شي جينپيڭ ورتالىق پارتيا مەكتەبىنىڭ (مەملەكەتتىك اكىمشىلىك شۋەيۋانى) ورتا جاس، جاس كادرلار كۋرسىنىڭ وقۋ باستاۋ سالتىندا ماڭىزدى ءسوز سويلەپ، بىلاي دەپ باسا دارىپتەدى
مۇرات - سەنىم نەگىزىن بەكەمدەپ، دۇرىس ناتيجە كوزقاراسىن ورناتىپ، امالياتتا ايگىلەپ، جاڭا ءداۋىردىڭ جاڭا جورىعىندا وكىنىشسىز كۇرەس ىزدەرىن قالدىرۋ كەرەك
ۋاڭ حۋنيڭ قاتىناستى
3 - ايدىڭ 1 - كۇنى 2022 - جىلعى كوكتەمگى وقۋ ماۋسىمىنداعى ورتالىق پارتيا مەكتەبىنىڭ (مەملەكەتتىك اكىمشىلىك شۋەيۋانى) ورتا جاس، جاس كادرلار كۋرسى ورتالىق پارتيا مەكتەبىندە وقۋ باستادى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ وقۋ باستاۋ سالتىندا ماڭىزدى ءسوز سويلەدى.
□سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن
شينحۋا اگەنتتىگىنىڭ 3 - ايدىڭ 1 - كۇنى بەيجيڭنەن بەرگەن حابارى. 2022 - جىلعى كوكتەمگى وقۋ ماۋسىمىنداعى ورتالىق پارتيا مەكتەبىنىڭ (مەملەكەتتىك اكىمشىلىك شۋەيۋانى) ورتا جاس، جاس كادرلار كۋرسى 3 - ايدىڭ 1 - كۇنى تۇستەن بۇرىن ورتالىق پارتيا مەكتەبىندە وقۋ باستادى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ وقۋ باستاۋ سالتىندا ماڭىزدى ءسوز سويلەپ، بىلاي دەپ باسا دارىپتەدى: جاس كادرلار پارتيا مەن مەملەكەت ىستەرى دامۋىنىڭ ءۇمىتى، ءسوز جوق، مۇرات - سەنىم نەگىزىن بەكەمدەپ، شىرىكتەسۋدەن اۋلاق بولۋ، ازعىنداۋدان ساقتانۋ قورعانىس شەبىن مىقتاپ ساقتاپ، دۇرىس ناتيجە كوزقاراسىن ورناتىپ جانە امالياتتا ايگىلەپ، ەرەن قابىلەت شىڭداپ، جاۋاپكەرشىلىك ارقالاۋ جانە كۇرەس جاساۋ رۋحىن ساۋلەلەندىرىپ، پارتيانىڭ بۇقارالىق لۋشيانىن دايەكتىلەندىرىپ، پارتياعا ادال بولاتىن ساياسي قاسيەت جەتىلدىرىپ، حالىقتىڭ ءۇمىتىن اقتايتىن وتباسى - وتان سۇيىسپەنشىلىگىن ورناتىپ، وسكەلەڭ دە كىرشىكسىز يدەيالىق دەڭگەيگە ۇمتىلىپ، پارتيا مەن حالىق ىستەرى جولىندا ايانباي ۇلەس قوسىپ، جاڭا ءداۋىردىڭ جاڭا ساپارىندا وكىنىشسىز كۇرەس ىزدەرىن قالدىرۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت شۋجيچۋىنىڭ شۋجيى ۋاڭ حۋنيڭ وقۋ باستاۋ سالتىنا قاتىناستى.
