مەملەكەت ءتوراعاسى شي جينپيڭ 4 - ايدىڭ 29 - كۇنى حالىق سارايىندا پورتۋگاليانىڭ پرەزيدەنتى دەسوسامەن كەڭەس وتكىزدى.
شي جينپيڭ مىنالاردى اتاپ كورسەتتى: جۇڭگو مەن پورتۋگاليا ءبىر - ءبىرىن ماڭىزدى ستراتەگيالىق سەلبەستىك سەرىگى دەپ قارايدى، ەكى جاقتى قاتىناستىڭ ستراتەگيالىق سيپاتى كورنەكتى، مۇددەلىك ۇشتاسۋى جوعارى، ەكونوميكادا ءوزارا تولىقتاۋ سيپاتى كۇشتى. ەكى ەل باسشىلارى جارىم جىلعا جەتپەيتىن ۋاقىتتا ءوزارا ساپاردا بولىپ، جۇڭگو - پورتۋگاليا قاتىناسىنىڭ جوعارى دەڭگەيىن ايگىلەدى. جاڭا تاريحي باستامادا ەكى جاق ءداستۇردى ساۋلەلەندىرىپ، ورايدى يگەرىپ، قول ۇستاسا العا باسىپ، جان - جاقتى سەلبەستىكتى تەرەڭدەتىپ، اناعۇرلىم جوعارى دەڭگەيدەگى، اناعۇرلىم كەڭ كوز اياداعى، اناعۇرلىم ومىرشەڭدىك كۇشكە يە جۇڭگو مەن پورتۋگاليانىڭ جالپى بەتتىك ستراتەگيالىق ارىپتەستىك قاتىناسىن قالىپتاستىرۋى كەرەك. ءوزارا قۇرمەت ەتۋدى، ءوزارا سەنىمدىلىكتى نەگىز ەتىپ، جوعارى جىكتەگىلەردىڭ بارىس - كەلىسىن جيىلەتىپ، ءبىر - ءبىرىنىڭ وزەكتى مۇددەسى مەن كوڭىل ءبولىپ وتىرعان كەلەلى ىستەرىنە كوڭىل ءبولۋ كەرەك. جۇڭگو پورتۋگاليانى «ءبىر بەلدەۋ، ءبىر جولدى» بىرگە قۇرۋدىڭ ماڭىزدى سەرىگى دەپ قارايدى، ەكى جاقتىڭ ساۋدا، قارجى قوسۋ، ەنەرگيا، نەگىزدىك قۇرىلعى، ەلەكترلى اۆتوموبيل سياقتى سالالارداعى سەلبەستىگىن تەرەڭدەتۋ كەرەك. اۋىس - كۇيىستى، ءوزارا ۇلگى الۋدى ماقسات ەتىپ، گۋمانيتارلىق سالاداعى، عىلىم - تەحنيكاداعى سەلبەستىكتى نىعايتۋ كەرەك. بەيبىت دامۋدى تالپىنىس ەتىپ، كەلەلى حالىقارالىق ماسەلەلەردەگى مايداندى سايكەستىرۋدى كۇشەيتىپ، كوپ جاقتى ساۋدا ءتۇزىلىسىن باتىل قولداپ، دۇنيە ءجۇزىنىڭ اشىق ەكونوميكالىق جۇيەسىن قۇرۋدى ىلگەرىلەتۋ كەرەك.
