6 - ايدىڭ 14 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن پالەستينا زۇڭتۇڭى ابباسپەن كەڭەس وتكىزدى. سۋرەتتە: كەڭەستەن ىلگەرى شي جينپيڭ حالىق سارايىنىڭ سولتۇستىك ۇلكەن زالىندا ابباسقا ارناپ قارسى الۋ سالتىن وتكىزدى.
□ سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 6 - ايدىڭ 14 - كۇنى بەيجيڭنەن بەرگەن حابارى (ءتىلشى جىڭ ميڭدا). 6 - ايدىڭ 14 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن پالەستينا زۇڭتۇڭى ابباسپەن كەڭەس وتكىزدى. ەكى ەلدىڭ مەملەكەت باسشىلارى جۇڭگو مەن پالەستينانىڭ ستراتەگيالىق سەرىكتەستىك قارىم - قاتىناس ورناتقاندىعىن جاريالادى.
شي جينپيڭ بىلاي دەپ اتاپ كورسەتتى: جۇڭگو مەن پالەستينا ەكى ەل ءوزارا سەنىم ارتقان، ءبىرىن - ءبىرى قولداعان جاقسى دوس، جاقسى سەرىكتەر. جۇڭگو پالەستينا ازاتتىق ۇيىمىن جانە پالەستينا مەملەكەتىن ەڭ ەرتە مويىنداعان مەملەكەتتەردىڭ ءبىرى، پالەستينا حالقىنىڭ ۇلتتىڭ زاڭدى ۇقىعىن قالپىنا كەلتىرۋ جونىندەگى ادىلەتتى ءىسىن، پالەستينا ماسەلەسىنىڭ ەرتەرەك جالپى بەتتىك، ءادىل، باياندى شەشىم تابۋىن ىلگەرىلەتۋدى باستان - اياق تاباندىلىقپەن قولداپ كەلەدى. جۇڭگو جاق پالەستينانىڭ بىرلەسكەن مەملەكەتتەر ۇيىمىنا رەسمي مۇشە ەل بولۋىن قولدايدى، كوپ جاقتى ورىنداردا پالەستينا جاق ءۇشىن ۇزدىكسىز ادىلدىگىن ايتىپ، ادىلدىكتى جاقتايدى، پالەستينا جاققا قولىنان كەلەتىن كومەگىن جاساپ، پالەستينا جاقتىڭ ادامگەرشىلىك جاقتا تاپ بولعان قيىنشىلىقتاردى شەشۋىنە، قايتا قۇرۋ ىستەرىن قانات جايدىرۋىنا كومەك كورسەتۋدى قالايدى. جۇڭگو جاق پالەستينا جاقپەن ستراتەگيالىق سەرىكتەستىك قارىم - قاتىناس ورناتۋدى وراي ەتىپ، ءبىر - ءبىرىنىڭ وزەكتى، ءجىتى قاداعالاپ وتىرعان ماسەلەلەرىندە ءبىرىن - ءبىرى ۇزدىكسىز باتىل قولداۋدى، ءارقايسى سالاداعى دوستىق سەلبەستىكتى جان - جاقتى ىلگەرىلەتۋدى، ”ءبىر بەلدەۋ، ءبىر جولدى“ بىرگە قۇرۋ سەلبەستىگىن تەرەڭدەتۋدى، جۇڭگو − پالەستينا ەركىن ساۋدا كەلىسىمى كەلىسسوزىن جەدەلدەتۋدى، ەل باسقارۋ تاجىريبەلەرى اۋىس - كۇيىسىن كۇشەيتۋدى، ءداستۇرلى دوستىقتى جالعاستىرا ءتۇسۋدى قالايدى.
