بارلىعىن حالىق ءۇشىن ىستەۋگە، بارلىعىندا حالىققا سۇيەنۋگە باستان - اياق تاباندى بولىپ، جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋ كەرەك

شي جينپيڭ جۇڭگو كوممۋنيستىك پارتياسى 20 - كەزەكتى ورتالىق كوميتەتى ساياسي بيۋروسى تۇراقتى كوميتەتىنىڭ مۇشەلەرىمەن بىرگە جۇڭگولىق، شەتەلدىك تىلشىلەرمەن كەزدەسكەندە بىلاي دەپ باسا دارىپتەدى

بارلىعىن حالىق ءۇشىن ىستەۋگە، بارلىعىندا حالىققا سۇيەنۋگە باستان - اياق تاباندى بولىپ، جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋ كەرەك

　　 10 - ايدىڭ 23 - كۇنى ەندى عانا جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءبىرىنشى جالپى ماجىلىسىندە سايلانعان جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ جانە جۇڭگو كوممۋنيستىك پارتياسى ورتالىق كوميتەتى ساياسي بيۋروسى تۇراقتى كوميتەتىنىڭ مۇشەلەرى لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي بەيجيڭ حالىق سارايىندا جۇڭگو كوممۋنيستىك پارتياسى 20 - قۇرىلتايىنا تىلشىلىك جاساعان جۇڭگولىق، شەتەلدىك تىلشىلەرمەن ىستىق ىقىلاسپەن كەزدەستى.

　　سۋرەتتە: شي جينپيڭ ماڭىزدى ءسوز سويلەۋدە.

　　□ سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

　　بۇكىل پارتيانىڭ، بۇكىل ەلدەگى ءار ۇلت حالقىنىڭ بىرگە قۇلشىنۋىنىڭ ارقاسىندا، ءبىز جاپپاي دوڭگەلەك داۋلەتتى قوعامدى ءدال ۋاعىندا ورناتتىق، ءبىرىنشى 100 جىلدىق كۇرەس نىساناسىن جۇزەگە اسىردىق. قازىر ءبىز جاپپاي سوتسياليستىك وسىزاماندانعان مەملەكەت قۇرۋدىڭ جاڭا جورىعىنا تاسقىنداعان جىگەرمەن قادام تاستاپ، ەكىنشى 100 جىلدىق كۇرەس نىساناسىنا قاراي جورىق جاساپ، جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋدەمىز.

　　جاڭا جورىقتا ءبىز اسقاق بەينەمەن ەكپىندەي ىلگەرىلەيتىن رۋحاني كۇيدى باستان - اياق ساقتاۋىمىز كەرەك.

　　جاڭا جورىقتا ءبىز بارلىعىن حالىق ءۇشىن ىستەۋگە، بارلىعىندا حالىققا سۇيەنۋگە باستان - اياق تاباندى بولۋىمىز كەرەك.

　　جاڭا جورىقتا ءبىز پارتيانىڭ وزىنە - ءوزى توڭكەرىس جاساۋىن باستان - اياق ىلگەرىلەتۋىمىز كەرەك.

　　جاڭا جورىقتا ءبىز بۇكىل ادامزاتقا ورتاق قۇندىلىقتى باستان - اياق اسقاقتاتۋىمىز كەرەك.

　　جۇڭگونىڭ دامۋى دۇنيە جۇزىنەن قول ۇزە المايدى، دۇنيە ءجۇزىنىڭ دامۋى دا جۇڭگونى قاجەت ەتەدى.

　　جاڭا جورىق − داڭق پەن ارمانعا تولى ۇزاق جورىق. ۇلى جوبا جاسالدى، دابىل الدەقاشان قاعىلدى. ءبىز اسقاق جىگەرمەن قايراتتانا ۇمتىلىپ، ەرلىكپەن العا ىلگەرىلەپ، ءتىپتى دە شۇعىلالى بولاشاق جاراتۋعا قۇلشىنۋىمىز كەرەك.

