقى مەن جۇڭحۋا ۇلتىنىڭ ۇلى ويانۋى بولعاندىقتان، جۇڭگو حالقى مەن جۇڭحۋا ۇلتىنىڭ اقيقاتقا ۇمتىلۋ، العا باسۋعا تالپىنۋ اعىمىنا وسىدان كەيىن ەشكىم كەدەرگىلىك جاساي المايدى!

شي جينپيڭ بىلاي دەپ باسا دارىپتەدى: 4 - مامىر قوزعالىسى بۇكىل ۇلتتىڭ شايقاس ارقىلى ماڭگى كۇرەس جۇرگىزۋ ۇلى ءداستۇرىن جەتىلدىردى. 4 - مامىر قوزعالىسى ارقىلى جۇڭگو جاستارى وزدەرىنىڭ كۇش - قۋاتىن بايقادى، جۇڭگو حالقى مەن جۇڭحۋا ۇلتى ءوزىنىڭ كۇش - قۋاتىن بايقادى. جۇڭگو حالقى مەن جۇڭحۋا ۇلتى كۇرەس امالياتىنان جۇڭگو قوعامىنىڭ دامۋى، جۇڭحۋا ۇلتىنىڭ گۇلدەنۋى، جۇڭگو حالقىنىڭ باقىتى، ءسوز جوق، ءوزىنىڭ ەرلىكپەن كۇرەس جۇرگىزۋى ارقىلى جۇزەگە اساتىنىن، ەشكىم دە بىزگە نۇرلى جۇڭگونى بەرمەيتىنىن ءبىلدى. تاريح مىنانى تەرەڭنەن كورسەتتى: جۇڭگو حالقى مەن جۇڭحۋا ۇلتى ءوزىنىڭ تاعدىرىن وزگەرتۋ ءۇشىن كۇرەس جۇرگىزىپ، قۇرباندىقتار بەرۋدەن تايىنباعاندا عانا، مەملەكەتىمىز، ءسوز جوق، بايىپ - قۇدىرەتتەنۋگە بەت الادى، ۇلتىمىز، ءسوز جوق، ۇلى گۇلدەنۋدى جۇزەگە اسىرا الادى!

شي جينپيڭ بىلاي دەپ اتاپ كورسەتتى: جاستار − تۇتاس قوعامداعى كۇشتەر اراسىنداعى ەڭ بەلسەندى، ەڭ جالىندى كۇش، مەملەكەتتىڭ ءۇمىتى جاستاردا، ۇلتتىڭ بولاشاعى جاستاردا. جاڭا داۋىردەگى جۇڭگو جاستارى جۇڭحۋا ۇلتىنىڭ دامۋىنىڭ ەڭ تاماشا مەزگىلىندە تۇر، وڭاي قول جەتە بەرمەيتىن ۇلەس قوسىپ، شارۋاشىلىق قۇرۋ سىندى ءومىر كەشىرمەسىنە، سونداي - اق ”زامان اۋىر مىندەتتى وزىمە ارقالاتادى“دەيتىن ءداۋىر بورىشىنا ءدوپ كەلىپ وتىر. جاڭا داۋىردەگى جۇڭگو جاستارى 4 - مامىر رۋحىن ۇزدىكسىز ساۋلەلەندىرىپ، جۇڭحۋا ۇلتىنىڭ ۇلى گۇلدەنۋىن مىندەت ەتىپ، پارتيانىڭ ءۇمىتىن، حالىقتىڭ تىلەگىن، ۇلتتىڭ ۇلكەن سەنىمىن اقتاۋى، ۇلى ءداۋىرىمىزدىڭ مىندەتىن وتەۋى كەرەك.

