4 - ايدىڭ 6 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەت ىستەرى ساپارىمەن كەلگەن فرانسيا زۇڭتۇڭى ماكرونمەن كەڭەس وتكىزدى.
□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
شينحۋا اگەنتتىگىنىڭ 4 - ايدىڭ 6 - كۇنى بەيجيڭنەن بەرگەن حابارى (ءتىلشى ليۋ حۋا). 4 - ايدىڭ 6 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەت ىستەرى ساپارىمەن كەلگەن فرانسيا زۇڭتۇڭى ماكرونمەن كەڭەس وتكىزدى.
شي جينپيڭ ماكروننىڭ جۇڭگوعا تاعى ساپارلاي كەلگەندىگىن قارسى الدى. شي جينپيڭ بىلاي دەپ اتاپ كورسەتتى: بۇگىنگى دۇنيە تەرەڭ تاريحي وزگەرىستەردى باستان كەشىرۋدە، جۇڭگو مەن فرانسيا بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى جانە دەربەس، وزىنە - ءوزى قوجايىن بولاتىن ءداستۇرلى ءىرى ەل رەتىندە، دۇنيە ءجۇزىنىڭ كوپ ۇيەكتەنۋىنىڭ، حالىقارالىق قارىم - قاتىناستىڭ دەموكراتيالانۋىنىڭ تاباندى ىلگەرىلەتۋشىسى رەتىندە، الاۋىزدىق پەن بوگەتتەن اتتاپ ءوتىپ، ورنىقتى، ءوزارا ءتيىمدى، ءورىس اشاتىن، العا باساتىن جۇڭگو − فرانسيا جالپى بەتتىك ستراتەگيالىق سەرىكتەستىك قارىم - قاتىناسىنىڭ ۇلكەن بەتالىسىنا تاباندى بولىپ، ناعىز كوپ جاقتىلىقتى امالياتتا ايگىلەپ، دۇنيە ءجۇزىنىڭ بەيبىتشىلىگىن، ورنىقتىلىعىن، گۇلدەنۋىن قورعاۋدا قابىلەتى، جاۋاپكەرشىلىگى بار.
شي جينپيڭ جۇڭگو − فرانسيا قارىم - قاتىناسىنىڭ بەلسەندى، ورنىقتى، اقاۋسىز دامۋ بەتالىسىن ساقتاعاندىعىن بەلسەندى باعالادى ءارى باسا دارىپتەپ بىلاي دەپ اتاپ كورسەتتى: ورنىقتىلىق − جۇڭگو − فرانسيا قارىم - قاتىناسىنىڭ كورنەكتى ەرەكشەلىگى جانە باعالى بايلىعى، بۇل ەكى جاقتىڭ دەن قويا قورعاۋىنا تاتيدى. ەكى جاق ەكى ەلدىڭ جان - جاقتى، جوعارى دەڭگەيلى پىكىرلەسۋ ارناسىنان ويداعىداي پايدالانىپ، ەكى ەل مەملەكەت باسشىلارىنىڭ تىعىز قارىم - قاتىناسىن ساقتاپ، وسى جىل ىشىندە جۇڭگو − فرانسيا ستراتەگيا، ەكونوميكا، قازىنا - فينانس، گۋمانيتارلىق اۋىس - كۇيىس سىندى ءۇش ۇلكەن جوعارى دارەجەلىلەر تىلدەسۋ مەحانيزمىنىڭ جاڭا ءبىر رەتكى ءماجىلىسىن وتكىزۋى كەرەك. ەكى جاق ءبىر - ءبىرىنىڭ يەلىك ۇقىعى مەن تەرريتوريا تۇتاستىعىنا ءوزارا قۇرمەت