5 - ايدىڭ 17 - كۇنى تۇستەن كەيىن مەملەكەت ءتوراعاسى شي جينپيڭ شي - اندا جۇڭگو - ورتا ازيا باسشىلار ماجىلىسىنە قاتىناسۋ ءارى مەملەكەتتىك ساپاردا بولۋ ءۇشىن جۇڭگوعا كەلگەن قازاقستان زۇڭتۇڭى توقايەۆپەن كەڭەس وتكىزدى.
سۋرەتتى شينحۋا اگەنتتىگىنىڭ ءتىلشىسى ليۋ بين تۇسىرگەن
شينحۋا اگەنتتىگىنىڭ 5 - ايدىڭ 17 - كۇنى شي - اننان بەرگەن حابارى (تىلشىلەر ياڭ يجۇن، چىن چىن). 5 - ايدىڭ 17 - كۇنى تۇستەن كەيىن مەملەكەت ءتوراعاسى شي جينپيڭ شي - اندا جۇڭگو − ورتا ازيا باسشىلار ماجىلىسىنە قاتىناسۋ ءارى مەملەكەتتىك ساپاردا بولۋ ءۇشىن جۇڭگوعا كەلگەن قازاقستان زۇڭتۇڭى توقايەۆپەن كەڭەس وتكىزدى.
شي جينپيڭ بىلاي دەپ اتاپ كورسەتتى: جۇڭگو مەن قازاقستان − ءوزارا سەنىم ارتۋعا تاتيتىن جاقسى دوستار، جاقسى باۋىرلاستار، جاقسى سەرىكتەر. جۇڭگو جۇڭحۋا ۇلتىنىڭ ۇلى گۇلدەنۋىن جۇڭگو ۇلگىسىندەگى وسىزامانداندىرۋ ارقىلى جاپپاي ىلگەرىلەتۋدە، قازاقستان جەدەل دامىعان، گۇلدەنىپ - كوركەيگەن ”جاڭا قازاقستان“ قۇرۋدا. جۇڭگو مەن قازاقستان تۇگەلدەي دامۋدىڭ، گۇلدەنۋدىڭ شەشۋشى كەزەڭىندە تۇر، جۇڭگو − قازاقستان قارىم - قاتىناسىنىڭ جاڭا ”التىن 30 جىلى“ باستالدى. ەكى جاق ءداستۇرلى دوستىقتى بارىنشا اسقاقتاتىپ، باتىل تۇردە ءوزارا قولداۋ كورسەتىپ، دامۋ ستراتەگيالارىن ءتۇيىلىستىرۋدى نىعايتىپ، ءوزارا ءتيىمدى سەلبەستىكتى تەرەڭدەتىپ، دامۋدى، گۇلدەنۋدى بىرگە جوسپارلاپ، جۇڭگو مەن قازاقستاننىڭ ۇرپاقتار بويى دوس، جوعارى دەڭگەيدە ءوزارا سەنەتىن، بەينەت پەن زەينەتتى بىرگە وتكەرەتىن تاعدىرلاس ورتاق تۇلعاسىن قۇرۋدى ىلگەرىلەتۋى كەرەك.