شي جينپيڭ بىلاي دەپ باسا دارىپتەدى: مۇرات - سەنىم پارتيا قۇرۋدىڭ، پارتيانى كوركەيتۋدىڭ نەگىزى ءارى پارتيالى كادرلاردىڭ تابان تىرەپ تۇرۋىنىڭ تياناعى. جاس كادرلار جاقسى ءىزباسار بولۋ ءۇشىن ەڭ ماڭىزدىسى، ماركسيزم سەنىمىنە تاباندى بولىپ، كوممۋنيزم ۇلى مۇراتى مەن جۇڭگوشا سوتسياليزم ورتاق مۇراتى جولىندا كۇرەس جۇرگىزۋدىڭ جاقسى ءىزباسارى بولۋ كەرەك. پارتيالى كادرلار دارقان پەيىلدە، اسقاق مۇراتتا بولىپ، اۋەلگى ماقساتتى، بورىشتى ۇمىتپاي، ءومىر مۇراتىن پارتيا مەن حالىق ىستەرىنە توعىستىرىپ، حالىقتىڭ باقىتى جولىندا كۇرەس جاساۋدى ءوزىنىڭ ەڭ زور باقىتى ساناعاندا عانا، قاستەرلى دە ءماندى ومىرگە يە بولادى. مۇرات - سەنىمدى بەكەمدەۋدە، ءسوز جوق، الدىمەن تانۋ، ونان كەيىن سەنۋ، سەنگەننەن كەيىن ارەكەتتەنۋ كەرەك. مۇرات - سەنىمدى بەكەمدەۋ ءبىر مەزەتتىك ءىس ەمەس، قايتا ومىرلىك ءىس، ۇنەمى جەتىلىپ، ۇنەمى شىڭدالىپ، ءاردايىم ءتۇسىنىپ، ءاردايىم ىلگەرىلەپ، مەيلى ءتيىمدى جاعداي، الدە ءتيىمسىز جاعدايدا بولسىن، قاجىماس تاباندىلىق كورسەتىپ، سان وتكەلەكتىڭ سىنىنان سۇرىنبەي ءوتۋ كەرەك.
شي جينپيڭ بىلاي دەپ اتاپ كورسەتتى: جاس كادرلار، ءسوز جوق، پاكتىك − قۇت، ءناپسى − جۇت دەيتىن قاعيدانى ەستە بەرىك ساقتاپ، پارتيانىڭ نازارياسىمەن جانە لۋشيان، باعىت - ساياساتتارىمەن ۇنەمى سالىستىرىپ، پارتيا ۋستاۆىمەن، پارتيا ەرەجەسىمەن، پارتيا تارتىبىمەن ۇنەمى سالىستىرىپ، اۋەلگى ماقساتپەن، بورىشپەن ۇنەمى سالىستىرىپ، كەيبىر ىستەردى ىستەۋ كەرەك پە، جوق پا؟ ىستەۋگە بولا ما، جوق پا دەگەنگە كوز جەتكىزىپ، قاي - قاشان دا ءوزىن قادىرلەپ، ءوزىن باعامداپ، تارتىپكە، زاڭعا، قاعيداعا قاتاڭ بويسۇنۋ كەرەك. شىرىكتەسۋدەن اۋلاق بولۋ، ازعىنداۋدان ساقتانۋ قورعانىس شەبىن ساقتاۋدا، ەڭ ماڭىزدىسى، شىن نيەتتەن اينىماۋ، كىشكەنە ىستەردەن، ەلەۋسىز بۋىنداردان باستاپ ۇستاپ، كوڭىلگە تۋراشىلدىق ۇيالاتىپ، ىزگىلىك ۇستانىپ، احىلاقتى، بايىپتى بولىپ، ”يدەياداعى شاڭ - توزاڭدى“ ۇنەمى قاعىپ، ”ءناپسىنىڭ زيانىن“ كوبىرەك ءبىلىپ، بوگدە نيەتتە بولماۋ ارقىلى بەتالدى قيمىل جاساماۋعا كەپىلدىك ەتۋ كەرەك.