　　 شينحۋا اگەنتتىگىنىڭ 10 - ايدىڭ 23 - كۇنى بەيجيڭنەن بەرگەن حابارى. ەندى عانا جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءبىرىنشى جالپى ماجىلىسىندە سايلانعان جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ جانە جۇڭگو كوممۋنيستىك پارتياسى ورتالىق كوميتەتى ساياسي بيۋروسى تۇراقتى كوميتەتىنىڭ مۇشەلەرى لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي 10 - ايدىڭ 23 - كۇنى تۇستە حالىق سارايىندا جۇڭگو كوممۋنيستىك پارتياسىنىڭ 20 - قۇرىلتايىنا تىلشىلىك جاساعان جۇڭگولىق، شەتەلدىك تىلشىلەرمەن ىستىق ىقىلاسپەن كەزدەستى.

　　حالىق سارايىنىڭ جينسى زالىندا الۋان ءتۇرلى شىراقتار جارقىراپ، قىزۋ دۋماندى سالتانات لەبى ەسەدى. جۇڭگولىق، شەتەلدىك 600دەن استام ءتىلشى وسى اراعا كەلىپ، جاڭا كەزەكتى جۇڭگو كوممۋنيستىك پارتياسى ورتالىق كوميتەتى ساياسي بيۋروسى تۇراقتى كوميتەتى مۇشەلەرىنىڭ تۇڭعىش رەت توپتىق الدىعا شىعۋ ءساتىن بۇكىل الەمگە حابارلادى.

　　ساعات 12دەن 5 مينۋت وتكەندە شي جينپيڭ قاتارلىلار شاتىرلاعان شاپالاق ءۇنى ىشىندە زالعا كىرىپ، زالداعى جۇڭگولىق، شەتەلدىك تىلشىلەرگە قول بۇلعاپ، قۇرمەت ءبىلدىردى.

　　جۇڭگو كوممۋنيستىك پارتياسى 20 - قۇرىلتايىنىڭ اقپارات مالىمدەمەشىسى سۇن يەلي قىسقاشا تانىستىرۋ جاساعاننان كەيىن، شي جينپيڭ ماڭىزدى ءسوز سويلەدى. شي جينپيڭ الدىمەن مىنالاردى ءبىلدىردى: ءتىلشى دوستارمەن وسى ارادا كەزدەسكەنمە وتە قۋانىشتىمىن. كەشە جۇڭگو كوممۋنيستىك پارتياسىنىڭ مەملەكەتتىك 20 - قۇرىلتايى جەڭىسپەن جابىلدى. بۇل تۋدى بيىك ۇستاعان، كۇش - قۋاتتى ۇيىستىرعان، ىنتىماقتاسا ەكپىندەي ىلگەرىلەگەن قۇرىلتاي بولدى. حالىقارالىق قوعام جۇڭگو كوممۋنيستىك پارتياسىنىڭ 20 - قۇرىلتايىنا ايرىقشا نازار اۋداردى. كوپتەگەن ەلدەردىڭ ساياسي پارتيالارى قۇتتىقتاۋ تەلەگراممالارىن، قۇتتىقتاۋ حاتتارىن جولدادى، مۇنىڭ كوبىن مەملەكەت باسشىلارى، ۇكىمەت جەتەكشىلەرى، ساياسي پارتيالار مەن ماڭىزدى ۇيىمدىق قۇرىلىمداردىڭ باسشىلارى جولدادى. وسى ورايدا مەن جۇڭگو كوممۋنيستىك پارتياسى ورتالىق كوميتەتى اتىنان شىن جۇرەكتەن العىس ايتامىن.

　　شي جينپيڭ كوپشىلىككە جۇڭگو كوممۋنيستىك پارتياسى ورتالىق كوميتەتى ساياسي بيۋروسى تۇراقتى كوميتەتىنىڭ باسقا دا مۇشەلەرىن تانىستىرعاننان كەيىن، جاڭا كەزەكتى جۇڭگو كوممۋنيستىك پارتياسى ورتالىق كوميتەتىنىڭ باسشىلىق قۇرامىنداعىلار اتىنان بۇكىل پارتياداعى جولداستاردىڭ سەنىم ارتقاندىعىنا شىن جۇرەكتەن العىس ايتىپ، ءسوز جوق، پارتيانىڭ سيپاتى مەن باس ماقساتىن ەستە بەرىك ساقتاپ، ءوز بورىشتارى مەن جاۋاپكەرشىلىكتەرىن ەستە بەرىك ساقتاپ، قىزمەتتىڭ تالابىنان شىعىپ، قىزمەتتى قۇلشىنا ىستەپ، پارتيا مەن حالىقتىڭ ماڭىزدى تاپسىرماسىن، ءسوزسىز، ورىندايتىندىقتارىن ءبىلدىردى.

