شي جينپيڭ، جاۋ لىجي، ۋاڭ حۋنيڭ، ديڭ شۋەشياڭ، لي شي قۇرىلتايعا قاتىناسىپ قۇتتىقتادى، ساي چي پارتيا ورتالىق كوميتەتى اتىنان ارناۋ ءسوز سويلەدى
6 - ايدىڭ 19 - كۇنى جۇڭگو كوممۋنيستىك جاستار وداعىنىڭ مەملەكەتتىك 19 - قۇرىلتايى بەيجيڭ حالىق سارايىندا اشىلدى. سۋرەتتە: جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ءتوراعالار مىنبەسىندە قۇرىلتايعا قاتىناسقان ۋاكىلدەرگە قۇرمەت بىلدىرۋدە.
□ سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن
6 - ايدىڭ 19 - كۇنى جۇڭگو كوممۋنيستىك جاستار وداعىنىڭ مەملەكەتتىك 19 - قۇرىلتايى بەيجيڭ حالىق سارايىندا اشىلدى. شي جينپيڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي قاتارلىلار ءتوراعالار مىنبەسىنەن ورىن الىپ، قۇرىلتايدىڭ اشىلعاندىعىن قۇتتىقتادى.
□ سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن
شينحۋا اگەنتتىگىنىڭ 6 - ايدىڭ 19 - كۇنى بەيجيڭنەن بەرگەن حابارى. جۇڭگو كوممۋنيستىك جاستار وداعىنىڭ مەملەكەتتىك 19 - قۇرىلتايى 6 - ايدىڭ 19 - كۇنى تۇستەن بۇرىن حالىق سارايىندا اشىلدى. شي جينپيڭ، جاۋ لىجي، ۋاڭ حۋنيڭ، ديڭ شۋەشياڭ، لي شي قاتارلى پارتيا مەن مەملەكەت باسشىلارى قۇرىلتايعا قاتىناسىپ قۇتتىقتادى، ساي چي پارتيا ورتالىق كوميتەتى اتىنان ارناۋ ءسوز سويلەدى.
حالىق سارايىنىڭ ۇلكەن زالىندا شىراقتار سامالاداي جارقىراپ، قىزۋ بەينەگە شومدى. ءتوراعالار مىنبەسىنىڭ تورىندە ”جۇڭگو كوممۋنيستىك جاستار وداعىنىڭ مەملەكەتتىك 19 - قۇرىلتايى“ دەگەن جازۋ جازىلعان قۇرىلتاي بەلگىسى ىلىنگەن، ارتقى پەردەنىڭ ءدال ورتاسىندا جارقىراعان وداق بەلگىسى ءىلىنىپ، 10 نارت قىزىل تۋ ەكى جاعىنا ءبولىنىپ تىزىلگەن. 2 - قاباتتاعى تەكشەگە ”شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، پارتيا 20 - قۇرىلتايىنىڭ رۋحىن جاپپاي دايەكتىلەندىرىپ، قالىڭ جاستاردى جۇمىلدىرىپ جانە باستاپ، جاپپاي سوتسياليستىك وسىزاماندانعان مەملەكەت قۇرۋ، جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋ جولىندا ىنتىماقتاسا كۇرەس جۇرگىزەيىك“! دەگەن ۇران جازىلعان كەرمە تۋ ىلىنگەن. بۇكىل ەلدىڭ جەر - جەرىنەن كەلگەن جاستار وداعى مەملەكەتتىك 19 - قۇرىلتايىنىڭ 1500دەي ۋاكىلى 73 ميلليوننان استام كوممۋنيستىك جاستار وداعى مۇشەسىنىڭ ماڭىزدى تاپسىرماسىن ارقالاپ قۇرىلتايعا قاتىناستى.
تۇستەن بۇرىن ساعات 10دا جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ قاتارلىلار قۇرىلتاي الاڭىنا كىردى، بۇكىل الاڭدا قىزۋ قول شاپالاق ءۇنى كوتەرىلدى.