شي جينپيڭ بىلاي دەپ باسا دارىپتەدى: كادرلار شىرىكتەسۋدەن اۋلاق بولۋ، ازعىنداۋدان ساقتانۋ قورعانىس شەبىن ساقتاۋدا، بەكەمدەۋدە ساتىلار بويىنشا شەپ قۇرۋ، بارلىق جەردە شەپ قۇرۋ كەرەك. ساياسي وتكەلدى ساقتاۋدا تۋى ايقىن تۇردە ساياسيدى دارىپتەۋ سىندى وسى ارقاۋدى قاي - قاشان دا مىقتاپ شيراتىپ، ۇلكەن دۇرىس، ۇلكەن بۇرىس الدىندا ساياسي پرينسيپ ماسەلەلەرىندە وي - ساناسى ەرەكشە سەرگەك ۇستاپ، تۇرعىسى ەرەكشە بەرىك بولۋ، استە ەكىبەتكەيلىك ىستەمەۋ، ەكىبەتكەي بولماۋ، استە پارتيا پرينسيبىن ساۋداعا سالماۋ كەرەك. بيلىك وتكەلىن ساقتاۋدا، ءسوز جوق، ۇقىقتان يمەنۋ سەزىمىن باستان - اياق ساقتاپ، بيلىكتى ءادىل ىستەتۋگە، بيلىكتى زاڭ بويىنشا ىستەتۋگە، بيلىكتى حالىق ءۇشىن ىستەتۋگە، بيلىكتى پاك ىستەتۋگە تاباندى بولۋ كەرەك. قارىم - قاتىناس وتكەلىن قاتاڭ يگەرۋ كەرەك، قارىم - قاتىناستا، ءسوز جوق، پرينسيپ، قاعيدا بولۋ، قوعامدىق قارىم - قاتىناس شەڭبەرىن، تۇرمىس شەڭبەرىن، دوستار شەڭبەرىن ۇزدىكسىز كىرشىكسىزدەندىرۋ كەرەك. تۇرمىس وتكەلىن قاتاڭ يگەرۋدە اقاۋسىز اۋەستى جەتىلدىرىپ، قاراپايىم تۇرمىس ۇستانىپ، كوممۋنيستەردىڭ قاسيەتىن ساقتاۋ كەرەك. سۇيىسپەنشىلىك وتكەلىن قاتاڭ يگەرۋدە وتباسى تاربيەسىن، وتباسى ستيلىن قاتايتۋ، ءارى ءوزى ونەگە كورسەتۋ، ءارى تۋىس - تۋعاندارىن، بالا - شاعالارىن قاتاڭ قاداعالاۋ، ۇنەمى باسقارۋ كەرەك.
شي جينپيڭ بىلاي دەپ اتاپ كورسەتتى: دۇرىس ناتيجە كوزقاراسىن ورناتۋدا جانە امالياتتا ايگىلەۋدە پارتيالىلىق شەشۋشى رول اتقارادى. پارتيالىلىق بەرىك بولىپ، جات نيەت، بوتەن ويدان اۋلاق بولعاندا عانا، ناتيجە كوزقاراسىندا اۋىتقۋشىلىق بولماۋعا كەپىلدىك ەتۋگە بولادى. كوممۋنيستەر حالىقتى باقىتقا كەنەلتۋ ەڭ ۇلكەن ناتيجە ەكەندىگىن، ءسوز جوق، ەستە بەرىك ساقتاۋ كەرەك. ءبىز قىزمەتتى جوسپارلاپ ىلگەرىلەتۋدە، ءسوز جوق، بۇكىل ىنتا - پەيىلمەن حالىق ءۇشىن قىزمەت ىستەۋ ءتۇبىرلى باس ماقساتىنا تاباندى بولىپ، حالىقتى وزەك ەتكەن دامۋ يدەياسىنا تاباندى بولىپ، دامۋ حالىق ءۇشىن بولۋعا، دامۋدا حالىققا سۇيەنۋگە، دامۋ جەتىستىگىنەن حالىقتى يگىلىكتەندىرۋگە تاباندى بولىپ، يگى ىستەردى، ناقتى ىستەردى بۇقارا رازى بولاتىنداي ەتىپ ىستەۋىمىز كەرەك. نەنىڭ يگى ءىس، ناقتى ءىس ەكەندىگىن بۇقارانىڭ ءتول قاجەتىمەن باعامداۋ كەرەك، سۋبيەكتيۆتىك دولبار جاساۋعا بولمايدى، قاراپايىمداستىرۋعا، سىڭار جاقتىلاندىرۋعا بولمايدى. حالىقتىڭ قاجەتى قاي جەردە بولسا، سول جەردە يگى ءىس، ناقتى ءىس تىندىرۋعا، سول جەردە ناتيجە جاراتۋعا بولادى. ناتيجەنىڭ جاقسى بولۋ - بولماۋىندا بۇقارانىڭ ءىس جۇزىندىك سەزىنۋىنە قاراۋ كەرەك، ونى بۇقارا باعالاۋ كەرەك. كەيبىر ءىستىڭ يگى ءىس، ناقتى ءىس بولعان - بولماعاندىعىن تۇجىرىمداۋدا تەك بۇقارانىڭ كوز الداعى قاجەتىنە قاراۋعا بولمايدى، قايتا زاردابى بار - جوقتىعىنا، ”ءبىر ماسەلەنىڭ شەشىلۋى 10 وكىنىش قالدىردى ما، جوق پا“ دەگەنگە قاراۋ كەرەك.