ەتىپ، قارسى جاقتىڭ وزەكتى مۇددەسىنە قۇرمەت ەتىپ، الاۋىزدىقتاردى ۇيلەسىمدى ءبىر جاقتى ەتۋى، مەڭگەرۋى كەرەك. ءبىر - بىرىنە پايدا جەتكىزىپ، ءوزارا تيىمدىلىك جاساپ، ورتاق دامۋعا تاباندى بولۋ كەرەك. جۇڭگو جوعارى ساپالى دامۋدى جانە جوعارى دەڭگەيدە ەسىك اشۋدى كۇش سالا ىلگەرىلەتۋدە، بۇل فرانسيا جاققا اناعۇرلىم كەڭ بازار ورايىن ازىرلەيدى. جۇڭگو جاق فرانسيا جاقپەن اۋىل شارۋاشىلىعى، ازىق - تۇلىك، اۆياتسيا - عارىش، حالىقتىق يادرو ەنەرگياسى سياقتى سالالارداعى سەلبەستىكتى تەرەڭدەتىپ، قىزمەت وتەۋ ساۋداسى، جاسىل دامۋ، عىلىم - تەحنيكادا جاڭالىق اشۋ سياقتى جاڭا سەلبەستىك ارتۋ تۇيىندەرىن جەتىلدىرىپ، ەكى جاقتىڭ كومىر قىشقىل گازىن بەيتاراپتاندىرۋ ورتالىعىن بىرگە قۇرۋىن، دارىندىلاردى بىرلەسىپ باۋلۋدى كۇشەيتۋىن قولداۋدى قالايدى. فرانسيانىڭ 2024 - جىلعى جۇڭگو حالىقارالىق قىزمەت وتەۋ ساۋدا جارمەڭكەسى جانە 7 - كەزەكتى جۇڭگو حالىقارالىق يمپورت كورمەسىنىڭ نەگىزگى قوناق ەلى بولۋىن قارسى الامىز. فرانسيا جاقتىڭ جۇڭگو كاسىپورىندارىنا ءادىل، تۋرا، كەمسىتپەيتىن شارۋاشىلىق - ساۋدا ورتاسىن ازىرلەۋىن ءۇمىت ەتەمىن. جۇڭگو جاق فرانسيا جاقپەن كەلەر جىلعى جۇڭگو مەن فرانسيانىڭ ديپلوماتيالىق قارىم - قاتىناس ورناتقاندىعىنىڭ 60 جىلدىعىن جانە جۇڭگو − فرانسيا مادەنيەت - ساياحات جىلىن، پاريج وليمپيادا سپورت جارىسىن وراي ەتىپ، قاتىستى سالالارداعى سەلبەستىكتى كۇشەيتۋدى قالايدى.
شي جينپيڭ بىلاي دەپ باسا دارىپتەدى: جۇڭگو جاق ۇزدىكسىز اشىق پوزيتسيا ۇستانىپ، فرانسيا جاقپەن بىرلەسكەن مەملەكەتتەر ۇيىمى، 20 ەل توبى، دۇنيە جۇزىلىك ساۋدا ۇيىمى سياقتى كوپ جاقتى مەحانيزمدە تىعىز بايلانىستى جانە سەلبەستىكتى ساقتاپ، ناعىز كوپ جاقتىلىقتى بىرگە امالياتتا ايگىلەپ، كليمات وزگەرىسى، ەنەرگيا ماسەلەسى سياقتى الەمدىك سىن - سايىستارعا قول ۇستاسا توتەپ بەرۋدى قالايدى. جۇڭگو جاق فرانسيا جاقتىڭ 2025 - جىلعى بىرلەسكەن مەملەكەتتەر ۇيىمىنىڭ تەڭىز - مۇحيت جينالىسىن ويداعىداي وتكىزۋىن قولدايدى، فرانسيا جاقتىڭ 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلى باسشىلار تالقى مىنبەرىنە قاتىناسۋىن قارسى الادى.
