14 - كەزەكتى مەملەكەتتىك حالىق قۇرىلتايىنىڭ 1 - ءماجىلىسى مەملەكەتتىڭ جاڭا كەزەكتى باسشىلارىن سايلاپ شىقتى
شي جينپيڭ مەملەكەتتىڭ ءتوراعالىعىنا، ورتالىق اسكەري ىستەر كوميتەتىنىڭ ءتوراعالىعىنا تولىق داۋىسپەن سايلاندى
جاۋ لىجي مەملەكەتتىك حالىق قۇرىلتايى تۇراقتى كوميتەتىنىڭ باستىقتىعىنا سايلاندى
حان جىڭ مەملەكەتتىڭ ورىنباسار ءتوراعالىعىنا سايلاندى
جاڭادان سايلانعان مەملەكەت باسشىلارى نەگىزگى زاڭ الدىندا سەرت بەردى
ءماجىلىس مەملەكەتتىك كەڭەس قۇرىلىمدارىنىڭ رەفورما جوباسىن بەكىتتى
جۇڭحۋا حالىق رەسپۋبليكاسىنىڭ ءتوراعاسى
جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعاسى
شي جينپيڭ
3 - ايدىڭ 10 - كۇنى 14 - كەزەكتى مەملەكەتتىك حالىق قۇرىلتايىنىڭ 1 - ءماجىلىسى بەيجيڭ حالىق سارايىندا ءۇشىنشى جالپى جيىنىن وتكىزدى. شي جينپيڭ جۇڭحۋا حالىق رەسپۋبليكاسىنىڭ ءتوراعالىعىنا، جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعالىعىنا تولىق داۋىسپەن سايلاندى. سۋرەتتە: شي جينپيڭ نەگىزگى زاڭ الدىندا سەرت بەرۋدە.
□ سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن
شينحۋا اگەنتتىگىنىڭ 3 - ايدىڭ 10 - كۇنى بەيجيڭنەن بەرگەن حابارى. 14 - كەزەكتى مەملەكەتتىك حالىق قۇرىلتايىنىڭ 1 - ءماجىلىسى 3 - ايدىڭ 10 - كۇنى تۇستەن بۇرىن شي جينپيڭدى جۇڭحۋا حالىق رەسپۋبليكاسىنىڭ ءتوراعالىعىنا، جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعالىعىنا سايلادى.
وسى سايلاۋ ناتيجەسى جاريالانعان كەزدە، بۇكىل زالدى ۇزاققا دەيىن شاتىرلاعان شاپالاق ءۇنى كەرنەدى.
جيىن سونىمەن بىرگە جاۋ لىجيدى 14 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ باستىقتىعىنا، حان جىڭدى جۇڭحۋا حالىق رەسپۋبليكاسىنىڭ ورىنباسار ءتوراعالىعىنا سايلادى.
تۇستەن بۇرىن ساعات 9دا 14 - كەزەكتى مەملەكەتتىك حالىق قۇرىلتايى 1 - ءماجىلىسىنىڭ ءۇشىنشى جالپى جيىنى حالىق سارايىندا وتكىزىلدى.
شي جينپيڭ، لي چياڭ، جاۋ لىجي، ۋاڭ حۋنيڭ، حان جىڭ، ساي چي، ديڭ شۋەشياڭ، لي شي قاتارلىلار جيىنعا قاتىناستى.
جيىنعا قاتىناسۋعا ءتيىستى ۋاكىل 2977 ادام، قاتىناسقانى 2952 ادام، 25 ادام قاتىناسا المادى، قاتىناسقان ادام سانى زاڭدا بەلگىلەنگەن ادام سانىنا ۇيلەسەدى.
جيىندى ءماجىلىستىڭ اتقارۋشى ءتوراعاسى، ءتوراعالار القاسىنىڭ تۇراقتى ءتوراعاسى لي گانجيە باسقاردى. ءماجىلىستىڭ اتقارۋشى ءتوراعالارى ۋاڭ جۇنجىڭ، ۋاڭ مىڭحۇي، شۇي چين، شىن شياۋميڭ، جوۋ زۋ - ي، جىڭ جيانمين، لياڭ يانشۇن، يۇي يۇنلين، لان فو - ان ءتوراعالار مىنبەسىنىڭ اتقارۋشى ءتوراعالار ورنىنا جايعاستى.