شي جينپيڭ بىلاي دەپ باسا دارىپتەدى: دەربەس، وزىنە - ءوزى قوجايىن بولعان، حاۋىپسىز، ورنىقتى، دامىپ، گۇلدەنگەن قازاقستان جۇڭگو مەن قازاقستان ەكى ەل حالقىنىڭ ورتاق مۇددەسىنە ۇيلەسەدى. جۇڭگو جاق قازاقستاننىڭ مەملەكەت تاۋەلسىزدىگىن، يەلىك ۇقىعىن، تەرريتوريا تۇتاستىعىن قورعاۋىن تاباندىلىقپەن قولدايدى، قازاقستاننىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن قولدايدى. مەن ”ءبىر بەلدەۋ، ءبىر جولدى“ بىرگە قۇرۋ باستاماسىن العا قويعان 10 جىلدان بەرى جۇڭگو مەن قازاقستان نەشە ونداعان ماڭىزدى سەلبەستىك نىسانىن تابىستى جۇرگىزىپ، ەكى ەل حالقىن يگىلىككە كەنەلدىرىپ، بىرگە دامۋدى جەبەدى. ەكى جاق ەكونوميكا - ساۋدا، قارجى قوسۋ، اۋىل شارۋاشىلىعى، اۆتوكولىك جاساۋ جانە ەنەرگيا سياقتى سالالارداعى سەلبەستىكتى كەڭەيتىپ، ۇلاستىرۋدى، تۇتاستىرۋدى تەرەڭدەتىپ، قۇرلىق - تەڭىز بىرلەسپە تاسىمالىن جەبەپ، ەلەكتروندى ساۋدا ىستەرى، جاڭالىق اشۋ، ءىرى ساندى مالىمەت سياقتى جاڭا سالالارداعى سەلبەستىكتى كەڭەيتىپ، ءوزارا مادەنيەت ورتالىقتارىن قۇرۋدى جانە لۋبان شەبەرحاناسىن اشۋدى تياناقتاندىرۋدى مىقتى يگەرىپ، ءوزارا ۆيزاسىز بارۋ كەلىسىمىنە قول قويىسۋدى وراي ەتىپ، گۋمانيتارلىق اۋىس - كۇيىستى، سەلبەستىكتى كۇشەيتىپ، حالىق تىلەگى نەگىزىن تەرەڭدەي بەكەمدەۋى كەرەك. قازاقستان جاقتىڭ 2024 - جىلى جۇڭگودا قازاقستان ساياحات جىلىن وتكىزۋىن قارسى الامىز. قازاقستاننىڭ شي - اندا تۇراتىن باس كونسۋلحاناسىنىڭ اشىلۋى ەكى ەلدىڭ جەرگىلىكتى ورىندارىنىڭ اۋىس - كۇيىسىن پارمەندى جەبەيتىندىگىنە سەنەمىن. ەكى جاق تاعى اقپارات قۇرالدارىنىڭ اۋىس - كۇيىسىن، سەلبەستىگىن كۇشەيتىپ، جۇڭگو − قازاقستان دوستىعىنىڭ حيكايالارىن بىرگە ويداعىداي بايانداۋى كەرەك.
شي جينپيڭ بىلاي دەپ اتاپ كورسەتتى: جۇڭگو − ورتا ازيا مەحانيزمىندە ءار ەلدىڭ قازىرگى قاجەتى مەن بولاشاق دامۋىن كوزدەي وتىرىپ، ءوزارا ءتيىمدى سەلبەستىكتى كۇشەيتىپ، بىرگە گۇلدەنىپ - كوركەيۋدى جەبەۋ ماقسات ەتىلەدى. الدا وتكىزىلەتىن جۇڭگو − ورتا ازيا باسشىلار ءماجىلىسى بەلەستىك مانگە يە، جۇڭگونىڭ ورتا ازيامەن سەلبەستىگىنىڭ جاڭا داۋىرگە قادام تاستاۋىن ىلگەرىلەتەدى. جۇڭگو جاق قازاقستاندى قامتىعان ورتا ازياداعى ءار ەلمەن جۇمىلا كۇش شىعارىپ، بىرگە اقىلداسىپ، بىرگە قۇرىپ، جۇڭگو − ورتا ازيا مەحانيزمىن 6 ەلدىڭ ىشكەرىلەي سەلبەستىك جاساسۋىن ىلگەرىلەتەتىن ماڭىزدى تۇعىر ەتىپ تۇلعالاۋدى قالايدى.
