مەملەكەت ءتوراعاسى شي جينپيڭ 4 - ايدىڭ 29 - كۇنى حالىق سارايىندا نەپالدىڭ پرەزيدەنتى بانداريمەن كەڭەس وتكىزدى.
شي جينپيڭ مىنالاردى اتاپ كورسەتتى: جۇڭگو مەن نەپالدىڭ تاۋ - وزەنى تۇتاسقان، دوستىعى ۇرپاقتان - ۇرپاققا جالعاسىپ كەلەدى، ەكى ەل حالىقتارى كوڭىل توعىستىرىپ، قۋانىش – قايعىنى بىرگە وتكەرىپ كەلە جاتىر. جۇڭگو جۇڭگو - نەپال قاتىناسىنىڭ دامۋىنا ايرىقشا ءمان بەرەدى، نەپالدىڭ مەملەكەتتىڭ تاۋەلسىزدىگىن، يەلىك ۇقىعىن، تەرريتوريا تۇتاستىعىن قورعاۋىن، ءوز ەلىنىڭ مەملەكەت جاعدايىنا ۇيلەسەتىن دامۋ جولىن قاراستىرۋىن قولدايدى، نەپالدىڭ ۇزاق ۋاقىتتان بەرى جۇڭگونىڭ وزەكتى مۇددەسىنە ساياتىن جانە نازار اۋدارىپ وتىرعان كەلەلى ماسەلەلەردە كورسەتكەن باتىل قولداۋىن القايدى، نەپالدىڭ «ءبىر بەلدەۋ، ءبىر جولدى» بىرگە قۇرۋعا بەلسەنە ات سالىسقانىن القايدى. جۇڭگو مەن نەپال نەگىزدىك قۇرىلعىلار قۇرىلىسى سالاسىنداعى سەلبەستىكتى كۇشەيتىپ، جۇڭگو مەن نەپالدىڭ شەكارا اتتاعان ەكونوميكالىق سەلبەستىك رايونىن قۇرۋدى ۇزدىكسىز ىلگەرىلەتۋى كەرەك. جۇڭگو نەپالدىڭ ەكونوميكالىق، قوعامدىق دامۋىن ۇزدىكسىز قولدايدى. ەكى ەلدىڭ زاڭ شىعارۋ قۇرىلىمى، پارتيا، جاستار، اقىل - پاراسات قويماسى، اقپارات قۇرالدارى، جەرگىلىكتى ورىندار سياقتى جاقتارداعى اۋىس - كۇيىسىن اناعۇرلىم كۇشەيتىپ، جۇڭگو مەن نەپالدىڭ دوستىق، سەلبەستىك قاتىناسىن ۇزدىكسىز تىڭ ساتىعا كوتەرۋ كەرەك.
