2 - ايدىڭ 14 - كۇنى مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەت ىستەرى ساپارىمەن كەلگەن يراننىڭ زۇڭتۇڭى رايسيمەن كەڭەس وتكىزدى. سۋرەتتە: كەڭەستەن ىلگەرى شي جينپيڭ حالىق سارايىنىڭ سولتۇستىك زالىندا رايسيدى قارسى الۋ سالتىن وتكىزدى.
□ سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن
شينحۋا اگەنتتىگىنىڭ 2 - ايدىڭ 14 - كۇنى بەيجيڭنەن بەرگەن حابارى (ءتىلشى ليۋ حۋا). 2 - ايدىڭ 14 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەت ىستەرى ساپارىمەن كەلگەن يراننىڭ زۇڭتۇڭى رايسيمەن كەڭەس وتكىزدى.
شي جينپيڭ بىلاي دەپ اتاپ كورسەتتى: جۇڭگو مەن يران ەكى ەلدىڭ ءداستۇرلى دوستىعى، ەكى ەل قارىم - قاتىناسى ءتۇرلى حالىقارالىق اۋمالى - توكپەلى وزگەرىستەردىڭ سىنىنان وتكەن. قازىرگى دۇنيە ءجۇزىنىڭ وزگەرىسى، ءداۋىردىڭ وزگەرىسى، تاريحتىڭ وزگەرىسى سىندى كۇردەلى جاعداي الدىندا، جۇڭگو مەن يران ءبىرىن - ءبىرى قولداپ، ىنتىماقتاسا سەلبەسىپ، قول ۇستاسا وتىرىپ جاڭا تيپتى ايدارشا ۆيرۋس ىندەتىنە قارسى اتتانىپ، ستراتەگيالىق ءوزارا سەنىمدىلىكتى ۇزدىكسىز بەكەمدەپ، ناقتى ىستەر سەلبەستىگىن ورنىقتى قاداممەن ىلگەرىلەتىپ، ورتاق مۇددەنى جەبەپ، حالىقارالىق ادىلدىكتى، تۋراشىلدىقتى قورعاپ، جۇڭگو − يران دوستىعىنىڭ جاڭا تاراۋىن جازدى. جۇڭگو جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتىپ، جوعارى ساپالى دامۋ مەن جوعارى دەڭگەيدەگى ەسىك اشۋدى تاباندىلىقپەن ىلگەرىلەتىپ، تاباندىلىقپەن دۇنيە ءجۇزىنىڭ بەيبىتشىلىگىن قورعاۋدا، بىرگە دامۋدى جەبەۋدە. جۇڭگو جاق جۇڭگو − يران قارىم - قاتىناسىنا باستان - اياق ستراتەگيالىق دەڭگەيدە مامىلە جاساپ جانە ونى دامىتىپ، حالىقارالىق جانە وڭىرلىك جاعداي قالاي وزگەرسە دە، جۇڭگو جاق يرانمەن بولعان دوستىق سەلبەستىكتى تيتتەي دە اۋىتقىماي دامىتىپ، جۇڭگو مەن يراننىڭ جان - جاقتى ستراتەگيالىق سەرىكتەستىك قارىم - قاتىناسىنىڭ ۇزدىكسىز تىڭ دامۋعا قول جەتكىزۋىن ىلگەرىلەتىپ، ءجۇز جىلدا بولماعان زور وزگەرىس بارىسىندا دۇنيە ءجۇزىنىڭ بەيبىتشىلىگى مەن ادامزاتتىڭ العا باسۋىندا بەلسەندى رول اتقارادى.
شي جينپيڭ بىلاي دەپ باسا دارىپتەدى: جۇڭگو جاق يران جاقتىڭ مەملەكەتتىڭ يەلىك ۇقىق تاۋەلسىزدىگىن، تەرريتوريا تۇتاستىعىن، ۇلتتىڭ ار - نامىسىن قورعاۋىن قولدايدى، يران جاقتىڭ سىڭار جاقتىلىققا، زورەكەرلىككە قارسى تۇرۋىن قولدايدى، سىرتقى كۇشتەردىڭ يراننىڭ ىشكى ىسىنە كيلىگۋىنە، يراننىڭ حاۋىپسىزدىگىن، ورنىقتىلىعىن بۇلدىرۋىنە قارسى تۇرادى، ءبىر - ءبىرىنىڭ وزەكتى مۇددەسىنە ساياتىن ماسەلەلەردە يران جاقپەن ۇزدىكسىز ءوزارا باتىل قولداۋ كورسەتۋدى قالايدى. جۇڭگو جاق يران جاقپەن بىرگە ەكى ەلدىڭ جان - جاقتى سەلبەستىك جوسپارىن ويداعىداي تياناقتاندىرىپ، ساۋدا، اۋىل شارۋاشىلىعى، ونەركاسىپ، نەگىزدىك قۇرىلعى سياقتى سالالارداعى ناقتى ىستەر سەلبەستىگىن تەرەڭدەتىپ، يراننىڭ اناعۇرلىم كوپ ساپالى اۋىل شارۋاشىلىق ونىمدەرىن يمپورت ەتۋدى قالايدى. جۇڭگو جاق يران جاقپەن ”ءبىر بەلدەۋ، ءبىر جولدى“ بىرگە قۇرۋ سەلبەستىگىن ۇزدىكسىز ورىستەتىپ، ءوزارا ۇلاستىرۋدى، تۇتاستىرۋدى جەبەپ، گۋمانيتارلىق اۋىس - كۇيىستى كەڭەيتۋدى قالايدى.
شي جينپيڭ بىلاي دەپ اتاپ كورسەتتى: ورتا شىعىستىڭ ورنىقتىلىعىن قورعاۋ وڭىردەگى ەلدەردىڭ جانە حالىقتىڭ ىرىس - قۇتىنا سايادى، دۇنيە ءجۇزىنىڭ بەيبىتشىلىگىن قورعاۋدا، الەم ەكونوميكاسىنىڭ دامۋىن جەبەۋدە، ەنەرگيامەن ورنىقتى قامداۋدى قامتاماسىز ەتۋدە ايرىقشا ماڭىزدى. جۇڭگو جاق يران جاقتىڭ توڭىرەكتەگى كورشى ەلدەرمەن قارىم - قاتىناستى بەلسەنە جاقسارتۋدى قالايتىندىعىن القايدى، وڭىردەگى ەلدەردىڭ تىلدەسۋ، كەڭەسۋ ارقىلى قايشىلىقتى جويىپ، تاتۋ كورشىلىك دوستىقتى جۇزەگە اسىرۋىن قولدايدى، ءوڭىردىڭ بەيبىتشىلىگى مەن ورنىقتىلىعىن جەبەۋدە ۇزدىكسىز تۇردە سىندارلى رول اتقارۋدى قالايدى. جۇڭگو جاق يران جاقپەن بىرلەسكەن مەملەكەتتەر ۇيىمى، شاڭحاي سەلبەستىك ۇيىمى سياقتى كوپ جاقتى تۇعىرلاردا بايلانىستى جانە سەلبەستىكتى كۇشەيتىپ، ناعىز كوپ جاقتىلىقتى امالياتتا ايگىلەپ، وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى. جۇڭگو جاق يراننىڭ يادرو ماسەلەسى جونىندەگى جالپى بەتتىك كەلىسىمدەگى ۋادەنى ورىنداۋدى قالپىنا كەلتىرۋ كەلىسسوزىنە ۇزدىكسىز بەلسەندى تۇردە قاتىناسىپ، يران جاقتىڭ ورىندى، زاڭدى ۇقىق - مۇددەسىن قورعاۋىن قولداپ، يراننىڭ يادرو ماسەلەسىنىڭ ەرتەرەك ۇيلەسىمدى شەشىلۋىن ىلگەرىلەتەدى.
رايسي مىنالاردى ءبىلدىردى: يران مەن جۇڭگونىڭ دوستىعى سىننان وتكەن، ۋاقىت وتكەن سايىن بەكەمدەلگەن. دەربەس، ءوز - وزىنە قوجايىن بولعان ەكى ءىرى ەل رەتىندە، يران − جۇڭگو قارىم - قاتىناسى ءوزارا قۇرمەت ەتۋ رۋحىن نەگىز ەتكەن، ءوزارا سەنىم ارتۋعا تاتيتىن شىنايى ستراتەگيالىق سەرىك. يران جاق يران مەن جۇڭگونىڭ جان - جاقتى ستراتەگيالىق سەرىكتەستىك قارىم - قاتىناسىن تەرەڭدەتۋگە جانە جوعارىلاتۋعا كۇش سالۋ بەكىمىنەن اۋىتقىمايدى، ءارقانداي حالىقارالىق جانە وڭىرلىك جاعداي وزگەرىسىنىڭ ىقپالىنا ۇشىرامايدى. يران جاق جۇڭگو جاقپەن تۇرلىشە دەڭگەيدەگى بارىس - كەلىستى كۇشەيتىپ، يران مەن جۇڭگونىڭ جان - جاقتى سەلبەستىك جوسپارىن ويداعىداي تياناقتاندىرىپ، ساۋدا، نەگىزدىك قۇرىلعى سياقتى سالالارداعى ناقتى ىستەر سەلبەستىگىن تەرەڭدەتۋدى ءۇمىت ەتەدى، جۇڭگو كاسىپورىندارىنىڭ يرانعا بارىپ قارجى قوسۋىن قارسى الادى، اناعۇرلىم كوپ جۇڭگولىق ساياحاتشىنىڭ يرانعا بارىپ ساياحاتتاۋىن ءۇمىت ەتەدى. يران جاق جۇڭگو جاقتىڭ يراننىڭ جاڭا تيپتى ايدارشا ۆيرۋس ىندەتىنە قارسى اتتانۋىنا قىمباتتى كومەك كورسەتكەندىگىنە العىس ايتادى، جۇڭگو جاقتىڭ يراننىڭ يادرو ماسەلەسى جونىندەگى جالپى بەتتىك كەلىسىم كەلىسسوزى سياقتى ماسەلەلەردە ادىلەتتى جاقتاعاندىعىنا العىس ايتادى. يران جاق جۇڭگو جاق العا قويعان ”ءبىر بەلدەۋ، ءبىر جول“ باستاماسىن، الەمدىك دامۋ باستاماسىن جانە الەمدىك حاۋىپسىزدىك باستاماسىن باتىل قولدايدى، بۇعان بەلسەنە ات سالىسادى. يران مەن جۇڭگو بىردەي سىڭار جاقتىلىق پەن زورەكەرلىككە باتىل قارسى تۇرادى، سىرتقى كۇشتەردىڭ ىشكى ىستەرگە كيلىگۋىنە باتىل قارسى تۇرادى. يران جاق جۇڭگو جاقتىڭ مەملەكەتتىڭ يەلىك ۇقىعى مەن تەرريتوريا تۇتاستىعىن قورعاۋىن باتىل قولدايدى. يران جاق جۇڭگو جاقپەن حالىقارالىق جانە وڭىرلىك ىستەر جونىندە بايلانىستى كۇشەيتىپ، شاڭحاي سەلبەستىك ۇيىمى سياقتى كوپ جاقتى ورىنداردا تاماشا سەلبەستىكتى ساقتاپ، حالىقارالىق ادىلدىك پەن ادىلەتتىلىكتى، ءوڭىردىڭ جانە دۇنيە ءجۇزىنىڭ بەيبىتشىلىگى مەن حاۋىپسىزدىگىن بىرگە قورعاۋدى قالايدى.
ەكى ەلدىڭ مەملەكەت باسشىلارى ورتاق كوڭىل ءبولىپ وتىرعان حالىقارالىق، وڭىرلىك ماسەلەلەر جونىندە دە پىكىر اۋىستىردى.
كەڭەستەن كەيىن، ەكى ەلدىڭ مەملەكەت باسشىلارى اۋىل شارۋاشىلىعى، ساۋدا، ساياحات، قورشاعان ورتانى قورعاۋ، دەنساۋلىق ساقتاۋ، اپاتتان قۇتقارۋ، مادەنيەت، دەنە تاربيە سياقتى سالالارداعى كوپتەگەن ەكى جاقتى سەلبەستىك حۇجاتتارىنا قول قويۋعا بىرگە كۋا بولدى.
كەڭەستەن ىلگەرى، شي جينپيڭ حالىق سارايىنىڭ سولتۇستىك زالىندا رايسيدى قارسى الۋ سالتىن وتكىزدى.
تيان - انمىن الاڭىندا 21 رەت قۇرمەت ساليۋتى اتىلدى، قۇرمەت قاراۋىلى قاتار تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن يران ەكى ەلدىڭ مەملەكەت ءانىن ورىندادى. رايسي شي جينپيڭنىڭ سەرىك بولۋىمەن جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن تاماشالادى.
ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.
رايسيدىڭ جۇڭگوداعى ساپارى كەزىندە ەكى جاق «جۇڭحۋا حالىق رەسپۋبليكاسى مەن يران ءىسلام رەسپۋبليكاسىنىڭ بىرلەسكەن مالىمدەمەسىن» جاريالايدى.