شي جينپيڭ بىلاي دەپ باسا دارىپتەدى: ەكىنشى 100 جىلدىق كۇرەس نىساناسىن جۇزەگە اسىرۋدا ءبىز پارتيانىڭ نەگىزگى لۋشيانىنا تاباندى بولۋىمىز، ەكونوميكالىق قۇرىلىستى وزەك ەتۋگە تاباندى بولۋىمىز كەرەك، الايدا جاڭا جاعدايداعى دامۋدا جاڭا اياق كيىم كيىپ، كونە سۇردەك جولمەن جۇرۋگە بولمايدى، ءسوز جوق، جاڭا دامۋ ۇستانىمىن تولىق، دالمە - ءدال، جاپپاي دايەكتىلەندىرىپ، جاڭا دامۋ ارناسىن جەدەل قالىپتاستىرىپ، جوعارى ساپالى دامۋدى ىلگەرىلەتۋ كەرەك. ناتيجە اتاۋلى ىستەۋدەن كەلەدى، شىنايى ىستەگەندە عانا، شىنايى ناتيجە شىعارۋعا، ناقتى ناتيجە شىعارۋعا بولادى. جاڭا جاعداي، جاڭا مىندەت الدىندا، پارتيالى كادرلار، ءسوز جوق، شىنايى يگەرىپ، ناقتى ىستەپ، ەسەلى ەڭبەك قوسىپ، ناقتى شارا شىعارىپ، ناقتى ونىمدىلىككە تالپىنىپ، ءىستى باسىنان - اياعىنا دەيىن ناتيجەلى ىستەۋ، ۇران ۇلگىسىندە، ەمەۋرىن ءبىلدىرۋ ۇلگىسىندە، جىلتىراتىپ كورسەتۋ ۇلگىسىندە تياناقتاندىرۋ ءادىسىن باتىل تيۋ كەرەك. كەزەك كۇتتىرمەيتىن ءىس جونىندە ايتقانىن تاباندا ورىنداپ، ۋاقىتتى مىقتى ۇستاپ جەدەل ءبىتىرۋ كەرەك، سىلبىر، سالاق بولۋعا بولمايدى. ۇزاق ۋاقىتتىق مىندەت جونىندە ستراتەگيالىق تاباندىلىق پەن ۇستامدىلىقتى ساقتاپ، جوبانى سوڭىنا دەيىن ورىنداۋعا تاباندى بولىپ، قاجىماس تاباندىلىق كورسەتۋ، ۇزبەي قۇلشىنۋ كەرەك. دالمە - ءدال ويلاۋدى كۇشەيتىپ، جوسپار جاساعاندا كەلەلى جاعدايدى ءبىر تۇتاس مەڭگەرۋ، ىستەۋ بارىسىندا شوگەل، جۇيەلى بولۋ، قىزمەتتى شەبەرلىكپەن تىڭعىلىقتى، تياناقتى ىستەۋ كەرەك.