قۇرىلتاي ءتوراعالار القاسى تۇراقتى كوميتەتىنىڭ مۇشەسى ادۇڭ قۇرىلتايدىڭ اشىلعاندىعىن جاريالادى. بۇكىل زالداعىلار ورىندارىنان تۇرىپ، مەملەكەت ءانىن، وداق ءانىن اسقاقتاتا شىرقادى.
وسىدان سوڭ 8 پيونەر قۇرىلتايعا ارناۋ ءسوز ارنادى. ولار اسقاق ۇنمەن كىشكەنتايلارىنان پارتيانىڭ سوزىنە قۇلاق اسىپ، پارتياعا ىلەسىپ، پارتيا ءۇشىن دارىندى بولىپ جەتىلۋگە، مەملەكەت ءۇشىن ۇلەس قوسۋعا بەل بايلاعان بەرىك سەنىمدەرىن جەتكىزدى.
ساي چي پارتيا ورتالىق كوميتەتى اتىنان «قۇدىرەتتى مەملەكەت قۇرىلىسىندا، ۇلتتى گۇلدەندىرۋ جاڭا جورىعىندا جاستىق كوكتەمنىڭ ايبىندى تاراۋىن جازايىق» دەگەن تاقىرىپتا ارناۋ ءسوز سويلەدى. ساي چي قۇرىلتايدىڭ اشىلعاندىعىن قىزۋ قۇتتىقتادى، بۇكىل ەلدەگى ءار ۇلت جاستارىنا، بارلىق كوممۋنيستىك جاستار وداعىنىڭ مۇشەلەرىنە، قالىڭ وداق كادرلارىنا جانە جاستار - ورەندەر قىزمەتكەرلەرىنە شىنايى سالەم جولدادى.
ساي چي ارناۋ سوزىندە بىلاي دەدى: پارتيا ورتالىق كوميتەتىنىڭ پارمەندى باسشىلىعىندا، جاستار وداعىنىڭ مەملەكەتتىك 18 - قۇرىلتايىنان بەرى كوممۋنيستىك جاستار وداعى شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، باس شۋجي شي جينپيڭنىڭ جاستار قىزمەتى جونىندەگى ماڭىزدى يدەياسىن مۇقيات دايەكتىلەندىرىپ، وداقتى جاپپاي قاتاڭ باسقاردى جانە جونگە سالدى، وداقتىڭ ساياسي سيپاتى، العاباسارلىق سيپاتى، بۇقارالىق سيپاتى ۇزدىكسىز كۇشەيىپ، جەتەكشىلىك ەتۋ قابىلەتى، ۇيىمداستىرۋ قابىلەتى، قىزمەت وتەۋ قابىلەتى ۇزدىكسىز جوعارىلادى. قالىڭ وداق مۇشەلەرى جانە جاستار پارتيا مەن حالىقتىڭ ۇندەۋىنە ءۇن قوسىپ، جاستىق ورالدارىمەن ”ءمولدىر ماحاببات تەك جۇڭگوعا عانا ارنالادى“ دەيتىن ءداۋىردىڭ كۇشتى اۋەنىن اسقاقتاتا شىرقاپ، جاستىق ورالىنداعى ءىس - ارەكەتتەرىمەن ”پارتيا الاڭسىز بولسىن، قۇدىرەتتى مەملەكەت قۇرۋدا مەن بارمىن“ دەيتىن كۇشتى سەرتتەرىن امالياتتا ايگىلەدى.
