6 - ايدىڭ 12 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن گوندۋراس زۇڭتۇڭى كاسترومەن كەڭەس وتكىزدى.
□ سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 6 - ايدىڭ 12 - كۇنى بەيجيڭنەن بەرگەن حابارى (ءتىلشى جىڭ ميڭدا). 6 - ايدىڭ 12 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن گوندۋراس زۇڭتۇڭى كاسترومەن كەڭەس وتكىزدى.
شي جينپيڭ بىلاي دەپ اتاپ كورسەتتى: كاسترو زۇڭتۇڭ − جۇڭگودا مەملەكەتتىك ساپاردا بولعان تۇڭعىش گوندۋراس زۇڭتۇڭى، ءسىزدىڭ ساپارىڭىز جۇڭگو − گوندۋراس قارىم - قاتىناسىنىڭ جاڭا تاريحي تاراۋىن اشتى. بيىل 3 - ايدا جۇڭگو گوندۋراسپەن ديپلوماتيالىق قارىم - قاتىناس ورناتقاننان بەرى ەكى ەلدىڭ قارىم - قاتىناسى جىلدام قادام باسىپ، تاماشا باستاما اشىپ، قارىشتاعان ومىرشەڭدىك كۇش پەن جارقىن بولاشاق بايقاتتى. جۇڭگو مەن گوندۋراستىڭ ديپلوماتيالىق قارىم - قاتىناس ورناتۋى قازىر ەڭبەك ءسىڭىرىپ، بولاشاقتا يگىلىگىن كورەتىن ءىس. جۇڭگو جاق جۇڭگو مەن گوندۋراستىڭ دوستىق قارىم - قاتىناسىن تاباندىلىقپەن دامىتىپ، گوندۋراستىڭ ەكونوميكالىق، قوعامدىق دامۋىن باتىل قولدايدى، گوندۋراسپەن ءوزارا قۇرمەت ەتەتىن، تەپە - تەڭ، ءوزارا پايدا جەتكىزەتىن، بىرگە داميتىن ابزال دوس، جاقسى سەرىك بولۋدى قالايدى. مەن سىزبەن بىرگە ەكى جاقتى قارىم - قاتىناستىڭ ىشكەرىلەي دامۋىنا ستراتەگيالىق بيىكتەن جانە ۇزاق بولاشاقتىق تۇرعىدان جەتەكشىلىك ەتىپ جانە ونى ىلگەرىلەتىپ، ەكى ەل سەلبەستىگىنىڭ تاماشا جوباسىن ناقتى جەتىستىككە اينالدىرىپ، ەكى ەل حالقىن اناعۇرلىم كوپ قۇت - ىرىسقا كەنەلتۋدى قالايمىن. ەكى جاقتىڭ ورتاق قۇلشىنۋىندا جۇڭگو − گوندۋراس قارىم - قاتىناسىنىڭ، ءسوز جوق، ورنىقتى دا باياندى بولىپ، جارقىن بولاشاققا بەت الاتىندىعىنا سەنەمىن.
