مەملەكەت ءتوراعاسى شي جينپيڭ 6 - ايدىڭ 16 - كۇنى بەيجيڭدە امەريكا بيلل جانە مەيليندا گاتەس قور قوعامىنىڭ بىرلەسكەن ءتوراعاسى بيلل گاتەسپەن كەزدەستى.
□ سۋرەتتى شينحۋا اگەنتتىگىنىڭ ءتىلشىسى پاڭ شيڭلەي تۇسىرگەن
شينحۋا اگەنتتىگىنىڭ 6 - ايدىڭ 16 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 6 - ايدىڭ 16 - كۇنى بەيجيڭدە امەريكا بيلل جانە مەيليندا گاتەس قور قوعامىنىڭ بىرلەسكەن ءتوراعاسى بيلل گاتەسپەن كەزدەستى.
شي جينپيڭ گاتەس پەن ونىڭ قور قوعامىنىڭ ۇزاق ۋاقىتتان بەرى الەمنىڭ كەدەيلىكتى ازايتۋ، دەنساۋلىق ساقتاۋ، دامۋ جانە الەۋمەتتىك يگىلىك قايىرىمدىلىق ىستەرىن جەبەۋگە كۇش سالعاندىعىن القادى. شي جينپيڭ بىلاي دەپ باسا دارىپتەدى: قازىر دۇنيە جۇزىندە 100 جىلدا بولماعان زور وزگەرىس جەدەل قۇبىلۋدا، مەنىڭ الەمدىك دامۋ دارىپتەمەسىن، الەمدىك حاۋىپسىزدىك دارىپتەمەسىن، الەمدىك وركەنيەت دارىپتەمەسىن ورتاعا قويۋداعى ماقساتىم − الەمدىك سيپاتتى سىن - سايىستى شەشۋگە جۇڭگو جوباسىن ازىرلەۋ. جۇڭگو ەڭ اۋەلى ءوز ماسەلەسىن ويداعىداي شەشۋگە دەن قويادى. جۇڭگونىڭ ءبىر ميلليارد 400 ميلليوننان استام جان سانى بار ءىرى ەل رەتىندە، ۇزاق ۋاقىتتىق ورنىقتىلىقتى جانە ءۇرتىس دامۋدى ساقتاۋى دۇنيە ءجۇزىنىڭ بەيبىتشىلىگىنە، ورنىقتىلىعىنا، گۇلدەنۋىنە قوسىلعان زور ۇلەس ەسەپتەلەدى. ءبىز كەدەيلىكتەن ارىلتۋدان قامال الۋ جەتىستىكتەرىن بەكەمدەپ، اۋىل - قىستاقتى گۇلدەندىرۋدى جۇزەگە اسىرىپ، اۋىل - قىستاقتىڭ دەنساۋلىق ساقتاۋ، سالاماتتىق دەڭگەيىن ۇزدىكسىز جوعارىلاتامىز.
شي جينپيڭ بىلاي دەپ باسا دارىپتەدى: جۇڭگو جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋگە كۇش سالادى، ءبىز مەملەكەت قۇدىرەتتەنگەندە، ءسوزسىز، زورەكەر بولۋ سىندى كونە سۇردەكپەن استە جۇرمەيمىز، قايتا باسقا ەلدەرمەن بىرگە ورتاق دامۋدى جۇزەگە اسىرىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتەمىز. جۇڭگو جاق دۇنيە جۇزىندەگى ءار ەلمەن بىرگە كەڭ كولەمدى عىلىم - تەحنيكادا جاڭالىق اشۋ سەلبەستىگىن ورىستەتىپ، كليمات وزگەرىسىنە توتەپ بەرۋ، ىندەتكە قارسى اتتانۋ، الەۋمەتتىك دەنساۋلىق ساقتاۋ سياقتى الەمدىك سيپاتتى سىن - سايىستارعا بەلسەندىلىكپەن قاتىناسۋدى جانە ونى ىلگەرىلەتۋدى قالايدى. جۇڭگو جاق بيلل جانە مەيليندا گاتەس قور قوعامىمەن بىرگە قاتىستى سالالارداعى سەلبەستىكتى ۇزدىكسىز كۇشەيتۋدى ءارى باسقا وركەندەپ كەلە جاتقان ەلدەرگە شامانىڭ جەتىسىنشە قولداۋ كورسەتۋدى جانە كومەكتەسۋدى قالايدى.
شي جينپيڭ گاتەسكە بىلاي دەدى: ءسىز بيىل مەن بەيجيڭدە كەزدەسكەن تۇڭعىش امەريكالىق دوسىم بولاسىز. دۇنيە ءجۇزى جاڭا تيپتى ايدارشا ۆيرۋس ىندەتىنەن بىرتىندەپ ايىعۋدا، ادامدار كوپ بارىس - كەلىس جاساپ، كوپ ارالاسىپ، تۇسىنىكتى تەرەڭدەتۋى كەرەك. مەن جۇڭگو − امەريكا قارىم - قاتىناسىنىڭ نەگىزى حالىق اراسىندا دەگەندى كوپ ايتامىن، ءبىز قاي - قاشان دا امەريكا حالقىنا ءۇمىت ارتامىز، ەكى ەل حالقى دوستىعىنىڭ جالعاسا بەرۋىن ءۇمىت ەتەمىز.
گاتەس جۇڭگومەن سەلبەستىك اياق الىسىن جانە بولاشاق ويلارىن تانىستىردى، ول مىنانى ءبىلدىردى: جۇڭگو كەدەيلىكتى ازايتۋ جانە جاڭا تيپتى ايدارشا ۆيرۋس ىندەتىنە توتەپ بەرۋ جاعىندا بۇكىل دۇنيەنى جالت قاراتقان وراسان زور تابىسقا قول جەتكىزىپ، دۇنيە جۇزىنە وتە تاماشا ۇلگى بولدى. سوڭعى جىلدارى بيلل جانە مەيليندا گاتەس قور قوعامى جۇڭگومەن تاماشا سەلبەستىك جاساسىپ، كورنەكتى ىلگەرىلەۋشىلىككە قول جەتكىزدى. جۇڭگونىڭ جاڭالىق اشا دامۋدى جەدەلدەتۋى جۇڭگوعا پايدالى، وركەندەپ كەلە جاتقان ەلدەرگە پايدالى، دۇنيە جۇزىنە پايدالى. قور قوعامى جۇڭگومەن بىرگە جاڭالىق اشۋ، الەمدىك كەدەيلىكتى ازايتۋ، الەۋمەتتىك دەنساۋلىق ساقتاۋ، ءدارى - دارمەك زەرتتەپ اشۋ، اۋىل - قىستاق، اۋىل شارۋاشىلىعى سياقتى سالالارداعى سەلبەستىكتى ءتىپتى دە كۇشەيتۋگە ءارى تابىستى تاجىريبەلەر مەن تەحنيكالاردى وركەندەپ كەلە جاتقان ەلدەردە جالپىلاستىرۋعا كۇش سالادى.
ۋاڭ ي، چين گاڭ قاتارلىلار كەزدەسۋگە قاتىناستى.