شي جينپيڭ بىلاي دەپ باسا دارىپتەدى: پالەستينا ماسەلەسى جارتى عاسىردان استام ۋاقىتقا سوزىلىپ، پالەستينا حالقىنا اۋىر ازاپ اكەلدى، ءسوزسىز، تەز ارادا پالەستينا ءۇشىن ءادىل شەشىم جاساۋ كەرەك. شي جينپيڭ 3 دارىپتەمەنى العا قويدى. ءبىرىنشى، پالەستينا ماسەلەسىن شەشۋدىڭ ءتۇبىرلى جولى 1967 - جىلعى شەكارانى نەگىز، شىعىس يەرۋ - ساليمدى استانا ەتكەن، تولىق يەلىك ۇقىققا يە تاۋەلسىز پالەستينا مەملەكەتىن قۇرۋ. ەكىنشى، پالەستينانىڭ ەكونوميكالىق، حالىق تۇرمىسى قاجەتى قامتاماسىزدىققا يە بولۋعا ءتيىس، حالىقارالىق قوعام پالەستينانىڭ دامۋىنا كومەك بەرۋدى جانە ادامگەرشىلىك كومەكتەسۋدى - سۇيەمەلدەۋدى كۇشەيتۋى قاجەت. ءۇشىنشى، بەيبىتشىلىك كەلىسسوزىنىڭ دۇرىس باعىتىنا تاباندى بولۋ كەرەك. يەرۋ - ساليمدە تاريحتا قالىپتاسقان ءدىني قاسيەتتى جەرلەردىڭ قازىرگى جاعدايىنا قۇرمەت ەتىپ، ۇشقارى جانە ارانداتۋشىلدىق ءسوز - ارەكەتتەردەن تيىلىپ، ءتىپتى دە كولەمدى، ءتىپتى دە قۇزىرلى، ءتىپتى دە ىقپالدى حالىقارالىق بەيبىتشىلىك ءماجىلىسىن اشۋدى ىلگەرىلەتىپ، بەيبىتشىلىك كەلىسسوزىن قايتا باستاۋعا شارت - جاعداي ازىرلەپ، پالەستينا مەن يزرايل ەكى ەلدىڭ بەيبىت قاتار تۇرۋىنا كومەكتەسۋ جاعىندا شىنايى قۇلشىنىس جاساۋى كەرەك. جۇڭگو جاق پالەستينا جاقتىڭ ىشكى جاقتاعى تاتۋلاسۋدى جۇزەگە اسىرۋىندا، بەيبىتشىلىك كەلىسسوزىن ىلگەرىلەتۋدە بەلسەندى رول اتقارۋدى قالايدى.
شي جينپيڭ بىلاي دەپ باسا دارىپتەدى: دۇنيە ءجۇزىنىڭ ءجۇز جىلدىق وزگەرىسى مەن ورتا شىعىس ءوڭىرى جاعدايىنىڭ جاڭا وزگەرىسىنە مەڭزەس، جۇڭگو جاق پالەستينا سياقتى وركەندەپ كەلە جاتقان ەلدەرمەن ىنتىماقتى، سەلبەستىكتى كۇشەيتىپ، حالىقارالىق جانە وڭىرلىك ىستەردە سايكەسۋدى كۇشەيتىپ، جۇڭگو − اراب ەلدەرى كوللەكتيۆ سەلبەستىگىن ىلگەرىلەتىپ، وركەندەپ كەلە جاتقان ەلدەردىڭ ورتاق مۇددەسىن جانە حالىقارالىق ادىلدىكتى، تۋراشىلدىقتى قورعاۋدى قالايدى.