شي جينپيڭ بىلاي دەپ باسا دارىپتەدى: دۇنيە جۇزىندەگى ەكى ۇلكەن كۇش، ەكى ۇلكەن بازار، ەكى ۇلكەن وركەنيەت رەتىندە، جۇڭگو − ەۆروپا قارىم - قاتىناسى ەكى جاقتىڭ ىرىس - قۇتىنا، دۇنيە ءجۇزىنىڭ ورنىقتىلىعى مەن گۇلدەنۋىنە سايادى. جۇڭگونىڭ ەۆروپا وداعىنا قاراتقان ساياساتى ۇزاق ۋاقىت ورنىقتى بولادى، باستان - اياق ەۆروپانى كوپ ۇيەكتەنگەن دۇنيە جۇزىندەگى دەربەس ءبىر ۇيەك دەپ قارايدى، جۇڭگو − ەۆروپا وداعى قارىم - قاتىناسىنىڭ ءۇشىنشى جاققا باعىتتالماۋىنا، باعىنىشتى بولماۋىنا، تەجەۋىنە دە ۇشىراماۋىنا تاباندى بولادى. جۇڭگو جاق ەۆروپا وداعى جاقپەن بىرگە بيىل جۇڭگونىڭ ەۆروپا وداعىمەن جان - جاقتى ستراتەگيالىق سەرىكتەستىك قارىم - قاتىناس ورناتقاندىعىنىڭ 20 جىلدىعىن وراي ەتىپ، اۋىس - كۇيىستى، تىلدەسۋدى جاپپاي قايتا باستاپ، جۇڭگو − ەۆروپا وداعى دوستىق سەلبەستىگى نەگىزگى اۋەنىن بەكەمدەپ، ورنىقتى، ءوزارا سەنىمدى قامداۋ تىزبەگى سەرىكتەستىك قارىم - قاتىناسىن ورناتۋدى قاراستىرىپ، ءوزارا پايدا جەتكىزىپ، تەڭ يگىلىككە كەنەلۋدى جۇزەگە اسىرۋدى قالايدى. فرانسيا جاقتىڭ بەلسەندى جەتەكشىلىك رولىن ساۋلەلەندىرۋىن ءۇمىت ەتەمىن.
ماكرون مىنالاردى ءبىلدىردى: مەنىڭ 3 جىلدان استام ۋاقىتتىڭ الدىندا جۇڭگوعا ساپارلاي كەلگەن كەزىمدەگى كورىنىس ءالى ەسىمدە، جۇڭگوعا تاعى دا ساپارلاي كەلىپ، ءتوراعا شي جينپيڭمەن بىرگە فرانسيا مەن جۇڭگونىڭ جان - جاقتى ستراتەگيالىق سەرىكتەستىك قارىم - قاتىناسىن اناعۇرلىم جوعارىلاتۋ جونىندە تالقى جۇرگىزگەنىمە توتەنشە قۋانىشتىمىن. مەن ءتوراعا شي جينپيڭنىڭ فرانسيا − جۇڭگو قارىم - قاتىناسى جونىندەگى بەلسەندى باعاسىن جانە ەكى جاقتى قارىم - قاتىناستى دامىتۋ جونىندە العا قويعان ماڭىزدى ۇسىنىستارىن بۇكىلدەي قۇپتايمىن. كەلەر جىلى فرانسيا مەن جۇڭگو ديپلوماتيالىق قارىم - قاتىناس ورناتقاندىعىنىڭ 60 جىلدىعىن بىرگە قۇتتىقتايدى. 60 جىلدان بەرى، فرانسيا − جۇڭگو قارىم - قاتىناسى ورنىقتى، اقاۋسىز دامىدى. فرانسيا مەن جۇڭگونىڭ دامۋ ۇلگىسى ۇقساماعانىمەن، ەكى جاق ءوزارا قۇرمەت ەتىپ، بۇكپەسىز اۋىس - كۇيىس جاساپ، ءار سالاداعى سەلبەستىكتە ءبىر - بىرىنە پايدا جەتكىزىپ، ءوزارا تيىمدىلىك جەتكىزۋدى جۇزەگە اسىردى، سونىمەن بىرگە قازىرگى دۇنيە ءجۇزى ءدوپ كەلىپ وتىرعان الەمدىك سىن - سايىستارعا سەلبەسىپ توتەپ بەرۋ جاعىندا ماڭىزدى ىلگەرىلەۋشىلىككە قول جەتكىزدى. فرانسيا جاق ءبىر جۇڭگو ساياساتىنا قۇرمەت ەتەدى جانە ونى اتقارادى. مەن وسى رەت اسا كولەمدى ۋاكىلدەر ۇيىرمەسىن باستاپ جۇڭگوعا ساپارلاي كەلۋىم جۇڭگو جاقپەن سەلبەستىكتى كۇشەيتىپ، گۋمانيتارلىق اۋىس - كۇيىستى جەبەۋ ءۇشىن بولىپ وتىر. فرانسيا جاق جۇڭگو جاقتىڭ كۇنميڭ − مونترەال «ورگانيزمدەردىڭ الۋان تۇرلىلىگى شارتىنىڭ» 15 - رەتكى شارت جاساسۋشى جاقتار جينالىسىن ءساتتى وتكىزگەندىگىن قۇتتىقتايدى، كليمات وزگەرىسى، استىق حاۋىپسىزدىگى سياقتى ماسەلەلەردە جۇڭگو جاقپەن ۇزدىكسىز تىعىز بايلانىس جاساۋدى، سەلبەسۋدى ءۇمىت ەتەدى. جۇڭگو جاق 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىن وتكىزەدى، فرانسيا جاق جۇڭگو جاقپەن وسى جونىندە سەلبەستىك ورىستەتۋدى قالايدى. فرانسيا جاق جۇڭگو جاقتىڭ بىرلەسكەن مەملەكەتتەر ۇيىمى ۋستاۆىنىڭ نەگىزگى ماقساتىنا باستان - اياق بويسۇنىپ، حالىقارالىق، وڭىرلىك قولامتالى ماسەلەلەردى شەشۋدە بەلسەندى رول اتقارعاندىعىن القايدى، جۇڭگومەن تىعىز بايلانىس جاساپ، سەلبەسىپ، دۇنيە ءجۇزىنىڭ باياندى بەيبىتشىلىگى مەن ورنىقتىلىعىن قۇلشىنا جۇزەگە اسىرۋدى ءۇمىت ەتەدى.