جيىن الدىمەن 14 - كەزەكتى مەملەكەتتىك حالىق قۇرىلتايى 1 - ءماجىلىسىنىڭ مەملەكەتتىك كەڭەس قۇرىلىمدارىنىڭ رەفورما جوباسى جونىندەگى قاۋلىسىن داۋىسقا سالىپ ماقۇلداپ، وسى جوبانى بەكىتتى. جيىن مىنانى تالاپ ەتتى: مەملەكەتتىك كەڭەس پارتيا ورتالىق كوميتەتىنىڭ ورتالىقتانعان ءبىر تۇتاس باسشىلىعىنا تاباندى بولىپ، ەگجەي - تەگجەيلى ورنالاستىرىپ، دەن قويا ۇيىمداستىرىپ، مەملەكەتتىك كەڭەس قۇرىلىمدارىنىڭ رەفورما مىندەتىن ورىنداۋعا شىنايى كەپىلدىك ەتۋى كەرەك.
جيىن 14 - كەزەكتى مەملەكەتتىك حالىق قۇرىلتايى 1 - ءماجىلىسىنىڭ سايلاۋ جانە مىندەتكە تاعايىنداۋدى ۇيعارۋ ءادىسىن داۋىسقا سالىپ ماقۇلدادى.
جيىنعا قاتىناسقان ۋاكىلدەر داۋىسقا سالۋ ارقىلى 35 ۋاكىلدەن ۇيىمداسقان باس بەلەت باقىلاۋشىنىڭ، بەلەت باقىلاۋشىلاردىڭ ەسىمدىگىن ماقۇلدادى. شى شياۋلين، لين حۇڭ باس بەلەت باقىلاۋشى بولدى.
ساعات 9دان 27 مينۋتتا سايلاۋ رەسمي باستالدى. بەلەت باقىلاۋشىلار الدىمەن جيىن زالىنا قويىلعان 28 ەلەكتروندى بەلەت ساندىعىنا، ەلەكتروندى سايلاۋ جۇيەسىنە تەكسەرۋ جۇرگىزدى. ىلە - شالا، قىزمەتكەرلەر سايلاۋ بەلەتىن تاراتا باستادى. 4 ءتۇرلى رەڭدەگى سايلاۋ بەلەتى ءاربىر ۋاكىلگە تاراتىلدى. سايلاۋ بەلەتى مەملەكەتتە ءبىر تۇتاس قولدانىلاتىن جازۋمەن جانە 7 ءتۇرلى از ۇلت جازۋىمەن باسىلدى.
وسىدان سوڭ، ۋاكىلدەر بەلەت تولتىرا باستادى. جيىن زالىنىڭ ارتقى جاعىنا قۇپيا بەلەت تولتىرۋ ورنى ورنالاستىرىلدى.
سايلاۋ جانە مىندەتكە تاعايىنداۋدى ۇيعارۋ ءادىسى بويىنشا، جۇڭحۋا حالىق رەسپۋبليكاسىنىڭ ءتوراعاسى، جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعاسى، 14 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ باستىعى، ورىنباسار باستىقتارى، باس حاتشىسى، جۇڭحۋا حالىق رەسپۋبليكاسىنىڭ ورىنباسار ءتوراعاسى تەڭ سانمەن سايلانادى.
ساعات 9دان 51 مينۋتتا باس بەلەت باقىلاۋشى، بەلەت باقىلاۋشىلار الدىمەن بەلەت تاستادى. ونان سوڭ ۋاكىلدەر بەلەت تاستاي باستادى. بەلەت تاستاۋ اياقتاعان سوڭ، باس بەلەت باقىلاۋشى سايلاۋ بەلەتىنىڭ تاراتىلۋ جانە جينالۋ جاعدايىن ايتىپ، سايلاۋدىڭ كۇشكە يە بولعانىن مالىمدەدى.
قىزمەتكەرلەر بەلەت ساناۋ ناتيجەسىن وقىدى.
بەلەت ساناۋ ناتيجەسى مەملەكەت ءتوراعاسىن، ورتالىق اسكەري ىستەر كوميتەتىنىڭ ءتوراعاسىن سايلاۋدا شي جينپيڭنىڭ بارلىق 2952 قۇپتاۋ بەلەتىنە يە بولعانىن كورسەتتى، بۇكىل زالداعىلار ورىندارىنان تۇرىپ، قىزۋ شاپالاق سوقتى.