ابباس مىنالاردى ءبىلدىردى: مەن پالەستينا حالقى اتىنان جۇڭگو جاقتىڭ ۇزاق ۋاقىتتان بەرى پالەستينا حالقىنىڭ ۇلتتىڭ زاڭدى ۇقىعىن قالپىنا كەلتىرۋ ادىلەتتى ىسىنە پارمەندى قولداۋ كورسەتىپ، قالتقىسىز كومەك بەرىپ كەلگەندىگىنە شىن جۇرەكتەن العىس ايتامىن. جۇڭگو پالەستينا جاقتىڭ سەنىمدى دوسى جانە سەرىگى. پالەستينا جاق جۇڭگو جاقتىڭ وزەكتى مۇددە ماسەلەسىندەگى تۇرعىسىن باتىل قولدايدى، ءبىر جۇڭگو پرينسيبىنە بۇلجىماي تاباندى بولادى. پالەستينا جاق جۇڭگو جاقپەن ”ءبىر بەلدەۋ، ءبىر جولدى“ بىرگە قۇرۋدى ىلگەرىلەتۋدى، ءارقايسى سالالارداعى سەلبەستىكتى كۇشەيتۋدى، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى، پالەستينا مەن جۇڭگونىڭ ستراتەگيالىق سەرىكتەستىك قارىم - قاتىناسىن ۇزدىكسىز تەرەڭدەتۋدى قالايدى. پالەستينا جاق ءتوراعا شي جينپيڭ العا قويعان الەمدىك حاۋىپسىزدىك باستاماسىن، الەمدىك دامۋ باستاماسىن، الەمدىك وركەنيەت باستاماسىن قولدايدى، جۇڭگو جاقتىڭ ساۋد ارابياسى مەن يراندى تىلدەسۋگە تابىسپەن جاراستىرعاندىعىن وسكەلەڭ القايدى، جۇڭگو جاقتىڭ پالەستينا ماسەلەسىنىڭ كۇنى بۇرىن ءادىل شەشىم تابۋى جونىندە العا قويعان كوپتەگەن دارىپتەمەسىنە العىس ايتادى، پالەستينا جاق جۇڭگو جاقتىڭ اقىل - پاراساتى مەن ءادىل تۇرعىسىنا سەنەدى، جۇڭگو جاقتىڭ پالەستينانىڭ ىشكى جاقتاعى تاتۋلاسۋىن ىلگەرىلەتۋدە، سونداي - اق ورتا شىعىس ءوڭىرىنىڭ بەيبىتشىلىگىن جۇزەگە اسىرۋدا ءتىپتى دە زور رولىن ساۋلەلەندىرۋىن ءۇمىت ەتەدى.
كەڭەستەن كەيىن ەكى ەلدىڭ مەملەكەت باسشىلارى جۇڭگو مەن پالەستينانىڭ ديپلوماتيالىق قارىم - قاتىناس ورناتقاندىعىنىڭ 35 جىلدىعىن ەسكە تۇسىرۋگە ارنالعان ءبىرىنشى كۇنگى ماركالى كانۆەرتكە قولتاڭبا قالدىردى ءارى ەكونوميكالىق، تەحنيكالىق سەلبەستىك كەلىسىمى سياقتى كوپ ءتۇرلى ەكى جاقتى سەلبەستىك حۇجاتتارعا قول قويىلۋىنا كۋا بولدى.
ەكى جاق «جۇڭحۋا حالىق رەسپۋبليكاسى مەن پالەستينا مەملەكەتىنىڭ ستراتەگيالىق سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىن» جاريالادى.
كەڭەستەن ىلگەرى شي جينپيڭ حالىق سارايىنىڭ سولتۇستىك ۇلكەن زالىندا ابباسقا ارناپ قارسى الۋ سالتىن وتكىزدى.
ابباس كەلگەندە تيان - انمىن الاڭىندا 21 رەت قۇرمەت ساليۋتى اتىلدى، قۇرمەت قاراۋىلى قاتار تۇزەپ، قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن پالەستينا ەكى ەلدىڭ مەملەكەت ءانىن ورىندادى. ابباس شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن تاماشالادى.
سول كۇنى كەشتە شي جينپيڭ حالىق سارايىنىڭ جينسى زالىندا ابباسقا ارناپ قارسى الۋ قوناعاسىن بەردى.
ۋاڭ ي، چين گاڭ قاتارلىلار جوعارىداعى قيمىلدارعا قاتىناستى.