شي جينپيڭ بىلاي دەپ اتاپ كورسەتتى: جاس كادرلار باسشىلىق قىزمەتتىڭ ۇددەسىنەن شىعۋ ءۇشىن يگەرۋگە ءتيىستى قابىلەت وتە كوپ. ەڭ ءتۇبىرلى قابىلەت نازاريالىق جەتىلىم. ماركسيزمدىك تۇرعى، كوزقاراس، ءادىس قىزمەتتى جاقسى ىستەۋدەگى وزگەشە قابىلەت، ءبىزدىڭ دۇنيەنى تانۋىمىزعا، دۇنيەنى وزگەرتۋىمىزگە جەتەكشىلىك ەتەتىن قۋاتتى يدەيالىق قارۋ. پارتيالى كادرلار، ءسوز جوق، نازاريا ۇيرەنۋدى كۇشەيتىپ، نازاريالىق نەگىزدى نىعايتىپ، سانالى تۇردە جاڭا داۋىردەگى پارتيانىڭ جاسامپاز نازارياسىن قولدانىپ جاڭا جاعدايدى باقىلاپ، جاڭا احۋالدى زەرتتەپ، جاڭا ماسەلەلەردى شەشىپ، قىزمەتتەردى دۇرىس بەتالىسقا قاراي، وبيەكتيۆ زاڭدىلىق بويىنشا ىلگەرىلەتۋ كەرەك. نازاريانى امالياتپەن ۇشتاستىرۋعا تاباندى بولىپ، اماليات بارىسىندا شىنايى ءبىلىم ۇيرەنۋگە، اقيقاتتى تۇسىنۋگە ءمان بەرىپ، شىڭدالۋدى كۇشەيتۋ، قابىلەتتى ارتتىرۋ كەرەك. شەشۋشى ءتۇيىن كىشى پەيىلدىلىكپەن زەيىن قويىپ، ”وقۋشى“ بولۋعا پەيىل بولىپ، بىلمەگەندەرىن سۇراۋ، تومەندەگىلەردەن ۇيرەنۋگە ارلانباۋ، سۋبيەكتيۆ ويجوتالىقتان، بىلمەگەنىن بىلەرمەنسۋدەن مۇلدە اۋلاق بولۋ كەرەك.
شي جينپيڭ بىلاي دەپ باسا دارىپتەدى: بۇكىل پارتيا جاۋاپكەرشىلىك ارقالاۋ مەن كۇرەس جاساۋ رۋحىن ۇزدىكسىز اسقاقتاتقاندا عانا، جۇڭحۋا ۇلتىنىڭ ۇلى گۇلدەنۋى سىندى ايبىندى نىسانانى جۇزەگە اسىرا الادى. جاۋاپكەرشىلىك ارقالاۋ مەن كۇرەس جاساۋ ءبىر ءتۇرلى رۋح، قالتقىسىز مىنەز - قۇلىق پەن قايىسپاس ەرلىك - جىگەر توتەنشە قاجەتتى. قالتقىسىزدار قايىسپايدى، قايىسپايتىندار عانا جاۋاپكەرشىلىك ارقالاي الادى، كۇرەس جۇرگىزە الادى. جاۋاپكەرشىلىك ارقالاۋ مەن كۇرەس جاساۋ ءبىر ءتۇرلى جاۋاپكەرشىلىك، جاۋاپكەرشىلىك ارقالاۋعا باتىل بولعاندا عانا، شىنايى جاۋاپكەرشىلىك ارقالاۋعا، شىنايى كۇرەس جاساۋعا بولادى. پارتيالى كادرلار، اسىرەسە، باسشى كادرلار تاريحي ىرىقتىلىق رۋحىن اسقاقتاتىپ، وراي الدىندا ىرىقتىلىقپەن اتويلاپ، ءارى - ءسارى بولماۋ، جالتاقتاماۋ؛ قيىندىققا قاسقايا قارسى اتتانىپ، جالتارىپ شىعا بەرمەۋ، تايساقتاماۋ؛ حاۋىپ - قاتەرگە بەلسەندىلىكپەن توتەپ بەرىپ، قورعالاقتاماۋ، قاشقالاقتاماۋ كەرەك. جاۋاپكەرشىلىك ارقالاۋ مەن كۇرەس جاساۋ ءبىر ءتۇرلى جۇيە، ءىشىنارالىق جاعدايدى جالپى جاعدايعا بويسۇندىرۋعا، سانالى تۇردە كەلەلى جاعداي ءۇشىن جاۋاپكەرشىلىك ارقالاۋعا تاباندى بولۋ اناعۇرلىم قىمباتتى. ”مەملەكەتتىڭ زور ءىسىن“ كوكەيدە ساقتاپ، جالپى جاعداي جانە ستراتەگيا تۇرعىسىندا تۇرىپ ماسەلەگە وي جۇگىرتۋ، ءىس ىستەۋ، بارلىق قىزمەتتە پارتيا ورتالىق كوميتەتىنىڭ شەشىمدەرىن، ورنالاستىرۋلارىن دايەكتىلەندىرۋدى، تياناقتاندىرۋدى العى شارت ەتۋ كەرەك، ءىشىنارالىق مۇددە ءۇشىن جالپىلىق مۇددەگە زيان جەتكىزۋگە، ۋاقىتتىق مۇددە ءۇشىن ءتۇبىرلى مۇددە مەن ۇزاق ۋاقىتتىق مۇددەگە زيان جەتكىزۋگە بولمايدى.