باسقارۋشى بىلاي دەپ جاريالادى:
شي جينپيڭ جولداس جۇڭحۋا حالىق رەسپۋبليكاسىنىڭ ءتوراعالىعىنا سايلاندى.
شي جينپيڭ ۋاكىلدەرگە ءيىلىپ ىزەت ءبىلدىردى. بارلىق ۋاكىل ۇزاققا دەيىن قىزۋ شاپالاق سوعىپ، شي جينپيڭگە قۇرمەت ءبىلدىردى. قاسىندا تۇرعان لي جانشۋ، لي چياڭ شي جينپيڭمەن جەكە - جەكە قول الىسىپ، ونى قۇتتىقتادى.
باسقارۋشى شي جينپيڭ جولداستىڭ جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعالىعىنا سايلانعانىن جاريالاعان كەزدە زالدى تاعى ءبىر مارتە شاتىرلاعان شاپالاق ءۇنى كەرنەدى، شي جينپيڭ تاعى ءبىر رەت ۋاكىلدەرگە ءيىلىپ ىزەت ءبىلدىردى.
وسىدان سوڭ باسقارۋشى مىنالاردى كەزەكپەن جاريالادى:
جاۋ لىجي جولداس 14 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ باستىقتىعىنا سايلاندى.
حان جىڭ جولداس جۇڭحۋا حالىق رەسپۋبليكاسىنىڭ ورىنباسار ءتوراعالىعىنا سايلاندى.
لي حۇڭجۇڭ، ۋاڭ دۇڭميڭ، شياۋ جيە، جىڭ جيانباڭ، ديڭ جۇڭلي، حاۋ ميڭجين، ساي دافىڭ، حى ۋي، ۋ ۋيحۋا، تيە نيڭ، پىڭ چيڭحۋا، جاڭ چيڭۋي، لوساڭجياڭسۇن، شوكىرات زاكىر جولداستار 14 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىقتىعىنا سايلاندى.
ليۋ چي جولداس 14 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ باس حاتشىلىعىنا سايلاندى.
ءار سايلاۋدىڭ ناتيجەسى جاريالانعان سايىن، زالدان شاتىرلاعان شاپالاق ءۇنى كوتەرىلدى.
شاپالاق ءۇنى ىشىندە مەملەكەتتىك حالىق قۇرىلتايى تۇراقتى كوميتەتىنىڭ جاڭادان سايلانعان باستىعى جاۋ لىجي ورنىنان تۇرىپ، ۋاكىلدەرگە ءيىلىپ ىزەت ءبىلدىردى. وسىدان سوڭ ول شي جينپيڭنىڭ قاسىنا بارىپ، ەكەۋى ىقىلاستى قول الىستى، شي جينپيڭ ونى قۇتتىقتادى. جاۋ لىجي تاعى 13 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ باستىعى لي جانشۋمەن قول الىسىپ، ءوزارا قۇرمەت ءبىلدىرىستى.
شاپالاق ءۇنى ىشىندە مەملەكەتتىڭ جاڭادان سايلانعان ورىنباسار ءتوراعاسى حان جىڭ ورنىنان تۇرىپ، ۋاكىلدەرگە ءيىلىپ ىزەت ءبىلدىردى. وسىدان سوڭ ول شي جينپيڭنىڭ قاسىنا بارىپ، ەكەۋى ىقىلاستى قول الىستى، شي جينپيڭ ونى قۇتتىقتادى. حان جىڭ تاعى ۋاڭ چيشان جولداسپەن قول الىسىپ، ءوزارا قۇرمەت ءبىلدىرىستى.
14 - كەزەكتى مەملەكەتتىك حالىق قۇرىلتايى 1 - ءماجىلىسى ءتوراعالار القاسىنىڭ نەگىزگى زاڭ الدىندا سەرت بەرۋ جونىندەگى ۇيىمدىق ءادىسى بويىنشا، جالپى جيىننىڭ كەڭەستىك تارتىپتەرى اياقتاعان سوڭ، جۇڭحۋا حالىق رەسپۋبليكاسى 14 - كەزەكتى مەملەكەتتىك حالىق قۇرىلتايى 1 - ءماجىلىسىنىڭ نەگىزگى زاڭ الدىندا سەرت بەرۋ سالتى وتكىزىلدى.
ساعات 11دەن 7 مينۋتتا جۇڭگو حالىق ازاتتىق ارمياسىنىڭ اسكەري وركەسترىنىڭ كەرنايشىلارى زالدا سەرت بەرۋ كەرنايىن شالدى.