ماكرون مىنالاردى ءبىلدىردى: فرانسيا جاق دەربەس، وزىنە - ءوزى قوجايىن بولۋ ديپلوماتياسىنا تاباندى بولىپ، ەۆروپانىڭ ستراتەگيالىق دەربەس بولۋىن قۋاتتايدى، قاراما - قارسى بولىپ بولشەكتەنۋگە قارسى تۇرادى، توپقا ءبولىنىپ قارسىلاسۋعا قارسى تۇرادى. فرانسيا ءبىر تاراپتى تاڭداپ، سول جاقتا تۇرۋدى قالامايدى، قايتا ىنتىماقتى، سەلبەستىكتى، ءىرى ەلدەر قاتىناسىنىڭ ورنىقتىلىعىن ساقتاۋدى دارىپتەيدى. فرانسيا جاق جۇڭگو جاقپەن بۇكپەسىز، ىشكەرىلەي پىكىر اۋىستىرۋدى ساقتاپ، ءوزارا سەنىمدىلىكتى ارتتىرىپ، پارىقتاردى ساقتاپ، ورتاقتىققا ۇمتىلىپ، اشىق سەلبەستىك ورناتۋدى قالايدى. فرانسيا جاق ەۆروپا وداعى − جۇڭگو قارىم - قاتىناسىنىڭ دامۋىن بەلسەنە ىلگەرىلەتۋدى قالايدى.
ەكى ەلدىڭ مەملەكەت باسشىلارى ۋكراينا داعدارىسى جونىندە پىكىر اۋىستىردى. شي جينپيڭ بىلاي دەپ باسا دارىپتەدى: جۇڭگو جاقتىڭ ۋكراينا ماسەلەسىندەگى مايدانى دايەكتى، ايقىن، انىق، مۇنىڭ وزەگى − تاتۋلىققا ءناسيحاتتاپ، كەلىسسوزدى جەبەۋ، ساياسي جولمەن شەشۋ. داعدارىستى شەشۋدىڭ شيپالى ءدارىسى جوق، ءار جاقتىڭ وزىنەن باستاپ، ءوزارا سەنىمدىلىكتى نىعايتۋ ارقىلى سوعىستى تەجەۋ، بەيبىتشىلىك كەلىسسوزىن وتكىزۋ شارت - جاعدايىن جاراتۋىن قاجەت ەتەدى. جۇڭگو جاق ەۆروپا وداعى جاقتىڭ داعدارىستى ساياسي جولمەن شەشۋ ءۇشىن رول اتقارۋىن قولدايدى، فرانسيا جاقپەن بىرگە حالىقارالىق قوعامدى بايىپتى، ۇستامدى بولۋعا، داعدارىستى ونان ارى ۋشىقتىراتىن، ءتىپتى، مەڭگەرۋسىز جىبەرەتىن ارەكەتتەر قولدانۋدان ساقتانۋعا؛ حالىقارالىق ادامگەرشىلىك زاڭىنا قاتاڭ بويسۇنىپ، جاي بۇقارا مەن حالىقتىق قۇرىلعىلارعا شابۋىل جاساۋدان ساقتانىپ، ايەلدەر، بالالار قاتارلى قاقتىعىستا زياندالۋشىلاردى قورعاۋعا؛ يادرولىق قۇرالداردى ىستەتپەۋ، يادرولىق سوعىس جۇرگىزبەۋ ۋادەسىن شىنايى ورىنداپ، ءارقانداي احۋالدا بيولوگيالىق قۇرال ىستەتۋگە قارسى تۇرۋعا، يادرو ەلەكتر ستانسياسى قاتارلى حالىقتىق يادرولىق قۇرىلعىلارعا قارۋلى شابۋىل جاساۋعا قارسى تۇرۋعا؛ بەيبىتشىلىك كەلىسسوزىن تەزىرەك قايتا باستاپ، بىرلەسكەن