شينحۋا اگەنتتىگىنىڭ 9 - ايدىڭ 16 - كۇنى وزبەكستان سامارحاننان بەرگەن حابارى (تىلشىلەر فان ۋيگو، ليۋ حۋا). جەرگىلىكتى ۋاقىت 9 - ايدىڭ 16 - كۇنى مەملەكەت ءتوراعاسى شي جينپيڭ سامارحان حالىقارالىق ءماجىلىس ورتالىعىندا شاڭحاي سەلبەستىك ۇيىمىنا مۇشە ەلدەر مەملەكەت باسشىلارى القالار كەڭەسى 22 - رەتكى ءماجىلىسىنىڭ شاعىن كولەمدى كەڭەسىنە قاتىناستى.
وزبەكستان زۇڭتۇڭى مىرزيويەۆ ءماجىلىستى باسقاردى، شاڭحاي سەلبەستىك ۇيىمىنا مۇشە ەلدەردەن رەسەي زۇڭتۇڭى پۋتين، قازاقستان زۇڭتۇڭى توقايەۆ، قىرعىزستان زۇڭتۇڭى جاپاروۆ، تاجىكستان زۇڭتۇڭى راحمون، ءۇندىستان زۇڭليى مودي، پاكيستان زۇڭليى شاھباز قاتىناسىپ، شاڭحاي سەلبەستىك ۇيىمىنىڭ دامۋى جانە وڭىرلىك ساياسي، ەكونوميكالىق جاعدايعا ساياتىن كەلەلى حالىقارالىق جانە وڭىرلىك ماسەلەلەر جونىندە پىكىر اۋىستىردى.
جەرگىلىكتى ۋاقىت تۇستەن بۇرىن ساعات 9دان 55 مينۋت وتكەن مولشەردە شي جينپيڭ جانە شاڭحاي سەلبەستىك ۇيىمىنا مۇشە ەلدەردىڭ باسشىلارى سامارحان حالىقارالىق ءماجىلىس ورتالىعىنا ىركەس - تىركەس بارىپ، مىرزيويەۆ زۇڭتۇڭنىڭ ىقىلاستى قارسى الۋىنا بولەندى.
شاڭحاي سەلبەستىك ۇيىمىنا مۇشە ەلدەر باسشىلارى توپتىق سۋرەتكە ءتۇستى، ونان كەيىن شاعىن كولەمدى كەڭەس وتكىزدى.
شي جينپيڭ سوزىندە وزبەكستاننىڭ كەزەكتى ءتوراعا ەل بولىپ تۇرعان كەزىندە سامارحان باسشىلار ءماجىلىسى سياقتى قيمىلدارعا دايىندىق كورۋ، وسى ۇيىمنىڭ دامۋىن ىلگەرىلەتۋ جاقتارىندا كورسەتكەن بەلسەندى قۇلشىنىسى مەن ماڭىزدى ۇلەسىن جوعارى باعالادى.
شي جينپيڭ بىلاي دەپ اتاپ كورسەتتى: شاڭحاي سەلبەستىك ۇيىمى قۇرىلعان 20 نەشە جىلدان بەرى ”شاڭحاي رۋحى“ تۋىن باستان - اياق بيىك ۇستاپ، بىرتىندەپ ءساتتى تۇردە جاڭاشا حالىقارالىق ۇيىمداردىڭ ءوسىپ - جەتىلۋ، ۇلعايۋ جولىن تاۋىپ، ءبىر قىدىرۋ وي سالارلىق ءمان - ماڭىزعا يە ماڭىزدى تاجىريبەلەر توپتادى، قالىپتاستىردى.