ساي چي مىنالاردى ءبىلدىردى: جۇڭگو جاستارى مەن جۇڭگو جاستار قوزعالىسى ەجەلدەن ءداۋىر بورىشىن ارقالاۋ بارىسىندا جاستىق ورالدىڭ بورىشىن ايگىلەپ، ءداۋىردىڭ العا باسۋىن ىلگەرىلەتۋ بارىسىندا جەكە باسىنىڭ العا باسۋىن ىسكە اسىرىپ كەلەدى. جاپپاي سوتسياليستىك وسىزاماندانعان قۇدىرەتتى مەملەكەت قۇرىپ شىعۋ، ەكىنشى 100 جىلدىق كۇرەس نىساناسىن جۇزەگە اسىرۋ، جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋ − پارتيانىڭ وزەكتى مىندەتى ءارى جاڭا داۋىردەگى جۇڭگو جاستار قوزعالىسىنىڭ جانە جاستار قىزمەتىنىڭ ايقىن تاقىرىبى. قالىڭ جاستار باس شۋجي شي جينپيڭنىڭ ىقىلاستى ءتالىمىن ەستە بەرىك ساقتاپ، مۇراتتى، باتىلدىقپەن جاۋاپكەرشىلىك ارقالايتىن، جاپا تارتۋدان تايىنبايتىن، كۇرەس جاساۋعا پەيىل جاڭا ءداۋىردىڭ جاقسى جاستارى بولۋعا بەلدى بەكەم بۋىپ، قۇدىرەتتى مەملەكەت قۇرىلىسىندا، ۇلتتىڭ گۇلدەنۋىندە كوكىرەك كەرە جاۋاپكەرشىلىك ارقالاپ، ءداۋىردىڭ، حالىقتىڭ، تاريحتىڭ ءۇمىتىن اقتايتىن جاستىق ورالدىڭ جاڭا ناتيجەسىن ۇزدىكسىز جاراتۋى كەرەك. كوممۋنيستىك جاستار وداعى شي جينپيڭ جاڭا ءداۋىر جۇڭگوشا سوتسياليزم يدەياسى ارقىلى تاباندىلىقپەن زەيىن - زەردەنى ۇيىستىرىپ، رۋحتى سومداپ، قاي - قاشان دا پارتيا ورتالىق كوميتەتىنىڭ شەشىمدەرىنىڭ، ورنالاستىرۋلارىنىڭ تالاپتارىنا، ولشەمدەرىنە تۋرالانىپ، قىزمەتتەردى جوسپارلاپ جانە ىلگەرىلەتىپ، قالىڭ جاستاردى جاڭا جورىقتا ەكپىندەي ىلگەرىلەۋگە، جاڭا داۋىردە ەسە قوسۋعا اناعۇرلىم ويداعىداي ىنتىماقتاستىرىپ جانە باستاپ، وداقتى قاتاڭ باسقارىپ، وداقتى قاتاڭ جونگە سالىپ، جان - جاقتى، جوعارى ولشەممەن شىڭدالۋ بارىسىندا كوممۋنيستىك جاستار وداعىنىڭ اسقاق، ءورشىل رۋحاني بەت - بەينەسىن تاسقىنداتىپ، جاڭا داۋىردەگى جۇڭگو جاستار قوزعالىسىنىڭ جانە جاستار قىزمەتىنىڭ ايبىندى تاراۋىن قۇلشىنا جازۋى كەرەك.
جۇڭحۋا مەملەكەتتىك باس جۇمىسشى ۇيىمى پارتيا باسشىلىق گرۋپپاسىنىڭ شۋجيى، شۋجيچۋىنىڭ ءبىرىنشى شۋجيى شۇي ليۋپيڭ جۇڭحۋا مەملەكەتتىك باس جۇمىسشى ۇيىمى، جۇڭحۋا مەملەكەتتىك ايەلدەر بىرلەستىگى، جۇڭگو ادەبيەت - كوركەمونەرشىلەر بىرلەستىگى، جۇڭگو جازۋشىلار قوعامى، جۇڭگو عىلىم - تەحنيكا قوعامى، جۇڭحۋا مەملەكەتتىك وتانعا ورالعان حۋاچياۋلار بىرلەستىگى، جۇڭحۋا مەملەكەتتىك تايۋاندىق باۋىرلاستار دوستاستىعى، جۇڭگو مۇگەدەكتەر بىرلەستىگى اتىنان قۇرىلتايعا ارناپ قۇتتىقتاۋ ءسوزىن سويلەدى. قۇتتىقتاۋ سوزىندە مىنالار اتاپ كورسەتىلدى: ءارقايسى بۇقارالىق توپتار، ۇيىمدار تاڭداۋلى ءداستۇردى ۇزدىكسىز ساۋلەلەندىرىپ، ءوز باسىمدىقتارىن تولىق ساۋلەلەندىرىپ، وزدەرى بايلانىس ورناتقان بۇقارانى باستاپ، اناعۇرلىم كوكىرەك تولى سەنىممەن، اناعۇرلىم جالىندى جىگەرمەن پارتياعا ىلەسىپ، قۇدىرەتتى مەملەكەت قۇرىلىسىنىڭ، ۇلتتى گۇلدەندىرۋدىڭ داڭعىل جولىندا جاڭا داۋىردەگى پارتيانىڭ بۇقارالىق ۇيىمدار قىزمەتىنىڭ جاڭا تاراۋىن بىرگە جازۋى كەرەك.