شي جينپيڭ بىلاي دەپ اتاپ كورسەتتى: وسى جىلداردا ءبىز كوپتەگەن جاڭا تاريحي ەرەكشەلىكتەرگە يە ۇلى كۇرەستەردى جۇرگىزۋگە، ءسوز جوق، دايىندالۋدى باسا دارىپتەدىك، وسىنداي يدەيالىق دايىندىق بولعاندىقتان دا ءبىز ءبىر قىدىرۋ حاۋىپ - قاتەرلەرگە، سىناقتارعا بايسالدىلىقپەن توتەپ بەرە الدىق. سان - ساناقسىز فاكتتەر بىزگە تەك تار جولدا كەزدەسكەندە باتىر جەڭەدى دەيتىن جىگەردە بولىپ، كۇرەس جاساۋعا باتىل بولعاندا، كۇرەس جاساۋعا شەبەر بولعاندا عانا، ءبىزدىڭ بەدەلگە يە بولىپ، ىرىقتىلىققا يە بولىپ، مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن شىنايى قورعاي الاتىندىعىمىزدى ءتۇسىندىردى. جاس كادرلار، ءسوز جوق، قاسقايا العا شىعىپ، اتويلاپ الدا ءجۇرىپ، كۇرەس بارىسىندا بوران - شاشىندى باستان وتكىزۋ، ىستىق - سۋىقتى باستان كەشىرۋ كەرەك.
شي جينپيڭ بىلاي دەپ باسا دارىپتەدى: پارتيا 18 - قۇرىلتايىنان بەرى ءبىز ىركەس - تىركەس ءبىر قىدىرۋ شوعىرلى ۇيرەنۋ تاربيەلەرىن ورىستەتتىك، مۇنداعى ماڭىزدى ماقسات − بۇكىل پارتيانى جۇڭگو كوممۋنيستىك پارتياسى دەگەن نە؟ نە ىستەيدى دەگەن ءتۇبىرلى ماسەلەنى ەستە بەرىك ساقتاپ، پارتيانىڭ حالىقپەن ەتەنە بايلانىسىن باستان - اياق ساقتاۋعا تاربيەلەۋ، جەتەكتەۋ ءۇشىن بولىپ تابىلادى. پارتيانىڭ بۇقارالىق لۋشيانىن دايەكتىلەندىرۋدە، ەڭ اۋەلى، بۇقاراعا سۇيىسپەنشىلىكتە بولىپ، ءوزىن شىن مانىندە بۇقارانىڭ ءبىر مۇشەسىمىن دەپ ەسەپتەۋ، بۇقارانىڭ ءىسىن ءوز ءىسىم دەپ ىستەۋ كەرەك. جاڭا جاعدايداعى بۇقارالىق قىزمەتتىڭ ەرەكشەلىگى مەن زاڭدىلىعىنا ىشكەرىلەي زەرتتەۋ جۇرگىزىپ جانە ونى دۇرىس يگەرىپ، بۇقارالىق قىزمەت ءادىسىن جاقسارتۋ، بۇقارالىق قىزمەت ورەسىن جوعارىلاتۋ كەرەك. ارىز - ارمان الدىمىزعا كەلگەن بۇقارالىق قىزمەت، ارىز - ارمان ارناسى ارقىلى بۇقارانىڭ ءۇمىت - تىلەگى مەن ارمان - تالابىن ناقتاپ ۇعىسىپ، قىزمەتتەگى پارىقتار مەن ولقىلىقتاردى تاۋىپ، ءبىرى