　　شي جينپيڭ بىلاي دەپ اتاپ كورسەتتى: بۇكىل پارتيانىڭ، بۇكىل ەلدەگى ءار ۇلت حالقىنىڭ بىرگە قۇلشىنۋىنىڭ ارقاسىندا، ءبىز جاپپاي دوڭگەلەك داۋلەتتى قوعامدى ءدال ۋاعىندا ورناتتىق، ءبىرىنشى 100 جىلدىق كۇرەس نىساناسىن جۇزەگە اسىردىق. قازىر ءبىز جاپپاي سوتسياليستىك وسىزاماندانعان مەملەكەت قۇرۋدىڭ جاڭا جورىعىنا تاسقىنداعان جىگەرمەن قادام تاستاپ، ەكىنشى 100 جىلدىق كۇرەس نىساناسىنا قاراي جورىق جاساپ، جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋدەمىز.

　　شي جينپيڭ بىلاي دەپ باسا دارىپتەدى: جاڭا جورىقتا ءبىز اسقاق بەينەمەن ەكپىندەي ىلگەرىلەيتىن رۋحاني كۇيدى باستان - اياق ساقتاۋىمىز كەرەك. جاپپاي سوتسياليستىك وسىزاماندانعان مەملەكەت قۇرۋ جۇڭحۋا ۇلتىنىڭ اسىل ارمانى مەن تىلەگىن ارقالاعان، وعان جۇڭگو حالقىنىڭ كۇرەسى مەن ماڭداي تەرى سىڭگەن. جۇڭگو ۇلگىسىندەگى وسىزامانداندىرۋ − جۇڭگو كوممۋنيستىك پارتياسى مەن جۇڭگو حالقىنىڭ ۇزاق ۋاقىتتىق امالياتتىق ىزدەنىسىنىڭ جەمىسى، ۇلى دا جاپالى ءىس. جاپالى بولعاندىعى سەبەپتى ۇلى، جاپالى بولعاندىعى سەبەپتى اناعۇرلىم داڭقتى. وسى ۇلى ءىس جولىندا سانسىزداعان اعا بۋىندار ماشاقات - قيىندىقتا قاجىرلىلىقپەن ءىز اشىپ، كەدەرگى - بوگەتتەردى الاستاپ، جاپالى دا ەرەن كۇرەس جۇرگىزدى، ءبىز ولاردىڭ قوسقان ۇلەسى مەن بەرگەن بوداۋىن ماڭگى ەستە ساقتايمىز. ءبىز قاجىرلىلىقپەن ىستەپ، جاۋاپكەرشىلىك ارقالاپ، ىسكەرلىك كورسەتىپ، اناعۇرلىم كۇشتى تاريحي ىرىقتىلىق رۋحىمەن ماركسيزمنىڭ جۇڭگوشالانۋىن، زامانالانۋىن ىلگەرىلەتىپ، جاڭا داۋىردەگى جۇڭگوشا سوتسياليزمنىڭ جاڭا تاراۋىن ۇزدىكسىز جازىپ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋعا قۇلشىنۋىمىز كەرەك.

　　شي جينپيڭ بىلاي دەپ اتاپ كورسەتتى: جاڭا جورىقتا ءبىز بارلىعىن حالىق ءۇشىن ىستەۋگە، بارلىعىندا حالىققا سۇيەنۋگە باستان - اياق تاباندى بولۋىمىز كەرەك. باسىپ وتكەن جولىمىزدا ءبىز حالىققا تىعىز سۇيەنىپ، تاريح بەتىندە قالارلىق تالاي - تالاي جاۋاپنامالاردى تاپسىردىق. بولاشاقتى بەتكە العاندا، ءبىز ءالى دە حالىققا سۇيەنىپ، جاڭا تاريحي ۇلى ىستەر جاراتۋىمىز كەرەك. العا باسۋ جولى كەدەرگىگە تولى ءارى ۇزاق، تاباندىلىقپەن تالىقپاي جۇرگەندە عانا كوزدەگەن كومبەگە جەتۋگە بولادى. العا باسۋ جولىندا مەيلى بوران - شاشىن بولسىن، الدە اساۋ تولقىندار بولسىن، حالىق ماڭگى ءبىزدىڭ ەڭ بەرىك سۇيەنىشىمىز، ەڭ قۋاتتى كۇشىمىز. ءبىز باستان - اياق حالىقپەن قيىن - قىستاۋ شاقتاردى بىرگە وتكەرىپ، حالىقپەن تىلەكتەس بولىپ، حالىقتىڭ ويلاعانىن ويلاپ، حالىقتىڭ تاپسىرماسىن ورىنداپ، حالىقتىڭ تاماشا تۇرمىسقا دەگەن تالپىنىسىن ۇزدىكسىز رەالدىققا اينالدىرۋىمىز كەرەك.