توقايەۆ مىنالاردى ءبىلدىردى: جۇڭگو − ورتا ازيا باسشىلار ماجىلىسىنە قاتىناسۋ ءارى جۇڭگودا مەملەكەتتىك ساپاردا بولۋ ءۇشىن ۇسىنىس بويىنشا شي - انعا كەلگەنىمە قاتتى قۋانىشتامىن. ءتوراعا شي جينپيڭنىڭ جۇڭگوعا باسشىلىق ەتىپ، ۇلى تابىستارعا قول جەتكىزگەندىگىن قۇتتىقتايمىن، جۇڭگونىڭ اناعۇرلىم نۇرلى بولاشاققا جەتەتىنىنە سەنەمىن. مەن ءتوراعا شي جينپيڭنىڭ قازاقستان − جۇڭگو قارىم - قاتىناسىنا بەرگەن باعاسىن، سونداي - اق ەكى ەلدىڭ سەلبەستىگىن اناعۇرلىم كۇشەيتۋ جونىندەگى ۇسىنىستارىن بۇكىلدەي قۇپتايمىن. جۇڭگو قازاقستاننىڭ سىرتقا باعىتتاعان ساياساتىندا ەرەكشە ماڭىزدى ورىنعا يە، قازاقستان مەن جۇڭگونىڭ قارىم - قاتىناسى تەرەڭ دوستىق پەن ءوزارا بەرىك سەنىمدى تياناق ەتكەن، مۇندا ورتاق نىسانا جانە مىندەت بار. قازاقستان جاق جۇڭگو جاقپەن بىرگە قازاقستان مەن جۇڭگونىڭ ماڭگىلىك جاپپاي ستراتەگيالىق سەرىكتەستىك قارىم - قاتىناسىن اناعۇرلىم كۇشەيتىپ، ەكى جاقتىڭ ساۋدا - ساتتىق، ساياحات، گۋمانيتارلىق ىستەر، جەرگىلىكتى ورىندار سياقتى ءار سالاداعى سەلبەستىگىن كەڭەيتىپ، قازاقستان مەن جۇڭگونىڭ جاڭا ”التىن 30 جىلدى“ باستاۋىنا اناعۇرلىم بەرىك نەگىز ورناتۋدى قالايدى. قازاقستان مەن جۇڭگونىڭ ءوزارا ۆيزاسىز بارۋ كەلىسىمىنە قول قويعاندىعىنا ايرىقشا قۋانامىن، بۇل ەكى جاقتىڭ بارىس - كەلىسىن پارمەندى جەبەيدى. ”ءبىر بەلدەۋ، ءبىر جولدى“ بىرگە قۇرۋ − ۇلى باستاما، قازاقستان جاق بۇعان ۇزدىكسىز بەلسەندى ات سالىسادى. قازىرگى كۇردەلى حالىقارالىق جاعدايدا ءتوراعا شي جينپيڭنىڭ الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن العا قويۋى ماڭىزدى ءمان الادى، قازاقستان جاق مۇنى بەلسەندى قولدايدى، وسى جونىندە جۇڭگو جاقپەن تىلدەسۋدى، ىستەستىكتى كۇشەيتۋدى قالايدى. قازاقستان جاق جۇڭگو جاقپەن بىرگە جۇڭگو − ورتا ازيا مەحانيزمىنەن تولىق پايدالانىپ، ءوڭىردىڭ حاۋىپسىزدىگىن، ورنىقتىلىعىن جانە دامۋىن بىرگە جەبەۋدى قالايدى.
كەڭەستەن سوڭ ەكى ەلدىڭ مەملەكەت باسشىلارى «جۇڭحۋا حالىق رەسپۋبليكاسى مەن قازاقستان رەسپۋبليكاسىنىڭ بىرلەسكەن مالىمدەمەسىنە» قول قويىپ، ەكونوميكا - ساۋدا، ەنەرگيا، قاتىناس، اۋىل شارۋاشىلىعى، ءوزارا ۇلاستىرۋ - تۇتاستىرۋ، گۋمانيتارلىق ىستەر، جەرگىلىكتى ورىندار سياقتى سالالارداعى كوپتەگەن ەكى جاقتى سەلبەستىك حۇجاتىنا قول قويىلۋىنا بىرگە كۋا بولدى.
ساي چي، ۋاڭ ي، چين گاڭ قاتارلىلار جوعارىداعى قيمىلدارعا قاتىناستى.