ساياسي سەنىمدىلىكتى جەتىلدىرۋ كەرەك. مۇشە ەلدەر ۇرپاقتان - ۇرپاققا جالعاسقان دوستىقتان جازباي، بەيبىتشىلىك ۇستانىمىن ماڭگى ساقتاپ، ءبىر - ءبىرىنىڭ وزەكتى مۇددەسى مەن تاڭداعان دامۋ جولىنا قۇرمەت ەتىپ، تاراپتاردىڭ بەيبىتشىلىكتى، ورنىقتىلىقتى جانە دامۋدى، گۇلدەنۋدى جۇزەگە اسىرۋىن قولداۋ كەرەك. ءبىر - بىرىنە پايدا جەتكىزەتىن سەلبەستىك ورىستەتۋ كەرەك. ءبىر - ءبىرىنىڭ مۇددە تىلەك - تالاپتارىمەن ساناسىپ، بىرگە اقىلداسۋ، بىرگە قۇرۋ، بىرگە يگىلىكتەنۋ پرينسيبىنە تاباندى بولىپ، دامۋ ستراتەگيالارىن ۇشتاستىرۋدى كۇشەيتىپ، باستان - اياق ءوزارا پايدا جەتكىزىپ، تەڭ يگىلىككە كەنەلۋ، بىرگە كوركەيۋ جولىمەن ءجۇرۋ كەرەك. تەڭ تۇرعىدا مامىلە جاساۋدان جازباۋ كەرەك. ۇلكەن - كىشى ەلدەردىڭ تەرەزەسىنىڭ تەڭ بولۋىن دارىپتەپ، كەڭەسىپ ءبىر اۋىزدىلىققا كەلۋ پرينسيبىن اتقارىپ، ىسكە جولىققاندا كوبىرەك اقىلداسۋ، جۇمىس بولسا كەڭەسىپ شەشۋ، ۇلكەننىڭ كىشىنى باسىنۋىنا، كۇشتىنىڭ ءالسىزدى باسىنۋىنا جول بەرمەۋ كەرەك. ەسىك اشۋدى، سيىسىمدى بولۋدى دارىپتەۋ كەرەك. تۇرلىشە مەملەكەتتەردىڭ، تۇرلىشە ۇلتتاردىڭ، تۇرلىشە مادەنيەتتەردىڭ جاراسىمدى قاتار تۇرۋىن، ءوزارا ۇيرەنىپ، ءوزارا ۇلگى الۋىن قۋاتتايمىز، وركەنيەتتەر تىلدەسۋىن، پارىقتاردى تاستاپ، ورتاقتىققا ۇمتىلۋدى دارىپتەيمىز، مۇراتتاس، جولى ءبىر اناعۇرلىم كوپ ەلدەرمەن جانە حالىقارالىق ۇيىمدارمەن سەرىكتەستىك قارىم - قاتىناس ورناتۋدى جانە ءوزارا ءتيىمدى سەلبەستىكتى دامىتۋدى قالايمىز.
شي جينپيڭ بىلاي دەپ باسا دارىپتەدى: قازىرگى تاڭداعى دۇنيە ءجۇزى تىنىش ەمەس. ىنتىماقتاسۋ مەن بولشەكتەنۋ، سەلبەسۋ مەن قارسىلاسۋ سىندى ەكى ۇلكەن ساياسات اۋقىمداعى تىرەسۋ، بايقاسۋ كۇن سايىن كورنەكتىلەنۋدە. بۇل ءارى دۇنيە ءجۇزىنىڭ بەيبىتشىلىگىن، ورنىقتىلىعىن سوققىلايدى، سونداي - اق وسى ءوڭىردىڭ ۇزاق بولاشاقتىق دامۋىنا دا پايداسىز. كۇردەلى جاعداي الدىندا، ءبىز ۇيىمىمىزدىڭ دامۋ بەتالىسىن ءدال يگەرىپ، ءتۇرلى سالالارداعى سەلبەستىكتى تەرەڭدەتىپ، مۇشە ەلدەردىڭ دامۋىنا، گۇلدەنۋىنە ۇزدىكسىز پايدالى ورتا جاراتۋىمىز كەرەك.
شي جينپيڭ تومەندەگىدەي قىزمەتتەردى ءتۇيىندى تۇردە ىلگەرىلەتۋدى ۇسىنىس ەتتى.
ءبىرىنشى، ”شاڭحاي رۋحىن“ اسقاقتاتۋعا تاباندى بولىپ، ىنتىماقتى، سەلبەستىكتى نىعايتۋ. ۇيىمىمىزدىڭ اۋەلگى ماقساتىن، بورىشىن باتىل ساقتاپ، ءوزارا سەنىمدىلىكتى ارتتىرىپ، سىرتقى ورتانىڭ كۇردەلى وزگەرىسىنە كۇش بىرىكتىرە توتەپ بەرۋ كەرەك. ءبىر - ءبىرىنىڭ وزەكتى مۇددەسى مەن كەلەلى ءجىتى قاداعالاپ وتىرعان ىستەرىنە ساياتىن ماسەلەلەردە ۇزدىكسىز ءوزارا قولداۋ كورسەتىپ، ءبىر - ءبىرىنىڭ دامۋىن، گۇلدەنۋىن جۇزەگە اسىراتىن قۋاتتى تىرەككە اينالۋ كەرەك.