شي جينپيڭ جاڭا داۋىردەگى جۇڭگو جاستارىنا 6 ءتۇرلى تالاپ قويدى.ءبىرىنشى، ۇلى مۇرات ورناتىپ، ماركسيزم سەنىمىن، جۇڭگوشا سوتسياليزم سەنىمىن، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانى سەنىمىن ورناتىپ، جاڭا داۋىردەگى جاڭا ورىسكە بارىپ، جاستىق ورالدى جاڭالىق اشۋ، جاسامپازدىق بارىسىندا جايناتۋ كەرەك. ەكىنشى، ۇلى وتاندى قىزۋ ءسۇيىپ، پارتيانىڭ سوزىنە قۇلاق اسۋى، پارتياعا ىلەسۋى، ەلدىڭ، حالىقتىڭ قامىن ويلايتىن نيەتپەن، وتاندى، حالىقتى سۇيەتىن سۇيىسپەنشىلىكپەن ءومىر بويى شىنايى سۇيىسپەنشىلىكتى ارناۋ، ءومىر بويى قايىسپاي كۇرەس جۇرگىزۋ ارقىلى وتانشىلدىق سۇيىسپەنشىلىگىن ايگىلەپ، وتانشىلدىقتىڭ ۇلى تۋىن كوڭىل تورىندە قاشاندا بيىك جەلبىرەتۋ كەرەك. ءۇشىنشى، ءداۋىر جاۋاپكەرشىلىگىن ارقالاپ، جاستىق ورالدىڭ جاڭا داۋىردەگى رەفورما جاساۋدىڭ، ەسىك اشۋدىڭ كەڭ ورىسىندە گۇل اشىپ، ءومىردىڭ جۇڭگو ارمانىن جۇزەگە اسىرۋداعى ەرلىكپەن ۇمتىلۋ بارىسىندا ەرلىكپەن العا باسۋداي قاھارماندىق تۇلعانى ايگىلەۋىنە مۇمكىندىك جاساپ، احىلاق، اقىل - وي، دەنە، ەستەتيكا، ەڭبەك جاقتارىنان جان - جاقتى جەتىلگەن سوتسياليزمنىڭ قۇرىلىسشىلارى مەن ءىزباسارلارى بولۋعا قۇلشىنۋ كەرەك. ءتورتىنشى، ەرلىكپەن ەكپىندەي كۇرەس جۇرگىزىپ، باتىلدىقپەن ءداۋىردىڭ الدىڭعى لەگىندە جۇرەتىن ەكپىندىلەر، ءورىس اشۋشىلار، ۇلەس قوسۋشىلار بولىپ، تولقىن جارۋ بارىسىندا ءورىس اشا العا ىلگەرىلەپ، توسقاۋىل - بوگەتتەردى جارىپ ءوتۋ بارىسىندا بايتاق كەڭىستىك اشىپ، قامال الىپ، قينشىلىقتى جەڭۋ بارىسىندا ناتيجە جاراتىپ، جاستىق كوكتەمدەرىمەن جانە قان - تەرلەرىمەن دۇنيە ءجۇزىن جالت قاراتاتىن جاڭا كەرەمەتتەر جاساۋ كەرەك. بەسىنشى، توسەلگەن شەبەرلىك جەتىلدىرىپ، ۇيرەنۋدەگى كوكەي تەستىلىك سەزىمىن كۇشەيتىپ، ماركسيزمدىك تۇرعىنى، كوزقاراستى، ءادىستى قۇلشىنا ۇيرەنىپ، عىلمي مادەنيەت بىلىمدەرى مەن ماماندىق شەبەرلىكتەردى قۇلشىنا يگەرىپ، گۋمانيتارلىق ساپالارىن قۇلشىنا جوعارىلاتىپ، شىنايى دارىن، ناعىز بىلىممەن حالىققا قىزمەت ەتىپ، جاڭالىق اشۋمەن، جاسامپازدىق جاراتۋمەن مەملەكەتكە ۇلەس قوسۋ كەرەك. التىنشى، ءمورالدىق جەتىلىمدى شىڭداپ، سوتسياليستىك وزەكتى قۇن كوزقاراسىن سانالى تۇردە ورناتىپ جانە امالياتتا ايگىلەپ، ۇلى ءمورالدى ۇعىنىپ، الەۋمەتتىك ءمورالعا بويسۇنىپ، جەكە ءمورالدى قاتايتىپ، اناعۇرلىم وسكەلەڭ، اناعۇرلىم ءورىستى، اناعۇرلىم سالاۋاتتى ومىرگە تالپىنىپ، پاك سيتلدى، دۇرىس سالتتى، جالىندى جىگەردى تۇتاس قوعامعا جالپىلاستىرۋ كەرەك.