مەملەكەتتەر ۇيىمى ۋستاۆىنىڭ نەگىزگى ماقساتى جانە پرينسيبىنە نەگىزدەلىپ، تاراپتاردىڭ حاۋىپسىزدىك جونىندەگى ءجىتى قاداعالاپ وتىرعان ۇيلەسىمدى ماسەلەلەرىنە تەڭ ءمان بەرىپ، ساياسي جولمەن شەشۋگە ۇمتىلىپ، تەپە - تەڭ، ءونىمدى، باياندى ەۆروپا حاۋىپسىزدىك جۇلگەسىن ورناتۋعا؛ ۋكراينا داعدارىسىنىڭ استىق، ەنەرگيا، فينانس، قاتىناس سياقتى سالالاردا تۋدىرعان سىرتقا كەڭەيۋ اسەرىنە سەلبەسە توتەپ بەرىپ، ۋكراينا داعدارىسىنىڭ دۇنيە جۇزىنە، اسىرەسە، قالىڭ وركەندەپ كەلە جاتقان ەلدەرگە جاسايتىن كەرى ىقپالىن ازايتۋعا ۇندەيدى. جۇڭگو جاق فرانسيا جاقپەن وسى جونىندە پىكىر اۋىستىرۋدى ساقتاپ، داعدارىستى ساياسي جولمەن شەشۋدە سىندارلى رول اتقارۋدى قالايدى.
ماكرون فرانسيا جاقتىڭ كوزقاراسىن تانىستىرىپ، جۇڭگو جاقتىڭ ۋكراينا داعدارىسىن ساياسي جولمەن شەشۋدە اتقارعان ماڭىزدى رولىن القادى، فرانسيا جاقتىڭ ساياسي كەلىسسوزدى قايتا باستاپ، داعدارىستى ديپلوماتيالىق تاسىلمەن شەشىپ، ەۆروپانىڭ باياندى بەيبىتشىلىگىن جۇزەگە اسىرۋدى قۋاتتايتىندىعىن، جۇڭگو جاقپەن پىكىر اۋىستىرۋدى كۇشەيتىپ، بەيبىتشىلىك ءۇشىن بىرگە قۇلشىنۋدى ءۇمىت ەتەتىندىگىن ءبىلدىردى.
كەڭەستەن كەيىن، ەكى ەلدىڭ مەملەكەت باسشىلارى اۋىل شارۋاشىلىعى، ازىق - تۇلىك، عىلىم - تەحنيكا، اۆياتسيا، حالىقتىق يادرو ەنەرگياسى، باياندى دامۋ، مادەنيەت سياقتى سالالارداعى كوپتەگەن ەكى جاقتى سەلبەستىك حۇجاتتارىنا قول قويۋعا بىرگە كۋا بولدى.
ەكى ەلدىڭ مەملەكەت باسشىلارى تاعى بىرگە جۇڭگولىق، شەتەلدىك تىلشىلەرمەن كەزدەستى.
كەڭەستىڭ الدىندا شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا ماكروندى قارسى الۋ سالتىن وتكىزدى.
ماكرون جەتكەندە، قۇرمەت قاراۋىلى قاتار تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن فرانسيا ەكى ەلدىڭ مەملەكەت ءانىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. ماكرون شي جينپيڭنىڭ سەرىك بولۋىمەن جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن تاماشالادى.
ۋاڭ ي، چين گاڭ قاتارلىلار جوعارىداعى قيمىلدارعا قاتىناستى.