　　شي جينپيڭ بىلاي دەپ باسا دارىپتەدى: جاڭا جورىقتا ءبىز پارتيانىڭ وزىنە - ءوزى توڭكەرىس جاساۋىن باستان - اياق ىلگەرىلەتۋىمىز كەرەك. سان - ساناقسىز وزگەرىستى باستان كەشسە دە، اۋەلگى ماقساتىنان اينىماعان پارتيا عانا، نەگىزى مىعىم بولىپ، مىزعىماي تۇرا الادى؛ شۇعىلالى ناتيجە جاراتسا دا، جۇرەكتىلىكپەن وزىنە - ءوزى توڭكەرىس جاساعان پارتيا عانا، الماس قامالى بولمايتىن جەڭىمپاز بولا الادى. 100 جىلدىق بوران - شاشىندى باستان كەشىرىپ، بولاتتاي بەرىك سومدالۋ، اسىرەسە، جاڭا داۋىردەگى 10 جىلدىق توڭكەرىستىك شىڭدالۋ ارقىلى جۇڭگو كوممۋنيستىك پارتياسى اناعۇرلىم باتىل دا پارمەندى، اناعۇرلىم ومىرشەڭدىك كۇشكە تولى بولدى. جاڭا جورىقتاعى جاڭا سىن - سايىس، جاڭا سىناقتار الدىندا، ءبىز، ءسوز جوق، اسا قىراعى بولىپ، ەمتيحان تاپسىراتىن سەرگەكتىك پەن بايسالدىلىقتى ماڭگى ساقتاپ، پارتيانى جاپپاي قاتاڭ باسقارۋدى قاجىماي - تالماي ىلگەرىلەتىپ، 100 جىلدىق ءىرى پارتيانى وزىنە - ءوزى توڭكەرىس جاساۋ بارىسىندا جالىندى ومىرشەڭدىگىن ۇزدىكسىز تاسقىنداتىپ، باستان - اياق جۇڭگو حالقىنىڭ ەڭ سەنىمدى، ەڭ بەرىك تىرەگىنە اينالدىرۋىمىز كەرەك.

　　شي جينپيڭ بىلاي دەپ اتاپ كورسەتتى: جاڭا جورىقتا ءبىز بۇكىل ادامزاتقا ورتاق قۇندىلىقتى باستان - اياق اسقاقتاتۋىمىز كەرەك. قازىرگى تاڭداعى دۇنيە ءجۇزى بۇرىن بولماعان سىن - سايىسقا ءدوپ كەلىپ وتىر. ءبىز ادامزاتتىڭ بولاشاعى مەن تاعدىرىن دۇنيە جۇزىندەگى ءار ەل حالقى يگەرۋى جانە بەلگىلەۋى كەرەك دەگەندى ەجەلدەن دارىپتەپ كەلەمىز. الەم حالقى داڭعىل جولمەن بىرگە جۇرگەندە عانا، ءار ەل تاتۋ - ءتاتتى ءوتىپ، سەلبەسىپ تەڭ يگىلىككە كەنەلىپ، دۇنيە ءجۇزىنىڭ كوركەم بولاشاعىن قول ۇستاسا جاراتا الادى. ءبىز ءار ەل حالقىمەن بىرگە بەيبىتشىلىك، دامۋ، ادىلدىك، تۋراشىلدىق، دەموكراتيا، ەركىندىك سىندى بۇكىل ادامزاتقا ورتاق قۇندىلىقتى اسقاقتاتىپ، دۇنيە ءجۇزىنىڭ بەيبىتشىلىگىن قورعاپ، دۇنيە ءجۇزىنىڭ دامۋىن جەبەپ، ادامزاتتىڭ تاعدىرلاس ورتاق تۇلعاسىن قۇرۋدى ۇزدىكسىز ىلگەرىلەتەمىز.