شي جينپيڭ بىلاي دەپ باسا دارىپتەدى: جۇڭگو كوممۋنيستىك پارتياسى جۇڭحۋا ۇلتىنىڭ ماڭگىلىك ۇلى ءىسىن مۇرات ەتۋدە، ءسوز جوق، باستان - اياق قالىڭ جاستارعا ۋاكىل بولىپ، قالىڭ جاستاردىڭ قولداۋىنا يە بولىپ، قالىڭ جاستارعا سۇيەنىپ، وراسان زور كۇشپەن جاستار قىزمەتىن جاقسى ىستەپ، پارتيا ىستەرىنىڭ ۇرپاقتارعا جالعاسۋىنا شىنايى كەپىلدىك ەتۋ، جۇڭحۋا ۇلتىنىڭ ماڭگى تىنباي دامۋىنا شىنايى كەپىلدىك ەتۋ كەرەك. جاس ۇرپاقتى احىلاق، اقىل - وي، دەنە، ەستەتيكا، ەڭبەك جاعىنان جان - جاقتىلى دامىعان سوتسياليزمنىڭ قۇرىلىسشىلارى جانە ءىزباسارلارى ەتىپ باۋلىپ جەتىلدىرۋ بۇكىل پارتيانىڭ ورتاق ساياسي جاۋاپكەرشىلىگى. ءار دارەجەلى پارتكومدار مەن ۇكىمەتتەر، ءار دارەجەلى باسشى كادرلار، سونداي - اق تۇتاس قوعام جاستارعا تولىق سەنىم ارتۋ، جاستارعا ىنتالىلىقپەن كوڭىل ءبولۋ، جاستارعا قاتاڭ تالاپ قويۋ، جاستاردىڭ ارمان - تىلەگىنە ءمان بەرۋ، جاستاردىڭ دامۋىنا كومەكتەسۋ، جاستاردىڭ شارۋاشىلىق قۇرۋىنا قولداۋ كورسەتۋ، جاس دوستاردىڭ سىرلاسى، جاستار قىزمەتىنە دەن قويۋشى، جاستار قاۋىمىنىڭ جول باستاۋشىسى بولۋ كەرەك. جاستارعا ىرىقتىلىقپەن جاقىنداپ، جاستاردى دەن قويا تىڭداپ، جاستارعا شىن پەيىلمەن كوڭىل ءبولىپ، جاستارعا قامقورلىق جاساپ، جاستاردى ىجداعاتپەن تاربيەلەپ، جاستاردى جەتەكتەپ، جاستاردىڭ تابيعاتىنا قۇرمەت ەتىپ، جاستاردىڭ ەرەكشەلىگىن ويلاستىرىپ، جاستاردىڭ ويلاعانىنا، ۋايىم - قامىنا، ءۇمىت - تىلەگىنە ءمان بەرىپ، جاستارعا بارلىق ادام دارىندى بولۋعا قۇلشىناتىن، بارلىق ادام دارىندى بولا الاتىن، بارلىق ادام دارىنىن ايگىلەيتىن دامۋ شارت - جاعدايىن بەلسەندىلىكپەن ازىرلەپ، جاستار قول جەتكىزگەن تابىس پەن ناتيجەگە القاۋ، بارەكەلدى ايتىپ، جاس قاھارمانداردى جۇڭحۋا ۇلتىنىڭ ۇلى گۇلدەنۋگە قارقىندى قادام تاستاۋىن جەبەيتىن جالىندى كۇش ەتۋ كەرەك.

شي جينپيڭ بىلاي دەپ اتاپ كورسەتتى: كوممۋنيستىك جاستار وداعى پارتيانىڭ باسشىلىعىنا بۇلجىماي تاباندى بولىپ، ”ءتورت تانىم“دى كۇشەيتىپ، ”ءتورت سەنىم“دى بەكەمدەپ، ”ەكىنى قورعاۋ“دى ورىنداپ، جۇڭگوشا سوتسياليستىك بۇقارالىق ۇيىمدى دامىتۋ جولىنان اۋىتقىماي، ساياسيلىقتى، العاباسارلىقتى، بۇقارالىقتى ۇزدىكسىز ساقتاپ جانە نىعايتىپ، سوتسياليزمنىڭ قۇرىلىسشىلارى مەن ءىزباسارلارىن باۋلۋدى ءتۇبىرلى مىندەت ەتۋگە تاباندى بولىپ، جاستارعا جەتەكشىلىك ەتۋ، ۇيىستىرۋ، جاستاردى ۇيىمداستىرۋ، جۇمىلدىرۋ، جاستارمەن بايلانىس ورناتۋ، ولارعا قىزمەت وتەۋ بورىشىن مۇقيات اتقارىپ، جاڭا داۋىردەگى جۇڭگو جاستارىن جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ ساپارىندا ۇزدىكسىز ءورىس اشا جاڭالىق جاساۋعا، ەكپىندەي العا ۇمتىلۋعا ىنتىماقتاستىرۋ جانە باستاۋ كەرەك. پارتيا، ۇكىمەتتىڭ بارلىق ورگاندارى، كاسىپورىندار، ءىسورىندار، حالىق ازاتتىق ارمياسى جانە قارۋلى ساقشى بولىمدەرى، ءارقايسى حالىقتىق ۇيىمدار جانە قوعامدىق ۇيىمدار، قالىڭ قالا - اۋىل نەگىزگى ساتىلارىنداعى ءوزىن - ءوزى باسقاراتىن ۇيىمدار، ءارقايسى جاڭا ەكونوميكالىق ۇيىمدار جانە جاڭا قوعامدىق ۇيىمدار تۇگەلدەي جاستاردىڭ تولىسۋىنا كوڭىل ءبولۋى، جاستاردىڭ دامۋىن قولداۋى، جاستارعا ءتىپتى دە مول وراي ازىرلەپ، جاستاردىڭ رولىن ءتىپتى جاقسى ساۋلەلەندىرۋى كەرەك.