شي جينپيڭ بىلاي دەپ باسا دارىپتەدى: ەكى جاق دۇرىس بەتالىستى مىقتاپ يگەرىپ، ساياسي ءوزارا سەنىمدىلىكتى تەرەڭدەتۋى كەرەك. ءبىر جۇڭگو پرينسيبى − جۇڭگو مەن گوندۋراستىڭ ديپلوماتيالىق قارىم - قاتىناس ورناتۋى مەن ەكى جاقتى قارىم - قاتىناستى دامىتۋىنىڭ ەڭ ماڭىزدى العى شارتى جانە ساياسي نەگىزى، گوندۋراس جاقتىڭ مۇنى قاز - قالپىندا ناقتى تياناقتاندىراتىندىعىنا سەنەمىن. جۇڭگو جاق گوندۋراس جاقتىڭ مەملەكەتتىڭ يەلىك ۇقىعىن، تاۋەلسىزدىگىن قورعاۋ، دامۋدى جەبەۋ، حالىق تۇرمىسىن جاقسارتۋ جولىندا جاساعان قۇلشىنىسىن باتىل قولدايدى، گوندۋراس جاقتىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىن ءوز الدىنا تاڭداۋىن قولدايدى، ءارقانداي سىرتقى كۇشتىڭ گوندۋراستىڭ ىشكى ىسىنە كيلىگۋىنە قارسى تۇرادى، گوندۋراس جاقپەن ەل باسقارۋ جونىندەگى تاجىريبە اۋىس - كۇيىسىن كۇشەيتىپ، كەدەيلىكتى جويۋ، قوعامدىق باسقارۋ، شىرىكتەسۋدى جازالاۋ سياقتى تاجىريبەلەرىن ورتاقتاسۋدى قالايدى، ۇكىمەت، زاڭ شىعارۋ قۇرىلىمى، ساياسي پارتيا، جەرگىلىكتى ورىندار اراسىندا اۋىس - كۇيىستى، سەلبەستىكتى جان - جاقتى ورىستەتۋگە دەم بەرەدى. ەكى جاق ستراتەگيالىق ءتۇيىلىسۋدى كۇشەيتىپ، ەكى ەل سەلبەستىك مەحانيزمىنىڭ نەگىزگى قۇرىلىمىن ورناتىپ، ”ءبىر بەلدەۋ، ءبىر جولدى“ بىرگە قۇرۋدى ءبىر تۇتاس باسشىلىققا الىپ، ورتاق دامۋدى جەبەۋى كەرەك. جۇڭگو جاق گوندۋراس جاقتىڭ ەرەكشە ونىمدەرىنىڭ جۇڭگو بازارىنا ەرتەرەك كىرۋىن بەلسەنە ىلگەرىلەتەدى، گوندۋراس جاقپەن ەركىن ساۋدا كەلىسىمىن كەڭەسۋ بارىسىن كۇنى بۇرىن باستاۋدى قالايدى. ەكى جاق گۋمانيتارلىق اۋىس - كۇيىستى جەبەپ، جۇڭگو مەن گوندۋراس دوستىعىنىڭ حالىق رايى نەگىزىن بەكەمدەۋى كەرەك. جۇڭگو جاق گوندۋراس جاقپەن كوپ جاقتى ىستەستىكتى كۇشەيتىپ، حالىقارالىق ءتارتىپ پەن حالىقارالىق قارىم - قاتىناستىڭ نەگىزگى ولشەمىن بىرگە قورعاپ، وركەندەپ كەلە جاتقان ەلدەردىڭ ىنتىماعىن، سەلبەستىگىن كۇشەيتىپ، وركەندەپ كەلە جاتقان ەلدەردىڭ ورتاق مۇددەسى مەن حالىقارالىق ادىلدىكتى، تۋراشىلدىقتى قورعاۋدى قالايدى. جۇڭگو جاق گوندۋراستى قامتىعان لاتىن امەريكاسى جانە كارايب ەلدەرىمەن بىرگە جۇڭگو − لاتىن امەريكاسى جانە كارايب ەلدەرى ورتاق تۇلعاسى تالقى مىنبەرى قۇرىلىسىن، سونداي - اق جۇڭگو − لاتىن امەريكاسى جانە كارايب ەلدەرى جالپىلىق سەلبەستىگىن ىلگەرىلەتۋدى قالايدى.