ا دۇڭ كوممۋنيستىك جاستار وداعى 18 - كەزەكتى ورتالىق كوميتەتى اتىنان «شي جينپيڭ جاڭا ءداۋىر جۇڭگوشا سوتسياليزم يدەياسىنىڭ جەتەكشىلىگىندە، قالىڭ جاستاردى جۇمىلدىرىپ جانە باستاپ جاپپاي سوتسياليستىك وسىزاماندانعان مەملەكەت قۇرۋ جولىندا ىنتىماقتاسا كۇرەس جۇرگىزەيىك» دەگەن تاقىرىپتا بايانداما جاسادى. بايانداما 10 بولىككە ءبولىندى: توڭكەرىستىك شىڭدالۋ بارىسىندا ەكپىندەي ىلگەرىلەگەن جۇڭگو كوممۋنيستىك جاستار وداعى؛ جاڭا داۋىردەگى جۇڭگو جاستارىنىڭ بورىشى، جاۋاپكەرشىلىگى؛ شي جينپيڭ جاڭا ءداۋىر جۇڭگوشا سوتسياليزم يدەياسى ارقىلى كوممۋنيستىك جاستار وداعى قىزمەتىنە ءبىر تۇتاس جەتەكشىلىك ەتەيىك؛ جاستاردى يدەيالىق - ساياسي جاقتان جەتەكتەۋدى بارىنشا كۇشەيتەيىك؛ جاستاردى جۇڭگو ۇلگىسىندەگى وسىزامانداندىرۋ قۇرىلىسىنداعى جالىندى قوسىن بولۋعا ۇيىمداستىرايىق؛ جاستاردىڭ ەسەيىپ - ەرجەتۋىنە، دامۋىنا شىن پەيىلمەن قىزمەت وتەيىك؛ جاستاردىڭ وتانشىلدىق بىرلىكسابىن بەكەمدەيىك جانە كەڭەيتەيىك؛ ادامزاتتىڭ تاعدىرلاس ورتاق تۇلعاسىن قۇرۋدىڭ جاستىق كۇشىن ۇيىستىرايىق؛ كوممۋنيستىك جاستار وداعى رەفورماسىن ىشكەرىلەي ىلگەرىلەتەيىك؛ تاباندىلىقپەن وداقتى جاپپاي قاتاڭ باسقارايىق.
جۇڭگو كوممۋنيستىك پارتياسى ورتالىق كوميتەتى شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتىندەگى، مەملەكەتتىك كەڭەستەگى، مەملەكەتتىك ساياسي كەڭەستەگى، ورتالىق اسكەري ىستەر كوميتەتىندەگى قاتىستى باسشى جولداستار ماجىلىسكە قاتىناستى.
ورتالىق پەن مەملەكەت ورگاندارىنىڭ قاتىستى تاراۋلارىنداعى، ءارقايسى حالىقتىق توپتارداعى، بەيجيڭ قالاسىنداعى جاۋاپتى جولداستار، بەيجيڭدە كوممۋنيستىك جاستار وداعى ورتالىق شۋجيچۋىندا قىزمەتتە بولعان ءبىر ءبولىم دەمالىسقا، زەينەتكە شىققان ساقا جولداستار، استاناداعى ءار ۇلت، ءار سالاداعى وداق مۇشەلەرىنىڭ، جاستاردىڭ ۋاكىلدەرى، ت. ب اشىلۋ ماجىلىسىنە قاتىناستى.