ۋاڭ حۋنيڭ جينالىستى باسقارعان كەزدە مىنالاردى ءبىلدىردى: باس شۋجي شي جينپيڭنىڭ ماڭىزدى ءسوزى 4 - مامىر اتويشىلارىنىڭ وسكەلەڭ وتانشىلدىق سۇيىسپەنشىلىگى مەن توڭكەرىستىك رۋحىن ىستىق ىقىلاسپەن ەسكە الىپ، 4 - مامىر قوزعالىسىنىڭ تاريحي ءمانىن وسكەلەڭ باعالاپ، جاڭا داۋىردە 4 - مامىر رۋحىن ساۋلەلەندىرۋدىڭ ماڭىزدى تالاپتارىن ايقىن العا قويىپ، وسى زامانعى جاستارعا تەرەڭ سەزىممەن سالەم جولدادى. مۇقيات ۇيرەنىپ، ءتۇسىنىپ، دايەكتىلەندىرۋدى، تياناقتاندىرۋدى مىقتاپ يگەرىپ، ”قوس 100 جىلدىق“ كۇرەس نىساناسىن جۇزەگە اسىرۋدىڭ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋدىڭ ايبىندى ساپارىندا، اعا بۋىنداردىڭ ءۇمىتىن اقتاۋدىڭ، ءداۋىردىڭ ءۇمىتىن اقتاۋدىڭ، حالىق ءۇمىتىن اقتاۋدىڭ شۇعىلالى تاراۋلارىن ۇزدىكسىز جازۋىمىز كەرەك.

جينالىس اسقاق «ينتەرناتسيونال ءانى» اۋەنىمەن اياقتالدى.

بەيجيڭدەگى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىقتارى، مەملەكەتتىك كەڭەستىك مۇشەلەرى، ەڭ جوعارى حالىق سوت مەكەمەسىنىڭ باستىعى، ەڭ جوعارى حالىق پروكۋراتۋراسىنىڭ باس پروكۋرورى، مەملەكەتتىك ساياسي كەڭەستىڭ ورىنباسار ءتوراعالارى، سونداي - اق ورتالىق اسكەري ىستەر كوميتەتىنىڭ مۇشەلەرى جينالىسقا قاتىناستى.

ورتالىق پارتيا، ۇكىمەت، ارميا، بۇقارالىق ۇيىمداردىڭ ءارقايسى تاراۋلارى مەن بەيجيڭ قالاسىنىڭ نەگىزگى جاۋاپتى جولداستارى، ءارقايسى دەموكراتيالىق پارتيا - توپتاردىڭ ورتالىق كوميتەتتەرىنىڭ، مەملەكەتتىك ساۋدا - ونەركاسىپشىلەر بىرلەستىگىنىڭ جاۋاپتىلارى جانە پارتيادا، توپتا جوق قايراتكەرلەردىڭ ۋاكىلدەرى، استاناداعى ءار سالا بۇقاراسىنىڭ جانە جاستاردىڭ ۋاكىلدەرى قاتارلى 3000نان استام ادام جينالىسقا قاتىناستى.

4 - ايدىڭ 30 - كۇنى 4 - مامىر قوزعالىسىنىڭ 100 جىلدىعىن ەسكە ءتۇسىرۋ جينالىسى بەيجيڭدەگى حالىق سارايىندا سالتاناتپەن وتكىزىلدى. شي جينپيڭ، لي كىچياڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلىلار جينالىسقا قاتىناستى. سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن