ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 4 - ايدىڭ 8 - كۇنى تۇستەن بۇرىن استانادا مىندەتتى اعاش ەگۋ قيمىلىنا قاتىناسقاندا مىنالاردى دارىپتەدى: جۇڭحۋا ۇلتىنىڭ اعاشتى ايالاۋ، ەگۋ، قورعاۋ ءداستۇرىن ساۋلەلەندىرۋ، بۇكىل ەل، جالپى حالىق، بۇكىل قوعام ورتاق ات سالىسىپ، مەملەكەت جەرىن كەڭ كولەمدە جاسىلداندىرۋ قيمىلىن ىشكەرىلەي جۇرگىزۋ، مەملەكەت جەرىن جاسىلداندىرۋدا ۇزدىكسىز ناقتى ونىمدىلىككە قول جەتكىزۋ كەرەك.
كوكتەم لەبى ەسىپ، ومىرشەڭدىك تاسقىندادى. تۇستەن بۇرىن ساعات 10 نان 30 مينۋت وتكەندە پارتيا مەن مەملەكەت باسشىلارىنان شي جينپيڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلىلار اۆتوكولىكپەن بەيجيڭ قالاسى تۇڭجوۋ رايونى يۇڭشۇن قالاشىعىنا كەلىپ، استاناداعى بۇقارامەن بىرگە مىندەتتى اعاش ەگۋ قيمىلىنا قاتىناستى.
اعاش ەگۋ قيمىل ورنى بەيجيڭ قالاسىنىڭ قوسالقى ورتالىعى لۇيشين قالا ورمان باقشاسىندا، ەگۋ كولەمى شامامەن 500 مۋ. بۇل جەردە بۇرىن سالىنعان حيميا ونەركاسىپ زاۆودى قاتارلى قۇرىلعىلار شاعىلىپ، ورىن بوساتىلعاننان كەيىن جاسىلداندىرۋ قۇرىلىسىنا پايدالانىلدى ءارى بولاشاقتا بۇقارانىڭ سەيىل ـ سەرۋەن جاسايتىن قيمىل ورنىنا اينالادى.
اۆتوكولىكتەن تۇسە سالا شي جينپيڭ كۇرەك كوتەرىپ، اعاش ەگۋ ورنىنا قاراي ءجۇردى. اعاش ەگىپ جاتقان كادرلار مەن بۇقارا باس شۋجيدىڭ كەلگەنىن كورىپ، باس شۋجيگە امانداستى. شي جينپيڭ كوپشىلىككە قول بۇلعاپ قۇرمەت ءبىلدىردى. وسىدان سوڭ بەيجيڭ قالاسىنداعى، مەملەكەتتىك ورمان شارۋاشىلىق جانە جايىلىم باسقارۋ مەكەمەسىندەگى جاۋاپتى جولداستار، سونداي - اق، استاناداعى كادرلار مەن بۇقارا، پيونەرلەر قولدارىنا كۇرەك - قايلا الىپ شۇقاناق قازىپ، توپىراق توگىپ، سۋ قۇيىپ، جاسىلداندىرۋ جۇمىسىنا قاۋىرت كىرىسىپ كەتتى.
ماي قاراعاي، ەسەكميا، بوز ارشا، ماگنوليا، قىزىل اعاش، شاپتول... شي جينپيڭ 7 ءتۇپ قالامشا ەكتى. ول ءبىر جاعىنان ەڭبەك ىستەپ، ەندى ءبىر جاعىنان جانىنداعى پيونەرلەردىڭ ۇيرەنۋ، تۇرمىس جانە دەنە شىنىقتىرۋ جاعدايىن ۇعىستى، ولارعا قارشادايىنان تابيعاتتى قورعاۋ، ورتانى قورعاۋ تانىمىن ورناتۋدى، قوس قولدارىمەن وتاندى ءتىپتى دە كورىكتەندىرۋدى تاپسىردى، ولاردىڭ كىشكەنتاي قالامشالار سەكىلدى امان ەسەن ەسەيىپ – ەرجەتۋىن تىلەدى.
اعاش ەگۋ الاڭى دۋمانعا بولەندى. ەڭبەككە قاتىناسقان باسشى جولداستار كوپشىلىكپەن بىرگە كوشەت باپتاپ، شەلەكپەن سۋ قۇيىپ، جانىنداعى كادر - جۇرتشىلىقپەن ەكولوگيانى قورعاۋدى كۇشەيتۋ، جاسىل دامۋدا تاباندى بولۋ جونىندە كوزقاستارىن بايانداپ پىكىر اۋىستىردى.
اعاش ەگۋ ارەدىگىندە شي جينپيڭ سول جەردەگى كادر - جۇرتشىلىقپەن ىقىلاسپەن اڭگىمەلەستى. ول مىنالاردى اتاپ كورسەتتى: بيىل ــ جاڭا جۇڭگونىڭ اعاش ەگۋ مەرەكەسى باستالعانىنىڭ 40 جىلدىعى. 40 جىلدان بەرى ەلىمىزدىڭ ورمان كولەمى، ورمان قورى جەكە – جەكە ءبىر ەسە ارتىپ، ەكپە ورمان كولەمى دۇنيە ءجۇزى بويىنشا ءبىرىنشى ورىنعا شىقتى. ەلىمىزدىڭ بۇكىل جەر شارىنداعى وسىمدىك جامىلعىسىنىڭ ارتۋىنا قوسقان ۇلەسى دۇنيە ءجۇزى بويىنشا الدىڭعى ورىندى يەلەدى. سونىمەن بىرگە، ەلىمىزدىڭ ەكولوگيالىق قارىزى ءالى دە وتە زور، ورمان از ءارى جاسىلداندىرۋ جەتكىلىكسىز، ەكولوگياسى ءالسىز بولۋ ءالى دە زور كۇشپەن شەشۋگە ءتيىستى ماسەلە بولىپ وتىر.