ەكىنشى، ستراتەگيالىق جاقتان ءوزىن - ءوزى باسقارۋعا تاباندى بولىپ، ءوڭىردىڭ ورنىقتىلىعىن قورعاۋ. ورتاقتىق، جالپىلىق، سەلبەستىك، باياندىلىق حاۋىپسىزدىك كوزقاراسىن دارىپتەپ، توپقا ءبولىنىپ قارسىلاسۋ تۋدىراتىن، ءوڭىردىڭ ورنىقتىلىعىن بۇلدىرەتىن ءارقانداي قاسكۇنەمدىككە قارسى تۇرۋ كەرەك. وڭىردەگى ەلدەردىڭ حاۋىپسىزدىك قاجەتىن تياناق ەتىپ، حاۋىپسىز سەلبەستىك ورتاق تانىمىن نىعايتىپ، ءوڭىردىڭ باياندى تىنىشتىعىن كۇش بىرىكتىرە قورعاۋ كەرەك. ۇيىمىمىزدىڭ زاڭ اتقارۋ حاۋىپسىزدىك سەلبەستىگى دەڭگەيىن جوعارىلاتىپ، لاڭكەس، ۇشقارى كۇشتەردىڭ ءوڭىردىڭ حاۋىپسىزدىگىنە لاڭ سالۋىنان قاتاڭ ساقتانۋ كەرەك.
ءۇشىنشى، جالپىعا ءتيىمدى، سيىسىمدى بولۋعا تاباندى بولىپ، دامۋ سەلبەستىگىن ىلگەرىلەتۋ. ساۋدا مەن قارجى قوسۋدىڭ ەركىن، قولايلى بولۋىن بەلسەنە ىلگەرىلەتىپ، كاسىپ سالاسى تىزبەگىنىڭ، قامداۋ تىزبەگىنىڭ ورنىقتىلىعىن، ىركىلىسسىزدىگىن قورعاپ، بايلىق فاكتورلارىنىڭ ءتارتىپتى اينالىمىن جەبەپ، وڭىرلىك ەكونوميكانىڭ توعىسا دامۋىن جۇزەگە اسىرۋ كەرەك. ”ءبىر بەلدەۋ، ءبىر جولدى“ بىرگە قۇرۋ باستاماسىن ءار ەلدىڭ دامۋ ستراتەگياسىمەن جانە باسقا دا وڭىرلەردى ءبىر تۇلعالاندىرۋ باستاماسىمەن ۇشتاستىرۋدى كۇشەيتىپ، ءار ەلدىڭ ەكونوميكالىق ارتۋ ومىرشەڭدىك كۇشىن قاۋلاتۋ كەرەك.
ءتورتىنشى، مۇشەلەردى كەڭەيتۋ اياق الىسىن ىلگەرىلەتۋگە تاباندى بولىپ، ۇيىمدىق مەحانيزم قۇرىلىسىن كەمەلدەندىرۋ. ءتىپتى دە كوپ ەلدەردىڭ ”شاڭحاي سەلبەستىك ۇيىمى ۇلكەن شاڭىراعىنا“ كىرۋگە ءوتىنىش بەرۋى شاڭحاي سەلبەستىك ۇيىمى سەلبەستىك ۇستانىمىنىڭ جۇرت جۇرەگىنە تەرەڭ ۇيالاعاندىعىن، دامۋ بولاشاعىنا جۇرتتىڭ جاپپاي ءۇمىت ارتىپ وتىرعاندىعىن تولىق ايگىلەدى. ورايدى يگەرىپ، جەدەل قىزمەت ىستەپ، ۇيىمىمىزدىڭ سەلبەستىك قوسىنىن ۇزدىكسىز كەڭەيتىپ، حالىقارالىق ادىلدىكتى، تۋراشىلدىقتى قورعايتىن جالىندى كۇشىن زورايتۋ كەرەك.
شي جينپيڭ بىلاي دەپ باسا دارىپتەدى: جۇڭگو كوممۋنيستىك پارتياسى جاقىن ارادا مەملەكەتتىك 20 - قۇرىلتايىن اشىپ، كەلەر ساتىداعى جۇڭگونىڭ دامۋ جوباسىن جاپپاي كەسكىندەيدى. حالىقارالىق جاعداي مەيلى قالاي وزگەرسىن، جۇڭگو جاق باستان - اياق بەيبىت دامۋعا، اشىق دامۋعا، سەلبەسە دامۋعا، بىرگە دامۋعا تاباندى بولادى، شاڭحاي سەلبەستىك ۇيىمىن ديپلوماتيادا الدىمەن ويلاساتىن بەتالىس رەتىندە قارايدى، ءوزىنىڭ دامۋى ارقىلى وڭىردەگى ەلدەردىڭ دامۋىنا دەم بەرىپ، ءار ەل حالقىن اناعۇرلىم كوپ قۇت - ىرىسقا كەنەلتۋدى قالايدى.
ۋاڭ ي جوعارىداعى قيمىلدارعا قاتىناستى.