كاسترو مىنالاردى ءبىلدىردى: جۇڭگومەن ديپلوماتيالىق قارىم - قاتىناس ورناتۋ − گوندۋراس ۇكىمەتىنىڭ جاساعان تاريحي تالعامى، مۇنىڭ تاريحقا جازىلارى حاق. گوندۋراس جاق ءبىر جۇڭگو پرينسيبىن باتىل قولدايدى ءارى وعان بويسۇنادى، جۇڭگو ۇكىمەتىنىڭ مەملەكەتتىڭ تۇتاستىعىن جۇزەگە اسىرۋ جولىندا جاساعان قۇلشىنىسىن باتىل قولدايدى. ءتوراعا شي جينپيڭنىڭ باتىل دا پارمەندى باسشىلىعىندا جۇڭگو ۇلى دامۋ تابىستارىنا قول جەتكىزدى، گوندۋراس جاق بۇعان قاتتى سۇيىنەدى. ءتوراعا شي جينپيڭ العا قويعان ”ءبىر بەلدەۋ، ءبىر جولدى“ بىرگە قۇرۋ باستاماسى مەن الەمدىك دامۋ باستاماسى، الەمدىك حاۋىپسىزدىك باستاماسى، الەمدىك وركەنيەت باستاماسى دۇنيە ءجۇزى حالىقتارىنىڭ ورتاق تىلەگىنە ۇيلەسەتىن اناعۇرلىم بەيبىت، حاۋىپسىز دۇنيە ءجۇزىن قۇرۋعا پايدالى، گوندۋراس جاق مۇنى ايرىقشا باعالايدى ءارى وعان بەلسەنە ات سالىسادى. گوندۋراس جاق جۇڭگومەن دوستىق سەلبەستىك قارىم - قاتىناستى دامىتۋدىڭ گوندۋراس جاقتىڭ اناعۇرلىم كوپ، اناعۇرلىم جاقسى دامۋ ورايىنا يە بولۋىنا پايدالى ەكەندىگىنە كامىل سەنەدى. ەكى ەل ديپلوماتيالىق قارىم - قاتىناس ورناتقان 2 ايدان استام ۋاقىتتان بەرگى سەلبەستىك اياق الىسىنىڭ جىلدام بولۋى گوندۋراس جاقتىڭ بولاشاققا نىق سەنىم ارتۋىنا مۇمكىندىك جاسادى. گوندۋراس جاق جۇڭگو جاقپەن ساۋدا، قارجى قوسۋ، نەگىزدىك قۇرىلعى، تەلەگراف، ەنەرگيا، عىلىم - تەحنيكا سياقتى سالالاردا سەلبەستىكتى كۇشەيتىپ، گۋمانيتارلىق اۋىس - كۇيىستى جيىلەتۋدى كۇتەدى. گوندۋراس جاق لاتىن امەريكاسى جانە كارايب ەلدەرى ورتاق تۇلعاسىنىڭ جۇڭگومەن قارىم - قاتىناستى دامىتۋىن بەلسەنە ىلگەرىلەتۋدى قالايدى. گوندۋراس − جۇڭگو دوستىعىنىڭ، ءسوز جوق، ۋاقىتتىڭ سىنىنان سۇرىنبەي ءوتىپ، تىڭ تابىستارعا ۇزدىكسىز قول جەتكىزەتىندىگىنە سەنەمىن.
كەڭەستەن كەيىن ەكى ەلدىڭ مەملەكەت باسشىلارى ”ءبىر بەلدەۋ، ءبىر جولدى“ بىرگە قۇرۋ، ساپا تەكسەرۋ، ەكونوميكا - ساۋدا، اۋىل شارۋاشىلىعى، عىلىم - تەحنيكا، مادەنيەت، وقۋ - اعارتۋ سياقتى سالالارداعى ءبىر قىدىرۋ ەكى جاقتى سەلبەستىك حۇجاتتارىنا قول قويۋعا بىرگە كۋا بولدى.
ەكى جاق «جۇڭحۋا حالىق رەسپۋبليكاسى مەن گوندۋراس رەسپۋبليكاسىنىڭ بىرلەسكەن مالىمدەمەسىن» جاريالادى.
كەڭەستەن ىلگەرى شي جينپيڭ حالىق سارايىنىڭ شىعىس قاقپاسى الدىنداعى الاڭدا كاستروعا ارناپ قارسى الۋ سالتىن وتكىزدى.
كاسترو كەلگەندە، قۇرمەت قاراۋىلى قاتار تۇزەپ، قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن گوندۋراس ەكى ەلدىڭ مەملەكەت ءانىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. كاسترو شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن تاماشالادى.
سول كۇنى كەشتە شي جينپيڭ حالىق سارايىنىڭ جينسى زالىندا كاستروعا ارناپ قارسى الۋ قوناعاسىن بەردى.
ۋاڭ ي، چين گاڭ قاتارلىلار جوعارىداعى قيمىلدارعا قاتىناستى.