ارقىلى وزگەسىن تۇسپالداپ، ىشكەرىلەي جاقسارتىپ، بۇقاراعا اناعۇرلىم ويداعىداي قىزمەت وتەۋ كەرەك. باسشى كادرلار ينتەرنەت بىلىمدەرىن ۇيرەنىپ، ينتەرنەتتى ءتۇسىنىپ، ينتەرنەتتەن پايدالانىپ، بۇقارانىڭ ويلاعانىن، ارمان - تىلەگىن ۇعىسىپ، جاقسى ويلاردى، جاقسى ۇسىنىستاردى جيناپ، ينتەرنەت قولدانۋشىلاردىڭ كوڭىل بولگەن ىستەرىنە بەلسەندىلىكپەن جاۋاپ قاتۋ كەرەك. جاڭا كاسىپ كۇيىنىڭ دامۋىنا ايرىقشا ءمان بەرىپ، ينتەرنەت جەلىسى مەن ينتەرنەت جەلىسىنەن تىسقارىنى ۇشتاستىرۋعا تاباندى بولىپ، جاڭادان جۇمىستانعان شوعىردى يدەيالىق جاقتان جەتەكتەۋ جانە ۇيىستىرۋ، قىزمەت وتەۋ قىزمەتىن جاقسى ىستەۋ كەرەك.
چىن شي وقۋ باستاۋ سالتىن باسقاردى، ول مىنالاردى ءبىلدىردى: باس شۋجي شي جينپيڭنىڭ ماڭىزدى سوزىندە جاس كادرلارعا دەگەن ىقىلاستى ءۇمىت قامتىلىپ، قالىڭ جاس كادرلاردىڭ اقاۋسىز ەسەيۋىنە ايقىن قۇلشىنۋ بەتالىسىن كورسەتتى، ىشكەرىلەي ۇيرەنىپ، ءتۇسىنىپ، شىن مانىندە كوڭىلگە ۇيالاتۋ، ارەكەتتە ايگىلەۋ؛ شي جينپيڭ جاڭا ءداۋىر جۇڭگوشا سوتسياليزم يدەياسىن ىشكەرىلەي جەتە يگەرىپ، جەتە ءتۇسىنىپ، شىنايى تياناقتاندىرىپ، ”ەكىنى تۇراقتاندىرۋدىڭ“ شەشۋشى ماڭىزىن تەرەڭ ءتۇسىنىپ، ”ەكىنى قورعاۋدى“ باتىل ورىنداۋدىڭ وسكەلەڭ سانالىلىعىنا شىنايى اينالدىرىپ، جاڭا جورىقتا ەكپىندەي ىلگەرىلەۋدىڭ، جاڭا داۋىردە ەسە قوسۋدىڭ قۋاتتى قوزعاۋشى كۇشىنە اينالدىرىپ، بار پەيىلىن سالا قاجىرلىلىقپەن ىستەپ، قايسارلىقپەن العا ىلگەرىلەپ، پارتيا 20 - قۇرىلتايىنىڭ جەڭىسپەن اشىلۋىن ءىس جۇزىندىك ارەكەتتەرىمەن قارسى الۋ كەرەك.
ديڭ شۋەشياڭ، حۋاڭ كۇنميڭ وقۋ باستاۋ سالتىنا قاتىناستى.
2022 - جىلعى كوكتەمگى وقۋ ماۋسىمىنداعى ورتالىق پارتيا مەكتەبىنىڭ (اكىمشىلىك شۋەيۋانى) ورتا جاس، جاس كادرلار كۋرسىنىڭ كۋرسانتتارى وقۋ باستاۋ سالتىنا قاتىناستى، ورتالىقتىڭ قاتىستى تاراۋلارىنداعى جاۋاپتى جولداستار وقۋ باستاۋ سالتىنا سىرتتاي قاتىناستى.