جۇڭگو حالىق ازاتتىق ارمياسىنىڭ 12 قۇرمەت قاراۋىلى ەكى قاتارعا ءبولىنىپ، جيىن زالىنىڭ ارتقى جاعىنان مارش قاداممەن ءجۇرىپ، ءتوراعالار مىنبەسىنىڭ الدىنا كەلىپ تۇردى.
بارلىق ادام ورنىنان تۇردى. ءتوراعالار مىنبەسىندە 3 قۇرمەت قاراۋىلى مارش قاداممەن «جۇڭحۋا حالىق رەسپۋبليكاسىنىڭ نەگىزگى زاڭىن» قورعاپ الىپ كەلىپ، نەگىزگى زاڭدى سەرت بەرۋ مىنبەرىنىڭ ۇستىنە قويدى.
اسكەري وركەستردىڭ سۇيەمەلدەۋىندە بۇكىل زالداعىلار جۇڭحۋا حالىق رەسپۋبليكاسىنىڭ مەملەكەت ءانىن اسقاقتاتا شىرقادى.
وسىدان سوڭ، قىزمەتكەر بىلاي دەپ جاريالادى: ەندى جۇڭحۋا حالىق رەسپۋبليكاسىنىڭ ءتوراعاسى، جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعاسى شي جينپيڭدى سەرت بەرۋگە ۇسىنىس ەتەمىز.
ءتوراعانىڭ ورتاعا شىعۋ كەرنايى شالىنىپ، جاڭادان سايلانعان مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ءتوراعالار مىنبەسىندەگى ورنىنان تۇرىپ، نىق قاداممەن سەرت بەرۋ مىنبەرىنىڭ الدىنا كەلىپ تۇردى.
ءتوراعالار مىنبەسىنىڭ تورىنە ىلىنگەن مەملەكەت گەربى شۇعىلا شاشىپ تۇردى. زالداعى مەملەكەتتىك حالىق قۇرىلتايىنىڭ 3000عا جۋىق ۋاكىلى وسىناۋ قاسيەتتى ساتكە بىرگە كۋا بولدى.
شي جينپيڭ سول قولىن نەگىزگى زاڭنىڭ ۇستىنە قويىپ، وڭ قولىن كوتەرىپ جۇدىرىعىن ءتۇيىپ، ايبىندى سەرت بەردى.
”مەن مىنانى سەرت ەتەمىن: جۇڭحۋا حالىق رەسپۋبليكاسىنىڭ نەگىزگى زاڭىنا ادال بولامىن، نەگىزگى زاڭنىڭ بەدەلىن قورعايمىن، زاڭدا بەلگىلەنگەن قىزمەت مىندەتىمدى اتقارامىن، وتانعا ادال بولامىن، حالىققا ادال بولامىن، ءوز قىزمەتىمدى بايىپتى، مۇقيات، جاقسى ىستەپ، پاك ءارى كوپشىل بولىپ، حالىقتىڭ باقىلاۋىن قابىلدايمىن، باي، قۇدىرەتتى، دەموكراتيالى، وركەنيەتتى، جاراسىمدى، كورىكتى سوتسياليستىك وسىزاماندانعان قۇدىرەتتى مەملەكەت قۇرۋ ءۇشىن قۇلشىنا كۇرەسەمىن“!
سەرتتىڭ ءور داۋىسى حالىق سارايىن جاڭعىرتتى.
سەرت بەرۋ اقىرلاسقان سوڭ، شي جينپيڭ زالداعىلارعا ءيىلىپ ىزەت ءبىلدىردى. زالدى ۇزاققا دەيىن شاتىرلاعان شاپالاق ءۇنى كەرنەدى.
وسىدان سوڭ، مەملەكەتتىك حالىق قۇرىلتايى تۇراقتى كوميتەتىنىڭ جاڭادان سايلانعان باستىعى جاۋ لىجي، مەملەكەتتىڭ جاڭادان سايلانعان ورىنباسار ءتوراعاسى حان جىڭ نەگىزگى زاڭ الدىندا جەكە - جەكە سەرت بەردى، مەملەكەتتىك حالىق قۇرىلتايى تۇراقتى كوميتەتىنىڭ جاڭادان سايلانعان ورىنباسار باستىقتارى، باس حاتشىسى نەگىزگى زاڭ الدىندا توپتىق سەرت بەردى.