　　شي جينپيڭ بىلاي دەپ باسا دارىپتەدى: جۇڭگونىڭ دامۋى دۇنيە جۇزىنەن قول ۇزە المايدى، دۇنيە ءجۇزىنىڭ دامۋى دا جۇڭگونى قاجەت ەتەدى. رەفورما جاساعان، ەسىك اشقان 40 نەشە جىلدان بەرى، ءبىز قاجىماي - تالماي قۇلشىنۋ ارقىلى ەكونوميكانىڭ جىلدام دامۋى جانە قوعامنىڭ ۇزاق ۋاقىت ورنىقتى بولۋى سىندى ەكى ۇلى كەرەمەتتى جاراتتىق. قازىر جۇڭگو ەكونوميكاسىنىڭ سەرپىمدىلىگى كۇشتى، كومەسكى كۇشى جەتكىلىكتى، مۇمكىندىكتەرى كەڭ، ۇزاق ۋاقىت جاقسارعان نەگىزگى جاعدايى وزگەرمەيدى. جۇڭگونىڭ اشىلعان ەسىگى تەك بارعان سايىن ايقارا اشىلادى. ءبىز رەفورما جاساۋدى، ەسىك اشۋدى بۇلجىماستان جاپپاي تەرەڭدەتىپ، جوعارى ساپالى دامۋدى بۇلجىماستان ىلگەرىلەتىپ، ءوزىمىزدىڭ دامۋىمىز ارقىلى دۇنيە جۇزىنە اناعۇرلىم كوپ وراي جاراتامىز.

　　شي جينپيڭ بىلاي دەپ اتاپ كورسەتتى: جاڭا جورىق − داڭق پەن ارمانعا تولى ۇزاق جورىق. ۇلى جوبا جاسالدى، دابىل الدەقاشان قاعىلدى. ءبىز اسقاق جىگەرمەن قايراتتانا ۇمتىلىپ، ەرلىكپەن العا ىلگەرىلەپ، ءتىپتى دە شۇعىلالى بولاشاق جاراتۋعا قۇلشىنۋىمىز كەرەك.

　　شي جينپيڭ سوڭىندا بىلاي دەدى: بىرنەشە كۇننەن بەرى ءتىلشى دوستار قۇرىلتايدى تولىق حابارلاپ، بۇكىل دۇنيە جۇزىنە جۇڭگونىڭ ءۇنىن جەتكىزىپ، جۇڭگو كوممۋنيستىك پارتياسىنىڭ دارىپتەمەسىن تاراتىپ، دۇنيە ءجۇزىنىڭ نازارىن جۇڭگوعا اۋداردى. سىزدەردىڭ قاجىرلىلىقپەن قىزمەت ىستەگەندىكتەرىڭىزگە العىس ايتامىن، كوپشىلىك جاپا شەكتىڭىزدەر. كوپشىلىكتىڭ جۇڭگونىڭ جەر - جەرىن كوبىرەك ارالاپ، كورىپ، دۇنيە جۇزىنە جۇڭگو حيكاياسىن وبيەكتيۆ، شىنايى تۇردە جاقسى بايانداۋىن، جۇڭگو كوممۋنيستىك پارتياسىنىڭ حيكاياسىن جاقسى بايانداۋىن، ءبىز باستان كەشىرىپ جاتقان جاڭا ءداۋىر حيكاياسىن جاقسى بايانداۋىن قارسى الامىز.

　　ساعات 12دەن 30 مينۋت وتكەندە كەزدەسۋ ءماجىلىسى اياقتادى. شي جينپيڭ قاتارلىلار جۇڭگولىق، شەتەلدىك تىلشىلەرگە قول بۇلعاپ قوشتاستى. بۇكىل زالدان تاعى دا شاتىرلاعان شاپالاق ءۇنى كوتەرىلدى.

　　ورتالىق راديو - تەلەۆيزيا باس ستانسياسى مەن شينحۋا سايتى ۇستىنەن تىكە تاراتتى.